गलाती 2 - जिरेलयेशू ख्रीष्टकी खटे खाबातेबेकी पावललाङ खोपरोङ छेतराङ ईन साबाते 1 थेमे लो च्युप्स्यी तिरीकामा ङा लोक्ला यरूशलेमने गालाप। थेजीन ङात्ताङ बारनाबासोङ ओतान। थे बेलाला तीतसलाङ ङे ङ्योम्बु खेरा ओतान। 2 परमेश्वरगीराङ ङाला थेने ग्युक सिन साबेकी ङे थेने गाल्गीन येशू ख्रीष्ट मिओनगी छ्येते मि ईन साबाते मिओनताङ ठेता खाबाप। थेबाताङकामा ठेत्कीन ङाराङगी ज्येन ज्येन जातकी मिला गा लाङच्येते बात लोप्जीन चुक चुक सिन लोप्कीते सिन ङे थेबाला गाङे साबाप। ङाराङगी लोप्कीन ओताते बातला खइँदा बात ठाल्दुक सिता ना खइँदा बात मायाङसुङ साला ङाराङगी दुक्पा खाईन खाईन खाबाते थेमे खिन ओताते काम थाराङ खेरोला मोन्डोस्यीत सिनराङ ङे थेबाताङ थोक खाईन बात खाबाप। 3 दि गाङे बात सानामेकीङ ङे ङ्योम्बुराङ खेराते तीतस ग्रीक ईन्सीनोङ परमेश्वरगी यहूदीओनला बिन्दाते नियमला साबाच्योक खाला तीतसकीङ जीउला खतकी चिनु ज्वा फाप्क्यो सिन थेबा सुङगीङ मासासुङ। 4 ईन्दाका येशू ख्रीष्टला विश्वास खित्कान्ते ईन सिरकान तर थोक मेन्दाते कोई कोई मि ङ्योकोन बात खित्सादु माबा ईन्सीन थे खतकी चिनु जोच्येते बादोङ थेन्च्याराङ मेतान। येशू ख्रीष्टताङ जीउज्यीकराङ ओङगीन ङ्योकोनगी परमेश्वरगी ङेराङ यहूदीओनला बिन्दाते होथे नियम ङेन्दा ताङा ओताते बात छ्या स्येबा ओत्कीन ङ्योकोनगी चुक चुक खित्च्या ईन्दाका सिन चिवा खिताला होथेबाचेन सुङगीङ स्योक मासाबाला थाराङ थेरू वाबा ओतान। थेरू खइँदा बात जिन्दा थुप्सीन लोक्ला ङ्योकोनला होथे नियमतेबा गाङे ङेन्दाराङ फाप्क्यो सिराला थेबा थोक खाईन थेरू वाबा ओतान। 5 थेबेकी थोक खिता चाल्सीनोङ ङ्योकोनगी थेबे बातला कि फेनजोङ माने माक्या। थेबे बात ङेन्दा ईन्सीन ख्योकोनगी ङेन्दाते गा लाङच्येते बात दाक खुदुक डोच्या ओतान। 6 येशू ख्रीष्ट मिओनगी छ्येते मि ईन साबाते होथे मिओनगीचेन ङे लोप्कीन ओताते बातकी लाक्तु ज्येनोङ दोक दोक सिन लोप सिन सुङगीङ छ्याःङ मासासुङ। ईन्दानी थेबा गोमामेकी छ्ये टेक्टे जस्तो मि ईन्सीनोङ दोक्ते बात ङाला छ्याःङ मेन सिराच्योक लाङगीदुक। परमेश्वरगी मि छ्येत ताला काम मिक्किओ। 7 ङाला दोक दोक खि सिन छ्याःङ मिसिरा खाईन बरू थेबेकी यहूदीओन नाङ गा लाङच्येते बात लोप्च्येते जिम्मा पत्रुसला बिन्दा ओता च्योकराङ ज्येन ज्येन जातकी मि नाङ दि काम खित्च्येते जिम्माचेन परमेश्वरगी ङाला बिन्दा ओताक्वा सिन छ्या स्येसुङ। 