कलस्सी 1 - जिरेल1 दि चिट्ठी टिक्कान्ते ङा पावल थेमे ङुरूङ न्वा तिमोथी ईन। ङा येशू ख्रीष्टकी खटे खाबाते मि ईन। ङा थोक्ते मि ईन सिन परमेश्वरगी ङाला छाने खाबा ओत। 2 ङ्योकोन दि चिट्ठी कलस्सी सारदु ओताते परमेश्वर सन्तान ख्योकोनला टिगीन ओत। ख्योकोन ख्रीष्टताङ जीउज्यीकराङ ओङाते थेमे थेला विश्वास खिन देत्कान्ते ङ्योकोन आज्यो न्वा ईन। ङुरूङ आबा परमेश्वरगी ख्योकोनला दया खाला लेमु खिनराङ देत्स्यीत। परमेश्वरला धन्यवाद तेरच्येते थेमे प्रार्थना खित्च्येते बात 3 ख्योकोन लाईदु प्रार्थना खित्जीन ङ्योकोन जहिलेङ ङुरूङ प्रभु येशू ख्रीष्ट आबा परमेश्वरला धन्यवाद सिओ। 4 च्यिला सासीन ख्योकोनगी येशू ख्रीष्टला विश्वास खिदुक्लो थेमे परमेश्वर सन्तान गाङेला लेमु खिदुक्लो सिन ङ्योकोनगी थोसुङ। 5 परमेश्वरगी था तिरी खेराङला स्वर्गने तेरग्यो सिन साबातेबा ङेत्क्यो सिन खेराङगी आश खाईन देताते पक्काराङ ङेत्क्यो सिन छ्या स्येबेकीराङ ख्योकोनगी थोक लेमु खिन ओताते ईन। परमेश्वरगी खेराङला तेरग्यो साबाते ङेत्क्यो सिनचेन ख्योकोनगी सत्यते बात थोनामेई छ्या स्येबा ओत। सत्यते बातचेन गा लाङच्येते बात ईन। 6 ख्योकोनला दि बात लाप्कीन बिन्दा ओत। सा लुङबा खाङराङ दि बात फैले खिन डुइन ओत। थेमे दि बात ङेन्गीन झन झन मि काल्बेईकी लेमु काम खिन दुक। गा लाङच्येते बात थोबा छोमुमेई थेमे परमेश्वरगी दया खिओ सिन लेमु खाईन छ्या स्येनामेई ज्येन ज्येनगी च्योकराङ खाईन ख्योकोनगीङ लेमु काम खिताला स्यूबाते ईन। 7 गा लाङच्येते बात ख्योकोनला इपाफ्रासकी लापाते ईन सिन ङ्योकोनगी सिरा माफाप्तासीन। इपाफ्रासला ङ्योकोन ङिङज्ये खिओ। दिङ ङ्योकोन च्योकराङ ख्रीष्टकी काम खित्कान्ते मि ईन। ङ्योकोन साटोला दिकी खिता फापा च्योकराङ खाला ख्योकोन नाङ ख्रीष्टकी काम खिन दुक। 8 थेमे परमेश्वर आत्मे छ्य्वापेई ख्योकोनगी ज्येनला ङिङज्ये खिदुक सिनोङ ङ्योकोनला दिकीराङ लाःप्सुङ। 9 ख्योकोन बात थोबा छोमुमेई ङ्योकोनगी ख्योकोन लाईदु परमेश्वरला प्रार्थना खिता ताङा मेत। परमेश्वरगी ख्योकोनला थे खोरोङ आत्मे छ्य्वापेई बुद्धि बिन्ला खोबा फाप्च्येते बात गाङे लेमु खाला खो च्युत्ला थे खोरोङगी च्यि च्यि खि सिते सिन ख्योकोनगी लेमु खाला छ्या स्येस्यीत सिन ङ्योकोन प्रार्थना खिओ। 10 प्रभु येशू मिकी चुक खिता फाप्कीते सिन छ्या स्येला ख्योकोनगी थोकराङ खित्स्यीत, काम बात जे खासीनोङ थेला मन परे मिक्किच्येते सिराते छ्याःङ मिक्किस्यीत बरू झन झन लेमुते कामकामा खित्स्यीत थेमे परमेश्वर सु ईन्दे, चुक्ते ईन्दे सिन झन लेमु खाला छ्या स्येस्यीत सिन ङ्योकोन दोक खाला प्रार्थना खिओ। 