शक्ति काम 25 - जिरेलपावलगी फेस्तस दोन्दु खाबाते बात 1 थेमे सिजरियादु लेप्नामेई ङीमा सुम तिरी हाकिम फेस्तस थेरूकी यरूशलेमने गाल्सुङ। 2 थेने लेप्नामेकी छ्ये छ्ये पूजारीताङ यहूदीओनते ज्येनोङ छ्ये छ्ये मिकी थे ओत्सादु गाल्गीन पावलगी दोक दोक मेलेबा खासुङ सिन थेलाङ गाङे लाःप्कीन 3 पावलला यरूशलेमने ताङसीन लेमु ओङच्या ओतान साकीन थेला थेने थोङ सिन आउदी खाईन बिन्ती खासुङ। थेला थेने ताङसीन लामला गुला देत्ला ओङगीन ओङगीनलाराङ सेताप सिन थेबेकी ठो खाबा ओतान। 4 तर थेबे बात मेङेन्दा खाईन फेस्तसकी थेबाला “पावलला सिजरियापाराङ जेलदु लुगीन ज्याक्पा ओत। था ङाङ थेपा होत्ताराङ ग्युरला डुइओ। 5 थोगी ख्योकोन नाङ छ्ये छ्येतेबा कोई ङात्ताङराङ थेपा ख्योम। थेकी खइँदा गल्ती खाबा ओत्सीन ख्योकोनगी थेपाराङ गाल्ला बयान तेरा थुप्क्यो,” सिन सिदुक। 6 यरूशलेमदु ङीमा गुजो च्युताम्बाजो देत्कीन फेस्तस सिजरियापा ग्युरसुङ। थेपा ख्योल्गीन ङारो च्योक्तेराङ थेकी अड्डादु गाल्गीन पावलला थेरू काताङसुङ। 7 थेला थेरू खुलानामेई यरूशलेमनेकी वाबाते यहूदीओन छ्ये छ्ये मिकी थे फेरो खाङ लाकीन दिकी दोक दोक खासुङ सिन आउदी मेलेबा मेलेबा दोष लै खासुङ। ईन्सीनोङ थेकी थोक खाबातेराङ ईन सिनचेन थेबेकी छ्याःङ प्रमाण तेन्दा माथुप्सुङ। 8 थेमे पावलगीङ फेस्तस दोन्दु “हजूर, ङे ङेराङ यहूदीओनला बिन्दाते परमेश्वर नियमला खिता मेङगो साबाते काम छ्याःङ खाबा मेत। परमेश्वर मन्दिरला बिटुले खित्च्येते कामोङ छ्याःङ खाबा मेत। थोकराङ खाला रोमी गेल्बो विरोधलाङ ङे छ्याःङ खाबा मेत,” सिन थे खोरोङ बयान बिन्सुङ। 9 थेकी दोक सासीनोङ यहूदीओनला खुशी ज्वाप्ला फेस्तसकी थेला “ङा खोल्ला यरूशलेमने खेरला खुई दोक दोक खाबाते ईन्दाकाना मेन्दाका ताला थेनेराङ खुई मुद्धा च्येत्ला तेरग्यो, ओङगीताना मेङते?” सिन सिदुक। 10 थोक सिरजीन पावलगी “हजूर, ङा थाल्ला रोमी गेल्बो अड्डादु ओत। ङे दि अड्डादुराङ न्याय ङेता फाप्क्यो। यहूदीओन सुङलाङ ङे छ्याःङ मेलेबा खाबा मेत। दि बात हजूर खुई दाक थोङसुङ। 11 ईन्सीनोङ ङाला सेताराङ फाप्च्येते ङे खइँदा गल्ती खाबा ओत्सीन ङा स्याप्ला नाइँ मिसिरो। दिबेकी ङाला लै खाबाते दोष पक्काराङ ईन सिन छ्याःङ प्रमाण तेन्दा माथुप्नामेई न्याय खिताला ङाला सुङगीङ दिबे लाःक्तु सोम्पे खिता मुथुबो। ङे मुद्धा रोमी गेल्बोकीराङ तारस्यीत,” सिन सिदुक। 12 थेकी थोक सानामेकी फेस्तसकी थे खोरोङला सल्लाह तेरकान्ते मिओनताङ बात खासुङ। थेमे थेकी पावलला “लो खुई मुद्धा रोमी गेल्बोकीराङ तारस्यीत सिन बिन्ती खासुङ। थोगी खोल्ला ङा थे ओत्सादुराङ तोङगो,” सिन सिदुक। फेस्तसकी अग्रिपाला पावल बात खाबाते 13 टिक्पी तिरी हाकिम फेस्तसला ठेत्ला मान खिताला गेल्बो अग्रिपाताङ बर्णिस सिजरियापा लेप्सुङ। 14 थेबा थेरू आदोराङ देतेकी फेस्तसकी गेल्बो अग्रिपाला ङीमाई दोक सिन पावल बात खासुङ। च्यि सासीन “थोङला फेलिक्स हाकिम ओत्जीनमेईराङ दुरू जेलदु ज्याक्पाते मिज्यीक ओत। 15 ङा यरूशलेमदु गाले बेलाला छ्ये छ्ये पूजारीताङ यहूदीओनते ज्येनोङ छ्ये छ्ये मिकी थेकी आउदी मेलेबा काम खाबेकी थेला सजाय बिन्ला सेता फाप्क्यो सिन ङात्ताङ बात खाबा ओतान। 