शक्ति काम 24 - जिरेलयहूदीओनगी फेलिक्स दोन्दु पावल बात खाबाते 1 ङीमा ङा तिरी गाङे भन्दा छ्येते पूजारी हननिया सिजरियापा गाल्सुङ। थेकी यहूदीओन छ्ये छ्ये मि नाङ कोई कोईला थेमे तर्तुल्लस सिराते वकीलज्यीकला थे खोरोङताङ टीकीन खेरसुङ। थेबाबरी थेरू लेप्नामेकी हाकिम ओत्सादु गाल्गीन पावलगी दोक दोक मेलेबा खासुङ सिन बात खासुङ। 2 थेमे हाकिमगी पावललाङ काताङनामेकी तर्तुल्लसकी पावलला दोष लै खिनकामा “हजूर, ङ्योकोनगी थोरूमसाक सुङगीतेङ ज्यीबा खुरा फापा मेत। हजूर खुई जेसुकै लेमु खाईन ताबेकी खित्सादु लुङबा खाङराङ ङ्योकोन गाङेला लेमु ओङा ओत। 3 हजूर खुईते दि गुन ङ्योकोन नोमुङ टोक मेज्येदो। हजूर खुई खाबाते गाङे कामताङ बात ताजीन खो आउदी बुद्धि ओताते हाकिम ईन सिन ङ्योकोनगी छ्या स्येबा ओत। 4 था ङ्योकोन हजूर खोल्ला काल्बेई दुक्पा तेरा मोछोलो, जेराङ ईन्सीनोङ ङ्योकोनते दि बातज्यीकचेन ङेन्ला नाङ। 5 च्यि सासीन दि लेमु मि मेन। दिनी ज्यीबा लाङच्या मेलेबा खालगी मिका ईन। दि गाङेपा यहूदीओन ओत्सा ओत्साला गाल्ला थेबाला हूलदङ्गा खित ज्युत्कीदुक। थेमे नासरी सिराते पाटी मिओनते छ्येते मिङ दिराङ ईन। 6 दिकी परमेश्वर मन्दिरलाङ झन्दै बिटुले खाबा ओतान। थे बेलालाराङ थेप्कीन ङ्योकोनगी दिला पक्रे खाबाप। थेमे ङ्योकोनगी दिला ङेराङ धर्मे नियमदु तोके खाबाते सजाय तेराला ठीक खाबा ओतान। 7 तर मिल्टेरी छ्येते मि लायसिअसकी वाकीन दिला ङ्योकोन लाःक्तुकी जबरजस्ती ठ्वाकीन खेरसुङ। 8 थेमे ङ्योकोनगी च्यि च्यि बयान तेरा फाप्कीका थेङ हजूर खोल्लाराङ बिन सिन थेकी ङ्योकोनला देपा ताङसुङ। था हजूर खुई दिलाराङ ठिसुङ सासीन ङ्योकोनगी खाबाते बात ईन्दाकाना मेन्दाका सिन दाक छ्या स्येक्यो,” सिन बात खासुङ। 9 थेरू वाबाते ज्येन यहूदीओनगीङ गाङे बात तर्तुल्लसकी साबा च्योकराङ ईन सिन सिदुक। हाकिम फेलिक्स दोन्दु पावलगी बयान बिन्दाते 10 तर्तुल्लसकी बात खाईन सिन्नामेई हाकिमगी पावलला बात खि सिन थेतेङ बयान लासुङ। थेमे पावलगी “हजूर, खुई दि लुङबादु राज्य खिताला स्यूबाते आदोराङ गालेकी दि लुङबे मि बाततेबा लेमु खाला छ्याराङ ओत। थोगी हजूर खुई दोन्दु ङा छ्याःङ ज्यीबा मिक्किता खाला बात खिता थुप्क्यो। 11 बात च्यि सासीन ङा यरूशलेमपा परमेश्वरला प्रार्थना खिताला गालाते ङीमा च्युन्ङी भन्दा ल्हाक्पा गाला मेत। दि बात हजूरगी ज्येनला ठिसीनोङ लेमु खाला छ्या स्येक्यो। 12 ङे यरूशलेमदु परमेश्वर मन्दिरदु सुइँदा मित्ताङ टेकाटेउरी खासुङ, यहूदीओनते मिटिङ खित्च्येते खाम्बे नाङला थेमे सारगी नाङला हूलदङ्गा खासुङ सिन सुई सिरा थुप्कीते? ज्येनतोक्तेनी बातराङ थोङ 13 थाल्ला दिबा खोपरोङगी बिन्दाते बयान ठीक ईन सिरालाङ दिबेकी छ्याःङ प्रमाण तेन्दा मुथुबो। 14 दि बातज्यीकचेन ङा लेमु खाला सिरा थुप्क्यो। च्यि सासीन ङाचेन दिबेकी ईनराङ मेन्दे बात ईन सिन साबाते येशू बात ङेन्गीन थे छ्य्वापा लै खाईन ङेराङ ज्युज्यु पुर्खेकी माने खाबाते परमेश्वरला माने खिओ। परमेश्वर नियमला टिबाते थेमे परमेश्वर बात खित्कान्तेबेकी टिबाते बातओनोङ ङा गाङे ङेन्ग्यो। 15 दोस्यिककामा मेन, लेमु खित्कान ईन्स्यीत, मेलेबा खित्कान ईन्स्यीत तिरी परमेश्वरगी स्याप्ते मि गाङेला सोम्बो लोइओ सिरच्येते बात पक्काराङ ईन सिन ङाङ दिबा च्योकराङ खाला पत्ते खिओ। 