कलस्सी 2 - जिरेल1 ङा ख्योकोन लाईदु दोक खाला स्याप स्याप खाला काम खिन ओताते बात ख्योकोनगी छ्या स्येबा फाप्क्यो। ईन्दाका ख्योकोन लाईदुकामा मेन, लाओडिसिये सारदु ओताते थेमे थातासाक नोमुङ माठेताते ज्येनोङ येशू ख्रीष्ट मि गाङे लाईदु ङा दोक खाला दुक्पा खिन ओत। 2 ख्योकोन थेमे होथेबा ज्येन गाङेकी आँट ङेत्ला दोक्पोईकी ज्येनज्यीकला ङिङज्ये खिन गाङेराङ सेमज्यीकराङ खाला डिक्ला देत्स्यीत थेमे परमेश्वरगी गोमा सुङलाङ छ्या स्ये च्युता मेताते बात च्यि ईन्दाका सिन ख्योकोन गाङेकी लेमु खाला छ्या स्येला पूरो खाला खोबा थुप्स्यीत सिनराङ ङा दोक दुक्पा खाला खाला काम खिन ओत। होथे बात लेमु खाला छ्या स्येच्या साबातेचेन ख्रीष्टला छ्या स्येच्येतेराङ ईन। 3 ख्रीष्टताङकामा परमेश्वर बुद्धि ओत थेमे गाङे बात थेकीकामा लेमु खाला छ्या स्येक्यो। परमेश्वरगी छ्या स्ये ज्युता चालाते गाङे बात थेकीकामा पूरो खाला छ्या स्ये ज्युता थुप्क्यो। 4 सुङगीङ ख्योकोनला स्यीम्बु स्यीम्बु बात खाला लुला खोपरोङ छ्य्वापा लै खिता मुथुप्स्यीत सिनराङ ङा दि बातओन सिन ओत। 5 ङा ख्योकोनताङ ङ्योम्बु मेत्सीनोङ ख्योकोनला चुक ओताका, च्यि खिन ओताका सिन आउदी खाला सम्झे खिओ। ख्योकोन डिगीन थुन्गीन देताते थेमे ख्रीष्टला विश्वास खिन देता ओताते बात सम्झे खित्जीनचेन ङाला गा लाङगीदुक। ख्रीष्टताङ जीउज्यीकराङ ओङनामेई चुक ओङगीते 6 येशू ख्रीष्टराङ खेराङ मालिक ईन सिन ख्योकोनगी थेला विश्वास खिताला स्यूबा ओत। थोगी थेत्ताङ जीउज्यीकराङ ओङाते मिकी काम बात चुक खिता फाप्च्येते ईन्दे ख्योकोनगी थोकराङ खिन देत। 7 च्यि सासीन येशू ख्रीष्ट सु ईन्दे, चुक्ते ईन्दे सिन खेराङगी छ्या स्येबाते बात ङेन्दा नोमुङ मातोङ, झन झन लेमु खाला थे बातला खि साबा च्योकराङ खिन येशू ख्रीष्टला विश्वास खिन देत, ज्येनगी जे सासीनोङ खेराङला लाप्कीन बिन्दाते येशू ख्रीष्ट बातला छ्याःङ शंका माकेत थेमे परमेश्वरगी खेराङला चुक लेमु खासुङा सिन थेला धन्यवाद सिरा नोमुङ मातोङ। 8 ख्योकोन च्याङबो खाला देत। सुइँदेकी दोक दोक खासीन लेमु ओङगो सिरजीन थेबे बात माङेन। थेबेकी लोप्च्येते बातनी छ्याःङ काम लै मिक्किच्येते ईनराङ मेन्दे बात ईन। थोक्ते बातनी दि सा लुङबा खाङ मिओनगी खोपरोङ ज्युज्यु पुर्खे पालोमेई माने खिन वाबाते रीतिथिति बातकामा ईन। थोक्ते बात ख्रीष्ट सु ईन्दे, चुक्ते ईन्दे सिरच्येते बातताङ बान्दा मिडिगो। 