शक्ति काम 17 - जिरेलपावलबाला थिस्सलोनिकादु ओङाते बात 1 पावलबा ख्याम्गीन ख्याम्गीन अम्फिपोलिसताङ अपोल्लोनिये लामला खाईन थिस्सलोनिकादु लेप्सुङ। थेरूङ यहूदीओनते मिटिङ खित्च्येते खाम्बाज्यीक ओतान। 2 ज्येननापा च्योकराङ पावलचेन थेरूङ थे मिटिङ खित्च्येते खाम्बादु गाल्सुङ। थेमे सन्चारी सन्चारी ङीमा सुमसाक ख्रीष्टला चुक ओङगीते सिन परमेश्वर बातला गोमाका टिबाते बातओन पढे खिन 3 परमेश्वरगी तोङगो साबाते ख्रीष्ट दुरू वानामेई दुक्पा भोगे खाला स्यिइओ तर स्यिसादुकी लोक्ला सोम्बो लोइओ सिरच्येते बात थेरू मिओनला लेमु खाईन लाप्कीन बिन्सुङ। थोक खाईन थेरू मिओनताङ बात खिन थेकी “येशूराङ ख्रीष्ट ईन। थे बात लोपालाराङ ङा दुरू वाबाते ईन,” सिन सासुङ। 4 थेकी खाबाते थे बाततेबा थोकीन यहूदी नाङ कोई कोईचेन दि बात सत्यतेराङ ईन सिन पावलताङ सिलास छ्य्वापा लै खासुङ। थोकराङ खाईन परमेश्वरला माने खित्कान्ते ग्रीकओनोङ काल्बेई थेबे छ्य्वापा लै खासुङ। थे ग्रीकओन नाङ थे सारगी छ्ये छ्ये फेम्मे मिङ आदोराङ ओतान। 5 थोक खाईन मि काल्बेई थेबे छ्य्वापा लै खाबा थोङगीन ज्येन यहूदीओनचेन थेबा ङिबोताङ आउदी खाईन स्येदाङ खासुङ। थोगी थेबेकी थे सारगी नाङले कोई कोई मेलेबाते मि रूकीन होहल्ला खिताला स्यूसुङ। थेमे थेबा ङिबोला जुम्ला गाङे मि दोन्दु खेरा फाप्क्यो सिन यासोन सिराते मि खाम्बापा गाल्सुङ। 6 थेपा गाल्ला ताजीन थेबा ङिबोला माथेप्नामेई थेबेकी यासोनताङ थेरू आज्यो न्वाओनलाराङ कोई कोईला जुम्गीन थे सारगी छ्ये छ्ये मि दोन्दु खेरसुङ। थेमे गाङेकी थोच्या खाला बात खिन थेबेकी “लो तो, सा लुङबा खाङ युला गाङेपा मि नाङ होहल्ला खित ज्युत्कान्ते मिओन दुरू ङुरूङ सारदुङ लेप्तुक। 7 थेबाला दुरू यासोनगी साप थुङा बिन्गीन ज्याक्ला दुक। दिबा गाङेकी ङुरूङ रोमी गेल्बो नियम कानून मेङेन्दा खाला येशू सिराज्यीक ज्येनराङ गेल्बो ओत, थेला माने खिता फाप्क्यो सिन मिओनला लोप्कीदुक,” सिन सासुङ। 8 थेबेकी थोक सानामेई ना था थेरूङ गोलमाल ओङगीता सिन छ्ये छ्ये मि थेमे थेरू वाबाते ज्येन मिङ गाङेराङ आउदी खाईन ज्यीबा खासुङ। 9 थोगी थे छ्ये छ्ये मिकी यासोनताङ थेरू खेराते ज्येन मि गाङेला पैसा धरौटी ज्य्वा च्युत्कीनकामा ताङसुङ। पावलबा बेरियापा गालाते 10 थोक ओङनामेकी थे छोमु नाम स्योनामेकी थेरू आज्यो न्वाओनगी पावलताङ सिलासला बेरियापा ताङसुङ। थेपा लेप्नामेकी थेबा थेरूङ यहूदीओनते मिटिङ खित्च्येते खाम्बादु गाल्सुङ। 11 थेरू यहूदीओनगीचेन थिस्सलोनिकादु ओतातेबेकी च्योक मेलेबा मिक्किता खाईन पावलगी लापाते येशू बात लेमु खाईन ङेन्सुङ। थेमे थेकी लापाते बात परमेश्वर बातला टिबाते बातताङ डिइकाना मिडिक्का सिन थेबेकी ङीमे ठाङमा परमेश्वर बात आउदी खाईन पढे खाईन तासुङ। 