11 दोस्यिककामा मेन, जस्तो ओङसीनोङ सेम मेसेता खाला गा खिन जस्तो दुक्पाङ खपे खिन देताला परमेश्वरगी ख्योकोनला थे खोरोङ छ्येज्यीक शक्ति तेरस्यीत 12 थेमे ख्योकोनगी आबा परमेश्वरला धन्यवाद सिरा थुप्स्यीत सिनोङ प्रार्थना खिओ। थेकी थे खोरोङ सन्तानओनगी स्वर्गे राज्यने ङेत्च्येते गाङे ङुरूङगीङ ङेत्क्यो सिन साबा ओत। 13 थेकीराङ ङुरूङला मुन्दाक राज्य गेल्बो शैतान लाःक्तुकी टाल्गीन थे खोरोङ ङिङज्येते फुज्युङ राज्यदु खुलाबा ओत। 14 परमेश्वर फुज्युङगी खाबाते कामगी खित्सादु ङुरूङ पापकी सजायदुकी ठाला ओत, ङुरूङ पाप गाङे माफ ओङा ओत। पावलगी येशू ख्रीष्ट चुक छ्ये ईन्दे सिन साबाते 15 परमेश्वर दोकस्यिकराङ दुक सिन मि मिगी थोङा माथुप्सीनोङ परमेश्वर फुज्युङला ताला परमेश्वरताङ थेला छ्याःङ फरक मेताक्वा सिन लेमु खाला छ्या स्येक्यो। परमेश्वरगी ओताते जति गाङे ज्वा भन्दा गोमामेई परमेश्वर फुज्युङ ओत्कीन ओतान। 16 च्यिला सासीन सा नाम ईन्स्यीत, मिओनगी थोङा थुप्च्येते देङला ओताते जति जे ईन्स्यीत, मिओनगी थोङा मुथुप्च्येते स्वर्गने परमेश्वर दूत ईन्स्यीत, ल्हा लु ईन्स्यीत, ज्येनला राज्य खित्कान्तेबा ईन्स्यीत, छ्ये टेक्टे जोराङ ईन्सीनोङ ओताते जति गाङे परमेश्वरगी थे छ्य्वापेकीराङ जोबाते ईन। जोबाते जति गाङे थेतेराङ ईन। 17 दि सा नाम खाङ ओताते जति गाङे ज्वा भन्दा गोमामेई थे ओत्कीन ओतान, होदि जोबाते जति गाङे चुक चुक ओङा फाप्च्येते ईन्दे थोकराङ ओङ ज्युत्कान्ते थेराङ ईन। 18 दोस्यिककामा मेन, मि जीउकी गोः च्योकराङ थे खोरोङ मिओनते छ्येतेचेन ख्रीष्टराङ ईन। येशू ख्रीष्ट मिओनचेन थे जीउ च्योक ईन। थेचेन थे जीउकीते गोः च्योक ईन। मिओनला थे खोरोङ मि जोकान्ते थेमे स्याप्ते मिओन नाङ गाङे भन्दा गोमा नोमुङ मिस्यिच्या खाला सोम्बो लोक्कान्ते थेराङ ईन। सा नाम खाङ ओताते जोबाते जति जो ईन्स्यीत जे ईन्स्यीत, थे खोरोङ मि ईन्स्यीत होदिबा गाङेते जहिलेङ जे कुरोलाङ ख्रीष्टकामा छ्येते ओङा फाप्क्यो सिन परमेश्वरगी होदोक दोक ओङ च्युताते ईन। 19 च्यिला सासीन थे खोरोङ जस्तो ईन फुज्युङोङ होथोकराङ ओङाते थेला लेमु लाबा ओतान। थे खोरोङगी दोक खिता चालेकीराङ थोक ओङाते ईन। 20 थेमे थे खोरोङगी खिता चाला च्योकराङ खाईन थेकी दि पृथ्वीदु ओताते ईन्स्यीत, स्वर्गने ओताते ईन्स्यीत, जो ईन्सीनोङ जे ईन्सीनोङ गाङेला थे खोरोङ फुज्युङ छ्य्वापेकीराङ थे खोरोङताङ डिक्पा खाबा ओत। थे खोरोङ फुज्युङ स्यिङगी थामला टाँए खाला स्यिजीन थे जीउदुकी थेन्दाते ठागी खित्सादु थेकी ओताते जति गाङेला होथोक खाईन थे खोरोङताङ डिक्पा खाबा ओत। 21 गोमाबा ख्योकोन मेलेबाते कामताङ बातकामा खिन ओतान। दोक खाईन ख्योकोन परमेश्वरताङ डिक्पा मेतान, थेत्ताङ डिक्च्येते सेमोङ खिन मेतान। 22 ख्योकोन गोमा थोक ओता ईन्सीनोङ ख्रीष्ट मि जुनी लाकीन स्याप्की खित्सादु थाचेन परमेश्वरगी ख्योकोनला थे खोरोङताङ डिक च्युता ओत। ख्योकोन थे खोरोङ दोन्दु सेम खुदुक गालाते, छ्याःङ गल्ती मेताते थेमे सुङगीङ दिबा दोक दोक गल्ती खित्कान्ते मि ईन सिरा मुथुप्च्या गालाते मि ओङस्यीत सिन थेकी ख्योकोनला दोक खाईन थे खोरोङताङ डिक च्युता ओत। 