गलाती 3 - जिरेलपरमेश्वरगी चुक्ते मिला दोषी मेन सिते 1 गलातिये मिवे, ख्योकोन च्यिला लेम्बे काम खिता छोल्गीते? ख्योकोनला सुई च्यि कुल्गीन लै खाईन दोक गाल्सुङा? येशू ख्रीष्टला स्यिङगी थामला टाँए खाईन सेताते बात ङे ख्योकोनला लेमु खाईन खोबा खाईन बिन्दा ओतान मेन? 2 लो ख्योकोनगी ङाला दि बातज्यीककामा सिते ओना। ख्योकोनगी परमेश्वर आत्मा ङेताते चुक खाईन ईन्दे? परमेश्वर नियमला खि साबाते ङेन्गीन ईन्दाना ख्योकोनला लापाते बात ङेन्गीन येशू ख्रीष्टला विश्वास खाईन ईन्दे? 3 ख्योकोन दोक लेम्बा च्योक खित्च्या च्यि ख्योकोनगी गाङे बात टोक ज्येत्कीन सिन्सुङ? परमेश्वर आत्मेकी खेराङ नाङ शुरू खाबाते काम थाचेन ख्योकोन चुक खाला खेराङगीराङ खिता थुप्क्यो सिराच्योक खिते? 4 थोक ईन्सीन ख्योकोनगी दोक खाईन थातासाक दुक्पा भोगे खाबाते थाराङ ईन ओना? दोकनी पक्काराङ मेन। 5 थेमे परमेश्वरगी ख्योकोनला थे खोरोङ आत्मा तेरगीन देत्च्येते थेमे ख्योकोन नाङ अचम्ब अचम्बते काम खित्च्येते ख्योकोनगी परमेश्वर नियमला खि साबाते ङेन्देकी खित्सादु ईन्दाना खेराङला लापाते बात ङेन्गीन येशू ख्रीष्टला विश्वास खिन ओतेकी ईन्दे? 6 अब्राहाम बातराङ विचार खिना। “अब्राहामगीचेन परमेश्वरगी थे खोरोङताङ जमान खाबा च्योकराङ खिओ सिन थेला विश्वास खाबा ओतान। थोक खाबेकी खित्सादु परमेश्वरगी थेला दोषी मेन साबा ओतान।” 7 बात दोक ईन्देकी चुक्ते मिला अब्राहाम सन्तान सिरच्या ईन्दाका सिन ख्योकोनगी लेमु खाला छ्या स्येबा खि। अब्राहामगी च्योक खाला जो जसकी परमेश्वरगी खिओ साबा च्योकराङ खिओ सिन थेला विश्वास खिदुक होथोक्ते मिचेन अब्राहाम सन्तान ईन। 8 ज्येन ज्येन जातकी मिलाङ तिरी थेबेकी थे खोरोङला विश्वास खितेकी खित्सादु परमेश्वरगी थेबाला दोषी मेन सिओ सिन गोमाकाराङ परमेश्वर बातला टिबा ओतान। दोक ओङगो सिरच्येते गा लाङच्येते बात खाईन परमेश्वरगी अब्राहामला “खुई छ्य्वापेकीराङ लुङबा लुङबे मिकी आशी ङेत्क्यो,” सिन साबा ओतान। 9 थोगी अब्राहामगी च्योकराङ खाला थेला विश्वास खित्कान्ते मि गाङेला परमेश्वरगी अब्राहामला च्योकराङ खाला आशी तेरग्यो। 10 परमेश्वर नियम ङेन्सीन परमेश्वरगी खोपरोङला दोषी मेन सिओ सिन विचार खित्कान्ते मिलाचेन गाङेला थेकी सराप बिन्ला सजाय तेरग्यो। च्यिला सासीन परमेश्वर नियमला चुक साबा ओते सासीन “नियमला खि साबाते दोक्पोईओङ मोतोङा खाला गाङे साबा साबा च्योकराङ खिन मादेत्सीन थोक्ते मिला परमेश्वरगी सराप बिन्ला सजाय तेरग्यो,” सिन टिबा ओत। 11 परमेश्वर नियमला खि साबाते ङेन्लाचेन सुङलाङ परमेश्वरगी दोषी मेन मिसिरो। च्यिला सासीन परमेश्वर बातला चुक सिन टिबा ओते सासीन “थे खोरोङला विश्वास खित्कान्ते मिला परमेश्वरगी दोषी मेन सिओ। थेमे थोक्ते मिकी नोमुङ मिसिन्च्येते जुनी ङेत्क्यो,” सिन साबा ओत। 