गलाती 4 - जिरेल1 दि बात लेमु खाला खोबा थुप्स्यीत सिन था ङा दि बादोङ खितामीन। चुक सासीन सुइँदा धनीते मि फुज्युङगी तिरी आबातेते ओताते जति जेसुकै ङेत्च्येते ईन्सीनोङ उमेर माछाङथुप आबाते सम्पत्तिला थेते छ्याःङ हक लै मिक्किओ। थेङ थेरू खाम्बादु काम खित्कान्ते मि छेतराङ ईन। 2 आबातेकी साबा छेत उमेर माछाङथुप थेकी थे खोरोङला दोक खि, थोक माकेत सिन कोत्कान्ते मि थेमे थे खाम्बे सम्पत्ति ताकान्ते मि अधीनला देता फाप्क्यो। 3 होथोक्ते धनीते मि फुज्युङगी थे खोरोङ उमेर माछाङथुप ज्येनगी अधीनला देता फापा च्योकराङ दाक्पोनगी बात लेमु खाईन छ्या मास्येथुप गोमा ङुरूङोङ दि सा लुङबादु थाङबोमेई चले खिन वाबाते रीतिथिति माने माक्याबाला ओङराङ मेङगो सिराच्योक खाला थे रीतिथितिओन माने खिन ओतान। 4 तर परमेश्वरगी गोमा तोके खाबाते समय छाङनामेकीचेन थेकी थे खोरोङ फुज्युङला देमा ताङा ओतान। थेमे परमेश्वर फुज्युङ ङुरूङ च्योकराङ मि जुनी लाकीन केबा ओतान। थेमे यहूदी ईन्देकी थेङ परमेश्वर नियम अधीनला देता ओतान। 5 परमेश्वर नियम अधीनला देत्कान्ते तर थेरू खि साबा साबाच्योक खिता मुथुप्कान्ते मिओन था थे नियम अधीनला देता माफाप्स्यीत सिन परमेश्वरगी थे खोरोङ फुज्युङला देमा ताङा ओतान। दोक खाईन थेकी ङुरूङला थे खोरोङ धर्म-पुत्र जोकीन थे फुज्युङ फुमुकी ङेत्च्येते जति गाङे ङेत्च्येते अधिकार बिन्सुङ। 6 दोक खाईन ख्योकोन थे खोरोङ फुज्युङ फुमुराङ ओङा ओतेकी परमेश्वरगी ख्योकोनला थे खोरोङ फुज्युङ आत्मा बिन्सुङ। ङुरूङ सेमगी नाङ ओताते थे आत्मे छ्य्वापेकीराङ परमेश्वरला ङुरूङ दाक आबा सिन सिओ। 7 दोक ओङनामेकी गोमा सुइँदे खाम्बादु काम खित्कान्ते दाक्पोनते छ्याःङ हक मेताते मि छेतराङ ईन्दाते ख्योकोन गाङेराङ थाचेन परमेश्वर फुज्युङ फुमु ओङा ओत। थेमे परमेश्वरगी थे खोरोङ फुज्युङ फुमुला तेरच्येतेबरी ख्योकोनगी ङेत्च्या ओङा ओत। गलातियादु येशू ख्रीष्ट मिओन लाईदु पावलगी पीर खाबाते 8 गोमाबा परमेश्वरला छ्या स्येबा मेते बेलाला ख्योकोन दुक्पा खाला खाला ल्हा लुला माने खिन ओतान। थोक खाला थेजीन ख्योकोन थेबाला माने माक्याबाला ओङराङ मेङगो सिराच्योक खाला ल्हा लु माने खिन ओतान। थेबानी ल्हा ईनराङ मेन। 9 थाचेन ख्योकोनगी परमेश्वर सु ईन्दे, चुक्ते ईन्दे सिन लेमु खाईन छ्या स्येबा ओत। ख्योकोनगी थेला छ्या स्येबाते ईन सिरा भन्दाङ बरू परमेश्वर थे खोरोङगीराङका ख्योकोनला थे खोरोङ सु ईन्दे, चुक्ते ईन्दे सिन छ्या स्ये च्युत्कीन बिन्दाते ईन सिरा डिगीतासीन। बात दोक ईन्गीन ईन्गीनोङ परमेश्वरला माने खिता ताङगीन ख्योकोनगी चुक खाईन थाङबोमेई चले खिन वाबाते रीतिथिति लोक्ला माने खिताला स्यूबे? थोक खाला छ्याःङ फाइदा मेत्सीनोङ ख्योकोन च्यिला याङराङ स्याप स्याप खाला थे रीतिथिति माने खिता छोल्गीते? 