एफिसी 6 - जिरेलआबा आमाताङ फिजाओनगी चुक खिता फाप्कीते 1 थेमे फिजावे, दोक खाबाते प्रभु ख्रीष्टला मन परे खित्च्येते ईन्देकी आबा आमेकी लाःपा कोताते ङेन। फिजाओनगी दोक खिता फाप्च्येतेराङ ईन। 2 परमेश्वरगी बिन्दाते छ्ये छ्ये नियम नाङ “आबा आमाला मान खि,” सिन साबा ओत। होथे नियम नाङ फिजाओनगी दोक खासीन च्यि लेमु ओङगीते सिनोङ साबा ओताते गोमे नियम दिराङ ईन। 3 थोक खित्कानला च्यि लेमु ओङगीते सिनोङ परमेश्वर बातला “आबा आमाला मान खित्कान्ते मिला जेसुकै साबा च्योक ओङला थे दुरू काल्बासाक सोन्ला देता ङेत्क्यो,” सिन साबा ओत। 4 थेमे आबा आमातेबा ख्योकोनगीङ फिजाओनला थाप्कीन ङारगीनकामा देत्ला स्येदाङ मालोङ। बरू प्रभु ख्रीष्टकी च्यि बात चुक खाईन लापा ओताने सिन विचार खाला थेबेकी चुक खिता फाप्कीते, थेबे बानी बिवारा चुक ओङा फाप्कीते सिन थेबाला लेमु खाला लोप। मालिकओन थेमे योक्पो योङमुकी चुक खिता फाप्कीते 5 थेमे योक्पो योङमुतेबा ख्योकोनला ङा दोक सिओ। च्यि सासीन खेराङला कोता च्योकराङ खाला लेमु खाला काम खिता फाप्क्यो सिन दाक्पोन मालिकला मान खिन थेबेकी लाःपा कोताते ङेन। ख्रीष्टकी खि साबाते सेमदुकीराङ ङेन्दाच्योक खाला थेबेकी च्यि खि सिका थे लेमु खाला खि। 6 थेबेकी खेराङला आउदी लेमु खाला काम खित्कान्ते दुका सिरस्यीत सिन थेबे मिगी दोन्दुकामा स्याप स्याप खाला काम खित्जुम माकेत। ख्रीष्ट खेराङ मालिक ईन सिन टोक मेज्येता खाला परमेश्वरगी खि साबाते लेमु खाईन ङेन्दा च्योकराङ खाला खेराङ काम लेमु खाला खि। 7 खेराङगी खिता फाप्च्येते काम थेबे लाईदु मेन्देकी प्रभु ख्रीष्ट लाईदु खाबाते ईन सिराच्योक खाला थुपासम्म स्येत खाला खि। 8 योक्पो योङमु ईन्स्यीत, मालिक ईन्स्यीत जोराङ ईन्सीनोङ लेमु काम खित्कानलाचेन तिरी प्रभु ख्रीष्टकी इनाम तेरग्यो सिन ख्योकोनला छ्याराङ ओत। 9 थेमे मालिकतेबा ख्योकोनगीङ दाक्पोन योक्पो योङमुला लेमु खि। थेबाला ज्यीबा तेन्ला तेन्ला काम माकोत। ख्योकोनतेङ स्वर्गने मालिक ओत। थेचेन थेबेतेङ ख्योकोनतेङ मालिक ईन। थेमे थेकी सुङलाङ काका पाका मिक्किता खाला न्याय खिओ सिन ख्योकोनगी टोक माज्येत। परमेश्वरगी ङुरूङला तेरच्येते हात हतियार बात 10 थोरूमोङ बातज्यीक च्यि सासीन प्रभु ख्रीष्टताङ जीउज्यीकराङ ओङेकी थेकी ख्योकोनला थे खोरोङ छ्येज्यीक शक्ति बिन्दा ओत सिन टोक मेज्येता खाला छ्याःङ ज्यीबा मिक्किता खाला देत। 11 थेमे शैतानताङ जीङाला परमेश्वरगी तेरच्येते हात हतियार जति गाङे खुरला खोन्ला देत। थोक खाईन देत्सीन खेराङला परमेश्वर छ्य्वापेई डेलाला शैतानगी जतिराङ च्याङबो खाईन काम खासीनोङ थेते छ्याःङ सीप लै मिक्किओ। 12 च्यि सासीन ङुरूङ जीङा फाप्च्येते मित्ताङ मेन। ङुरूङनी दि सा नाम खाङ ओताते ल्हा लु, ल्हन्डीक स्यिन्डीप थेमे होदिबा च्योकराङ शैतानताङ डिक्ला दि कलि जुगला राज्य खित्कान गाङेताङ जीङच्येते ईन। 