9 परमेश्वर जस्तो ईन ख्रीष्टोङ होथोकराङ ईन, मि जुनी लाबा ओत्सीनोङ ख्रीष्टताङ परमेश्वरला छ्याःङ फरक मेत। 10 थेमे ख्रीष्टकी खित्सादुराङ ख्योकोनगी परमेश्वरगी तेरच्येते साम्बाते जुनी ङेत्कीन खेराङला गोच्येते जति गाङे ङेता ओत। सा नाम खाङ ओताते परमेश्वर दूतओन ईन्स्यीत, ल्हा ल्हन्डीक ईन्स्यीत, छ्ये टेक्टे जो ईन्सीनोङ जे ईन्सीनोङ होदिबा गाङे ख्रीष्टकी अधीनला ओत। होदिबा गाङे भन्दा छ्येतेचेन थेराङ ईन। 11 ख्रीष्टताङ जीउज्यीकराङ ओङगीन ख्योकोन खतकी चिनु जोबाते मि ओङा ओत। दोक साबाते ख्योकोनला सुइँदेकी जीउला खतकी चिनु जोकीन बिन्दाते मेन, बरू ख्रीष्टकी खेराङ मेलेबा सेम खुदुक जोबा ओतेकी था ख्योकोन खुदुक मि ओङा ओत साबाते ईन। 12 चुक सासीन ख्योकोनला बप्तिस्मा तेरजीन ख्योकोन छ्युई नाङ नुप्जीन ख्रीष्टताङराङ स्यिइन थेत्ताङ दिबाते ईन। थेमे छ्युदुई थेन्जीन परमेश्वरगी ख्योकोनला ख्रीष्टताङराङ सोम्बो लोक्पाते ईन। ख्रीष्टला स्यिसादुकी सोम्बो लोक्कान्ते परमेश्वरताङ छ्येज्यीक शक्ति ओत सिन थेला विश्वास खाबेकी थेकी ख्योकोनला थोक खाबाते ईन। 13 खेराङ सेम मेलेबा ओत्कीन गोमाबा ख्योकोन खेराङला चुक खिता सेम लाङगीका थोकराङ खिन पाप खिन देतेकी परमेश्वर लाईदु स्याप छेतराङ गाला ओतान। ख्योकोन थोक्ते मि ओता ईन्सीनोङ परमेश्वरगी ख्योकोनला ख्रीष्टताङराङ सोम्बो लोगीन थेला बिन्दा च्योक्ते साम्बाते जुनी बिन्सुङ। थेकी ङुरूङगी खाबाते पाप गाङे माफ बिन्दा ओत। 14 चुक सासीन ङुरूङगी खाबाते पापबरी थेकी गाङे टिकीन ज्याक्पा ओतान। थोक खाईन टिबाते स्यिउला ङुरूङ दोषी ईन, सजाय तेरा फाप्क्यो सिनोङ टिबा ओतान। थेकी थे स्यिउ स्यिङगी थामला काँटी ग्याप्कीन टाँए खाईन ङुरूङ पापी ईन, ङुरूङगी सजाय ङेता फाप्क्यो सिन थेरू टिबा ओताते बातबरी गाङे मेटे खासुङ। 15 थेमे परमेश्वर दूतओन ईन्स्यीत, ल्हा ल्हन्डीक ईन्स्यीत सा नाम खाङ राज्य खित्कान्तेबे अधिकार थेकी थे खोरोङ लाःक्तु लासुङ। थेमे थेबा सुङगीङ था नोमुङ राज्य खिता मेङेदो सिन गाङेपा गाङेला छ्या स्ये च्युत्सुङ। दोक दोकचेन थेकी ख्रीष्ट स्यिङगी थामला टाँए खाईन स्याप्की खित्सादु खाबाते ईन। 16 बात दोक दोक ईन्देकी सुइँदेकी ख्योकोनला च्यिला दि सेइते, दि थुङगीते, च्यिला दि दि चाड माने मिक्किते, च्यिला औंसी माने मिक्किते, सन्चारी छोमु दि दि खि, दि दि माकेत सिरजीन ख्योकोनगी थोक्ते मि बातला नामज्योकराङ मासेत। 