शक्ति काम 20 - जिरेलपावलबा म्यासिडोनियाताङ ग्रीस लुङबापा ग्युराते 1 थोक खाईन थे होहल्ला तोरनामेकी पावलगी थेरू येशू चेला गाङेला काताङसुङ। थेमे थेकी था ङा ड्वामीन। जस्तो ओङसीनोङ येशूला विश्वास खिन देता मातोङ सिन थेबाला आँट बिन्सुङ। थेमे थे थेरूकी म्यासिडोनिये लुङबापा गाल्सुङ। 2 म्यासिडोनियादु ठाउँ ठाउँला ओताते येशू ख्रीष्ट मिओनला ठेत्कीन थेकी थेबाताङ आदोराङ बात खाईन जस्तो ओङसीनोङ येशूला विश्वास खिन देता तोङा मेङगो सिन आँट बिन्सुङ। थोक खाला युगीन युगीन थे ग्रीस लुङबापा लेप्सुङ। 3 थेमे दावा सुमसाक थेरूराङ देत्सुङ। थेरूकी थे पानीजहाजला जेला सिरिये लुङबापा ड्वाप्ला ठीक खासुङ। थे थेपा डोजीन ग्रीसदु यहूदीओनगी थेला पानीजहाजलाराङ सेत्च्येते ठो खाला दुक्लो सिन थोबेकी थे सिरियापा पानीजहाजला मोन्डोबा खाईन म्यासिडोनियापा खाला ड्वा फाप्सुङ सिन थेपाराङ खाईन गाल्सुङ। 4 थेजीन थेत्ताङ ज्येन ज्येन मिङ ङ्योम्बुराङ ओतान। थेबाचेन बेरियापे पाईरस सिराते मि फुज्युङ सोपाटर, थिस्सलोनिकापे अरिस्तार्खसताङ सिकन्डस, डर्बीपे गायस थोकराङ खाईन तिमोथी थेमे एशिये अञ्चल टाइकिकसताङ त्रोफिमस सिरातेबा ओतान। 5 थेबा गाङेराङ पावल गोमा गोमा गाल्गीन त्रोआसदु लेप्कीन पावलबा ङ्योकोनला गुकीन देता ओतान। 6 यहूदीओनते सोडा मुलुबा खाला स्योबेन स्येला साच्येते चाड माने खाईन सिन्नामेकी पावलबा ङ्योकोन गाङेराङ फिलिप्पीदुकी ख्याम्बाप। थेमे समुन्द्रे लामलेई खाईन ङीमा ङे तिरी ङ्योकोन त्रोआसदु लेपाप। थेरू गोमाका गाल्ला देत्कान्तेबाला ठेत्कीन ङ्योकोन गाङेराङ थेरू हप्ताईसाक देताप। पावल तिरी पालोला त्रोआसदु देताते 7 थेमे आदेरी छोमु ङ्योकोन गाङेराङ थेरू येशूला विश्वास खित्कान्ते मिओनताङ प्रभु भोज साप्ला खाम्बाज्यीक्तु जम्मा ओङा ओतान। थेमे पावलगी गाङेताङ बात खिताला स्यूसुङ। ङारो च्योक्तेराङ थे खोरोङ थेरूकी डोच्येते ईन्देकी नुप फेतसाकोङ थेकी बात खाईन सिन्दा मेतान। 8 ङ्योकोन जम्मा ओङगीन देताते थे ताले लाकने कोठादु बत्ती काल्बेई पारा ओतान। 9 थेमे थेरू युटिकस सिराते स्याराज्यीक मि झ्यालदु देत्ला बात ङेन्गीन ओतान। पावल थोक खाला बात खिन खिनला थे च्य्वा गोरगीन भुसुक्क ङिक गाल्दुक। थोक खाईन ङिक गाल्नामेकी थे थेरूकी ताला सुमगी चावामा ल्हुम्दुक। थेमा गाल्ला लोङजीन थे स्यिइन सिन्दा ओतान। 10 थेमे पावलगी थेमा गाल्गीन थेला रिल्सादुराङ फाङबा ताप्कीन थेरू ओताते मिओनला “ख्योकोन सुङ ज्यीबा माकेत। दि सोम्बो लोक्सुङ,” सिन सिदुक। 11 थेरूई पावल याङराङ ताले लाकने गाल्सुङ। थेमे थेकी स्योबेन च्यागीन च्याकीन गाङेताङ प्रभु भोज सोसुङ। थे छोमुचेन थेकी लोप्कीन देत्कीनराङ नाम लाङसुङ। नाम लानामेकी थे थेरूई ख्याम्सुङ। 