गलाती 5 - जिरेलख्रीष्टकी खित्सादु परमेश्वर नियम अधीनला देता माफाबो 1 ख्रीष्टकी खाबाते कामगी खित्सादु ङुरूङगी परमेश्वर नियम अधीनला देता माफाबो। ङुरूङगी गोमाबा खिन ओताच्योक नोमुङ खिता माफाबो। बात थोक ईन्देकी था ख्योकोनगी खुरा मुथुप्च्येते खुर्बु खुरा छोलाच्योक खाला परमेश्वरगी यहूदीओनला बिन्दाते नियम ङेन्ला थेरू खि साबा साबा खिता माछोल। 2 दि बात लेमु खाला नामज्योक सेत्ला ङेन। ङा पावल ख्योकोनला च्यि सिते सासीन ख्योकोनगी थे नियमला साबाते ङेन्गीन जीउला खतकी चिनु जोसुङ सासीन ख्रीष्टकी खाबाते काम ख्योकोन लाईदु छ्याःङ काम लै मिक्किओ। 3 ङा थोरूम च्यि सिते सासीन थे खतकी चिनु जोकान्ते मिकीचेन परमेश्वर नियमला खि साबाते जति दोक्पोईओङ मोतोङा खाला गाङे खि साबा साबा च्योकराङ खिता फाप्क्यो। 4 परमेश्वर नियम ङेन्सीन परमेश्वरगी खेराङला दोषी मेन सिओ सिन विचार खित्कान ख्योकोननी ख्रीष्टताङ ठाल्गीन सिन्दाते मि ईन। थोगी परमेश्वरगी ख्योकोनला दया खाला लेमु खिता मुथुबो। 5 ङुरूङनी परमेश्वर नियम ङेन्देकी मेन्गीन येशू ख्रीष्टला विश्वास खाबेकीका परमेश्वरगी दाक्पोनला दोषी मेन सिन साबाते ईन सिन पत्ते खिओ। परमेश्वर आत्मा ङेता ओतेकी था तिरी परमेश्वरगी दाक्पोनला पक्काराङ दोषी मेन सिओ सिन ङुरूङ आश खाला गुलाराङ देत्क्यो। 6 च्यिला सासीन येशू ख्रीष्टताङ जीउज्यीकराङ ओङाते मिओनगी खतकी चिनु जोसीनोङ माजोसीनोङ छ्याःङ फरक परे मिक्किओ। छ्येते बातचेन थेबेकी येशू ख्रीष्टला विश्वास खाला ज्येनतेबालाङ ङिङज्ये खिकाना मिक्किका सिरच्येतेकामा ईन। 7 ख्योकोननी आउदी लेमु खालाका सत्यते बात ङेन्गीन ओतान। थोस्यिककामा खाला मेङगो सिन ख्योकोनला सुई ङ्ये च्युत्सुङा? थोक्ते मि बात ङेन्ला ख्योकोन च्यिला सत्यते बात ङेन्दा तोङा छोल्गीते? 8 स्यीम्बु स्यीम्बु बात खिन ख्योकोनला ल्वा छोल्कान्ते होथे मिओनला थोक खि सिन खेराङला थे खोरोङ दोन्दु स्योक सिन कातोङकान्ते परमेश्वरगी साबाते मेन। 9 सोडा टिक्पीस्यिकराङ लुक्सीनोङ ज्येन्ताक गाङेपा ठाम्ग्यो सिन च्यि ख्योकोनला छ्या मेत? 10 जे ईन्सीनोङ ङाराङगी प्रभु येशू ख्रीष्ट लाक पूरो खाईन भर परे खाबा ओतेकी ख्योकोनगी गोमा ङेन्दाते सत्यते बात ङेन्दा ताङला ज्येन बात ङेन्ग्यो सिराच्योक ङाला बान्दा मालाङदुक। खोपरोङगी खि साबाच्योक खिता फाप्क्यो साला ख्योकोनला अलमल्ल लोङकान्ते मि जोराङ ईन्सीनोङ ङीमाई थे गोःनामा परमेश्वर सजाय फाप्क्यो। 11 थेमे आज्यो न्वावे, गा लाङच्येते बात लोप्जीन ङेङ यहूदीओनगी जीउला ज्वा फाप्च्येते खतकी चिनु ज्वापराङ फाप्क्यो सिन थोरूमसाक लोप्कीन ओता ईन्सीन थरिङसाकराङ यहूदीओनगी च्यिला ङाला खेदा खाला खाला दुक्पा तेरगीका ओना? ङेङ थेबेकी साबा च्योकराङ खित्च्येते ईन्दा ईन्सीन येशू ख्रीष्ट स्यिङगी थामला टाँए खाईन स्याप्की खित्सादुकामा परमेश्वरगी मिला दोषी मेन सिओ सिन ङे लोप्कीन ओताते बातकीते थेबा सुङगीङ दोक खाला विरोध खित्च्याराङ मेतान। 12 ख्योकोनला खतकी चिनु ज्वा फाप्क्यो सिन उल्के खित्कान्ते मिओनगीनी बरू खोपरोङगी खोपरोङलाराङ रोबो खसी ज्वापच्योक खासीन लेमु ओङच्या ओतान। परमेश्वर आत्मे अधीनला देत्कानताङ दाक्पोन खुशी खित्कान बात 13 आज्यो न्वावे, ख्योकोन थे खोरोङ नियम अधीनला देता माफाप्स्यीत सिन परमेश्वरगी ख्योकोनला थे खोरोङ दोन्दु स्योक सिन काताङाते ईन। दोक सिरजीनमेईराङ थोक ईन्सीन थानी जे खासीनोङ ओङच्याक्वा सिन खेराङ सेमला लाबा लाबा माकेत। बरू ख्योकोनगी दाक्पोन नाङ ङिङज्ये खितरीङ खिन दोक्पोईकी ज्येनज्यीकला लेमु खि। 