कलस्सी 3 - जिरेलसाम्बाते जुनी ङेताते मिओनगी चुक खिता फाप्कीते 1 परमेश्वरगी ख्योकोनला ख्रीष्टताङराङ सोम्बो लोगीन साम्बाते जुनी बिन्दा ओत। थोगी था ख्योकोनगी स्वर्गने सु ओते, चुक चुक ओङगीते सिन थेने बात विचार खि। स्वर्गनेचेन ख्रीष्ट ओत, थे थेने परमेश्वर सामे छ्य्वापा देता ओत सिन टोक माज्येत। 2 ख्योकोनगी दि सा लुङबे मिओनगी खिताच्योक खिता माछोल। बरू स्वर्गने देत्कानताङ थेने चुक चुक ओङगीते सिन विचार खाला थेने खित्च्येते च्योक्ते कामताङ बात खित्च्ये छ्य्वापा सेम लै खि। 3 च्यिला सासीन खेराङ ख्रीष्टताङ स्यिइन सिन्दाते मि ईन्देकी ख्योकोन गोमाबा खाबाच्योक खित्च्ये छ्य्वापेई ठाल्गीन सिन्दा ओत। ख्योकोनगी ख्रीष्टताङ ङेताते साम्बाते जुनी चुक्ते ईन्दे सिन परमेश्वरगी थरिङोला ज्येनला छ्या स्ये च्युता मेत। ख्रीष्ट परमेश्वरताङ स्वर्गने ङ्योम्बु ओतेकी मिओनगी मोथोङो। 4 ङुरूङला साम्बाते जुनी तेरकान्ते ख्रीष्ट था तिरी गाङेकी थोङच्या खाला देमा ग्युरला ओङगो। थेजीनराङ ख्योकोन परमेश्वरगी ज्वा चालाच्योक लेमु गाल्गीन मान ङेत्कीन थेत्ताङ ङ्योम्बु ओताते गाङेकी थोङगो। 5 थोगी था ख्योकोनगी दाक्पोन खुशी खिन दाक्पोनला च्यि च्यि खिता सेम लाङगीका थोकराङ खिन देता थोङ। च्यि सासीन रन्डीबाजी थेमे होदि च्योक्ते खिता मेङच्येते ङोचा लाङच्येते काम माकेत, होदोक्ते काम माक्याबाला ओङराङ मेङगो सिराच्योक माकेत, लोभ माकेत, लोभ खित्च्येतेनी परमेश्वर लाईदु ल्हा लु माने खाबा छेतराङ मेलेबा ईन। 6 परमेश्वरगी खि साबाते माङेन्ला होदोक दोक्ते काम खित्कान्ते मिओनला था थेकी स्येदाङगी चूर गाल्ला सजाय तेरग्यो। 7 ईन्दाका गोमा गोमाबा ख्योकोनोङ ज्येनगी खाबाच्योक होथोक्ते कामराङ खिन ओतान। 8 थाचेन ख्योकोनगी दोक दोक खिता थोङ। च्यि सासीन सुङताङ स्येदाङ माकेत, स्येदाङ फुङ मापुङ, मि छतिपति माक्युर, मि मामोत, फोर बात माकेत 9 थेमे दोक्पोईकी ज्येनज्यीकला ढाँर माकेत। ख्योकोनगीनी मेलेबा कामताङ बात खित्च्येते बानी ताङगीन 10 खेराङ बानी खुदुक गाल्गीन लेमु कामताङ बात खिताला स्यूबा ओत। परमेश्वरगीराङ ख्योकोन बानी दोक लेमु जोबाते ईन। थे खोरोङ चुक्ते ईन्दाका सिन झन लेमु खाला छ्या स्येस्यीत थेमे थे खोरोङ च्योकराङ लेमु डुइन डोरस्यीत सिन परमेश्वरगी ख्योकोन बानी झन झन लेमु जोइन ओत। 11 थेकी दोक लेमु खिन ओताते मि नाङ ग्रीक ईन्स्यीत कि यहूदी ईन्स्यीत, जीउला खतकी चिनु जोबाते मि ईन्स्यीत कि थे चिनु माजोबाते मि ईन्स्यीत, ज्येन ज्येन लुङबे मि ईन्स्यीत कि सिथिया सिराते मिओन ईन्स्यीत, योक्पो योङमु ईन्स्यीत कि ज्येन ईन्स्यीत गाङे थोजोराङ ईन। सु च्यि जातकीते ईन्दे, सु छ्ये टेक्टे ईन्दे सिरच्येते बात ओङा मेङगो। ख्रीष्टकामा छ्ये ईन। थे खोरोङ मि गाङे सेमगी नाङ थेराङ देत्क्यो। 12 परमेश्वरगी ख्योकोनला थे खोरोङ सन्तान सिन छाने खाईन ख्योकोन सेम खुदुक जोबा ओत, थेकी ख्योकोनला आउदी खाला ङिङज्ये खिओ। ख्योकोन बात दोक ईन्देकी ख्योकोनगी चुक चुक खिता फाप्कीते सासीन पीर फापा ओतातेबाला पीर माकेत सिन सिरा फाप्क्यो, ज्येनगी दुक्पाला ता फाप्क्यो, ङा ङाराङ ईन सिराच्योक खिता मेङगो, गाङेताङ खा छ्येत लेमु खिता फाप्क्यो, होत्ताराङ स्येदाङ खिता मेङगो, 13 सुङताङ होपकी जोप मिक्किता खाला बरू सै खाला देत, खेराङ नाङ सुइँदाताङ खइँदा स्येदाङ ओत्सीन स्येदाङ साला माज्यो, थोक्तेला माफ बिन। प्रभु येशूकी खेराङ पाप माफ बिन्दा च्योकराङ खाला ख्योकोनगीङ खेराङ नाङ माफ बिन। 