एफिसी 5 - जिरेलनाम्दाकला देत्कान्ते मिओनगी चुक खिता फाप्कीते 1 थोगी परमेश्वरला ताला ख्योकोनगीङ थेकी च्योकराङ खि। थे खोरोङ फुज्युङ फुमु ईन सिन थेकी ङिङज्ये खाबाते मि ईन्देकी ख्योकोनगी होदोक खि। 2 थेमे ख्रीष्टकी ङुरूङला चुक ङिङज्ये खाईन थे खोरोङ ज्यानराङ बिन्गीन स्या ओताने सिन सम्झे खाला काम बात जे खासीनोङ ख्योकोनगीङ ज्येनला ङिङज्ये खाला खि। परमेश्वरला भोग बिन्दाते स्येक्जीन खाच्येते ठीमा थेला मन परे खिन ओतान। ख्रीष्टकी ङुरूङ लाईदु ज्यान बिन्गीन स्याप्तेचेन परमेश्वरला मन परे खित्च्येते होथे ठीमा च्योक्ते ईन। 3 रन्डीबाजीताङ होदि च्योक्ते खिता मेङच्येते ङोचा लाङच्येते काम थेमे लोभ खित्च्येतेनी बातराङ थोङ, होदोक्ते कामगी बात समेदोङ ख्योकोनगी खिता मेङगो। परमेश्वर सन्तानगी होदोक्ते बात खिताराङ सोई मिक्किओ। 4 थोकराङ खाला ङोचा लाङच्येते फोर बात खित्च्येते, बिनसित्ति बात खित्च्येते थेमे ङोचा लाङच्येते बात खाला गुट्टी खित्च्येतेङ ख्योकोनगी खिता मेङगो। दोक खिता साटोला बरू ख्योकोनगी खेराङला लेमु खाबाते कामगी लाईदु परमेश्वरला धन्यवाद बिन। 5 ख्योकोनगी दि बात छ्या स्येबा खि। च्यि सासीन रन्डीबाजीताङ होदि च्योक्ते खिता मेङच्येते ङोचा लाङच्येते काम खित्कान्ते थेमे लोभ खित्कान्ते मि सुङ था तिरी ख्रीष्टताङ परमेश्वर राज्यदु देताराङ मेङेदो। लोभ खित्च्येतेनी परमेश्वर लाईदु ल्हा लु माने खाबा छेतराङ मेलेबा ईन। 6 सुइँदेकी होदोक्ते कामताङ बात खिता छ्याःङ मेलेबा मेन सासीनोङ ख्योकोनगी थेबे बात ङेनराङ माङेन। परमेश्वरगी खि साबाते माङेन्ला होदोक दोक्ते काम खित्कान्ते मिओनला था थेकी स्येदाङगी चूर गाल्ला सजाय तेरग्यो। 7 थोगी ख्योकोनगी होथोक्ते मित्ताङ साङ खाला थेबेकी च्योकराङ माकेत। 8 मुन्दाकला देत्कीन ख्योकोन गोमा मेलेबा कामताङ बात खिन ओतान। प्रभु ख्रीष्टताङ जीउज्यीकराङ ओङेकी थाचेन ख्योकोन नाम्दाकला देत्कान्ते मि ईन। थोगी नाम्दाकला देत्कान्ते मिकी चुक चुक खिता फाप्च्येते ईन्दे ख्योकोनगी थोकराङ खि। 9 चुक सासीन नाम्दाकला देत्कान्ते मिकीचेन लेमुते कामताङ बात खिओ, परमेश्वरगी खि साबा साबाच्योक खिओ थेमे साँचोते बातकामा खिओ। 10 थेमे जहिलेङ ख्योकोनगी खित्च्येते कामताङ बात प्रभु ख्रीष्टला मन परे खित्च्येते ईन्दाना मेन्दे सिन छ्या स्येलाकामा खि। 11 मुन्दाकला देत्कान्ते मिओनगी खित्च्येते मिला ङ्ये ज्युत्च्येते मेलेबाताङ ङोचा लाङच्येते काम सिराते ख्योकोनगी खितराङ माकेत। बरू दोक्ते काम खित्कान्ते मिओनला थोक खिता लेमु मेन सिन लाप्ला बिन। 12 ज्येनगी थाहा मेङेता खाला थेबा कोई कोईकी खित्च्येते कामगीतेनी बात खिताङ ङोचा ईन। 13 नाम्दाक फोक्नामेई मुन्दाक तोरला नाम्दाक ड्वा च्योकराङ थेबेकी खित्च्येते थोक्ते काम लेमु मेन सिन लाप्कीन बिन्नामेई थोक खिता मेङच्याक्वा सिन थेबेकी छ्या स्येक्यो। 14 नाम्दाककी खित्सादुराङ थोक खाला थेबाङ मुन्दाकदुकी ठाल्ला नाम्दाकला देता ङेत्क्यो। थोगीराङ “ङ्याला ओतातेबा ङिक छेत्ला स्याप छेतराङ गाल्सादुकी ल्वा थेमे ख्रीष्टकी ख्योकोनला नाम्दाकला देत ज्युत्क्यो,” सिन सिरच्येते ईन। 15 थोगी ख्योकोनगी छ्याःङ छ्या मेस्येकान्ते मि च्योक मिक्किता खाला खेराङगी चुक खिता फाप्कीते सिन विचार खाला खिता फापा च्योकराङ खि। 16 दि कलि जुग ईन्देकी दोक्ते काम खिता ङेत्च्येते समय था काल्बा मेत सिन छ्या स्येला दोक्ते कामताङ बाततेबा टोले मिक्किता खाला खि। 