शक्ति काम 5 - जिरेलहननियाताङ सफीराला चुक ओङसुङा 1 थेजीन हननिया सिराज्यीक मिङ ओतान। थे फेम्मे मिनचेन सफीरा ओतान। थेबा ङिबोकीङ खोपरोङ स्यीङज्यीक च्वासुङ। 2 थेमे स्यीङ च्वाबाते पैसा टिक्पीस्यिक खोपरोङला सिन हननियेकी खाराक्पा ब्वाकीन ज्याक्सुङ। थोक खाबाते फेम्मेतेलाङ छ्या ओतान। थेमे थेकी खाम्बादु ज्यागीन बाँकी देताते पैसाचेन येशू ख्रीष्टकी खटे खाबाते मिओनला खेरगीन बिन्सुङ। 3 थे पैसा खुलानामेई पत्रुसकी थेला “हननिया, खो च्यिला खाम्बादु पैसा ज्याक्ला स्यीङ च्वाबाते पैसा दोस्यिकराङ ईन सिते? दोक खाला च्यिला खो ल्हन्डीक गेल्बो शैतानताङ डिक्ला परमेश्वर आत्माला ढाँर खिता छोल्गीते? खुई च्यिला दोक खाबे? 4 खोल्ला थे स्यीङ छ्वा सिन सुङगीङ साबा मेतान। थेमे थे च्वासीनोङ ङेताते पैसा खोरोङ खुशी खिता ङेत्च्या ओतान। स्यीङगी पैसा गाङे दोस्यिकराङ ईन सिन सिरा खुई चुक खाईन थुप्सुङा? खुईनी मिओनला ढाँर खाबाते मेन, परमेश्वरलाका ढाँर खाबाते ईन,” सिन सिदुक। 5 पत्रुसकी दोस्यिक सिराईताङ हननिया थेरूराङ ज्याङे रिल्गीन डोले स्यिसुङ। थोक ओङनामेकी दि बात थोकान गाङेराङ ज्यीबेकी थरावरी गाल्सुङ। 6 थेमे हननिये रोचेन थेरू ओताते स्याराते मिओनगी वाकीन खोलाककी ठील्गीन फिनामा खेरगीन च्याकीन दिसुङ। 7 थोक ओङाते घण्टा सुमजो तिरी थेरू हननिये फेम्मेतेङ लेप्सुङ। थेला ख्योबोते स्याप्ते बात छ्या मेतान। 8 थेमे पत्रुसकी थेलाङ “ङाला दि बात साँचो लोप्ते, च्यि ख्योकोन स्यीङ च्वाबाते पैसा दोस्यिकराङ ईन?” सिन ठिजीन थेकीङ “अँ हजूर, दोस्यिकराङ ईन,” सिन सिदुक। 9 थेमे पत्रुसकी थेलाङ “ख्योकोन ङिबोकी डिगीन च्याकीन ख्योकोनगी ढाँर खाबाते बात प्रभु येशू आत्मेकी च्यि छ्या स्येओङारो सिन चुक खाईन विचार खिता थुप्सुङा? लो खुई ख्योबोला दिक गालाते मिओन ग्युरगीन उथेमा गोई खादु लेप्सुङ। था थेबेकी खोल्लाङ खेरला दिइओ,” सिन 10 सिरासात्तु थे फेम्मे मिङ पत्रुस काम्बे खादुराङ ज्याङे रिल्गीन स्यिसुङ। थेमे थे स्याराते मिओन नाङने स्यूक्जीन थेलाङ ज्याङे स्या थोङगीन फिनामा खेरगीन थे मोरोङ ख्योबोते दिसे खादुराङ दिसुङ। 11 थेरू थोक ओङाते बात थोनामेकी येशू ख्रीष्ट मिओन थेमे ज्येनोङ मि गाङे झन ज्यीबेकी आते खाईन थरावरी गाल्सुङ। येशू ख्रीष्टकी खटे खाबाते मिओनगी खाबाते अचम्बते कामओन 12 येशू ख्रीष्टकी खटे खाबाते मिओनगी मिओन नाङ छ्ये छ्येताङ अचम्बतेन्दे काम काल्बेई खिन ओतान। येशूला विश्वास खित्कान गाङेराङ डिक्ला परमेश्वर मन्दिरदु ओताते सोलोमन सिराते पिंढीदु जम्मा ओङगीन ओतान। 