12 पावलगी सोम्बो लोक च्युताते थे स्याराते मिला थेरू ओताते मिओनगी खाम्बापा खेरसुङ। थे थोक खाईन सोन्देकी गाङेराङ आउदी गा खाबा ओतान। पावलबा मिलेटसपा लेपाते 13 थेरूकी ख्याम्बे खाला पावलगी ङ्योकोनला “ख्योकोन पानीजहाजला जेला अस्सोसपा ग्युक। ङा ख्योकोनला थेपाराङ ठेता खाला ओङगो,” सिन सानामेई ङ्योकोन पानीजहाज जेकीन थेपा गालाप। थेचेन थेस्साक ख्याम्गीनराङ वादुक। 14 थेमे थेरू थेङ पानीजहाजला जेनामेई ङ्योकोन गाङेराङ मितिलेनेपा गालाप। 15 थेमे थेरूकी ङारो च्योक्ते खियस सिरसे खादु लेपाप। थेरूई ना च्योक्ते फारकेनपा सामोस सिरसापा लेपाप। थेमे ज्ये च्योक्तेचेन मिलेटसदु लेपाप। 16 एशिये अञ्चल नाङला काल्बासाक अलमल खिता मेङगो सिन पावलगी एफिससपा मोन्डोओ सिन साबा ओतान। च्यिला सासीन थुपासम्म पेन्तिकोस चाडला यरूशलेमपा लेपाप सिन थे हतार हतार खाला डुइन ओतान। ठाले खाला पावलगी एफिसस मिओनताङ खाबाते बात 17 मिलेटसदु लेप्नामेकी पावलगी एफिससदु ओताते येशू ख्रीष्ट मिओनला ताकान्तेबाला थे खोरोङ ओत्सापा स्योक सि सिन लोन ताङसुङ। 18 थेबा थेरू वानामेकी थेबाताङ बात खिन थेकी “आज्यो न्वावे, ङे ख्योकोनला बातज्यीक बात ङि खिताप सिन दुरू काताङाते ईन। जसकी जे सासीनोङ ङा एशिये अञ्चलदु लेपा छोमुमेकी थातासाक बेला बेलाला ख्योकोनताङ ङ्योम्बुराङ ओत्जीन ङा चुक खाईन देत्सुङा, चुक चुक खासुङा सिन ख्योकोन गाङेला छ्याराङ ओत। 19 च्यि सासीन प्रभु येशूकी ङाला खि साबाते काम ङे छ्ये मिक्किता खाईन खाबाप। यहूदीओनगी ङाला सेताप सिन बाजिताङ बाजि ठो खाबेकी दि काम खित्जीन ङे पीर खिन दुक्पाङ भोगे खिता फाप्सुङ। 20 ख्योकोनला लेमु ओङे लाईदु ख्योकोन गाङेराङ जम्मा ओङसादु थेमे खाम्बा खाम्बाला समेदोङ गाल्गीन लोपा फाप्च्येते बात दोक्पोईओङ बाँकी मोज्योबा खाईन ङे गाङे लेमु खाईन लाप्कीन बिन्दा ओत। 21 यहूदी ईन्स्यीत, ग्रीक ईन्स्यीत ङे गाङेला ओर्च्ये ख्योकोनगी खेराङ पापी दुका सिन छ्या स्येला परमेश्वर छ्य्वापा लै खि थेमे प्रभु येशूला विश्वास खि सिन साबा ओत। ङे दोक दोक खाबा ओतान सिन ख्योकोन गाङेला छ्याराङ ओत। 22 था च्यि सासीन परमेश्वर आत्मेकी ङाला यरूशलेमपा ग्युक सिन साबा ओतेकी ङा थेपा डुइन ओत। थेपा लेप्नामेई च्यि ओङगीते चुक ओङगीते सिन ङाला छ्याःङ छ्या मेत। 23 ईन्सीनोङ ङा यरूशलेमपा लेप्नामेकी ङे थेरू जेलदु देता फाप्क्यो थेमे ङेतासम्म दुक्पा ङेत्क्यो सिन परमेश्वर आत्मेकी ङाला सार सारला याङ याङ छ्या स्येबा खाईन बिन्दा ओत। 24 थोक दुक्पा ओङजीन स्याराङ फाप्सीनोङ ङाला छ्याःङ ज्यीबा मेत। ङाराङ सोन सोनसाक ङे खिता फाप्च्येते कामचेन परमेश्वरगी मिओनला दया खिओ सिरच्येते गा लाङच्येते बात गाङेला लोप्च्येते ईन। थोक खाला प्रभु येशूकी खि साबाते काम ङे पूरो खिताराङ फाप्क्यो। 25 था ङुरूङ ठेत्च्येते दोस्यिकराङ ईन्दासीन। ङे परमेश्वर राज्य बात लापाते थोकान्तेबा ख्योकोन सुङगीङ था लोक्ला ङाला नोमुङ मेठेदो। 