शक्ति काम 3 - जिरेलपत्रुसताङ यूहन्नेकी कुज्येला ठाक्पा खाबाते 1 ङीमाई ङीम्मु तीन बजेला खित्च्येते प्रार्थना खिते बेलाला पत्रुसताङ यूहन्ना परमेश्वर मन्दिरने प्रार्थना खिताला डुइन ओतान। 2 थे मन्दिरने स्यूक्सादु केजीनमेईराङ कुज्ये ओताते मिज्यीक देता ओतान। थेला ङीमे ठाङमा ज्येनगी खुरला खुलाला च्याला थे मन्दिरते लेमुते गो सिरसादु ज्य्वाकीन ओतान। थेमे थेचेन थे मन्दिरदु ओङकान्ते मिओनला पैसा नाङ खिन ओतान। 3 थेकी पत्रुसताङ यूहन्ना मन्दिरने स्यूक्पा खित्जीन थेबालाङ पैसा नाङ खासुङ। 4 थोक खित्जीन थेबा ङिबोकी ख्युर ग्युरगीन थेला तासुङ। थेमे पत्रुसकीचेन थेला “देपा तोते,” सिन सिदुक। 5 थेकी थोक सिरजीन थेबेकी खइँदा तेरगीता सिन थे कुज्येकी थेबाला तासुङ। 6 थेमे पत्रुसकी थेला “खोल्ला तेराला ङात्ताङ सेर नोर छ्याःङ मेत। ईन्सीनोङ ङे खिता थुप्च्येतेचेन ङा खोल्ला खिओ। नासरतपे येशू ख्रीष्ट मिन लाला ङा खोल्ला लाला ख्योम सिन सिओ,” सिन साकीन 7 थे सामे लाक्पाला जुम्गीन लाङसुङ। थोक खिताईताङ थे कुज्ये दाक ख्याम्बा थुप्च्या गाल्सुङ। 8 थे खोक लाकीन ख्याम्बालाङ स्यूसुङ। थेमे गा खिनकामा फिरगीन परमेश्वर चुक छ्ये ईन्दाका सिनकामा थेङ थेबा ङिबोताङराङ मन्दिर नाङने स्यूसुङ। 9 थे थोक खाईन परमेश्वरते जय जय खिन ख्याम्बाते थेरू मन्दिर नाङला ओताते मि गाङेकी थोङसुङ। 10 थेमे थेचेन थे लेमुते गो सिरातेदु देत्ला नाङ खित्कान्ते मिराङ दुका सिन थेबेकी ङो स्येसुङ। थेमे थोक कुज्येङ चुक खाईन ख्याम्बा थुप्च्या गाल्ताका सिन अचम्ब लाकीन मिओन छक्क परे खासुङ। पत्रुसकी परमेश्वर मन्दिरदु खाबाते बात 11 थेमे थे ठाक्पाते मिङ मन्दिर नाङ पत्रुसताङ यूहन्ने द्वामा द्वामा ख्याम्गीन सोलोमन सिराते पिंढीदु ख्योल्सुङ। थेबा थेपा ख्योल्नामेई थे मि चुक खाईन ख्याम्बा थुप्च्या गाल्ताका सिन छक्क परे खिन मि गाङेराङ छ्य्वाकीन वाकीन थेरूराङ जम्मा ओङसुङ। 12 थोक खाईन खोपरोङ फेरो खाङ जम्मा ओङाते मिओनला बात खिन पत्रुसकी “ए इस्राएलीवे, दि कुज्ये ख्याम्बा थुप्च्या गाला थोङजीन ख्योकोन च्यिला दोक खाला छक्क परे खिते? ख्योकोन च्यिला ख्याराच्योक खाला ङ्योकोनला तालाराङ देत्कीते? च्यि ख्योकोनगी दि मिला ङ्योकोनगी ङेराङ शक्तिकी ख्याम्बा थुप्च्या जोबाते ईन्दासीन साबाप? ना ङेत परमेश्वरला आउदी खाला माने खित्कान्ते मि ईन्देकी थोक खिता थुपासीन साबे? 13 बात चुक ईन्दे सासीन थरिङ दि अचम्बते काम खित च्युत्कीन ङुरूङ ज्युज्यु पुर्खा अब्राहाम, इसहाकताङ याकूबकी माने खाबाते परमेश्वरगी थे खोरोङ काम खित्कान्ते येशूताङ चुक छ्येज्यीक शक्ति ओते सिन छ्या स्ये च्युत्कीन बिन्दाते ईन। येशूला सेता फाप्क्यो सिन ख्योकोनगीचेन ज्येन जातकी मिओन लाःक्तु सोम्पे खासुङ। थेमे रोमी गेल्बो हाकिम पिलातसकी थेते छ्याःङ गल्ती मिन्दुक सिन तोङा छोल्जीनोङ ख्योकोनगी थेला मातोङ, थेलाचेन सेताराङ फाप्क्यो सिन साकीन 14 थे साटोला ज्यानमाराज्यीकलाका थोङ सिन साबा ओतान। थोक खाईन ख्योकोनगीनी सेमला पाप सिराते छ्याःङ मेताते खालि परमेश्वरगी खि साबा साबा च्योककामा खित्कान्ते येशूला दिङ सु ईन्देरो सिराच्योकका खासुङ। 