एफिसी 1 - जिरेल1 दि चिट्ठी टिक्कान्ते ङा पावल ईन। ङा येशू ख्रीष्टकी खटे खाबाते मि ईन। ङा थोक्ते मि ईन सिन परमेश्वरगी ङाला छाने खाबा ओत। ङा दि चिट्ठी एफिसस सारदु ओताते परमेश्वर सन्तान ख्योकोनला टिगीन ओत। ख्योकोन येशू ख्रीष्टला विश्वास खित्कान्ते थेमे थेत्ताङ जीउज्यीकराङ ओङाते मि ईन। 2 ङुरूङ आबा परमेश्वरताङ प्रभु येशू ख्रीष्टकी ख्योकोनला दया खाला लेमु खिनराङ देत्स्यीत। ख्रीष्टकी खित्सादु परमेश्वरगी खाबाते कामगी बात 3 ङुरूङ प्रभु येशू ख्रीष्ट आबा परमेश्वरते जय जय खिइ। च्यिला सासीन ख्रीष्टकी खित्सादु थेकी स्वर्गनेकी थे खोरोङगी तेरच्येते आशी जति गाङे ङुरूङला बिन्दा ओत। 4 च्यि सासीन थे खोरोङ दोन्दु सेम खुदुक गालाते थेमे छ्याःङ गल्ती मेताते मि ओङस्यीत सिन ख्रीष्टकी खित्सादु थेकी ङुरूङला दि सा नाम ज्वा भन्दा गोमाराङ छाने खाबा ओतान। ङुरूङला ङिङज्ये खाईन 5 थेजीनराङ थेकी येशू ख्रीष्टकी खित्च्येते कामगी खित्सादु ङुरूङला थे खोरोङ धर्म-पुत्र जोइओ सिन साबा ओतान। थे खोरोङगी थोक खिता सेम खाबेकीराङ परमेश्वरगी दोक दोक खाबा ओतान। 6 थे खोरोङ ङिङज्येते फुज्युङ येशू ख्रीष्टकी खित्सादु थेकी ङुरूङला खितासम्म दया खाबा ओत। थे खोरोङ चुक अचम्ब खाला दया खित्कान्ते ईन्दे सिन थेते जय जय खिता थुप्स्यीत सिन थेकी ङुरूङला गोमाका होथोक थोक खाबा ओतान। 7 थेमे ङुरूङला पापकी सजायदुकी डेलाला थेकी ख्रीष्टला स्याप्ला दुरू ताङसुङ। ख्रीष्ट स्यिजीन थे जीउदुकी थेन्दाते ठागी खित्सादु थेकी ङुरूङगी खाबाते पाप गाङे माफ बिन्दा ओत। थे खोरोङ आउदी खाला दया खित्कान्ते ईन्देकी 8 थेकी ङुरूङला थोक अचम्ब खाईन पापदुकी टालाते ईन। दि काम चुक आउदी बुद्धि पुरे खाईन खाबाते ईन्दे सिन थेकी ङुरूङला लेमु खाईन खो च्युत्सुङ। 9 थेकी गोमा सुङलाङ छ्या स्ये च्युता मेताते थे खोरोङगी गोमामेईराङ खिता चालाते येशू ख्रीष्ट छ्य्वापेकी खिओ साबाते बात च्यि ईन्दे सिन था ङुरूङला छ्या स्ये च्युत्सुङ। 10 थे खोरोङगी तोके खाबाते ठीक समय छाङनामेईचेन गोमामेईराङ येशू ख्रीष्ट छ्य्वापेकी खिओ सिन थे खोरोङगी खिता चालाते काम थेकी खासुङ। दि काम च्यि ईन्दे सासीन स्वर्गने ओताते ईन्स्यीत, पृथ्वीदु ओताते ईन्स्यीत, जो ईन्सीनोङ जे ईन्सीनोङ गाङेला येशू ख्रीष्ट छ्य्वापेकी डिक्पा खाला थे अधीनलाराङ ज्य्वाच्येते ईन। 11 परमेश्वरचेन गोमा थे खोरोङगी खिओ सिन टुङ्गो खाबाते गाङे काम खिता चाला च्योकराङ खाला खित्कान्ते ईन। थे दोक खित्कान्ते ईन्देकी थेकी ङ्योकोनला गोमामेईराङ ख्रीष्टकी छ्य्वापेकी छाने खिओ सिन साबा ओतेकी साबा च्योकराङ खाईन छाने खासुङ। 12 थे खोरोङ आउदी अचम्ब खाला काम खित्कान्ते ईन सिन थेते जय जय खिता थुप्स्यीत सिन ज्येनगी भन्दा गोमामेई ख्रीष्टला विश्वास खित्कान्ते ङ्योकोनला थेकी होथोक खाईन छाने खासुङ। 