कलस्सी 4 - जिरेल1 थोकराङ खाला मालिकतेबालाङ ङा च्यि सिते सासीन स्वर्गने ख्योकोनतेङ मालिक ओत थेमे खेराङगी खाबाते गाङे कामताङ बातकी हर हिसाब ङीमा लेनज्यीक थेला तेरा फाप्क्यो सिन ठेम्बा खि। थोगी खेराङ योक्पो योङमुला थेबाङ मिराङ ईन सिरच्येते बात टोक मेज्येता खाला थेबाला दुक्पा मातेर, थेबाला गोच्येते जेसुकै दाङच्या खाला बिन। गाङेकी खिता फाप्च्येते काम 2 थेमे ख्योकोन गाङेकी परमेश्वरला प्रार्थना खिन देता नोमुङ मातोङ। प्रार्थना खित्जीन खेराङ परमेश्वरताङ बात खिन ओत सिन छ्या स्येबा खि, थेला धन्यवादोङ बिन। 3 थेमे थे खोरोङगी गोमा सुङलाङ छ्या स्ये च्युता मेताते ख्रीष्टकी बात मिओनला लोपाला परमेश्वरगी ङ्योकोनला मौका तेरस्यीत सिन ङ्योकोन लाईदुङ प्रार्थना खि। होथे बात मिओनला लापेकी खित्सादु थरिङोला ङाला जेलदु लुक्पा ओत। 4 ङे ङाराङगी खिता फापा च्योकराङ खाला होथे बात मिओनगी लेमु खाला खोच्या खाला लोपा थुप्स्यीत सिनोङ प्रार्थना खि। 5 येशू ख्रीष्ट मि मेन्दाते मिओनताङ चुक खाला बात खिता फाप्कीते, थेबे दोन्दु च्यि काम खिता लेमु ईन्दे सिन लेमु खाला विचार खाला खि। दोक्ते काम खिता ङेत्च्येते समय था काल्बा मेत सिन छ्या स्येला टोले मिक्किता खाला दोक खिन देत। 6 थेबाताङ बात खित्जीन थेबे सेमला फोक्च्येते बात मिक्किता खाला खा छ्येत लेमु खाला बात खि। थोक खासीन थेबेकी खइँदा बात ठिजीन थे बात चुक खाला सिरा लेमु ईन्ताका सिन विचार खाला लाःपा थुप्क्यो। पावलगी चिट्ठी टिला सिन्दे खाला साबाते बात 7 ज्येन बात च्यि सासीन ङिङज्येते न्वा टाइकिकसकी थेपा लेप्नामेई ख्योकोनला ङे बात गाङे लाःप्क्यो। दिकी खिता फापा च्योकराङ खाला प्रभु येशू काम खिन ओत। दिङ ङा च्योकराङ प्रभु येशू काम खित्कान्ते मि ईन। 8 ङ्योकोनला देपा चुक दुका सिन ख्योकोनगी लेमु खाला छ्या स्येला पीर मिक्किस्यीत थेमे दिकी खुलाबाते लोन थोला ख्योकोनगी आँट ङेत्स्यीत सिनराङ ङे दिला ख्योकोन ओत्सापा ताङाते ईन। 9 ङे दित्ताङराङ खेराङ युलगी मि ओनेसिमसलाङ ताङा ओत। दिङ दोक्पोई येशू ख्रीष्टला लेमु खाला विश्वास खित्कान्ते ङुरूङ ङिङज्येते न्वाराङ ईन। दुरू च्यि च्यि ओङसुङा, बात चुक दुका सिन दिबा ङिबोकी ख्योकोनला गाङे लेमु खाला लाःप्क्यो। 10 दुरू ङात्ताङराङ जेलदु ओताते अरिस्तार्खसते ख्योकोनला नमस्ते ओत्लो। थेमे बारनाबास न्वा फाप्च्येते मर्कूसतेङ नमस्ते ओत्लो। मर्कूसला च्यि सिसे थेमे थेला चुक खिता फाप्कीते सिन ङे ख्योकोनला गोमाकाराङ साकीन सिन्दा ओत। था थे ख्योकोन ओत्सापा वासीन थेला लेमु खि। 11 थेमे युस्तस सिराते येशूतेङ नमस्ते ओत्लो। येशू ख्रीष्टला विश्वास खित्कान्ते यहूदी नाङ अरिस्तार्खस, मर्कूस थेमे युस्तस दिबा सुमबोकामा ज्येनगीङ परमेश्वर राज्य बात छ्या स्येला ङेन्स्यीत सिन ङात्ताङ डिक्ला ख्रीष्टकी बात लोप्कीन ओत। दिबेकी दोक खाईन मद्धत खाबाते ङाला लेमु ओङसुङ। 12 थोकराङ खाला खेराङ युलगी मि इपाफ्रासतेङ ख्योकोनला नमस्ते ओत्लो। थेङ येशू ख्रीष्ट काम खित्कान्ते मिराङ ईन सिन ख्योकोनला छ्याराङ ओत। ख्योकोन काम बात जे कुरोलाङ पाको गालाते मि ओङस्यीत थेमे परमेश्वरगी खेराङला च्यि खि सिका सिन लेमु खाला छ्या स्येला खि साबा च्योकराङ खित्स्यीत सिन दिकी ख्योकोन लाईदु परमेश्वरताङ आउदी खाला प्रार्थना खिदुक। 13 ख्योकोन लाईदुकामा मेन, दिकी लाओडिसियाताङ हिरापोलिस सारदु ओताते येशू ख्रीष्ट मिओन लाईदुङ नोमुङ टोक मेज्येता खाला आउदी खाला प्रार्थना खिदुक। दि ङेराङ थोङाते ईन। 14 थेमे ङिङज्येते डाक्टर लूका थेमे डेमासतेङ ख्योकोनला नमस्ते ओत्लो। 15 लाओडिसियादु ओताते आज्यो न्वाओनलाङ ङेते नमस्ते ओत्लो सि। थोकराङ खाला निम्फसला थेमे थे खाम्बादु जम्मा ओङकान्ते येशू ख्रीष्ट मिओनलाङ नमस्ते ओत्लो सि। 16 थेमे खेराङ गाङेकी थोच्या खाईन पढे खाईन सिन्नामेकी दि चिट्ठी ख्योकोनगी लाओडिसियापा थोङ। ख्योकोनगी च्योकराङ खाला दि चिट्ठी थेरू जम्मा ओङकान्ते येशू ख्रीष्ट मि गाङेकी थोच्या खाला पढे खिता फाप्क्यो। थोकराङ खाला ङे थेबाला ताङाते चिट्ठीचेन ख्योकोन ओत्सापा थोङ साला गाङेकी पढे खि। 17 थेमे अर्खिप्पसला च्यि सिसे सासीन प्रभु येशूकी थे खोरोङला जिम्मा बिन्दाते काम मासिनथुप खिनराङ देत सि। 18 थेमे ङेतेङ ख्योकोनला नमस्ते सिनचेन ङा पावल ङाराङ लाक्पेकीराङ टिगीन ओत। ङा जेलदु ओताते बात टोक माज्येत। प्रभु येशू ख्रीष्टकी ख्योकोनला दया खिनराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.