14 दोक दोककामा खाला मेङगो। खेराङ नाङ ङिङज्ये खितरीङ खि, ङिङज्ये खासीनकामा ख्योकोन गाङेराङ सेमज्यीकराङ खाला डिक्ला थुन्ला देता थुप्क्यो। 15 ख्रीष्टकी ख्योकोनला सेम ढुक्क खाला देत ज्युत्च्येते ईन्देकी ख्योकोन सेमज्यीकराङ खाला डिक्ला थुन्ला देत। ख्योकोन जीउज्यीकराङ ओङाते गाङेराङ डिक्ला थुन्ला देत्स्यीत सिनराङ परमेश्वरगी ख्योकोनला थे खोरोङ दोन्दु स्योक सिन काताङाते ईन। परमेश्वरगी खाबाते गाङे कामगी लाईदु ख्योकोनगी थेला धन्यवाद बिन। 16 थेमे खेराङगी ख्रीष्टकी बात झन झन लेमु खाला छ्या स्येबा थुप्स्यीत सिन थे बात ख्योकोनगी सेमगी नाङ गुने खिनराङ देत। चुक सासीन परमेश्वरगी बिन्दाते बुद्धिकी ख्योकोनगी थे बात खेराङ नाङ लोप्कीन देत, थेरू साबा च्योकराङ खिन देता फाप्क्यो सिन दोक्पोईकी ज्येनज्यीकला सिनराङ देत। थेमे परमेश्वरगी खेराङला चुक दया खासुङा सिन गा खिन थेला धन्यवाद सिनकामा खेराङ नाङ भजन लिन्च्येते, परमेश्वरला छ्ये जोच्येते लु लिन्च्येते थेमे परमेश्वर आत्मेकी लिन च्युताते ज्येनोङ लु लिन्च्येते खि। 17 ख्योकोनगी काम बात जे खासीनोङ प्रभु येशू मिओनगी खिता फापा च्योकराङ खाला खि। थेमे प्रभु येशू छ्य्वापेई आबा परमेश्वरला धन्यवाद तेरगीन देत। खाम्बे मि सु सुकी चुक खिता फाप्कीते 18 थेमे फेम्मे मिवे, दाक्पोन ख्योबो अधीनला देत। ख्योकोन प्रभु येशूताङ जीउज्यीकराङ ओङा ओताते मिकी दोक खिता लेमु ईन। 19 थेमे ख्योओ मिवे, दाक्पोन फेम्मेला ङिङज्ये खि। थेबाताङ स्येदाङ खाला थाप्च्या दुङच्या खाला दुक्पा मातेर। 20 थोकराङ खाला फिजावे, जहिलेङ आबा आमेकी लाःपा कोताते ङेन। ख्योकोनगी दोक खासीन प्रभु येशूला गा लाङगो। 21 थेमे आबातेबा ख्योकोनगीङ दाक्पोन फुज्युङ फुमुला जहिलेङ थाप्च्या ङारच्येतेकामा माकेत। थोककामा खिन देत्सीन जस्तो लेमु खित्जीनोङ मेङच्याक्वा सिराच्योक खाला थेबेकी सेम सेत्क्यो। 22 थेमे योक्पो योङमुतेबा ख्योकोनला ङा दोक सिओ। च्यि सासीन ख्योकोनगी जहिलेङ दाक्पोन मालिककी लाःपा कोताते ङेन। थेबेकी खेराङला आउदी लेमु खाला काम खित्कान्ते दुका सिरस्यीत सिन थेबे मिगी दोन्दुकामा स्याप स्याप खाला काम खित्जुम माकेत। प्रभु येशूला मन परे मिक्किच्येते छ्याःङ खिता मेङगो सिन ज्यीबा खिन खेराङ मालिक दोन्दु मेत्सीनोङ थेबेकी कोताते लेमु खाला सेम लै खाला खि। 23 थेबा खेराङ दोन्दु ओत्सीनोङ मेत्सीनोङ थेबे लाईदु मेन्देकी खेराङगी खिता फाप्च्येते जे कामोङ प्रभु येशू लाईदु खाबाते ईन सिराच्योक खाला थुपासम्म स्येत खाला खि। 24 थेकी तिरी थे खोरोङ मिओनला इनाम सिन तेरग्यो साबाते जति ख्योकोनगीङ ङेत्क्यो सिन ख्योकोनला छ्याराङ ओत। ख्योकोनगी खिन ओताते काम खेराङ मालिक प्रभु ख्रीष्ट लाईदु ईन सिन टोक माज्येत। 25 थेमे दि बादोङ टोक माज्येत। च्यि सासीन परमेश्वरगी सुङलाङ काका पाका मिक्किता खाला न्याय खिओ। मेलेबा काम खित्कान्ते मि जोराङ ईन्सीनोङ थेकी थेबे काम ताला सजाय तेरग्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.