17 दोक्ते साच्या थुङच्याताङ चाड माने खित्च्येते बाततेबा गाङे परमेश्वरला माने खिताला ख्रीष्ट मावाथुप ङेन्दा फाप्च्येते बातकामा ओतान। थोगी दि बाततेबा खालि ख्रीष्ट वानामेई चुक चुक खिते सिन थेकी खित्च्येते कामगी नक्कलकामा ओतान। ख्रीष्ट वानामेई परमेश्वरला चुक खाला माने खिता फाप्कीते सिरच्येते गाङे बात पूरो ओङा ओत। 18 थेमे परमेश्वरला माने खिताला बर्त देत्च्येतेताङ दुक्पा खाला खाला होदोक्ते काम काल्बेई खिता फाप्क्यो, परमेश्वर दूतओनलाङ माने खिता फाप्क्यो सिन सिरकान्ते मि सुङगीङ बात माङेन। थोक्ते मि बात ङेन्सीन ख्योकोनगी परमेश्वरगी तेरच्येते इनाम मेङेदो। होथोक सिरकान्ते मिओनगीचेन परमेश्वरगी ङ्योकोनला मिलाम खित ज्युताच्योक खासुङ, थेजीन ङ्योकोनगी दोक दोक थोङसुङ सिन सिओ। थेबे सेम लेमु मेतेकी थेबा होदोक्ते बात खिन छ्ये खिन ख्याम्ग्यो। 19 थोक्ते मिचेन ख्रीष्टताङ ठाल्गीन सिन्दाते मि ईन। मि जीउकी गोः च्योकराङ थे खोरोङ मिओनते छ्येते ख्रीष्टराङ ईन। मि जीउचेन चाताङ छिकी जोरे खाबा ओङगो। थेमे गोः ओत्सीनकामा मि जीउ छारग्यो। थोकराङ खाला ख्रीष्टकीकामा थे खोरोङ मि गाङेला डिक च्युत्ला परमेश्वरगी चुक ओङा फाप्क्यो सिन साबाते ईन्दे पूरो खाला थोकराङ ओङ ज्युत्क्यो। 20 ख्योकोन ख्रीष्टताङ स्याप्ते मि ईन, मेनरो? थोक ईन्सीनोङ ख्योकोन च्यिला दि सा लुङबा खाङ मिओनगी खोपरोङ ज्युज्यु पुर्खे पालोमेई माने खिन वाबाते रीतिथिति माने खिता फाप्क्यो सिराच्योक खिते? दोक्ते रीतिथिति था छ्याःङ माने खिता माफाबो। 21 दि खिता मेङगो, दि सा मेङगो थे सा मेङगो, दोक दोक खिता मेङगो सिरच्येते रीतिथिति बात ख्योकोनगी ङेनराङ माङेन। 22 साच्या थुङच्या सिराते सोनामेई दाक सिन्ला डुइओ। दि साच्या थुङच्याताङ दि खिता मेङगो, थे खिता मेङगो सिन लोप्च्येते बात गाङे खालि मिओनगी माने खिता फाप्क्यो सिन खोपरोङगी जोबाते रीतिथितिकामा ईन। 23 परमेश्वरला माने खित्जीन खोपरोङगी खि साबा च्योकराङ खाला माने खिता फाप्क्यो, बर्त देत्च्येतेताङ दुक्पा खाला खाला होदोक्ते काम काल्बेई खाला दाक्पोन जीउला दुक्पा तेरा फाप्क्यो सिन मिओनगी लोप्च्येते रीतिथिति बात पक्काराङ ईन्दाते माने खिता फाप्च्येते च्योक थोङगो। लेमु खाईन तासुङ सासीनचेन थोक्ते रीतिथिति माने खाला मि खुदुक मोन्डोओ, खिता मेङच्येते काम खित्च्येते बानी तोङा मुथुबो बरू झन छ्ये खाला दाक्पोन खुशी खिन ख्याम्ग्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.