शक्ति काम 18 - जिरेलपावलगी कोरिन्थदु येशू बात लापाते 1 दि तिरी पावल एथेन्सदुकी कोरिन्थ सारनापा गाल्सुङ। 2 थेरू थेकी अक्वीला सिराते यहूदीज्यीकला ठेत्सुङ। थेचेन पोन्टस सिरसापे मि ओतान। तर थे रोमदु वाकीन देता ओतान। रोमी गेल्बो क्लौडियसकी रोमदु ओताते यहूदी गाङेला थेन्ला ग्युक सिन हुकुम बिन्देकी थेचेन थे खोरोङ फेम्मे प्रिस्किलाला टीकीन इटाली लुङबादुकी भर्खरकामा कोरिन्थपा लेपा ओतान। थेबाला ठेत्नामेई पावल थेबा देत्सापा गाल्सुङ। 3 थेबा जाप्राङ ङिकाराङ पाल जोकान ओतान। पावलगीङ गोमा पाल जोच्येते लापा ओतेकी थेबाताङ ङ्योम्बु देत्कीन पाल ज्वाप्ला स्यूसुङ। 4 ईन्सीनोङ सन्चारी छोमु छोमुचेन पावल यहूदीओनते मिटिङ खित्च्येते खाम्बापा गाल्ला थेरू जम्मा ओङकान्ते यहूदीताङ ग्रीकओनला येशू बात सत्यते बात ईन सिन छलफल खाला खाला लेमु खाला लोप्कीन ओतान। 5 सिलासताङ तिमोथी म्यासिडोनियादुकी थेरू वानामेकीचेन ज्येनते काम ताङगीन पावलगी खालि गा लाङच्येते बातकामा लोपाला स्यूसुङ। थेकी यहूदीओनला येशूराङ परमेश्वरगी तोङगो साबाते ख्रीष्ट ईन सिन ठोके खाईन लाप्सुङ। 6 तर थेरू काल्बा च्योक्ते यहूदीओनगी “खुई लापाते सत्यते बात ईनराङ मेन,” सिन थे विरोध खासुङ। थोक खानामेई पावलचेन “लो ख्योकोनगी ङे बात माङेन्सुङ। था तिरी परमेश्वरगी ख्योकोनला सजाय बिन्सीन थे खेराङ गल्तीकी खित्सादु ईन। ङेते छ्याःङ गल्ती मेत। थाचेन ङा ख्योकोनला ताङला ज्येन ज्येन जातकी मि ओत्साला डुइओ,” सिन थे खोरोङ खोलाकला खोबाते थाला समेदोङ टाक टाक खाईन 7 थे मिटिङ खित्च्येते खाम्बादु नोमुङ मेङच्या खाईन ताङगीन गाल्सुङ। थेरूई थे येशू बात लोपाला तीतस युस्तस सिराते मि खाम्बादु गाल्सुङ। थे परमेश्वरला माने खित्कान्ते मि ओतान। थे खाम्बाचेन होथे मिटिङ खित्च्येते खाम्बे दोन्दुराङ ओतान। 8 पावलगी लापाते बात ङेन्गीन क्रिस्पसताङ थे खाम्बे मि गाङेकी प्रभु येशूला विश्वास खिताला स्यूसुङ। क्रिस्पसचेन होथे मिटिङ खित्च्येते खाम्बेते छ्येते मि ओतान। पावलगी लोप्कीन ओताते बात ङेन्गीन कोरिन्थदु ज्येनोङ मि काल्बेईकी प्रभु येशूला विश्वास खाईन बप्तिस्मा लासुङ। 9 थेमे ग्वामाई पावलला मिलाम खित ज्युताच्योक खित च्युत्कीन प्रभु येशूकी थेत्ताङ बात खासुङ। थेकी थेला “खो बान्दा ज्यीबा माकेत। दुरू मिओनला ङे बात लोप्कीनराङ देत। थोक खिता मातोङ। 10 च्यिला सासीन दि सारदु था मि काल्बेईकी ङाला विश्वास खिओ। ङा खोत्ताङराङ देत्क्यो। खोल्ला सुङगीङ छ्याःङ मेलेबा खिता मुथुबो,” सिन सिदुक। 11 थेमे पावल थेरू मिओनला परमेश्वर बात लोप्कीन थेरूराङ लोज्यीकताङ फेस्याक देत्सुङ। 12 तर थेरू गल्लियो सिराते मि अखैये लुङबादु रोमी गेल्बो हाकिम ओङनामेई था पावलला खइँदा माक्याबाला मायाङसुङ सिन यहूदीओनगी डिगीन च्याकीन थेला जुम्गीन अड्डापा खेरसुङ। 13 थेमे थेबेकी थे हाकिमला “हजूर, दि मिकी परमेश्वरला माने खिताला दोक दोकका खिता फाप्क्यो सिन नियमताङ डिकराङ मिडिक्च्येते मेन्दा मेन्दे बात दुरू मिओनला लोप्कीदुक,” सिन सासुङ। 14 थेबेकी थोक सानामेकी पावलगी बात खिता खाबा ओतान। तर थेकी बात खा माक्याला गल्लियोकी “यहूदीवे, दि मिकी रोमी गेल्बो नियम कानूनला माकेत साबाते खइँदा मेलेबा काम खाबा ईन्सीन ङा ख्योकोन उजूर ताच्या ओतान। 15 तर ख्योकोन उजूर बात खालि खेराङ रीतिथितिताङ खेराङ धर्मे नियम माङेन्सुङ सिराकामा ओतेकी दि बात खेराङगीराङ डिक्पा खि। दोक्ते बात ताच्येते ङाला छ्याःङ खाँचो मेत,” सिन 16 थेबाला ङारगीन थेरूई तेन्गीन ताङसुङ। 