8 च्यिला सासीन पत्रुस यहूदी नाङ काम खिताला येशू ख्रीष्टकी खटे खाबाते मि ईन्देकी परमेश्वरगी पत्रुस छ्य्वापेकी यहूदीओन नाङ काम खाबा च्योकराङ ङाचेन ज्येन ज्येन नाङ काम खिताला येशू ख्रीष्टकी खटे खाबाते मि ईन्देकी परमेश्वरगी ङे छ्य्वापेकी ज्येन ज्येन जातकी मि नाङ काम खासुङ। 9 परमेश्वरगी ङाला दया खाईन दि काम खित्च्येते जिम्मा बिन्दाते दुका सिन छ्या स्येनामेकी होथे छ्येते मिओन नाङ गाङे भन्दा छ्येतेबा ईन सिन साबाते याकूब, पत्रुस थेमे यूहन्नेकी ङाङ खोपरोङ छेतराङ ईन साकीन बारनाबासताङ ङाला ङुरूङ गाङेराङ डिक्ला काम खिइ सिन सिदुक। दोक खित्जीनराङ बारनाबासताङ ङा ज्येन ज्येन जातकी मिला थेमे थेबाचेन यहूदीओनला गा लाङच्येते बात लोप्की सिरच्येते बातला थेबा डिक्सुङ। 10 येशू ख्रीष्टला विश्वास खित्कान्ते दुक्पा ङेताते थेरू यहूदीओनला ङ्योकोनगी मद्धत खिता लेमु ईन सिन बातज्यीकचेन थेजीन थेबेकी ङ्योकोनला साबा ओतान। दुक्पा ङेतातेबाला ता फाप्क्यो सिन ङा ङाराङतेङ सेम ओतान। पावलगी पत्रुसला बातज्यीकला थापाते 11 थेमे तिरी पत्रुस एन्टिओखियापा वाबा ओतान। थेकी गल्ती खाबेकी ङीमाई ङे थेला आउदी खाईन थापाप। 12 बात चुक ओङा ओताने सासीन थेरू वानामेकी गोमा थेकी येशू ख्रीष्टला विश्वास खित्कान्ते ज्येन ज्येन जातकी मित्ताङ ङ्योम्बुराङ रूला साप सेइन ओतान। टिक्पी तिरी याकूब मिओन नाङ कोई कोई थेरू वादुक। जीउला खतकी चिनु माजोबाला ओङराङ मेङगो सिन सिरकान्ते होथे यहूदीओन वानामेकीचेन ज्येन ज्येन जातकी मित्ताङ साप सा थोङसीन होथेबेकी च्यि सिताना सिन ज्यीबा खाईन पत्रुस ठाल्गीन खुदुकराङ साप साप्ला स्यूसुङ। 13 थेकी थोक खानामेई ज्येन ज्येन जातकी मित्ताङ थोक खाला ठाल्च्येते ठीक मेन सिन छ्या ओत्कीन ओत्कीनोङ थेङला ओताते येशू ख्रीष्टला विश्वास खित्कान्ते ज्येन यहूदीओनगीङ पत्रुसताङ डिगीन थेकी च्योकराङ खिताला स्यूसुङ। थेबा गाङेकी थोक खाबा थोङनामेईनी ङेङ थोकराङ खिता फाप्क्यो सिराच्योक खाईन बारनाबासोङ थे छ्य्वापाराङका लै खासुङ। 14 थेबेकी थोक खाबाते काम गा लाङच्येते बातताङ डिकराङ मिडिक्च्येते ईन्देकी थेरू गाङे ङोन्दुराङ ङे पत्रुसला चुक साबे सासीन “खोरोङ यहूदी ईन्सीनोङ परमेश्वरगी ङुरूङ यहूदीओनला बिन्दाते नियम ङेन्दा ताङगीन ज्येन ज्येन जातकी मित्ताङ डिक्पा ओतान सासीन था खो याङराङ चुक खाला ज्येन ज्येन जातकी मिकीङ होथे नियम ङेन्दा फाप्क्यो सिराच्योक खिते? 