एफिसी 3 - जिरेलपावलगी ज्येन ज्येन जातकी मि लाईदु खित्च्येते कामगी बात 1 परमेश्वरगी ख्योकोनला होदोक लेमु खाबा ओतेकी ङा पावल ख्योकोन लाईदु परमेश्वरला प्रार्थना खिओ। येशू ख्रीष्टकी खि साबाते काम खाबेकी ङाला जेलदु ज्याक्पा ओत। ख्योकोन ज्येन ज्येन जातकी मिला लेमु ओङस्यीत सिन ङा दोक खाला दुक्पा भोगे खिओ। 2 परमेश्वर थे खोरोङ दयेकी खाबाते कामगी बात ख्योकोन ज्येन ज्येन जातकी मिला लोप्च्येते जिम्मा ङाला बिन्दाते ईन सिन ख्योकोनगी थोबाराङ ओतासीन। 3 च्यि सासीन गोमा सुङलाङ छ्या स्ये च्युता मेताते बात च्यि ईन्दे सिन परमेश्वर थे खोरोङगीराङ ङाला छ्या स्ये च्युत्कीन बिन्सुङ। थे बात च्यि ईन्दे सिन ङे थुम्मी खाईन दि चिट्ठीला आनाङ भर्खर टिकीन सिन्दा ओत। 4 ख्रीष्टकी छ्य्वापेई खाबाते गोमा सुङलाङ छ्या स्ये च्युता मेताते थे बात ङे खजो लेमु खाईन खोबा ओता ईन्दाका सिन दि चिट्ठी पढे खित्जीन ख्योकोनगी छ्या स्येक्यो। 5 थे बात च्यि ईन्दे सिन परमेश्वरगी गोमे मि सुङलाङ छ्या स्ये च्युता मेतान। थाचेन थेकी येशू ख्रीष्टकी खटे खाबाते मिओन थेमे थे खोरोङ बात खित्कान्ते मिओनला थे बात च्यि ईन्दे सिन थे खोरोङ आत्मे छ्य्वापेई छ्या स्ये च्युत्कीन बिन्दा ओत। 6 थे बातचेन दिराङ ईन। च्यि सासीन येशू ख्रीष्टकी खाबाते कामगी खित्सादु थाचेन परमेश्वरगी ज्येन ज्येन जातकी मिलाङ थे खोरोङगी छाने खाबाते इस्राएलीओनला तेरच्येते जति गाङे तेरच्या ओङा ओत, थेबालाङ ज्येन गाङेताङ डिक्पा खाईन जीउज्यीकराङ जोबा ओत थेमे गोमा थेकी थे खोरोङ मिओनताङ लेमु खिओ सिन जमान खाबा ओताते जति गाङे थेबे लाईदुङ खाला तेरच्या ओङा ओत। दि बाततेबा थेबाला लोप्च्येते गा लाङच्येते बातला साबा ओत। 7 दि गा लाङच्येते बात लोप्च्येते काम ङा खिन ओत। परमेश्वरगी ङाला दया खाईन दि बात लोप सिन छाने खाईन दि काम खिताला थे खोरोङ शक्तिङ बिन्सुङ। 8 दि काम खिताला परमेश्वर सन्तान गाङे नाङ ङा सोईराङ मिक्किकान्ते मि ईन्सीनोङ परमेश्वरगी ङालाराङ दि काम खित्च्येते जिम्मा बिन्सुङ। ङे कामचेन ख्रीष्टकी ङुरूङ लाईदु खाबाते कामतेबा खोबा चाल्ला खोबा मुथुप्च्या चुक अचम्ब खाईन खाबाते ईन्दे सिन ज्येन ज्येन जातकी मिला लोप्च्येते 9 थेमे परमेश्वरगी गोमा सुङलाङ छ्या स्ये च्युता मेताते बात चुक खाईन छ्या स्ये च्युत्सुङा सिन मि गाङेला लेमु खाला खो ज्युत्च्येते ईन। दि सा नाम थेमे ओताते जति गाङे जोकान्ते परमेश्वरगी गोमा गोमा दि बात गाङेताङ ब्वाकीन ज्याक्पा ओतान। 