17 थोगी छ्याःङ मोखोकान्ते मि च्योक मिक्किता खाला प्रभु ख्रीष्टकी च्यि खि सिरच्या ईन्दाका सिन ख्योकोनगी छ्या स्येबा खि। 18 थेमे छ्याङ रक्सीकी जिला माख्याम। जा बेलाला मिकी छ्याःङ होस मोज्योबा खाला मेता मेता खिओ। बरू परमेश्वर आत्मेकी खाङाते मि ओङला काम खि। 19 खेराङ नाङ भजन लिन्च्येते, परमेश्वरला छ्ये जोच्येते लु लिन्च्येते थेमे परमेश्वर आत्मेकी लिन च्युताते ज्येनोङ लु लाला प्रभु येशू ख्रीष्टला सेमदुकीराङ छ्ये जो। 20 थेमे जस्तो ओङसीनोङ जहिलेङ आबा परमेश्वरगी खाबाते कामगी लाईदु प्रभु येशू ख्रीष्ट छ्य्वापेई थेला धन्यवाद सि। 21 प्रभु येशूला मन परे मिक्किच्येते छ्याःङ खिता मेङगो सिन ज्यीबा खिन थेला मान खिन ङा ङाराङ ईन सिराच्योक मिक्किता खाला ख्योकोन दोक्पोईकी ज्येनज्यीक बात ङेन्च्येते खि। ख्यावा फेम्मेकी चुक खिता फाप्कीते 22 थेमे फेम्मे मिवे, प्रभु ख्रीष्टला मान खिन थेकी साबाते ङेन्दा च्योकराङ खाला ख्योकोनगी दाक्पोन ख्योबोलाङ मान खिन थेबे अधीनला देत। 23 ख्रीष्टकी मिओनते छ्येते ख्रीष्ट ईन्दा च्योकराङ फेम्मे मिते छ्येतेचेन थे मोरोङ ख्योबोराङ ईन। ख्रीष्टकी मिओनचेन थे जीउ ईन। थेबाला पापकी सजायदुकी डेल्कान्ते थेराङ ईन। 24 ख्रीष्टकी मिओन थे अधीनला देता च्योकराङ खाला फेम्मे मिओनोङ जहिलेङ दाक्पोन ख्योबो अधीनला देता फाप्क्यो। 25 थेमे ख्योओ मिवे, ख्रीष्टकी थे खोरोङ मिओनला चुक खाईन ङिङज्ये खासुङा ख्योकोनगीङ दाक्पोन फेम्मेला होथोकराङ खाला ङिङज्ये खि। थेकीनी थे खोरोङ मिओन लाईदु थे खोरोङ ज्यानराङ बिन्गीन स्यिसुङ। 26 थेकी थोक खाबातेचेन थेबा परमेश्वरला मन परे खित्च्येते मि ओङस्यीत सिनराङ ईन। दोक ओङाला छ्युला लुक्ला बप्तिस्मा तेरजीन थेमे थेजीन लापाते परमेश्वर बातकी छ्य्वापेई थेकी थेबाला पापदुकी टाल्गीन बिन्सुङ। 27 दोस्यिककामा मेन, थेकी थोक खाबातेचेन ङेर्मा माच्युम्बाते, छ्याःङ खुना खोटी मेताते, ताजीनोङ आउदी लेमु थोङच्येते बेउली च्योकराङ थेबाला सेम खुदुक गालाते थेमे छ्याःङ गल्ती मेताते मि जोला थे खोरोङ दोन्दु देत ज्युता थुप्स्यीत सिनोङ ईन। 28 थोगी होदि बात विचार खाला ख्योओ मिवे, दाक्पोन ज्यानला माया खिता च्योकराङ खाला ख्योकोनगी खेराङ फेम्मेला ङिङज्ये खि। फेम्मेला ङिङज्ये खित्कान्ते मिकीचेन दाक्पोन ज्यानलाराङ माया खाबाते ईन। 29 मि सुङगीङ नोमुङ दाक्पोन ज्यानगी बेवास्ता मिक्किओ। बरू ख्रीष्टकी थे खोरोङ मिओनला लेमु खाला ताप च्योकराङ खाला मि जसकीङ दाक्पोनला लेमु ओङस्यीत सिन दाक्पोन ज्यानगी वास्ता खिओ। 30 ङुरूङ थे खोरोङ जीउकी लाक्पा, काम्बा च्योक ईन्देकीराङ ख्रीष्टकी थे खोरोङ मि ङुरूङला थोक लेमु खाला ताच्येते ईन। 31 परमेश्वर बातलाङ “थोगीराङ मि दाक्पोन आबा आमाताङ ठाल्ला फेम्मेतेताङ ङ्योम्बुराङ देताला डुइओ। थेमे थेबा ङिबो जीउज्यीकराङ ओङगो,” सिन साबा ओत। 32 दि बातकीते सजिलो खाला खोबा मुथुप्च्याज्यीक आउदी अचम्बज्यीक अर्थ ओत। ङाचेन दुरू दि बात ख्रीष्टताङ थे मिओन विषयला खिन ओत। 33 परमेश्वर बातला साबाते थे बात ख्यावा फेम्मे विषयलाङ साबाते ईन। थोगी ख्योकोन गाङेकी दाक्पोन ज्यानला माया खाबा च्योकराङ खाला फेम्मेला ङिङज्ये खि। थेमे फेम्मे मिओनगीङ दाक्पोन ख्योबोला मान खि। |
© 1992 Wycliffe Bible Translators Inc. All rights reserved.
Wycliffe Bible Translators, Inc.