13 थोगी होदिबेकी जुन दिनगी छोमु मेलेबा खित वासीनोङ थेबाताङ फाम्ला छ्योङा माफाप्स्यीत सिन परमेश्वरगी तेरच्येते हात हतियार जति गाङे खुरला खोन्ला ख्योकोन ठीक ओङला देत। दोक खाईन देत्नामेई थेबेकी ख्योकोनला हारे खिताराङ मुथुबो। 14 दोक खाला थेबाताङ जीङाला ठीक ओङला देताला ख्योकोनगी दोक दोक खि। च्यि सासीन ख्योकोनगी परमेश्वर सत्यते बात ङेन्गीनराङ देत। दोक खित्च्येतेचेन केतापा पेटी छ्यिङच्येते ईन। थेमे परमेश्वरगी खि साबा साबाच्योक खि। दोक खित्च्येतेचेन मा मोथोत्स्यीत सिन ठाङनापा च्याकी पाता खोन्दाते ईन। 15 थोकराङ खाला ज्येनला परमेश्वरताङ डिक्पा थुप्क्यो सिरच्येते गा लाङच्येते बात लोपाला ठीक ओङला देत। दोक खाला देत्च्येतेचेन काचाप खोन्दाते ईन। 16 दोस्यिककामा मेन, येशू ख्रीष्टला विश्वास खिन देता नोमुङ मातोङ। थेला विश्वास खिन देत्च्येतेचेन लाःक्तु ढाल खुराते ईन। ढाल खुरा ओत्नामेई ख्योकोनला मेलेबा खित्कान्ते शैतानगी टुप्पोदु मे पारगीन ग्यापाते दा गाङे रोके खाला थे मे सेता थुप्क्यो। 17 थेमे परमेश्वरगी खेराङला पापकी सजायदुकी टाल्गीन सिन्दा ओत सिन टोक माज्येत। परमेश्वरगी दोक खाबा ओत सिन सम्झे खित्च्येतेचेन गोःला च्याकी टोप खोन्दाते ईन। थेमे परमेश्वर आत्मेकी तेरच्येते तरवार खुर। दि तरवारचेन परमेश्वर बातराङ ईन। 18 दोक दोक खित्जीन परमेश्वरताङ प्रार्थना खिनराङ देत। परमेश्वर आत्मे छ्य्वापेकी जहिलेङ थेत्ताङ प्रार्थना खिन देत्ला खेराङला च्यि च्यि गोकीका नाङ सि। थोक खाला प्रार्थना खित्जीन खेराङ परमेश्वरताङ बात खिन ओत सिन छ्या स्येबा खि। प्रार्थना खित्जीन परमेश्वर सन्तान गाङे लाईदु प्रार्थना खिताङ नोमुङ मातोङ। 19 थेमे परमेश्वरगी गोमा सुङलाङ छ्या स्ये च्युता मेताते गा लाङच्येते बात ङे ज्येनला लोप्जीन छ्याःङ ज्यीबा मिक्किता खाला थेमे थेबेकी खोबा थुप्च्या खाला लोपा थुप्स्यीत सिन ङे लाईदुङ प्रार्थना खि। 20 ङा दि गा लाङच्येते बात लोपाला येशू ख्रीष्टकी ताङाते मि ईन्सीनोङ दुरू जेलदु देता फापा ओत। जे ईन्सीनोङ ङे दि बात छ्याःङ ज्यीबा मिक्किता खाला जस्तो खाला लोपा फाप्च्येते ईन थोकराङ खाला लोप्कीन देता थुप्स्यीत सिन प्रार्थना खिनराङ देत। पावलगी चिट्ठी टिला सिन्दे खाला साबाते बात 21 ज्येन बात च्यि सासीन ङा चुक दुका, च्यि खिन दुका सिन था न्वा टाइकिकसकी ख्योकोनला गाङे लाःप्क्यो। दिला ङा ङिङज्ये खिओ। दिङ प्रभु ख्रीष्ट काम खित्कान्ते मिराङ ईन। दि थे काम आउदी लेमु खाला खित्कान्ते मि ईन। 22 ङ्योकोनला देपा चुक दुका सिन ख्योकोनगी लेमु खाला छ्या स्येला पीर मिक्किस्यीत थेमे दिकी खुलाबाते लोन थोला ख्योकोनगी आँट ङेत्स्यीत सिनराङ ङा दिला ख्योकोन ओत्सापा तोङगीन ओत। 23 थेमे आबा परमेश्वरताङ प्रभु येशू ख्रीष्टकी आज्यो न्वाबा ख्योकोनला डिक ज्युत्कीनराङ देत्स्यीत, दोक्पोईकी ज्येनज्यीकला ङिङज्ये खिन देत ज्युत्स्यीत थेमे विश्वास खिनराङ देत ज्युत्स्यीत। 24 ङुरूङ प्रभु येशू ख्रीष्टला ङिङज्ये खिन देत्कान गाङेला परमेश्वरगी दया खिनराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.