10 चुक सासीन ख्योकोनचेन दि दिनगी छोमु दोक खिता फाप्क्यो थोक खिता मेङगो सिरच्येते, औंसी पूर्णे माने खित्च्येते, खुदुक खुदुक चाडबाड माने खित्च्येते थेमे दि लोला दोक खिता ओङगो, थोक खिता मेङगो सिन सिरच्येते खिदुक। 11 ख्योकोनगी दोक दोक खाबा थोङजीन ङे दुक्पा खाईन खाईन ख्योकोन नाङ खाबाते काम छ्याःङ काम लै मिक्किच्या ईन्दा च्यिन्दा सिन ङाला आउदी पीर लाङगीदुक। 12 ओर्च्ये आज्यो न्वावे, ख्योकोनगीङ ङे च्योकराङ खि। ख्योकोनताङ ङ्योम्बु देत्जीन यहूदी ईन्गीनोङ ङे चुक खाबा ओताने सिन ठेम्बा खि। थातासाक ख्योकोनगी ङे सेमला फोक्च्येते काम छ्याःङ खाबा मेत। 13 चुक सासीन ङाराङ नाबा ओतेकी खित्सादु ङे गोमे पालोला ख्योकोन ओत्सापा वाकीन गा लाङच्येते बात लाप्कीन बिन्दा ओतान सिन ख्योकोनगी टोक ज्येता मेतासीन। 14 थेजीन ङा थोक खाईन नाबा ओत्सीनोङ ख्योकोनगी ङाला छ्यि चुक मेलेबा खाईन नाला दुका सिराच्योक माक्यासुङ, ङिङमारोङ माक्यासुङ। बरू ख्योकोनगीनी खेराङ दोन्दु परमेश्वर दूत वाबा च्योकराङ खाईन ङाला लेमु खाबा ओतान। दूत छेतकामा मेन, येशू ख्रीष्ट थे खोरोङराङ ख्योकोन ओत्सादु वाबा छेत खाईन ङाला मान खाबा ओतान। 15 थे बेलाला ख्योकोन आउदी खुशी ओतान। थेमे थरिङोला ख्योकोनला च्यि ओङसुङा? खिता थुप्च्येते काम ईन्दा ईन्सीन ख्योकोनगी थेजीन ङे लाईदु खेराङ मिक समेदोङ थेन्ला तेरच्या ओतान। 16 च्यि ख्योकोनला था ङा ख्योकोनताङ मिडिक्कान्ते मि ईन सिराच्योक लाङगीदुक? थोक ईन्सीनका ङे ख्योकोनला सत्यते बात लापेकीराङ दोक ओङासीन। 17 ख्योकोनगी दि बात छ्या स्येबा खि। च्यि सासीन स्यीम्बु स्यीम्बु बात खाला ख्योकोनला मान खित्कान्ते होथे मिओनगी ख्योकोनला लेमु ओङस्यीत सिन थोक खित्च्येते मेन। ख्योकोन ङे छ्य्वापेकी ठाल्ला थेबे बात ङेन्स्यीत थेमे खोपरोङला मान खित्स्यीत सिनकामा थेबेकी थोक खित्च्येते ईन। 18 ईन्दाका बात लेमु ईन्सीन ख्योकोनगी ज्येनगी बात ङेन्ला थेबालाङ ङा ख्योकोनताङ ङ्योम्बु ओत्जीन ङाला च्योकराङ खाला मान खिता लेमु ईन। ङा ङ्योम्बु ओत्सीनोङ मेत्सीनोङ दोक खिता जहिलेङ लेमु ईन। 19 ङे ङिङज्येते फिजावे, सुत्केरी बेथा ग्यापाते फेम्मे मिला च्योकराङ ङाला आउदी दुक्पा ओङा ओत। च्यिला सासीन ख्रीष्टकीकामा ख्योकोनला थे खोरोङ च्योकराङ लेमु ज्वा थुप्क्यो सिन ख्योकोन थेला सेमदुकीराङ भर परे खित्कान मागालथुप ङा रकस्यिकोङ ढुक्क खाईन देता थुपा मेत। 20 ङालानी थाल्लाराङ ख्योकोनताङ ठेत्कीन बात खिता ङेत्सीन चुक लेमु ओङच्या ओताने सिराच्योक लाङगीदुक। दोक खिता ङेत्सीन ख्योकोनला झन लेमु खाला बात खिता ङेत्च्या ओतान। ख्योकोनला चुक चुक सिन बात खित्च्ये सिन ङानी अलमल्ल परे खाईन सिन्सुङ। हागारताङ सारे छ्य्वापेई च्यि बात छ्या स्येकीते 21 ख्योकोनला परमेश्वर नियमला खि साबा साबा ङेन्ला थे नियम अधीनला देता सेम लाङगीदुक मेन ओना? थोक ईन्सीन ख्योकोनगी ङाला दि बातज्यीक सिते ओना। च्यि ख्योकोनगी थे नियमला साबाते बात गाङे लेमु खाईन खोबा ओत? 22 थे नियमला बातज्यीक दोक सिन टिबा ओत। च्यि सासीन अब्राहामते फुज्युङ ङि ओतान। दोक्पोईचेन योङमुते हागार छ्य्वापेकी केबा ओतान। ज्येनतेचेन फेम्मेते सारे छ्य्वापेकी केबा ओतान। 