16 ङीमाई पक्काराङ दोक ओङगो सिन ङा दि जुनीला थुपासम्म जहिलेङ परमेश्वरगी साबा साबा च्योकराङ खित्च्येते थेमे ज्येनला लेमु ओङच्येते कामकामा खिता छोल्ग्यो। 17 सिइराङ सासीन ङानी यरूशलेमदु मादेतातेङ लो काल्बेई गाला ओतान। खरचिङ ङानी दुक्पा ङेताते ङेराङ यहूदीओनला बिन सिन ज्येन मिओनगी ङे लाःक्तु बिन्दाते पैसा केलाला थेमे ङाराङगी परमेश्वरला चढे खिओ सिन साबाते चढे खितालाका थेपा गाला ओतान। 18-19 थेमे ङा चोके खाईन गाल्गीन मन्दिरदु परमेश्वरला चढे खिता फाप्च्येतेबा चढे खाईन सिन्दे बेलाला एशिये अञ्चलदुकी वाबाते कोई कोई यहूदीकी ङाला थेरू थोङाते ईन। थे बेलाला ङात्ताङ थेरू काल्बेई मिङ मेतान। थेमे थेरू छ्याःङ हूलदङ्गाङ ओङा मेतान। थेरू ङे खइँदा मेलेबा कामताङ बात खाबा ईन्सीन ङाला थोङकान्ते होथे मिओनका दुरू बयान तेराला ओङा फाप्च्या ओतान। 20 थोकराङ खाईन छ्ये छ्ये पूजारी, धर्मे गुरूओन थेमे यहूदीओनते ज्येनोङ छ्ये छ्ये मि गाङे दोन्दु बात खित्जीन ङे खइँदा मेलेबा बात खाबा ईन्दा ईन्सीन दिबेकी थाल्लाराङ हजूर खोल्ला सिरस्यीत। 21 ङाचेन स्याप्ते मिओनला परमेश्वरगी था तिरी सोम्बो लोइओ सिन पत्ते खित्कान्ते ईन्देकी ङाला मुद्धा चले खाईन थरिङ दुरू खुलाबाते ईन सिरच्येते बातज्यीकचेन ङे थेजीन दिबा गाङे दोन्दु गाङेकी थोच्या खाईन साबाते ईन। ङेते खइँदा गल्तीराङ ओत सिन सासीन दिराङ ईन,” सिन सिदुक। 22 येशू बातओन चुक्ते बात ईन्दे सिन थेला लेमुराङ खाला छ्या ओतेकी पावलगी बात खाईन सिन्नामेई हाकिम फेलिक्सकी “थरिङ बात दोस्यिकराङ ईन। दि मुद्धे फैसलाचेन था ङा मिल्टेरी छ्येते मि लायसिअस दुरू वानामेकीकामा खाला तेरग्यो,” सिन टारे खाईन थेबाला थेरूई ताङसुङ। 23 थेमे थेकी मिल्टेरी क्याप्टेनला “दिला फ्रोबा मुथुप्च्या खाला लेमु खाला स्योक, छ्याःङ दुक्पाङ मातेर। थेमे दिला गोच्येते केल ओङकान्ते र्वातेबाला रोके माकेत,” सिन कोत्सुङ। फेलिक्सताङ द्रूसिल्लेकी पावलताङ बात खाबाते 24 टिक्पी दिन तिरी हाकिम फेलिक्स थे खोरोङ फेम्मेते द्रूसिल्लाला टीकीन पावलला ज्याक्सादु गाल्सुङ। द्रूसिल्लाचेन यहूदी ओतान। थेमे फेलिक्सकी येशू बात ङेन्दाला पावलला काताङसुङ। थेमे पावलगी थेबा ङिबोला येशू ख्रीष्टला विश्वास खित्च्येते बात च्यि ईन्दे, चुक ईन्दे सिन लाप्कीन च्याकीन 25 मिओनगी परमेश्वरगी साबा साबा च्योकराङ खिता फाप्च्येते, दाक्पोन सेम काबूला ज्य्वाबा फाप्च्येते थेमे परमेश्वरगी मि गाङे न्याय खित्च्येते दिन ओङगो सिनोङ लाप्कीन बिन्सुङ। थेकी दि बातओन खित्जीन ज्यीबा लाबेकी फेलिक्सकी थेला “लो थरिङ दोस्यिकराङ ओङसुङ। ज्येन बात खिताला फुर्सत ङेत्नामेई ङा ङारो ना लोक्ला खोल्ला कातोङामीन,” सिन थेला थेरूकी ताङसुङ। 26 पावलगी घूस तेरगीता सिन थेकी विचार खाबा ओतान। थोगीराङ थेकी तिरीङ थेला बात खिताला पालोताङ पालो काताङा ओतान। 27 थोक खिन खिनला लो ङि तिरी थे साटोला पोर्सिअस फेस्तस हाकिम ओङसुङ। यहूदीओनला खुशी ज्वाप्ला थे खोरोङ ड्वा बेलालाङ फेलिक्सकी पावलला जेलदुकी माताङसुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.