13 ज्येन ज्येनचेन ज्यीबेकी थेबाताङ रूगीन मेतान। थेबाताङ मारूसीनोङ थेबा लेमु मि ईन सिन थेबाला गाङेकी मान खिन ओतान। 14 खोले खोले होथेबे नाङदुईराङ ख्योओ मि, फेम्मे मि काल्बेईकी प्रभु येशूला विश्वास खिताला स्यूसुङ। थेमे थेबाङ येशूला विश्वास खित्कान्ते मिओनताङराङ डिगीन ख्याम्बाला स्यूसुङ। 15 थेमे थे सारगी मिओनगी नाबाते मिओनला दिङच्या खोन्च्याताङराङ खुलाकीन लामगी छेउकी नाङला जहाँसुकै ङ्याल्गीन ज्य्वाबाला स्यूसुङ। थेबे नाङ मेन्दाई मेन्दा ङिलाकामा ईन्सीनोङ पत्रुस लामला ख्याम्जीन थे ठिमाककामा फाप्सीनोङ थेबा ठाइओ सिनराङ मिओनगी थोक खाबा ओतान। 16 थोकराङ खाला यरूशलेम सारगी फेरोला ओताते ज्येन ज्येन सारगी नाङपेकीङ मि काल्बेई येशू ख्रीष्टकी खटे खाबाते मिओन ओत्सादु ओङगीन ओतान। दोक खाला ओङजीन थेबेकी नाबातेताङ ल्हन्डीक स्यिन्डीपकी दुक्पा बिन्दाते मिओनलाङ थेरू खुलाङगीन ओतान। थेमे थेबा गाङेराङ लेमु खाला ठाक्ला ग्युरगीन ओतान। येशू ख्रीष्टकी खटे खाबातेबाला दुक्पा बिन्दाते बात 17 थोक खाईन मि गाङेराङ येशू ख्रीष्टकी खटे खाबाते मिओनताङ लै खाबा थोङजीन गाङे भन्दा छ्येते पूजारी थेमे थेत्ताङ डिक्कान्ते सदुकी पाटी मिओनला आउदी खाईन स्येदाङ लासुङ। 18 थेमे थेबेकी थाचेन दिबाला खइँदाज्यीक माक्याबाला मायाङसुङ सिन थेबाला जुम्गीन खेरगीन जेलला लुक्सुङ। 19 थेबाला जेलला लुक्पे छोमुराङ ग्वाका चुक ओङसुङा सासीन थेबा ओत्सादु प्रभु परमेश्वर दूतज्यीक लेप्सुङ। थेमे थेकी जेलगी गो पेत्कीन थेबाला फिनामा खुलाकीन च्याकीन 20 “लो ग्युक, था ख्योकोनगी परमेश्वर मन्दिरपा गाल्ला येशूकी नोमुङ मिसिन्च्येते जुनी तेरग्यो सिरच्येते बात मिओनला लेमु खाला लोप,” सिन ताङसुङ। 21 थेमे थेबाङ ङारो च्योक्ते ङोमुका मन्दिरपा गाल्गीन थे दूतकी साबा च्योकराङ खाईन मिओनला लोपाला स्यूसुङ। थेमे गाङे भन्दा छ्येते पूजारीताङ थे र्वाओनगी छ्ये छ्ये पूजारी, धर्मे गुरूओन थेमे ज्येनोङ छ्ये छ्ये मि गाङेला काताङसुङ। दोक खाईन थेबेकी इस्राएलीओन छ्ये छ्ये मि गाङेला जम्मा खासुङ। थेमे थेबेकी येशू ख्रीष्टकी खटे खाबाते मिओनला खोपरोङ दोन्दु खोरच्योक सिन पुलिसओनला जेलदु ताङसुङ। 