15 ईन्दाका ङुरूङ यहूदी ईन्देकी होथे नियम मेङेन्कान्ते ज्येन ज्येन जातकी मि च्योक पापी मेन। 16 यहूदी ईन्सीनोङ परमेश्वर नियमला खि साबाते ङेन्ला सुङलाङ परमेश्वरगी दोषी मेन सिरच्येते मेन, खालि येशू ख्रीष्टला विश्वास खित्कान्ते मिओनलाकामा थेकी दोषी मेन सिओ सिन ङुरूङगी लेमु खाईन छ्या स्येबा ओत। थोगी ङुरूङोङ परमेश्वर नियम ङेन्नामेई थेकी दाक्पोनला दोषी मेन सिओ सिन मिसिरो। बरू येशू ख्रीष्टकी खाबाते कामगी खित्सादुका थेकी ङुरूङला दोषी मेन सिओ सिन ङुरूङगी येशू ख्रीष्टला विश्वास खाबाते ईन। च्यिला सासीन परमेश्वर नियमला खि साबाते ङेन्लानी सुङ परमेश्वर दोन्दु गल्ती मिक्किकान्ते मि ओङाराङ मुथुबो। 17 दोक खाला येशू ख्रीष्टकी खित्सादुकामा परमेश्वरगी ङुरूङलाङ दोषी मेन सिओ सिन थेकी ङुरूङ यहूदीओनला बिन्दाते नियम ङेन्दा ताङनामेई थे नियम मेङेन्कान्ते ज्येन ज्येन जातकी मि च्योकराङ पापी ओङच्या ओङसुङ। थोक ईन्सीन च्यि येशू ख्रीष्ट ङुरूङला पाप खित ज्युत्कान्तेका ईन ओना? पक्काराङ मेन। 18 बात च्यि सासीन होथे नियम था नोमुङ ङेन्दा माफाबो सिन ङेन्दा ताङनामेकीङ ङे याङराङ थे नियमराङ ङेन्दाला स्यूसीन ङानी थे नियम ङ्ये ज्युत्कान्ते मिका ओङगो। 19 परमेश्वर नियम मेङेन्कान्ते मि सजाय ङेत्ला स्यिइओ साबा ओतेकी थेरू तोके खाबाते सजाय ङेत्ला ङा स्या फाप्च्या ओङा ओतान। थोक खाईन ङा थे नियम लाईदु स्याप छेतराङ ओङा ओतान। थोगी थाचेन ङा परमेश्वरगी खि साबा साबाच्योक खिता थुप्क्यो। 20 चुक खाईन सासीन ख्रीष्टला स्यिङगी थामला टाँए खाला सेत्जीन ङाङ थेत्ताङराङ थे थामला टाँए खाईन स्याप्ते ईन। ङा थोक खाईन स्याप ईन्सीनोङ थोरूमसाक सोम्बोराङ ओत। ङाराङ सोम्बो ओत्सीनोङ थरिङोला ङे जे खिदुक थे ङे खित्च्येते मेन, ख्रीष्ट ङे सेमगी नाङ ओतेकी ङे च्यि च्यि खिका गाङे थेकीराङ खित ज्युत्च्येते ईन। मास्यिथुप था ङा परमेश्वर फुज्युङला विश्वास खिन देत्ला थेकी खित ज्युता चाला च्योककामा खिन देत्क्यो। थेकी ङाला ङिङज्ये खाईन ङे लाईदु थे खोरोङ ज्यानराङ बिन्गीन स्या ओतान। 21 परमेश्वरगी ख्रीष्टकी छ्य्वापेकी मिओनला दया खाबाते काम ङा छ्याःङ काम लै मिक्किओ सिराच्योक मिक्किओ। परमेश्वर नियमला खि साबाते ङेन्देकी परमेश्वरगी ङाला दोषी मेन सिरच्येते ईन्दा ईन्सीन ख्रीष्ट बिनसित्तिला स्यापच्योक ओङच्या ओतान,” सिन साबाप। |
© 1992 Wycliffe Bible Translators Inc. All rights reserved.
Wycliffe Bible Translators, Inc.