10 थाचेन गाङेपा जम्मा ओङकान्ते येशू ख्रीष्ट मिओनला ताला थे खोरोङगी थेबे लाईदु खाबाते कामतेबा चुक आउदी बुद्धि पुरे खाईन खाबाते ईन्दे सिन परमेश्वरगी स्वर्गने ओताते छ्ये टेक्टे थे खोरोङ दूत गाङेला छ्या स्ये च्युत्कीन बिन्सुङ। 11 दोक दोकराङ खिओ सिन थेकी गोमा गोमामेकीराङ ठीक खाबा ओतान। ठीक खाबा ओता च्योकराङ खाईन थेकी ङुरूङ प्रभु येशू ख्रीष्ट छ्य्वापेकी थे कामतेबा खासुङ। 12 ङुरूङ प्रभु येशू ख्रीष्टकी खाबाते कामगी खित्सादु थेमे थेला विश्वास खाबेकी खित्सादु था ङुरूङ छ्याःङ ज्यीबा मिक्किता खाला ढुक्क ओङला परमेश्वर दोन्दु ड्वा थुप्क्यो। 13 दोक ईन्देकी ओर्च्ये, ख्योकोन लाईदु काम खित्जीन ङे जेलदु देत्कीन दुक्पा भोगे खिता फापा ओत्सीनोङ ख्योकोन सेम मासेत। ङे दोक खाईन दुक्पा भोगे खाबातेनी ख्योकोनला लेमु ओङालाराङ ईन। पावलगी एफिसीओन लाईदु प्रार्थना खाबाते 14 आबा परमेश्वरगी खाबाते दि अचम्बते कामओन विचार खिन घुँडा चुला ङा थेला प्रार्थना खिओ। 15 स्वर्गदु थेमे पृथ्वीदु ओताते जति गाङेला जुनी तेरकान्ते थेराङ ईन। 16 थे आउदी खाला दया खित्कान्ते ईन्देकी थेमे थेत्ताङ छ्येज्यीक शक्ति ओतेकी थेकी थे खोरोङ आत्मेकी ख्योकोन सेमगी नाङ शुरू खाबाते काम खिन देत्ला ख्योकोनला थे खोरोङगी ज्वा चालाच्योक ओङाला झन शक्ति तेरस्यीत 17 थेमे थेला विश्वास खाबेकी खित्सादु ख्योकोन सेमगी नाङ ख्रीष्ट देत्स्यीत सिन प्रार्थना खिओ। थेमे ख्रीष्ट ङुरूङला थोई ङिङज्ये खित्कान्ते ईन्दे सिन नोमुङ टोक मेज्येता खाला जहिलेङ ख्योकोनगी ज्येनला ङिङज्ये खिन देता थुप्स्यीत। 18 दोक खाला परमेश्वरगी गोमा सुङलाङ छ्या स्ये च्युता मेताते बात खोबा चाल्ला खोबा मुथुप्च्या चुक अचम्ब ईन्दाका सिन परमेश्वर सन्तान ज्येन गाङेताङ ख्योकोनगीङ गाङे लेमु खाला खोबा थुप्स्यीत। 19 थेमे मिकी जति बुद्धि खिये खासीनोङ खोबा मुथुप्च्या खाला ख्रीष्टकी ङुरूङला चुक ङिङज्ये खिते सिन ख्योकोनगी खोबा थुप्स्यीत सिनोङ ङा प्रार्थना खिओ। परमेश्वरगी ख्योकोनला थे खोरोङ बुद्धि थेमे शक्ति बिन्ला थे खोरोङ च्योकराङ लेमु ओङाला गोच्येते जति तेरस्यीत सिनराङ ङा ख्योकोन लाईदु दोक दोक खाला प्रार्थना खिओ। 20 ङुरूङ नाङ काम खिन ओताते छ्येज्यीक शक्ति छ्य्वापेई परमेश्वरगी ङुरूङगी थेला नाङ साबा भन्दाङ काल्बेई तेरग्यो। थेमे ङुरूङगी विचार खाबा भन्दा खापान खापान छ्ये काम खिता थुप्क्यो। 21 गाङेपा जम्मा ओङकान्ते येशू ख्रीष्ट मिओनगी थे छ्य्वापेकी दोक छ्येते परमेश्वरते पुस्ता पुस्तासाक सधैँभरि जय जय खिन देत्स्यीत। आमेन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.