12 थे खोरोङला विश्वास खाबेकी खित्सादुकामा परमेश्वरगी मिओनला दोषी मेन सिओ सिरच्येते बात परमेश्वर नियमला छ्याःङ टिबाराङ मेत। थेरूनी खालि “नियमला खि साबाते गाङे साबा साबा च्योकराङ खित्कान्ते मिकीकामा नोमुङ मिसिन्च्येते जुनी ङेत्क्यो,” सिन टिबा ओत। 13 तर ख्रीष्टकीचेन परमेश्वर नियमला तोके खाबाते परमेश्वरगी ङुरूङला सराप बिन्ला तेरच्येते सजाय थे खोरोङगीराङ भोगे खाईन स्यिइन ङुरूङला थे सजायदुकी टाल्सुङ। दोक खाईन ङुरूङ साटोला परमेश्वरगी थेला सराप बिन्गीन सजाय बिन्दाते ईन सिन परमेश्वर बातला “स्यिङगी थामला टाँए खाबाते मिचेन परमेश्वर सराप लै खाईन सजाय ङेत्कीन स्याप्ते ईन,” सिन टिबा ओत। 14 ज्येन ज्येन जातकी मिकीङ परमेश्वरगी अब्राहामला तेरग्यो साबाते आशी ङेत्स्यीत थेमे थेला विश्वास खित्कान्ते मि ङुरूङ गाङेकी परमेश्वरगी तेरग्यो साबाते थे खोरोङ आत्मा ङेत्स्यीत सिन येशू ख्रीष्ट थोक खाईन परमेश्वरगी ङुरूङला सराप बिन्ला तेरच्येते सजाय छ्य्वापेई डेलाला स्याप्ते ईन। परमेश्वरगी खाबाते जमानताङ परमेश्वर नियम बात 15 आज्यो न्वावे, था ङुरूङ दि बातज्यीक विचार खाला तेइ। सुइँदा मिकी था थे खोरोङ बात नोमुङ खुदुक मोजोओ सिन सही छाप खाईन सुइँदाला खइँदा च्वासुङ सासीन तिरी थेकी थोक खाबाते मेन सिन नोमुङ सिरा मेङेदो। 16 परमेश्वरगी जमान खाबाते बादोङ होदोजोराङ ईन। परमेश्वरगी थेत्ताङ थे सन्तानला आशी तेरग्यो सिन अब्राहामताङ जमान खाबाते बात परमेश्वर बातला तासुङ सासीन थेरू थेकी अब्राहाम सन्तान काल्बेईकी बात खाबाच्योक खाईन खोत्ताङ खुई सन्तानओनला सिन साबा मिन्दुक। बरू मिज्यीगी बात खिन खुई सन्तानला सिन टिला दुक। अब्राहाम सन्तान सिन मेराज्यीगी बातकामा खाबाते थे सन्तानचेन ख्रीष्टराङ ईन। 17 बात च्यि सासीन परमेश्वरगी अब्राहामताङ जमान खानामेई लो सय स्यीताङ खालज्यीकताङ च्युताम्बा तिरीकामा यहूदीओनला थे खोरोङ नियम बिन्दा ओतान। थे नियम बिन्दा ईन्सीनोङ थेकी गोमाका जस्तो खिओ सिन जमान खाबा ओतान थोकराङ खिओ। थेकी जमान खाबा च्योकराङ मिक्किच्या ईन्दा ईन्सीन थेकी आशी तेरग्यो सिन साबाते बात बातकामा ओङच्या ओतान। 18 परमेश्वरगी थे खोरोङ नियम बिन्गीन थे नियम ङेन्सीनकामा आशी तेरग्यो साबा ईन्दा ईन्सीन गोमा थेकी जमान खाबाते बात छ्याःङ काम लै खित्च्या मेतान। तर थेकीनी थे खोरोङ दयेकीकामा अब्राहामला आशी तेरग्यो सिन जमान खाबा ओतान। 19 थोक ईन्सीन परमेश्वरगी थे खोरोङ नियम च्यिला बिन्ताका ओना सिरच्येते बादोङ थेन्ग्यो। थे नियमचेन पाप खित्च्या सिराते च्यि ईन्दे थेमे चुक खिता मेङते सिन छ्या स्येस्यीत सिन टिक्पी दिनगी लाईदुकामा बिन्दा ओतान। थे खोरोङगी आशी तेरग्यो सिन अब्राहामताङ जमान खाबाते अब्राहाम सन्तान ओङ ओङसाकलाकामा सिन थे नियम बिन्दा ओतान। यहूदीओनला ङेन सि सिन थे नियमचेन परमेश्वरगी थे खोरोङ दूतओन लाःकनापेकी मिज्यीकला बिन्दा ओतान। 