एफिसी 2 - जिरेलयेशू ख्रीष्ट छ्य्वापेई साम्बाते जुनी ङेत्च्येते बात 1 थेमे गोमाबा ख्योकोन खिता मेङच्येते कामकामा खिन पाप खिन ओतेकी परमेश्वर लाईदु स्याप छेतराङ गाला ओतान। 2 थेजीन ख्योकोन चालचलनताङ बानी बिवारा दि सा लुङबे मि ज्येनतेबेते च्योकराङ ओतान। ख्योकोनचेन दागार, ङीमा, कार्मा नामने ओताते जति गाङे थेमे ल्हा लुई गेल्बो शैतान अधीनला देत्ला थेकी खि साबा साबाच्योक खिन ओतान। परमेश्वरगी माकेत साबा साबा खित्कान्ते मिओनलाचेन थोरूमोङ शैतानगीराङ राज्य खिन ओत। 3 ईन्दाका गोमाबा ङुरूङ गाङेराङ ज्येन च्योकराङ दाक्पोन खुशीला ख्याम्गीन दाक्पोनला च्यि च्यि खिता सेम लाङगीका थोकराङ खिन खिता मेङच्येते कामताङ बात खिन ओतान। थोक खाबेकी ङुरूङगीङ होथेबा ज्येनगी च्योकराङ खाला परमेश्वरगी स्येदाङगी चूर गाल्ला तेरच्येते सजाय ङेता फाप्च्या ओतान। 4 तर परमेश्वर आउदी लेमु खित्कान्ते ईन्देकी थेकी ङुरूङला आउदी ङिङज्ये खाईन 5 खिता मेङच्येते कामकामा खिन पाप खिन थे लाईदु स्याप छेतराङ गालाते ङुरूङला ख्रीष्टताङराङ सोम्बो लोगीन थेला बिन्दा च्योक्ते जुनी बिन्सुङ। थे खोरोङ दयेकी खित्सादुकामा परमेश्वरगी ख्योकोनला दोक खाईन पापकी सजायदुकी टाल्गीन बिन्दाते ईन सिन टोक माज्येत। 6 थेमे येशू ख्रीष्टला स्यिसादुकी सोम्बो लोक्जीन परमेश्वरगी ङुरूङलाङ थेत्ताङराङ सोम्बो लोगीन स्वर्गने थेत्ताङ ङ्योम्बुराङ देताला ज्याक्पा ओत। 7 ङुरूङला ङिङज्ये खाईन थे खोरोङगी येशू ख्रीष्ट छ्य्वापेई खाबाते होदि गाङे काम चुक दया खाईन खाबाते ईन्दे सिन परमेश्वरगी जुग जुगसाकराङ गाङेला छ्या स्ये ज्युत्क्यो। 8 ख्योकोनगी थेला विश्वास खानामेई थे खोरोङ दयेकीकामा परमेश्वरगी ख्योकोनला पापकी सजायदुकी टालाते ईन। ख्योकोनगी खइँदा लेमु काम खाबेकी खित्सादु मेन्गीन थे खोरोङगी दोक खिता चालेकीकामा थेकी ख्योकोनला पापकी सजायदुकी टालाते ईन। 9 थेकी ख्योकोनला दोक खाबाते ख्योकोनगी थेकी खि साबा साबाच्योक लेमु काम खाबेकी खित्सादुचेन पक्काराङ मेन। थोक ईन्दा ईन्सीन ङ्योकोनगी लेमु काम खाईनका परमेश्वरगी ङ्योकोनला पापकी सजायदुकी टालाते ईन सिन ख्योकोन छ्ये खिता ङेत्च्या ओतान। तर परमेश्वर दोन्दु सु छ्ये खिता थुप्कीते? 10 येशू ख्रीष्टकी खाबाते कामगी खित्सादु परमेश्वरगीराङ ङुरूङला लेमुते काम खिता थुप्स्यीत सिन साम्बाते जुनी बिन्गीन खुदुक जोबाते ईन। ङुरूङगी खिता फाप्च्येते लेमुते कामतेबा थेकी गोमाकाराङ ठीक खाईन ज्याक्पा ओतान। येशू ख्रीष्टकी गाङेला डिक्पा खाबाते बात 11 बात दोक दोक ईन्देकी ख्योकोन ज्येन ज्येन जातकी मिकी खेराङ गोमा चुक ओताने सिन टोक माज्येत। खोपरोङचेन परमेश्वरगी छाने खाबाते मि ईन सिन जीउला खतकी चिनु जोकान्ते इस्राएलीओनगी ख्योकोनला खोपरोङ च्योक खतकी चिनु मोजोकान्ते मि ईन सिन सिओ। ईन्दानी जीउला जोच्येते थे खतकी चिनु मि खोपरोङगीराङ जोच्येते ईन। 