14 च्यिला सासीन “दाक्पोन ज्यानला माया खिता च्योकराङ ज्येनलाङ ङिङज्ये खि,” सिन साबाते होदि नियमज्यीक ङेन्नामेई परमेश्वर नियम गाङे ङेन्दाते ईन। 15 दोक्पोईकी ज्येनज्यीकला ङिङज्ये खिता साटोला ख्योकोन किताङ फाक्पा ठेताच्योक खिन देत्सीन च्याङबो खि याङ। ख्योकोन खेराङ खेराङराङ स्यिरीङ खिता फाबोङ। 16 था ङा ख्योकोनला च्यि खि सिते सासीन परमेश्वर आत्मेकी खित ज्युता चाला च्योकराङ खि। दोक खासीन ख्योकोनगी खेराङ सेमला जे जे खिता सेम लाङगीदुक थे थेराङ खिता माफाबो। 17 दाक्पोन खुशीला ख्याम्कान्ते मिकी परमेश्वर आत्मेकी खित ज्युता चालाच्योक खिता मोछोलो। थोकराङ खाला परमेश्वर आत्मेकी खित ज्युता चालाच्योक खित्कान्ते मिकीचेन दाक्पोन सेमला लाबा लाबा खिता मोछोलो। दोक खाला परमेश्वर आत्मेकी खित ज्युत्च्येते कामताङ दाक्पोन खुशीला ख्याम्च्येते बात डिकराङ मिडिगो। दाक्पोन खुशीला माख्याम्स्यीत सिन परमेश्वर आत्मेकी ख्योकोनला थे खोरोङगी खि साबाच्योक खित ज्युता छोल्ग्यो। 18 ख्योकोनगी परमेश्वर आत्मेकी खित ज्युता चालाच्योक खासीन परमेश्वर नियम अधीनला देता माफाबो। 19 दाक्पोन खुशीला ख्याम्कान्ते मिकी चुक चुक खिते सिन ङुरूङ गाङेला लेमु खाला छ्याराङ ओत। थोक्ते मिकीचेन रन्डीबाजी थेमे होदि च्योक्ते खिता मेङच्येते ङोचा लाङच्येते काम खिओ, 20 ल्हा लुला माने खिओ थेमे स्युत्च्या फुत्च्याताङ मन्तर तन्तर खिओ। थेकी ज्येनला ङिङमार खिओ, थोम्मु जीङगा खिओ, डार खिओ, पालोईला स्येदाङ फुङ पुङगो, दाक्पोनकामा छ्ये ओङा छोल्ग्यो, डिक्ला थुन्ला देता माचाल्ला फाटो ओङच्येते कामकामा खिओ 21 थेमे मि जाला लोभ खिओ। दोस्यिककामा मेन, थे छ्याङ रक्सीकी जिला ख्याम्ग्यो, ज्येनताङ रूला भक्कुचूर सोला थुला मोज मज्जा खिओ थेमे होदोक्ते ज्येन ज्येन कामोङ खिओ। होदोक दोक खिन देत्कान्ते मि सुङ तिरी परमेश्वर राज्यने स्यूक्पा मेङेदो सिन ङे ख्योकोनला गोमाकाङ लेमु खाईन साबा ओत, लोक्ला थरिङोङ थोकराङ सिओ। 22 परमेश्वर आत्मेकी खित ज्युता चालाच्योक खित्कान्ते मिलाचेन थेकी फलफूल गोन ज्युताच्योक खाला लेमु कामताङ बात खित ज्युत्क्यो। थोगी थोक्ते मिकीचेन ज्येनला ङिङज्ये खिओ, थे गा खिन देत्क्यो थेमे सेमदु ढुक्क खाला देत्क्यो। थोक्ते मि होत्ताराङ स्येदाङ मिक्किओ, थेकी ज्येनला दया खिओ थेमे लेमु खिओ, थेकी खिओ साबा च्योकराङ खिओ, 23 थे गाङेताङ खा छ्येत लेमु खाला देत्क्यो थेमे थेकी दाक्पोन सेम काबूला ज्य्वाबा थुप्क्यो। होदोक दोक खिता मेङगो सिनचेन परमेश्वर नियमला खापाङ साबा मेत। 24 येशू ख्रीष्टताङ जीउज्यीकराङ ओङाते मिओनगीचेन थानामेई थोक मिक्किओ सिन दाक्पोन खुशीला ख्याम्च्येते बानी येशू ख्रीष्ट टाँए खाईन स्याप्ते स्यिङगी थामला टाँए खाईन सिन्दा ओत। थोक खाईन दाक्पोन खुशीला ख्याम्च्येते बानी ताङगीन सिन्दा ओतेकी था थेबेकी दाक्पोनला च्यि च्यि खिता सेम लाङगीका थोकराङ खिता माफाबो। 25 परमेश्वर आत्मेकी ङुरूङला लेमु खिता थुप्कान जोबा ओतेकी ङुरूङगी काम बात जेङ थेकी खित ज्युता चाला च्योकराङ खिता फाप्क्यो। 26 ङुरूङगी दाक्पोन नाङ ङा ङाराङ ईन सिराच्योक खिता मेङगो। दोक खासीन दाक्पोन नाङ मिडिक्च्येतेताङ आरिस्ये खित्च्येते बातकामा ओङगो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.