20 अब्राहामताङ जमान खित्जीनचेन परमेश्वरला दोक खित्कान्ते ज्येन मि गोबा मेतान। ङा खोत्ताङ खुई सन्तानला आशी तेरग्यो सिन परमेश्वर थे खोरोङगीराङ साबा ओतान। 21 दोक ईन्सीन च्यि थे नियमचेन परमेश्वरगी आशी तेरग्यो सिन खाबाते जमान बातताङ बान्दा मिडिक्च्येते ईन ओना? मेन मेन, दोक पक्काराङ मेन। मिओनगी नोमुङ मिसिन्च्येते जुनी ङेत्स्यीत सिन परमेश्वरगी थे नियम बिन्दा मेतान। थोक ईन्दा ईन्सीन थे नियमला खि साबाते ङेन्कान्तेबाला थेकी दोषी मेन सिरच्या ओतान। 22 बरू बात चुक सासीन सा लुङबा खाङगी मि गाङेराङ परमेश्वर नियम माङेन्ला पापकामा खित्च्येते बानी थ्वाबाते ईन सिन परमेश्वर बातला साबा ओत। थोक ईन्देकी थेकी जमान खाईन तेरग्यो साबाते आशीचेन परमेश्वरगी येशू ख्रीष्टला विश्वास खित्कान्ते मिओनलाकामा तेरग्यो सिरच्येते बात पत्ते खित्कान्ते मिओनला तेरग्यो। 23 ईन्दाका येशू ख्रीष्टला विश्वास खित्च्येते समय मावाथुप ङुरूङ दोक खि थोक माकेत, दोक दोक माक्यासीन सजाय ङेत्क्यो सिरच्येते परमेश्वर नियम अधीनला देता फापा ओतान। दोक खाईन येशू ख्रीष्टला विश्वास खित्च्येते मौका माङेतथुप जेलला लुक्पाते मि स्योरा मुथुप्स्यीत सिन पुलिस ज्याक्पाच्योक खाईन ङुरूङ थे नियम अधीनला देता फापा ओतान। 24 ख्रीष्ट मावाथुप परमेश्वर नियमचेन ङुरूङ लाईदु दोक खि, थोक माकेत सिन फिजाओनला कोत्कान्ते मि च्योककामा ओतान। तर ख्रीष्ट वाकीन थेला विश्वास खानामेईचेन परमेश्वरगी ङुरूङला दोषी मेन सिन साबा ओत। 25 दोक खाईन ङुरूङगी ख्रीष्टला विश्वास खित्च्येते मौका ङेता ओतेकी था ङुरूङ परमेश्वर नियम अधीनला मेत। येशू ख्रीष्टकी खित्सादु परमेश्वर फुज्युङ फुमु ओङा थुपाते बात 26 येशू ख्रीष्टला विश्वास खाबेकी खित्सादु था ख्योकोन गाङेराङ परमेश्वर फुज्युङ फुमु ओङाते ईन। 27 चुक खाईन सासीन छ्युला लुक्ला बप्तिस्मा तेरजीन ख्योकोन गाङेराङ ख्रीष्टताङ जीउज्यीकराङ ओङाते ईन। दोक ईन्देकी ख्योकोनगी ख्रीष्टकी खित ज्युत्च्येतेकामा खिता सेम खित्च्येते ईन। 28 थोगी येशू ख्रीष्टताङ जीउज्यीकराङ ओङा ओतेकी यहूदी ईन्स्यीत कि ग्रीक ईन्स्यीत, योक्पो योङमु ईन्स्यीत कि ज्येन ईन्स्यीत, ख्योओ मि फेम्मे मि जोराङ ईन्सीनोङ था ख्योकोन गाङेराङ थोजोराङ ईन। 29 दोस्यिककामा मेन, ख्योकोन ख्रीष्टताङ जीउज्यीकराङ ओङा ओतेकी ख्योकोनोङ अब्राहाम सन्तानराङ ओङगीन परमेश्वरगी थेत्ताङ थे सन्तानला तेरग्यो साबाते आशी ख्योकोनगीङ ङेत्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.