गलाती 1 - जिरेल1 दि चिट्ठी टिक्कान्ते ङा पावल ईन। ङा येशू ख्रीष्टकी खटे खाबाते मि ईन। ङाला खटे खाबाते मिकीङ मेन थेमे येशू ख्रीष्टकी खटे खाबाते मिकी खित्च्येते काम खिताला मिकी ताङातेङ मेन। येशू ख्रीष्ट थेमे थेला स्यिसादुकी सोम्बो लोक्कान्ते आबा परमेश्वरगीराङ ङाला खटे खाबाते ईन। 2 गलातिये अञ्चलदु ठाउँ ठाउँला जम्मा ओङकान्ते येशू ख्रीष्ट मि ख्योकोन गाङेला ङा दि चिट्ठी टिगीन ओत। दुरू ङात्ताङ ओताते आज्यो न्वाओनतेङ ख्योकोनला नमस्ते ओत्लो। 3 ङुरूङ आबा परमेश्वरताङ प्रभु येशू ख्रीष्टकी ख्योकोनला दया खाला लेमु खिनराङ देत्स्यीत। 4 दि कलि जुग मिओनगी च्योक मेलेबा कामताङ बात खित्च्ये छ्य्वापेई ङुरूङ ठाल्स्यीत सिन प्रभु येशू ख्रीष्टचेन ङुरूङला पापदुकी डेलाला थे खोरोङ ज्यान बिन्गीन स्या ओतान। दि गाङे बात ङुरूङ आबा परमेश्वरगी खिता चाला च्योकराङ खाईन ओङा ओतान। 5 थेते सधैँभरि जय जय ओङस्यीत। आमेन। येशू ख्रीष्ट बातकामा गा लाङच्येते बात ईन 6 ख्योकोन बात थोकीन ङा छकदाङ परे खासुङ। ख्योकोनगी चुक खाईन दोक खिता थुप्सुङा? च्यि परमेश्वरगी ख्योकोनला थे खोरोङ दोन्दु स्योक सिन काताङाते ख्रीष्टकी खाबाते कामगी खित्सादु दया खिन लेमु खिताप सिन मेनरो? ख्योकोननी होथोक खित्कान्ते परमेश्वर छ्य्वापेई ठाला ठाला खाईन सिन्दुक। थेमे ख्योकोननी ख्रीष्टते गा लाङच्येते बात ङेन्दे साटोला गा लाङच्येते बात ईन सिन ज्येनज्यीक बातका ङेन्दाला स्यूदुक। 7 गा लाङच्येते बात ईन सिन थरिङोला कोई कोईकी ख्योकोनला लोप्कीन ओताते बातनी गा लाङच्येते बात ईनराङ मेन। होथोक्ते बात लाप्ला थेबेकीनी ख्योकोनला अलमल्ल लोङगीन दुक। दोक खाला थेबेकी ख्रीष्टते गा लाङच्येते बात खुदुक ज्वा छोल्गीन दुक। 8 सुइँदेकी ङ्योकोनगी ख्योकोनला लाप्कीन बिन्दा ओताते गा लाङच्येते बातताङ डिकराङ मिडिक्च्येते बात लोप्कीदुक सासीन ङ्योकोन ईन्सीनोङ स्वर्गनेई वाबाते परमेश्वर दूत ईन्सीनोङ जोराङ ईन्सीनोङ थोक खित्कान्तेलाचेन परमेश्वरगी सजाय बिन्ला नरककुण्डमा लुस्यीत। 9 गोमाका साबा च्योकराङ ङ्योकोन लोक्लाङ ख्योकोनला च्यि सिते सासीन ख्योकोनगी ङेन्दाते गा लाङच्येते बातताङ डिकराङ मिडिक्च्येते बात लोप्कान्ते जोराङ ईन्सीनोङ थोक्तेलाचेन परमेश्वरगी सजाय बिन्ला नरककुण्डमाराङ लुस्यीत। 10 ङे दोक सिन सिनोङ थोरूमोङ च्यि परमेश्वरला मेन्देकी मिओनला खुशी ज्वाप्लाका ङे दि बातओन साबाते ईन्दासीन सिराच्योक लाङगीदुक? ना मिओनगी ङाराङला लेमु मि सिरस्यीत सिन ङे दोक साबाते ईन सिराच्योक लाङगीका? ङा थोक खाला मि मान छोल्कान्ते ईन्सीन ङा ख्रीष्टकी काम खित्कान्ते ईन सिन ङे चुक खाला सिरा थुप्च्या ओतानेरो? पावलला परमेश्वरगीराङ छाने खाबा ओतान 11 आज्यो न्वावे, ख्योकोनगी दि बात लेमु खाला छ्या स्येबा खि। ङे लोप्कीन ओताते गा लाङच्येते बात मिकी जोबाते बात मेन। 