15 दोस्यिककामा मेन, ख्योकोनगीनी मिओनला जुनी तेरकान्तेलाराङ सेत च्युताते ईन। परमेश्वरगीचेन थेला स्यिसादुकीङ सोम्बो लोक्पा ओत। थे सोम्बो लोक्नामेई थेला ङ्योकोन गाङेकी ङेराङ मिगीराङ थोङाते ईन। 16 थेमे होदि कुज्येला येशूकी थे खोरोङ शक्तिकी ख्याम्बा थुप्च्या जोबाते ईन। थेकी दोक खिओ सिन ङ्योकोनगी थेला विश्वास खाबेकी दि मि ख्याम्बा थुप्च्या गालाते ईन। दि दोक गालाते येशूकी दि खोरोङला ठाक्पा खिता थुप्क्यो सिन दिकी थेला विश्वास खाबेकीराङ ईन। दि मि गोमा ख्याम्बा मुथुप्च्या ओतान सिन ख्योकोन गाङेला लेमु खाला छ्याराङ ओत। 17 आज्यो न्वावे, ख्योकोनताङ ख्योकोन छ्ये छ्ये मिकी येशूला सेत ज्युत्जीन खेराङगी चुक मेलेबाते काम खाबाते ईन्दे सिन छ्या मास्येसुङ। 18 ईन्दानी थे खोरोङगी तोङगो साबाते ख्रीष्टकी दुक्पा ङेत्क्यो सिन परमेश्वरगी थोङलाकाराङ थे खोरोङ बात खित्कान्ते मिबरीला सिर च्युता ओतान। ख्योकोनगी येशूला सेत्जीन परमेश्वरगी थे खोरोङगी सिर च्युताते बात साबा च्योकराङ ओङ च्युत्सुङ। 19 थाचेन ङा ख्योकोनला च्यि सिते सासीन ख्योकोनगी खेराङ पापी दुका सिन छ्या स्येला परमेश्वर छ्य्वापा लै खि। थोक खासीन प्रभु परमेश्वरगी ख्योकोन पाप माफ तेरग्यो। थेमे थेकी ख्योकोनला आशी बिन्ला ढुक्क खाला देत ज्युत्क्यो। 20 दोस्यिककामा मेन, ख्योकोन नाङ तोङगो सिन छाने खाबाते ख्रीष्टला थेकी लोक्ला देमा तोङगो। थेचेन येशूराङ ईन। 21 थे थरिङोला स्वर्गने देता ओत। परमेश्वर बात खित्कान्तेबेकी परमेश्वरगी तिरी जेसुकै लेमु जोइओ सिन परमेश्वरगी सिर च्युताते बाततेबा गाङे साबा च्योकराङ मायाङथुप थे थेनेराङ देत्क्यो। 22 येशू बात खित्जीन मोशेकीङ ङुरूङ ज्युज्यु पुर्खाला च्यि साबा ओताने सासीन ‘था तिरी प्रभु परमेश्वरगी ङा च्योकराङ परमेश्वर बात खित्कान्ते मिज्यीक तोङगो। थेलाचेन ख्योकोन नाङदुईराङ छाने खिओ। थेकी वाकीन साबाते बाततेबा ख्योकोनगी गाङे लेमु खाला ङेन। 23 थे बात मेङेन्कान्ते मिचेन परमेश्वर मिओनताङ देताराङ मेङेदो,’ सिन साबा ओतान। 24 मोशे तिरी शमूएलताङ परमेश्वर बात खित्कान्ते ज्येन ज्येनोङ गाङेकी थरिङोला ङुरूङ नाङ ओङगीन ओताते कामताङ बात गोमाका खाबा ओतान। 25 ख्योकोनचेन होथे परमेश्वर बात खित्कान्तेबे सन्तानराङ ईन्देकी थेबेकी खाबाते बातओन ख्योकोनला छ्या स्ये ज्युतालाराङ खाबा ओतान। थेमे परमेश्वरगी ख्योकोन ज्युज्यु पुर्खाताङ खाबाते जमान थेबे लाईदुकामा खाबा मेतान। थे जमानचेन थेकी ख्योकोनताङोङ खाबाते ईन। चुक सासीन परमेश्वरगी अब्राहामला ‘खुई सन्तान छ्य्वापेकीराङ ङा लुङबा लुङबे मि गाङेला आशी तेरग्यो,’ सिन साबा ओतान। 26 साबा च्योकराङ खाईन ख्योकोन गाङेला मेलेबाते कामदुकी टाल्ला आशी बिन्ला लेमु खिताला परमेश्वरगी थे खोरोङ काम खित्कान्ते येशूला गोमा ख्योकोन नाङ ताङाते ईन,” सिन सिदुक। |
© 1992 Wycliffe Bible Translators Inc. All rights reserved.
Wycliffe Bible Translators, Inc.