17 थेमे थे मि गाङेकी यहूदीओनते मिटिङ खित्च्येते खाम्बे छ्येते मि सोस्थेनेस सिरातेला अड्डे खादुराङ जुम्गीन दुसुङ। थोक खासीनोङ गल्लियोकीचेन छ्याःङ वास्ता माक्यासुङ। पावलबा गोमा गालाते कोई कोई ठाउँला ग्युराते 18 थोक थोक ओङनामेकीङ पावल आदोराङ कोरिन्थदुराङ देत्सुङ। थेमे तिरी थेरू आज्यो न्वाओनताङ ड्वामीन सिन बात खाईन थे सिरिये लुङबापाला ख्याम्सुङ। प्रिस्किलाताङ अक्वीलाङ थेत्ताङ ङ्योम्बुराङ गाल्सुङ। परमेश्वरला कोबोलज्यीक खाबा ओतेकी किंक्रियादु लेप्नामेकी पावलगी थे खोरोङ टा ठेसुङ। किंक्रियादुकीचेन थेबा पानीजहाजला जेकीन गाल्सुङ। 19 थेमे एफिसस सारदु लेप्सुङ। थेरू लेप्नामेकी प्रिस्किलाताङ अक्वीलाचेन थेङलाराङ देत्सुङ। पावलचेन थेरू यहूदीओनते मिटिङ खित्च्येते खाम्बादु गाल्गीन यहूदीओनताङ छलफल खिन येशू बात लोपाला स्यूसुङ। 20 थेमे थे मिओनगी टिक्पी दिन थेबाताङ ङ्योम्बुराङ देत्ला थे बात लाप्ला नाङ सिन सिरजीन 21 “दि पालोला ङा देता मुथुबो। परमेश्वरगी ङाला याङराङ देपा ताङसीन ङा ख्योकोन ओत्सापा ओङगो,” सिन पावलचेन पानीजहाजला जेकीन थेरूकीङ गाल्सुङ। 22 सिजरियादु लेप्नामेकी पानीजहाजदुकी फाप्कीन थे यरूशलेमने गाल्सुङ। थेमे थेरू येशू ख्रीष्ट मिओनताङ ठेता खानामेई एन्टिओखियामा ग्युरगीन गाल्सुङ। 23 टिक्पी दिन एन्टिओखियादु देत्नामेकी याङराङ थे गलातियाताङ फ्रिगिये अञ्चल नाङपा गाल्सुङ। थेमे थेङला ओताते येशू चेलाओनला ठेता खाईन थेकी गाङेला जस्तोराङ ओङसीनोङ येशूला विश्वास खिता मातोङ सिन आँट बिन्सुङ। अपोल्लोस एफिससताङ कोरिन्थपा गालाते 24 पावल थोक खाला ठाउँ ठाउँला युगीन ओते बेलालाराङ अपोल्लोस एफिससदु लेप्सुङ। थे अलेक्जेन्ड्रियापे यहूदी ओतान। थे आउदी लेमु खाला बात खिता स्येकानज्यीक ओतान। थेकी परमेश्वर बादोङ गाङे लेमु खाईन छ्या स्येबा ओतान। 25 प्रभु येशू बात ङेन्ला थे छ्य्वापा लै खित्च्या सिराते च्यि ईन्दे सिनोङ थेला लाप्कीन बिन्दा ओतान। थेमे दि बात गाङेकी छ्या स्येबाराङ फाप्क्यो सिराच्योक खाला थेकी ज्येनलाङ लोप्कीन ओतान। थे बातओन थेकी ठीक ठीक खाला लोप्कीन ओतान। ईन्सीनोङ यूहन्नेकी मिओनला छ्युला लुगीन बप्तिस्मा बिन्दाते बातओन बाई येशू बात गाङेचेन थेला लेमु खाला छ्या मेतान। अपोल्लोसकी एफिससदु यहूदीओनते मिटिङ खित्च्येते खाम्बादु 26 गाल्गीन ज्यीबाराङ मिक्किता खाईन थेरू जम्मा ओङाते मिओनला येशू बात लोपाला स्यूसुङ। प्रिस्किलाताङ अक्वीलाङ थेरू ओतान। थेकी थेरू लापाते बात थोनामेई दि मिकी येशू बात गाङे लेमु खाईन छ्या स्येबा मेताक्वा सिन छ्या स्येकीन थेबा ङिबोकी थेला खोपरोङ खाम्बापा खेरगीन थेकी छ्या मास्येबाते बातओन लेमु खाईन लाप्कीन बिन्सुङ। 27 तिरी अपोल्लोसकी अखैये लुङबापा डोच्येते बात खित्जीन एफिससदु ओताते आज्यो न्वाओनगीङ थेला थेपा गाल्सीन लेमु ईन सिन साकीन च्याकीन अखैयादु ओताते येशू चेलाओनला थेला थेपा वानामेकी लेमु खि सिन चिट्ठीज्यीक टिकीन बिन्गीन ताङसुङ। थेपा लेप्नामेकी थेकी परमेश्वर दयेकी खित्सादु थेरू येशूला विश्वास खिताला स्यूबाते थेबा गाङेला आउदी मद्धत खासुङ। 28 च्यिला सासीन थेकी थेरू लोप्जीन ख्रीष्टकी विषयला परमेश्वर बातला गोमाका टिबाते बात पढे खाईन येशू परमेश्वरगी तोङगो साबाते ख्रीष्टराङ ईन सिन मि गाङे दोन्दु लेमु खाईन लाप्कीन बिन्गीन येशूला ख्रीष्ट मेन सिन सिरकान्ते यहूदी गाङेते खा टाले खासुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.