23 योङमु छ्य्वापे फुज्युङचेन परमेश्वरगी ओङगो सिन साबेकी केबा मेतान। तर फेम्मेते छ्य्वापेतेचेन परमेश्वरगी “था खुई फेम्मेकी फुज्युङज्यीक केइओ,” सिन सानामेई केबा ओतान। 24 दि बातकीते खुदुक खुदुक अर्थ ओत। थे फेम्मे मि मेरा ङिकी बातकी छ्य्वापेई ङुरूङगी परमेश्वरताङ मिओन फारगी नाङ थरी ङि बात ओत सिन छ्या स्येबा थुप्क्यो। च्यि सासीन योङमु हागार बातताङ डिक्च्येते थरीज्यीक बातचेन सीनै बोमदुकी शुरू ओङाते ईन। होथे बोमदुराङ परमेश्वरगी यहूदीओनला थे खोरोङ नियम बिन्दा ओतान। दोक खाईन थेबा थे नियम अधीनला देता फाप्कीन योक्पो योङमु च्योकराङ ओङसुङ। 25 दि हागार साबातेचेन थरिङोला अरबदु ओताते सीनै बोम ईन। थरिङोले बातराङ खिइ सासीनचेन हागार बातताङ यहूदीओन छ्येते सार यरूशलेम बात डिगो। च्यिला सासीन परमेश्वर नियम ङेन्दा फाप्क्यो सिन थे नियम अधीनला देतेकी यरूशलेम मिओन छ्ये टेक्टे गाङेराङ योक्पो योङमु च्योकराङ ईन। 26 तर ज्येनज्यीक यरूशलेमोङ ओत। थेचेन दुरू यरूशलेम च्योक मेन्देकी स्वर्गनेते ईन। थेरूचेन योक्पो योङमु च्योक खाला परमेश्वर नियम अधीनला देत्च्येते बात छ्याःङ मेत। ङुरूङचेन दुरू यरूशलेम सारगी मि मेन्देकी स्वर्गने यरूशलेम सारगी मि ईन। 27 स्वर्गने यरूशलेम बात खिन परमेश्वर बातला चुक सिन टिबा ओते सासीन “फिजाज्यीगोङ मेकेकान्ते थारीमा खो गा खि। फिजे सुक देक्जीन चुक ओङगीते सिन छ्याराङ स्येबा मेताते खो आउदी खाला गा खि। च्यिला सासीन ख्योबो ओत्कान्तेते भन्दा खो च्यिकराङ देत्कान्तेतेका फिजा काल्बेई ओङगो,” सिन टिबा ओत। 28 थेमे आज्यो न्वावे, ख्योकोनोङ इसहाक च्योकराङ ईन। च्यिला सासीन परमेश्वरगी अब्राहामला ङा खुईते फुज्युङज्यीक ओङ ज्युत्क्यो सानामेकी अब्राहाम फेम्मे सारेकी इसहाक केबा च्योकराङ थेकी ख्योकोनलाङ थे खोरोङ सन्तान जोइओ सिन साबेकी ख्योकोन थे फुज्युङ फुमु ओङाते ईन। 29 ईन्दाका गोमाङ परमेश्वरगी ओङगो सिन मासाबालाराङ केबाते योङमु फुज्युङगी परमेश्वर थे खोरोङ आत्मे शक्तिकी ओङ च्युताते फुज्युङ इसहाकला दुक्पा बिन्दा ओतान। थेजीन थोक ओङा च्योकराङ थरिङोलाचेन परमेश्वर नियम अधीनला देता फाप्क्यो सिरकान्ते मिओनगी परमेश्वर फुज्युङ फुमुला दुक्पा तेरग्यो। 30 इसहाकला थोक खानामेई च्यि ओङा ओताने सिन परमेश्वर बातला चुक साला दुका सासीन “योङमुताङ थे फुज्युङला तेन्ला थोङ। थेकी सारे फुज्युङगी ङेत्च्येते आबाते सम्पत्ति छ्याःङ मेङेदो,” सिन टिला दुक। 31 बात दोक दोक ईन्देकी आज्यो न्वावे, ङुरूङचेन सारे फुज्युङ च्योक्ते ईन, योङमु फुज्युङ च्योक्ते मेन सिन लेमु खाला छ्या स्येबा फाप्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.