12 ख्योकोनगी टोक ज्येता मेङच्येते बात च्यि सासीन ख्योकोन गोमा ख्रीष्टकी छ्य्वापेई छ्याःङ मेङेत्कान्ते मि ओतान, परमेश्वरगी छाने खाबाते इस्राएली नाङ फाप्कीन मेतान थेमे परमेश्वरगी जमान खाईन थेबाला तेरग्यो साबातेबा ङेत्च्येते ख्योकोनते छ्याःङ हक मेतान। दोस्यिककामा मेन, तिरी जुनीला लेमु ओङच्येते ख्योकोनते छ्याःङ आश मेतान थेमे परमेश्वरला छ्या मास्येकीन दि सा लुङबादु खेराङला लेमु खित्कान्ते सुङ मेताच्योक खाईन देता ओतान। 13 गोमा थोक ओता ईन्सीनोङ येशू ख्रीष्ट स्यिङगी थामला टाँए खाला स्यिजीन थे जीउदुकी थेन्दाते ठागी खित्सादु थाचेन ख्योकोनोङ थेत्ताङ जीउज्यीकराङ ओङगीन परमेश्वर दोन्दु ओङा थुपा ओत। 14 च्यिला सासीन ङुरूङ गाङेला डिक्पा खाला तेरकान्ते ख्रीष्टराङ ईन। ख्योकोन ज्येन ज्येन जातकी मित्ताङ ङ्योकोन इस्राएली फारदु ओताते मिडिक्च्येते बात तोर च्युत्कीन थेकी ङुरूङ गाङेला डिक्पा खाईन बिन्गीन जातज्यीगी मिराङ जोसुङ। 15 चुक खाईन सासीन ख्रीष्टकी थे खोरोङ ज्यान बिन्गीन स्यिइन ङ्योकोन इस्राएलीला दोक खि, थोक माकेत सिन बिन्दाते परमेश्वर नियम काम लै मिक्किच्या जोसुङ। थे नियमचेन ङुरूङ फारदु मिडिक्च्येते बात ओतान। दोक खाईन थेकी गोमा खुदुक खुदुक जात ओताते मि ङुरूङला थे खोरोङताङराङ डिक्पा खाईन जातज्यीगी मिराङ जोसुङ। 16 दोक खाईन थेकी ङुरूङला जीउज्यीकराङ जोसुङ। थेमे थे खोरोङ स्यिङगी थामला टाँए खाईन स्याप्की खित्सादु थोक खाईन जीउज्यीकराङ जोबाते ङुरूङला थेकी परमेश्वरताङ डिक्पा खाईन बिन्सुङ। दोक खाईन थेकी ख्योकोनताङ ङ्योकोन फारदु थेमे परमेश्वरताङ ङुरूङ फारदु ओताते मिडिक्च्येते बात गाङे तोर च्युत्सुङ। 17 येशू ख्रीष्टकी देमा वाकीन गोमा परमेश्वरला छ्या मास्येकीन दि सा लुङबादु खेराङला लेमु खित्कान्ते सुङ मेताच्योक खाईन देता ओताते ख्योकोन थेमे परमेश्वरगी छाने खाबाते ङ्योकोन इस्राएली ङुरूङ गाङेला थोक खाईन डिक्पा खाबाते बात छ्या स्ये च्युत्कीन बिन्सुङ। 18 थेकी खाबाते कामगी खित्सादु थाचेन ख्योकोन ज्येन ज्येन जातकी मि ईन्सीनोङ ङ्योकोन इस्राएली ईन्सीनोङ ङुरूङ गाङेकी ङेताते परमेश्वर आत्मे छ्य्वापेईराङ आबा परमेश्वर दोन्दु ड्वा थुप्क्यो। 19 थोगी ज्येन ज्येन जातकी मि ईन्सीनोङ थाचेन ख्योकोनोङ परमेश्वर सन्तान ओङगीन थे खाम्बे मिओन ओङा ओत। गोमाचेन ख्योकोन थे सन्तान मेतान। थेमे थेकी थे खोरोङ सन्तानला तेरच्येतेबा ङेत्च्येते ख्योकोनते छ्याःङ हक मेतान। 20 येशू ख्रीष्टकी खटे खाबाते मिओनताङ परमेश्वर बात खित्कान्ते मिओनगी तिङाते जगी लाक गारो चिबाच्योक खाईन ख्योकोनला ज्याक्पा ओत। थे जगीते आउदी काम लै खित्च्येते थे मेताला छ्याःङ खिता मुथुप्च्येते दोचेन येशू ख्रीष्टराङ ईन। 21 परमेश्वर सन्तान गाङेला सेमज्यीकराङ खाला डिक्पा खाला परमेश्वर देताला सिन दि जगी लाक प्रभु येशू ख्रीष्टकी मन्दिर जोइन ओत। 22 ज्येनतेबा च्योकराङ थेत्ताङ जीउज्यीकराङ ओङाते ख्योकोनोङ दोक खाला जोइन ओताते मन्दिर ईन। थे खोरोङ आत्मे छ्य्वापेई परमेश्वर दि मन्दिरदु देत्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.