23 थोगी था ख्योकोनगी येशूला विश्वास खाईन ङेन्दाते बात ङेन्दा नोमुङ तोङा मेङगो, थे बातला खि साबा च्योकराङ खिन देता फाप्क्यो थेमे होथे गा लाङच्येते बात थोनामेई तिरी खेराङगी परमेश्वरगी तेरग्यो साबाते जति ङेत्क्यो सिन आश खाईन गुकीन देताते बातला ज्येनगी जे सासीनोङ छ्याःङ शंका मिक्किता खाला देत। होथे बात ख्योकोनलाकामा मेन, सा लुङबा खाङगी मिला लाप्कीन बिन्दा ओत। थेमे ङा पावललाचेन मिओनला होथे बात लोप्च्येते जिम्मा बिन्दा ओत। पावलगी येशू ख्रीष्ट मिओन लाईदु च्यि खिन ओते सिन साबाते 24 ख्योकोन लाईदु दुक्पा भोगे खित्च्येतेनी ङाला गा लाङच्येते बातका ईन। ख्रीष्टकी खिता चालाते काम पूरो ओङस्यीत सिन ङाङ ङाराङला ङे जीउकी थोई दुक्पा भोगे खिता फाप्क्यो सिन ओताने थोस्यिकराङ दुक्पा भोगे खिन ओत। दि दुक्पाचेन ङे येशू ख्रीष्ट थे खोरोङ जीउ ईन्दाते मिओनला लेमु ओङाला भोगे खिता फाप्क्यो। 25 परमेश्वरगी ङाला येशू ख्रीष्ट मिओन लाईदु खिता फाप्च्येते काम खिताला छाने खाबा ओत। थोक खाईन थेकी ङाला ख्योकोनला लोप साबाते थे खोरोङ बात गाङे लेमु खाला लोप सिन जिम्मा बिन्दा ओत। 26 थोक खाला लोप सिन साबाते दि बातचेन सा नाम ज्वा भन्दाङ गोमामेकी थातासाक परमेश्वरगी सुङलाङ छ्या स्ये च्युता मेतान। थाचेन दि बात च्यि ईन्दे, चुक्ते ईन्दे सिन थेकी थे खोरोङ सन्तानओनला छ्या स्ये च्युता ओत। 27 ज्येन ज्येन जातकी मिला चुक अचम्ब खाला आशी बिन्ला लेमु खिते सिरच्येते बात थे खोरोङ सन्तानओनगी छ्या स्येबा फाप्क्यो सिन परमेश्वरगी थेबाला छ्या स्ये च्युत्कीन बिन्सुङ। परमेश्वरगी गोमा छ्या स्ये च्युता मेताते होथे बात च्यि ईन्दे सासीन ख्रीष्टचेन ख्योकोन ज्येन ज्येन जातकी मि सेमगी नाङ देत्क्यो। थे थोक खाईन ख्योकोन सेमगी नाङ देत्नामेई परमेश्वरगी तिरी ख्योकोनला मान बिन्ला थे खोरोङगी ज्वा चाला च्योकराङ लेमु जोइओ सिरच्येते बात पक्काराङ दुका सिन आश खाला गुला देता थुप्क्यो। 28 ख्रीष्ट दोक खाला ज्येन ज्येन जातकी मि सेमगी नाङ देत्क्यो सिन ङ्योकोन मि गाङेला लोप्क्यो। च्यि सासीन ख्रीष्टताङ जीउज्यीकराङ ओङाते मिओन काम बात जे कुरोलाङ पाको गालाते मि ओङला परमेश्वर दोन्दु देता थुप्स्यीत सिन ङ्योकोनगी लोप्च्येते बात लेमु खाला ङेन सिन मि गाङेला दि बात परमेश्वरगी बिन्दाते बुद्धिकी लेमु खाला लोप्क्यो। 29 मिओन थोक खाला देता थुप्स्यीत सिनराङ ङा दुक्पा खाला खाला दि बाततेबा ज्येनला लोप्क्यो। ङाराङगी थुपासम्म स्याप स्याप खाईन काम खासीनोङ ङाला थोक खिताला छ्येज्यीक शक्ति तेरकान्तेचेन ख्रीष्टराङ ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.