22 जेलदु गाल्ला ताजीन पुलिसओनगी थेबाला थेरू माथोङसुङ। थोगी थेबेकी थोकराङ ग्युरगीन गाल्गीन जम्मा ओङाते छ्ये छ्ये मि गाङेला 23 “थेबानी मिन्दुक ओना। ङ्योकोन थेपा लेप्जीन जेलगी गोतेबा लेमुराङ खाईन च्येत्कीन ज्याक्पा ओताक्वा। थेमे गोई नाङला पालेओनोङ देता ओताक्वा। तर गो पेत्ला ताजीन नाङनेनी सुङ मेताक्वा,” सिन लाःप्सुङ। 24 थे बात थोकीन परमेश्वर मन्दिरदु देत्कान्ते पुलिसते छ्येते मित्ताङ छ्ये छ्ये पूजारी गाङेराङ च्यि ओङा ईन्ताका ओना सिन ख्यारा खिरा गाल्सुङ। 25 थेबा थोक खिन ओते बेलालाराङ थेरू मिज्यीक वाकीन थेबाला “ख्योकोनगी जेलदु खेरगीन लुक्पाते मिओननी मन्दिरपा ख्योल्गीन मिओनलाका लोप्कीन दुक ओना,” सिन सिदुक। 26 थे मिकी थोक सानामेई पुलिस छ्येते मि थे खोरोङ मिओन टीकीन मन्दिरपा गाल्सुङ। थेमे छ्याःङ जबरजस्ती मिक्किता खाईन लुकीन थेबाला टीकीन खुला लिच्युङ। थेबाला खइँदा जबरजस्ती खासीन थेरू ओताते मिओनगी खोपरोङला दोईकी ग्याप्ला सेत्कीता सिन ज्यीबेकी थेबेकी थेबाला छ्याःङ मिक्किता खाईन टीकीन खेरसुङ। 27 थोक खाईन थेबाला थेरू जम्मा ओङाते छ्ये छ्ये मि गाङे दोन्दु खुलानामेकी गाङे भन्दा छ्येते पूजारीकी थेबाला 28 “ख्योकोनला खरचिङकाराङ ङ्योकोनगी थे मि बात छ्याःङ सुङलाङ मालोप सिन कोता ओतान। तर ख्योकोनगीनी ङ्योकोनगी माकेत साबाते बातराङ खाईन यरूशलेम गाङे काङगीन सिन्दुक। दोस्यिककामा मेन, ख्योकोननी थेला सेत्कान्तेङ ङ्योकोनराङका ईन सिरा छोल्गीदुक,” सिन सिदुक। 29 थेकी थोक सिरजीन पत्रुसबा गाङेकी “ङ्योकोनगीनी परमेश्वरगी खि साबाते ताङला मि बात ङेन्दा मेङगो। 30 ख्योकोनगी येशूला स्यिङगी थामला टाँए खाईन सेत च्युता ओतान। ईन्सीनोङ ङुरूङ ज्युज्यु पुर्खेकी माने खाबाते परमेश्वरगी थेला स्यिसादुकी सोम्बो लोक्पा ओत। 31 थेमे थेकी थेला गाङेला राज्य खित्कान्ते गेल्बो जोबा ओत। मिओनला पापदुकी डेल्कान्तेङ थेराङ ईन सिन छ्येज्यीक मान बिन्गीन थेला थे खोरोङ सामे छ्य्वापा ज्याक्पा ओत। ङुरूङ इस्राएलीओन दाक्पोन पापी दुका सिन छ्या स्येला परमेश्वर छ्य्वापा लै खित्स्यीत थेमे ङुरूङगी खाबाते पाप माफ ओङस्यीत सिनराङ परमेश्वरगी येशूला थोक थोक खाबाते ईन। 32 ङ्योकोन खालि ङेराङगी थोङातेताङ थोबाते बातकामा खिओ। दि बाततेबा ईन्दातेराङ ईन सिन परमेश्वर आत्मेकीङ छ्या स्ये ज्युत्क्यो। परमेश्वर आत्माचेन परमेश्वरगी थे खोरोङगी खि साबा साबा खित्कान्ते मिओनला बिन्दा ओत,” सिन सासुङ। 33 थेबेकी दोक सिरजीन थेरू ओताते छ्ये छ्ये मि गाङेला स्येदाङगी मे बारसुङ। थोगी थेबेकी थेबाला सेत्च्ये ठो खासुङ। 