एफिसी 4 - जिरेलयेशू ख्रीष्ट मिओनगी चुक खाला डिक्ला काम खिता थुप्कीते 1 बात दोक दोक ईन्देकी ङा ख्योकोनला दोक खि सिन सिओ। प्रभु येशू ख्रीष्टकी खि साबाते काम खाबेकी ङाला जेलदु ज्याक्पा ओत। ङा ख्योकोनला चुक खि सिते सासीन ओर्च्ये, परमेश्वरगी खेराङला थे खोरोङ दोन्दु स्योक सिन कातोङजीन ख्योकोनगी चुक चुक खिता फाप्क्यो सिन साबा ओताने थोक थोकराङ खि। 2 च्यि सासीन ख्योकोनगी नोमुङ ङा ङाराङ ईन सिराच्योक माकेत, गाङेताङ खा छ्येत लेमु खि, होत्ताराङ स्येदाङ माकेत थेमे दोक्पोईकी ज्येनज्यीकला ङिङज्ये खिन सुङताङ होपकी जोप मिक्किता खाला बरू सै खाला देत। 3 परमेश्वर आत्मेकी ख्योकोन गाङेला सेमज्यीकराङ खाला डिक्ला थुन्ला देता थुप्कान जोबा ओतेकी डिक्ला थुन्ला देता फाप्क्यो सिन ख्योकोन गाङेकी थोक खाला देत्च्ये छ्य्वापाकामा स्येत खि। 4 च्यिला सासीन ङुरूङ गाङेराङ जीउज्यीक्तेराङ ओङा ओत, ङुरूङ गाङेकी परमेश्वर आत्माज्यीकराङ ङेता ओत थेमे परमेश्वरगी ख्योकोनला थे खोरोङ दोन्दु स्योक सिन कातोङजीन तिरी ख्योकोनते च्यि आश ओते सिन साबाते ङुरूङ गाङेकी ङेत्च्येतेङ दोक्पोईराङ ईन। 5 थोकराङ खाला प्रभु येशू ख्रीष्टकामा ङुरूङ मालिक ईन, थेला विश्वास खित्जीन ङुरूङ गाङेकी ङेन्दाते बातज्यीकराङ ईन थेमे ङुरूङ गाङेकी थे मिनगी छ्य्वापेईराङ बप्तिस्मा लाबाते ईन। 6 ङुरूङ गाङेते परमेश्वर दोक्पोईराङ ईन, थेराङ ङुरूङ आबा ईन। ङुरूङ गाङेला राज्य खित्कान्ते, गाङे नाङ काम खित्कान्ते थेमे गाङे नाङ देत्कान्ते थेराङ ईन। 7 थेमे ख्रीष्टकी ङुरूङ सु सुला चुक्ते सीपताङ शक्ति तेरच्ये सिन टुङ्गो खाईन ङुरूङ गाङेला खुदुक खुदुकते काम खित्च्येते सीपताङ शक्ति बिन्दा ओत। 8 थेकी दोक खिओ सिन परमेश्वर बातला चुक साबा ओते सासीन “थेकी दुरूकी स्वर्गने डोजीन फाम्बातेबालाङ थे खोरोङगी ग्याल्सुङ सिन तेन्दाला थे खोरोङताङराङ टीकीन खेरसुङ। थेमे मिओनलाचेन थे खोरोङगी तेरा सेम खाबाते बिन्सुङ,” सिन साबा ओतान। 9 थे दोक खाईन दुरूकी स्वर्गने गाल्सुङ साबाते ज्येनतोक छ्याःङ मेन्देकी थे स्वर्गनेकी गोमा देमा दि पृथ्वीदु वाबा ओतान साबातेराङ ईन। 10 थे स्वर्गनेकी देमा वाकीन थेनेराङ ग्युरगीन स्वर्ग भन्दाङ तेङने गाल्गीन सा नाम खाङ खापा चुक ओङा फाप्च्येते ईन्दे थोकराङ ओङ च्युत्ला गाङेपा गाङेला राज्य खिन ओत। 11 थेकीराङ मिओनला खुदुक खुदुकते काम खित्च्येते सीपताङ शक्ति बिन्गीन कोईला थे खोरोङगी खटे खाबाते मि थेमे कोईला परमेश्वर बात खित्कान्ते मि जोसुङ। थोकराङ खाईन कोईला ठाउँ ठाउँला गाल्ला गा लाङच्येते बात लोप्कान्ते मि थेमे कोईला परमेश्वर सन्तानओनला ताकान्ते थेमे परमेश्वर बात लोप्कान्ते मि जोसुङ। 