13 थेमे सत्यते बात थोनामेई ख्योकोनोङ ख्रीष्टताङ जीउज्यीकराङ ओङसुङ। पापकी सजायदुकी थारच्येते होथे गा लाङच्येते बात ङेन्गीन ख्रीष्टला विश्वास खानामेकी गोमा थे खोरोङगी ख्रीष्टकी छ्य्वापेकी तेरग्यो साबाते परमेश्वर आत्मा परमेश्वरगी ख्योकोनलाङ बिन्सुङ। दोक खाईन थेकी थे खोरोङ आत्मा बिन्दातेचेन ख्योकोनोङ थे खोरोङ मिराङ ईन सिराला छाप ग्यापाते च्योकराङ ओङसुङ। 14 ङुरूङगी परमेश्वर आत्मा ङेता ओतेकी परमेश्वरगी तिरी ङुरूङला तेरग्यो सिन साबा ओताते जति गाङे ङेत्क्यो सिन ङुरूङगी छ्या स्येक्यो। थेकी थे खोरोङ मि गाङेला पूरो खाला पापदुकी टाल्ला थे खोरोङताङ देत ज्युत्जीन थेकी ङुरूङला तेरग्यो सिन साबा ओताते जति गाङे ङुरूङगी ङेत्क्यो। थेकी खाबाते होदि गाङे काम ताला थे चुक अचम्ब खाला काम खित्कान्ते ईन्दे सिन ङुरूङगी थेते जय जय खिता थुप्स्यीत सिन परमेश्वरगी होदि गाङे काम खाबाते ईन। परमेश्वरला धन्यवाद तेरच्येते थेमे प्रार्थना खित्च्येते बात 15 बात दोक दोक ईन्देकी ख्योकोनगी प्रभु येशूला विश्वास खिदुक्लो थेमे परमेश्वर सन्तान गाङेला ङिङज्ये खिदुक्लो सिरा थोबा छुरनामेई परमेश्वरला प्रार्थना खित्जीन 16 ख्योकोनला सम्झे खिन ख्योकोन लाईदु थेला धन्यवाद तेरा ङे नोमुङ ताङा मेत। 17 ङुरूङ प्रभु येशू ख्रीष्टते परमेश्वरगी थे खोरोङ चुक्ते ईन्दे थेमे चुक अचम्ब खाला काम खिन ओते सिन खोबाला ख्योकोनला बुद्धि तेरस्यीत सिन ङा प्रार्थना खिओ। परमेश्वरचेन छ्येज्यीक शक्ति ओताते आबा ईन। 18 ङा ज्येनोङ च्यि सिन प्रार्थना खिते सासीन परमेश्वरगी ख्योकोनला थे खोरोङ दोन्दु स्योक सिन कातोङजीन तिरी ख्योकोनते च्यि आश ओते सिन साबाते बात थेमे थे खोरोङ सन्तान ज्येनतेबाताङराङ तिरी ख्योकोनगी ङेत्च्येते जति चुक लेमु ईन्दे सिरच्येते बात थेकी ख्योकोनला लेमु खाला खो ज्युत्स्यीत सिन प्रार्थना खिओ। 19 थेमे ख्रीष्टला विश्वास खित्कान ङुरूङ नाङ परमेश्वरगी चुक छ्येज्यीक शक्तिकी काम खिन ओते सिन ख्योकोनला छ्या स्ये ज्युत्स्यीत सिनोङ प्रार्थना खिओ। थेकी ङुरूङ नाङ जुन छ्येज्यीक शक्तिकी काम खिन दुक होथे शक्तिकीराङ 20 ख्रीष्टला स्यिसादुकी सोम्बो लोगीन स्वर्गने थे खोरोङ सामे छ्य्वापा ज्याक्पा ओत। 21 थेकी सा नाम खाङ ओताते परमेश्वर दूतओन ईन्स्यीत, ल्हा ल्हन्डीक ईन्स्यीत, छ्ये टेक्टे जो ईन्सीनोङ जे ईन्सीनोङ होदिबा गाङेला राज्य खित्च्येते अधिकार ख्रीष्टला बिन्दा ओत। थेमे थेकीराङ ख्रीष्ट छेत छ्ये होदिबा सुङ मेन, दि जुगला ईन्स्यीत, था ओङच्येते सत्यते जुगला ईन्स्यीत ख्रीष्टराङ गाङे भन्दा छ्येते ईन सिन साबा ओत। 22 दोक खाईन थेकी जो ईन्सीनोङ जे ईन्सीनोङ गाङेपा गाङेला ख्रीष्टकी अधीनलाराङ ज्याक्पा ओत। दोक खाला गाङेपा गाङेला राज्य खित्कान्ते ख्रीष्टलाराङ थेकी गाङेपा जम्मा ओङकान्ते येशू ख्रीष्ट मिओनतेङ छ्येते जोसुङ। दोक खाईन ख्रीष्टचेन थे खोरोङ मिओनते गोः च्योक ओङसुङ। 23 थेमे थे मिओनचेन थे जीउ च्योक ओङसुङ। थे खोरोङ मिओनला गोच्येते जति तेरकान्ते थेमे सा नाम खाङ खापा चुक ओङा फाप्च्येते ईन्दे थोकराङ ओङ च्युत्ला गाङेपा गाङेला राज्य खित्कान्तेङ ख्रीष्टराङ ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.