34 तर थे छ्ये छ्ये मि नाङ गमलिएल सिराज्यीक धर्मे गुरूङ ओतान। थेचेन फरिसी पाटी मि ओतान। यरूशलेम मि गाङेकी थेला आउदी मान खिन ओतान। थेमे थेकी देत्सादुई लाकीन येशू ख्रीष्टकी खटे खाबाते मिओनला “ख्योकोन रकस्यिक फिनामा ग्युक,” सिन फिनामा ताङसुङ। 35 थेबाला फिनामा ताङनामेकी थेकी थेरू ओताते छ्ये छ्ये मि गाङेला “इस्राएलीवे, ख्योकोनगी दि मिओनला खइँदा खिता गोमा लेमु खाला विचार खि याङ। 36 गोमा गोमा ओङाते बादोङ ख्योकोनगी ठेम्बा खि। च्यि सासीन गोमा बाजिई थूदास सिरातेकी ङा ङाराङ ईन सिराच्योक खाईन मिओनला थे खोरोङ छ्य्वापा लै खित च्युता ओतान। झन्दै मेन्दा सय स्यीजो मि थेत्ताङ डिगीन ख्याम्बा ओतान। तर तिरी थेला सेत्नामेकी थेत्ताङ ख्याम्कान्ते मिओन जहाँसुकै छरपुट्ट गाल्गीन थाराङ तोरगीन गाला ओतान। 37 लोईन तिरी जनसंख्या लिन्दे बेलाला यहूदा सिराते गालीलपे मिकीङ थोकराङ खाबा ओतान। थेमे थेत्ताङोङ आदोराङ मि लै खाबा ओतान। तर तिरी थेला सेत्नामेकी थेत्ताङ लै खाबाते मितेबाङ थाराङ तोरगीन गाला ओतान। 38 थोगी था ङा ख्योकोनला चुक सिते सासीन दि मिओनला थरिङराङ छ्याःङ माकेत। थेबाला बरू थोङ। च्यिला सासीन दिबेकी खाबाते कामताङ बात खोपरोङगी खाबाते ईन्सुङ सासीन दि था तिरी थोकराङ तोरला डुइओ। 39 दिबाला थोक खि सिन परमेश्वरगीराङ कोताते ईन्सीनचेन ख्योकोनते दिबाताङ छ्याःङ लै मिक्किओ। दोक ईन्देकी थेबाला छ्याःङ मेलेबा माकेत। दिबाला खइँदा खासीन खेराङका परमेश्वरला मेलेबा खित्कान्ते मि च्योक ओङोङ,” सिन सिदुक। 40 थेकी साबाते बात थेरू ओताते छ्ये छ्ये मि गाङेला सेमला गाल्सुङ। थेमे थेबेकी येशू ख्रीष्टकी खटे खाबाते मिओनला लोईन नाङने काताङगीन पुलिसओनला दुङ च्युत्कीन च्याकीन “लो थरिङमेकी लोक्ला नोमुङ येशू बात छ्याःङ सुङलाङ मालोप। दि बात लोपा मेङगो,” साकीन थेरूकी ताङसुङ। 41 ताङनामेई थेबाचेन “ङुरूङ चुक भाग्यमानी ईन्दे। च्यिला सासीन परमेश्वरगी ङुरूङला प्रभु येशू लाईदु दुक्पा भोगे खित्च्ये मौका बिन्सुङ,” सिन गा खिनकामा बात खिन गाल्सुङ। 42 थे तिरीङ थेबेकी गा लाङच्येते बात लोपा ताङराङ माताङसुङ। ङीमे ठाङमा परमेश्वर मन्दिरदु थेमे मि खाम्बा खाम्बाला गाल्ला येशू परमेश्वरगी तोङगो साबाते ख्रीष्टराङ ईन सिन दि बात मिओनला लोप्कीनराङ देत्सुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.