26 थोक ईन्देकी था ङा च्यि सिते सासीन ख्योकोन नाङ सुइँदेकी ङे लापाते बातओन माङेन्गीन तिरी परमेश्वर सजाय ङेत्सुङ सासीन थे ङे गल्ती मेन। 27 परमेश्वरगी मिओनला पापदुकी डेलाला च्यि खाबा ओते थेमे थेबाला चुक खिते सिरच्येते बातबरी छ्याःङ बाँकी मोज्योबा खाईन ङे ख्योकोनला गाङे साकीन बिन्दा ओत। 28 थोगी येशूला विश्वास खिता मोतोङा खाला था ख्योकोन खेराङोङ च्याङबो खाला देत। थेमे लेमु खाला तो सिन परमेश्वर आत्मेकी खेराङ जिम्माला बिन्दाते परमेश्वर मि गाङेते लेमु खाला हेर विचार खि। येशू ख्रीष्ट स्यिजीन थे जीउदुकी थेन्दाते ठागी थेकी थेबाला परमेश्वर मि ओङाला ङ्योबाते ईन सिन सम्झे खाला थेबाला लेमु खाला तो। 29 च्यिला सासीन था ङा दुरूकी गाल्नामेकी लुई बगाल नाङ फारा वाला लुक सेत्च्येते थेमे छरपुट्ट ज्वापच्योक खाला कोई कोई मि वाला ख्योकोन गाङेला आउदी खाला दुक्पा बिन्ला येशू छ्य्वापेई डेला छोल्ग्यो। 30 दोस्यिककामा मेन, ख्योकोन खेराङ नाङदुकीङ कोई कोईकी मेन्दा मेन्दे बात लाप्ला थुप थुपला ख्योकोन गाङेला खोपरोङ छ्य्वापा लै खित ज्युता छोल्ग्यो। 31 थोगी खेराङला सुङगीङ छक्के खिता मुथुप्स्यीत सिन च्याङबो खाला देत। ङे लो सुमसाक ख्योकोन गाङेला येशूला विश्वास खिनराङ देत सिन ङीन नुप ख्योकोन पीर खुरगीन दुक्पा खाईन खाईन खाबाते काम नोमुङ टोक माज्येत। 32 था ङा ख्योकोन गाङेला परमेश्वर लाःक्तुराङ सोम्पे खिओ। थेमे थेकी दया खिओ सिन छ्या स्येच्येते गा लाङच्येते बात ङेन्गीन देत सिनोङ सिओ। दोक खिन देत्सीन ख्योकोनगी प्रभु येशूला झन लेमु खाला विश्वास खिता थुप्क्यो। थेमे परमेश्वरगी सेम खुदुक जोबाते मि गाङेला तिरी तेरग्यो साबाते जति गाङे ख्योकोनलाङ तेरग्यो। 33 ज्येन बात च्यि सासीन ख्योकोनताङ ङ्योम्बु देत्जीन ङे सुङगीङ सेर नोरताङ खोलाक लोभ माक्या, सुङलाङ छ्याःङ नाङ मासा। 34 ङात्ताङ ङाराङ र्वाओनला गोच्येते पैसा ङे ङाराङ पाखुरा चले खाईन जोबाप। दि बादोङ ख्योकोनला छ्याराङ ओत। 35 थेमे ङुरूङगी दाक्पोन जीउ स्वाप्लाकामा मेन, दुक्पा ङेतातेबाला ताप्लाङ दुक्पा खाला काम खिता फाप्च्याक्वा सिन ङे ख्योकोनला तेन्गीन बिन्दा ओत। जे काम खित्जीनोङ ङुरूङगी ‘ज्येनगीते लिन्दा भन्दा बरू ज्येनला तेरा लेमु ईन,’ सिन प्रभु येशू थे खोरोङगीराङ साबाते बात टोक ज्येता मेङगो,” सिन बात खासुङ। 36 दि बाततेबा खाईन सिन्नामेई पावलगी एफिससदुकी वाबाते थेबा गाङेताङ खोबुकला देत्कीन परमेश्वरला प्रार्थना खासुङ। 37 थेमे पावलला फाङबा देप्कीन थेबा गाङेराङ आउदी खाईन ङुसुङ। 38 थेकी “था ख्योकोनगी ङाला नोमुङ ठेता मेङेदो,” सिन साबेकी थेबाला झन आउदी मेलेबा लाबा ओतान। थेमे थेबा गाङेराङ थेला पानीजहाजला जेताला समुन्द्रे छेउसाक केल लिच्युङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.