12 परमेश्वर सन्तान गाङेकी परमेश्वरगी खाबाते थेमे थेकी च्यि खि सिते सिन छ्या स्येला खोपरोङगी खिता फाप्च्येते काम खिता थुप्स्यीत, दोक खाला ख्रीष्टकी जीउ च्योक ओङाते थेबा गाङेराङ डिक्ला चुक खासीन दाक्पोन नाङ लेमु ओङगीका थोकराङ खित्स्यीत सिनराङ मिओनला खुदुक खुदुक काम खित्च्येते होदोक्ते सीपताङ शक्ति बिन्दाते ईन। 13 ङुरूङ गाङेकी थोक खिन डोजीन थेला विश्वास खाईन ङेन्दाते बातला ङुरूङ झन डिगीन डुइओ थेमे परमेश्वर फुज्युङ चुक्ते ईन्दे, च्यि खिते सिन झन लेमु खाला छ्या स्येला ङुरूङ गाङेराङ सेमज्यीकराङ खाला काम खित्कान ओङगो। दोक खाला ख्रीष्टकी ङुरूङ नाङ खिता चालाते काम पूरो ओङला ङुरूङ थेकी ज्वा चाला च्योकराङ पाको ओङगो। 14 दोक ओङनामेकीचेन ङुरूङ पाको गाला मेताते मिकी च्योक मिक्किओ। पाको गाला मेताते मिकीचेन परमेश्वर बात ईन सिन सुइँदेकी मेन्दे बात लाप्सीन थे ङेन्ग्यो। लोक्ला ज्येनज्यीगी होथोक्ते ज्येनराङ बात लाप्सीन थेङ ङेन्ग्यो। होथोक्ते बात लोप्कान्ते मिओन ज्येनला छक्के खिताला आउदी च्याङबो ओङगो। थेबेकी चुक खाला ओङगीका पाको गाला मेताते मिओन मिकला छारो ग्याप्ला खोपरोङ लाःक्तु लिन्ग्यो। 15 ङुरूङगीचेन मेन्दे बात खिता साटोला बरू दाक्पोन नाङ ङिङज्ये खिन परमेश्वरते सत्यते बातकामा खिता फाप्क्यो। दोक खिन डोजीन ङुरूङ कामताङ बात गाङे ख्रीष्टकी च्योकराङ लेमु खिता थुप्कान डुइन गाल्ला ङुरूङ गोः च्योकराङ ईन्दाते ख्रीष्टताङ झन जीउज्यीकराङ डुइन डुइओ। 16 थेमे ख्रीष्टकी थे खोरोङ मि गाङेला डिक च्युत्ला सेमज्यीकराङ खाला काम खित्कान जोला दोक्पोईकी ज्येनज्यीकला लेमु खित्स्यीत सिन थेबाला गोच्येते जति गाङे तेरग्यो। दोक ओङनामेई थेबा खोपरोङ नाङ ङिङज्ये खिन मि जीउ छारगीन ड्वापच्योक खाला ख्रीष्टकी थेबाला जस्तो ज्वा चाला ओतान थोकराङ डुइन डुइओ। दोक ओङाला थेबेकीङ दाक्पोन दाक्पोनगी खिता फाप्च्येते काम खिता फाप्क्यो। सेम लेमु जोकीन बिन्दाते मिओनगी चुक खिता फाप्कीते 17 थेमे प्रभु ख्रीष्टकी ङाला दोक सिरच्येते अधिकार बिन्दा ओतेकी ङा ख्योकोनला दि बाततेबा सिन ओत। च्यि सासीन ख्योकोनगीचेन परमेश्वरला छ्या मेस्येकान्ते मिओनगी च्योकराङ खिन देता मेङगो। परमेश्वरला छ्या मेस्येकान्ते मिओनचेन तिरी बात छ्याःङ विचार मिक्किकान्ते बुद्धि मेताते मि ईन। 18 खोबा थुप्च्या ओत्सीनोङ परमेश्वर सु ईन्दे, च्यि काम खिते सिरच्येते बात छ्याःङ खोबा माचालेकी थेबा छ्याःङ खोबा मुथुप्च्या गाल्सुङ। थेमे परमेश्वरगी तेरच्येते जुनी थेबेकी मेङेत्च्या ओङसुङ। 19 थेबे सेमचेन स्यिङ दो च्योकराङ स्येन्दे गाला ओतेकी खिता मेङच्येते काम खित्जीनोङ थेबाला छ्याःङ च्योक मालाङो। दोक गालेकी थेबेकी खिता मेङच्येतेताङ ङोचा लाङच्येते कामकामा खिन देत्क्यो। होथोक्ते काम माक्याबाला ओङराङ मेङगो सिराच्योक खाला थेबेकी झन झन होथोक्ते कामकामा खिता छोल्ग्यो। 