12 दि बात ङे सुइँदेकी लोप्कीन ओते बेलाला थोबातेङ मेन, ङाला सुइँदा मिकी लाप्कीन बिन्दातेङ मेन। दि बातनी ङाला येशू ख्रीष्ट थे खोरोङगीराङ छ्या स्ये च्युत्कीन बिन्दाते ईन। 13 ङा गोमा चुक्ते मि ओताने सिन ख्योकोनगीङ लेमु खाईन थोबाराङ ओतासीन। थेजीन ङा आउदी खाला यहूदी धर्म माने खिन ओतान। थोगी ठाउँ ठाउँला जम्मा ओङकान्ते परमेश्वर मि दोक्पोईलाङ सोम्बो ज्य्वाबा मेङगो सिन ङे थेबाला गाङेपा खेदा खाईन खाईन दुक्पा बिन्गीन थुपासम्म थेबेते दर सन्तानराङ तोर ज्युता चालाप। 14 दाक्पोन ज्युज्यु पुर्खे पालोमेकी चले खिन वाबाते रीतिथिति माने खिताराङ फाप्क्यो सिन ङे थेबा माने खिताला कम्ती दुक्पानी माक्या। ङेराङ जातकी बाला दौंतरी नाङ ङा छेत थोक लेमु खाला यहूदी धर्म माने खित्कान्ते मि ज्येन सुङ मेतान। 15 ङा होथोक्ते मि ओतान। ईन्सीनोङ आमे सुबे नाङ ओत्जीनमेईराङ परमेश्वरगी ङाला छाने खाबा ओताक्वा। थेमे थेकी ङाला दया खाईन थे खोरोङ दोन्दु स्योक सिन काताङगीन 16 थे खोरोङ फुज्युङ सु ईन्दे सिन ठेत च्युत्कीन बिन्सुङ। थे फुज्युङ सु ईन्दे, चुक्ते ईन्दे सिरच्येते बात ज्येन ज्येन जातकी मिला लोप सिन परमेश्वरगी ङाला थोक खाबा ओतान। थोक ओङनामेई था च्यि खित्च्ये, चुक खित्च्ये सिन ङे सुङ मित्ताङ सल्लाह माला। 17 ङाला भन्दा गोमाका येशू ख्रीष्टकी खटे खाबाते मिओनताङ ठेत्ला बात खिताप सिन यरूशलेमनेङ मागाल। दोक छ्याःङ मिक्किता खाईन च्यिकराङ देताप सिन बरू ङा अरब लुङबापा गालाप। थेमे तिरी थेपेकीङ याङराङ दमस्कस सारनापाराङ ग्युरगीन वाबाप। 18 लो सुम तिरीकामा ङा पत्रुसला ठेत्ला बात खिताप सिन यरूशलेमने गाल्गीन हप्ता ङि थेत्ताङराङ देताप। 19 थेरू देत्जीन प्रभु येशू न्वा याकूबला बाई येशू ख्रीष्टकी खटे खाबाते मिओन ज्येनलाचेन ङे सुङलाङ माठेत। 20 ङे दि गाङे ईन्दाते बातकामा टिगीन ओत सिन परमेश्वरलाराङ छ्या ओत। 21 पत्रुसबाला ठेत्नामेईचेन ङा सिरियाताङ सिलिसिये अञ्चल नाङपा गालाप। 22 थोगी यहूदिये अञ्चलदु ठाउँ ठाउँला जम्मा ओङकान्ते येशू ख्रीष्ट मिओनगीनी ङे छ्येदोङ थोङा मेतान। 23 खालि थेबेकी “गोमाबा ङुरूङला खेदा खाला खाला दुक्पा तेरकान्ते मिनी ज्येनगीङ येशू ख्रीष्टला विश्वास खित्स्यीत सिन थानी गा लाङच्येते बातका लोप्कीन ख्याम्बाला स्यूदुक्लो,” सिराचेन थोबा ओतान। 24 ङे थोक खिताला स्यूदुक्लो सिन छ्या स्येनामेई थेबेकी परमेश्वरगी चुक अचम्ब काम खासुङा सिन थेते जय जय खाबा ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.