16 थेबेकी थोक खित्जीन ङे थेबाला सुइँदा मिकी पक्काराङ गल्ती खाबाते ईन सिन छ्याराङ मास्येबाला थेला सजाय तेरा रोमी गेल्बो नियम कानूनताङ मिडिगो। ज्येनगी दोषी ईन साबाते मिकी थोक सिरकान्ते मिओन दोन्दुराङ अड्डादु थे खोरोङ बयान माबिनथुप थे मि न्याय खिता मेङेदो सिन साबाप। 17 थेमे थेला दोषी ईन सिरकान्ते मिओन दुरू वानामेकी ङे ङारो च्योक्तेराङ अड्डादु गाल्गीन थेला काताङगीन छलफल खाबाप। 18 थेला दोषी ईन सिरकान्तेबेकी खोपरोङ बयान बिन्सुङ। ङेचेन थेकी खइँदा आउदी मेलेबा काम खाबा ओता ईन्दा सिन विचार खाबा ओतान। ङे विचार खाबा ओताच्योक थेकी मेलेबा काम खाबाते बातचेन थेबेकी छ्याःङ माक्यासुङ। 19 थेबेकी खालि थेकी खोपरोङ धर्मे बातताङ मिडिक्च्येते काम खासुङ सिन सिदुक। थेमे येशू सिराते स्यिइन सिन्दाते मिज्यीक बातला थेबा थेत्ताङ बान्दा मिडिक्च्याक्वा सिनोङ ङे छ्या स्येसुङ। लोक्ला थे मिचेन थे येशू सिराते मि स्यिइनोङ सोम्बो लोक्पा ओत सिन सिरच्याक्वा। 20 यहूदीओन धर्मे बात ङाराङला लेमु खाला छ्या मेतेकी ङा अलमल्ल परे खासुङ। थोगी यरूशलेमने गाल्ला यहूदीओनताङ बात खाला मुद्धा फैसला खिताप सिन ङे थेला थेने गाल्गीन थे मुद्धा फैसला खासीन चुक ओङोङा सिन बात खाबाप। 21 थोक सिरजीन थेकी बान्दा माङेन्गीन थे खोरोङ मुद्धा रोमी गेल्बोकीराङ तारस्यीत, थेजीनसाक थेला दुरूराङ लेमु खाला ज्याक्ला नाङ सिन बिन्ती खासुङ। थोगी ङे थेला रोमी गेल्बो ओत्सापा तोङ तोङसाक दुरूराङ लेमु खाईन जेलला लुगीन ज्याक्पा ओत,” सिन सिदुक। 22 थेकी दि बात खानामेई अग्रिपेकी “ङे पालोई थे मित्ताङ ठेत्कीन थे बात ङेन्दा ङेत्सीन लेमु ओङच्या ओतान,” सिन सिरजीन थेकी “ओङगो ओङगो, था ङारोराङ ङा थेला बात खित ज्युत्क्यो,” सिन सिदुक। पावलला अग्रिपे दोन्दु क्यालाते 23 थेमे ङारो च्योक्ते गेल्बो अग्रिपाताङ बर्णिस आउदी लेमु लेमु खोलाक खोन्गीन छ्ये छ्ये मि जम्मा ओङच्येते कोठादु ख्योल्सुङ। थेरू थेबाला गाङेकी धूमधाम खाईन मान खासुङ। मिल्टेरी छ्ये छ्ये मिताङ थे सारगी छ्ये छ्ये मिङ थेबाताङ थेरू वाबा ओतान। थेमे फेस्तसकी पावलला थेरू लिन ताङसुङ। 24 थेला थेरू क्याल्नामेकी फेस्तसकी “गेल्बो अग्रिपाताङ दुरू ओताते गाङे छ्येवे, यहूदी गाङेकी यरूशलेमपा थेमे दुरूङ ङाला उजूर खाईन सेताराङ फाप्क्यो सिन साबाते मि दिराङ ईन। दिला मासेताला ओङराङ मेङगो सिन थेबा गाङेराङ झ्याउँ झ्याउँ खिनराङ देत्कीदुक। 25 ङेचेन दिला सेताराङ फाप्च्येते छ्याःङ गल्ती माथोङसुङ। लोक्ला दि खोरोङ मुद्धा रोमी गेल्बोकीराङ तारस्यीत सिन साबेकी दिला ङे रोमनापाराङ तोङच्ये टुङ्गो खाबा ओत। 26 तर दिला रोमी गेल्बो ओत्सादु तोङाला चिट्ठीला टिक्च्येते बात ङे छ्याःङ माथेप्सुङ। थोक ईन्देकी गेल्बो अग्रिपा थेमे दुरू ओताते मिओनगी दि मि बात च्यि ईन्दाका ङेन्गीन सिन्नामेकी ङे रोमी गेल्बोला खइँदा टिक्च्येते बात थेप्कीता सिन दिला दुरू खुलाबाते ईन। 27 च्यिला सासीन जेलदु ज्याक्पाते मिला दिकी दोक दोक गल्ती खाबाते ईन सिन खइँदा बात मिटिक्पा खाला रोमी गेल्बो दोन्दु तोङाचेन ङाला अप्ठेरोराङ ओङसुङ,” सिन सिदुक। |
© 1992 Wycliffe Bible Translators Inc. All rights reserved.
Wycliffe Bible Translators, Inc.