20 ईन्सीनोङ ख्योकोनलानी थेबेकी खित्च्येते कामतेबा ख्रीष्टताङ जीउज्यीकराङ ओङाते मिओनगी खिता डिक्च्येते मेन सिन लेमुराङ खाला छ्या ओत। 21 ख्रीष्ट सु ईन्दे सिन लापाते बात ख्योकोनगी थोबा ओत मेन? थे बात लोप्जीन येशूकी खाबातेताङ साबाते सत्यते बात ख्योकोनला लापा ओतान। 22 था खेराङला लापा च्योकराङ खि। च्यि सासीन गोमा खिन ओताच्योक खिन मेदेता खाला मेलेबाते कामताङ बात खित्च्येते बानी थोङ। गोमाबा ख्योकोन दाक्पोन सेमला लाबा लाबाच्योक खासीन लेमु ओङगो सिन थोकराङ खिन ओतान। होथोक खाबेकी ख्योकोन ङ्येला डुइन ओतान। 23 खेराङ सेम लेमु ओङाते मि ओङा फाप्क्यो सिन ख्योकोनगी परमेश्वरला खेराङ सेम खुदुक जोला नाङ सि। 24 थेमे गोमे मेलेबा बानीतेबा ताङला लेमु कामताङ बात खि। ख्योकोन बानी थे खोरोङते च्योकराङ ओङस्यीत सिन ख्योकोन बानी लेमु जोकान्ते परमेश्वरराङ ईन। थेकी थोक खिन ओतेकी ख्योकोनगी थेकी खि साबा साबाच्योक खिता थुप्क्यो थेमे थेला मन परे खित्च्येते कामताङ बात खिता थुप्क्यो। 25 थोगी ख्योकोनगी ढाँर खिता ताङला दोक्पोईकी ज्येनज्यीकताङ साँचोते बातकामा खि। च्यिला सासीन ङुरूङ गाङेराङ जीउज्यीगी लाक्पा, काम्बा, मिक च्योक्ते ईन। 26 सुइँदाताङ स्येदाङ लासीन स्येदाङगी खित्सादु मेलेबा काम माकेत। सुङताङ स्येदाङ मोसोक्पा खाला थे छोमुराङ थे बात डिक्पा खाला टोक ज्येत। 27 थोक माक्यासीन शैतानगी ख्योकोनला ङ्ये ज्युत्च्येते मौका ङेत्क्यो। ख्योकोनगी थेला थोक खित्च्येते मौका मातेर। 28 गोमा कुला साकान्तेकी थोक खिता ताङला दाक्पोन पाखुरा चले खाला सो। दाक्पोनला गोच्येतेकामा मेन्देकी छ्याःङ मेतातेबाताङ गोला सा थुप्स्यीत सिन जाँगर खाला काम खि। 29 थोकराङ खाला ख्योकोनगी दोक्पोईकी ज्येनज्यीक सेमला फोक्च्येते बात नोमुङ माकेत। बरू सु मिला च्यि बेलाला चुक सिरा लेमु ओङच्या दुका थे विचार खाला बात खि। 30 खेराङ खेकी खित्सादु परमेश्वर आत्माला मेलेबा लाङच्येते काम माकेत। परमेश्वर आत्मा ङेतेकी खित्सादुराङ परमेश्वरगी थे खोरोङगी साबे छोमु ख्योकोनलाङ पूरो खाला पापदुकी टाल्ला थे खोरोङताङ देत ज्युत्क्यो सिन टोक माज्येत। 31 थेमे सुङताङ स्येदाङ खुरला मादेत, पालोईला स्येदाङ फुङ पुङच्येते माकेत, सुङताङ स्येदाङ माकेत, ज्येनताङ थोम्मु माकेत, सुङलाङ मामोत, मि बात खित्च्येते होदोक्ते बानी गाङे थोङ। 32 बरू दोक्पोईकी ज्येनज्यीकला ङिङज्ये खाला दुक्पाला तो। थेमे ख्रीष्टकी खाबाते कामगी खित्सादु परमेश्वरगी खेराङ पाप माफ बिन्दा च्योकराङ खाला ख्योकोनगीङ दाक्पोनला मेलेबा खित्कानला माफ बिन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.