12 थेमे यहूदी काल्बेईकी येशूराङ ख्रीष्ट दुका सिन थेला विश्वास खिताला स्यूसुङ। थोकराङ खाईन ग्रीकओन नाङ छ्ये छ्ये फेम्मे मित्ताङ ख्योओ मिकीङ काल्बेईकी येशूला विश्वास खिताला स्यूसुङ। 13 पावलगी बेरियादुङ परमेश्वर बात लोप्कीन दुक्लो सिन थिस्सलोनिके यहूदीओनगी थोसुङ। थे बात थोकीन स्येदाङगी थेपाङ गाल्गीन थेबेकी पावल मेलेबा मि ईन साकीन थेरूङ मिओनला उल्के खाईन होहल्ला खित च्युत्सुङ। 14 थोक ओङनामेई थेरू आज्यो न्वाओनगी पावलला थेरू मोज्योकी सिन थेला ज्येननापा तोङाला समुन्द्रे छेउनामा केल ताङसुङ। सिलासताङ तिमोथीचेन थेरूराङ देत्सुङ। 15 पावलला केल डोकान्ते मिओनगी थेला एथेन्स सारनापा क्याल्गीन बिन्सुङ। थेमे थेकी थेबाला “खाँपा लेप्ला च्याला सिलासताङ तिमोथीला थुप थुपला होत्ता देपा स्योक्लो सिन सिसा,” सिन सिदुक। थेरूकी थे मिओनचेन खोपरोङ खाम्बापा ग्युरगीन लिच्युङ। पावलगी एथेन्सदु खाबाते बात 16 सिलासताङ तिमोथीला एथेन्सदु गुला देत्जीन पावलगी थेरू मन्दिरताङ ल्हे मूर्ति आउदी काल्बेई थोङसुङ। थोक थोङजीन थेरू मिओनगी परमेश्वरला माने मिक्किच्याक्वा सिन पावलला आउदी मेलेबा लासुङ। 17 थेकी थेरू यहूदीओनते मिटिङ खित्च्येते खाम्बादु गाल्गीन यहूदीओन थेमे परमेश्वरला माने खित्कान्ते ग्रीकओनताङ छलफल खिन येशू बात लाप्सुङ। थेमे ङीमे ठाङमा थे सारदु मिओन रूक्सादु गाल्गीन थेरू ओङकान डोकान मिओनलाङ थोकराङ खाईन येशू बात लाप्सुङ। 18 थे मि रूक्सादु इपिक्युरीताङ स्तोइकी सिरातेन्दे पाटी गुरूओनोङ ओतान। पावलगी लापाते येशू बात थेमे स्यिनामेकी याङराङ सोम्बो लोइओ सिरच्येते बात थोजीन थेत्ताङ छलफल खिन थेबे नाङ लालेकी “दि फतफते बादोङ च्यि ङेन्च्ये?” सिन सासुङ। लालेकीचेन “दिकी ज्येन लुङबे ल्हे बात खित्च्या ईन्दा च्यिन्दा,” सिन सासुङ। 19 थेमे थेबेकी पावलला अरियोपागस सिराते मिटिङ खित्च्येते खाम्बापा खेरगीन च्याकीन “खुई लोप्कीन ख्याम्बाते बात ङ्योकोनला छ्या स्येबा सेम लासुङ। 20 खुई साबाते दि ल्हे बातनी ङ्योकोनगी नोमुङ थोबा मेत। दि बात च्यि ईन्दे ङ्योकोनलाङ लेमु खाला लाप्ला नाङ,” सिन सिदुक। 21 थेबेकी च्यिला पावलला थोक साबा ओताने सासीन थे सारगी मि थेमे ज्येन लुङबादुकी थेरू देताला वाबाते मिओन काल्बा च्योक्ते गाङेराङ गोमा थोबा मेताते साम्बा साम्बाते बात खालाकामा ङीन तोङगीन ओतान। 22 थेमे अरियोपागसदु जम्मा ओङाते एथेन्सते छ्ये छ्ये मि दोन्दु लाकीन पावलगी “हजूरवे, ख्योकोन आउदी खाला ल्हा लु माने खित्कान दुका सिन ङे छ्या स्येसुङ। 23 च्यिला सासीन सार खाङ युगीन डोजीन ङे ख्योकोन मन्दिरताङ ल्हे थान काल्बेई थोङसुङ। लेमु खाला ताजीन ठाउँज्यीक्तु थानज्यीक जोकीन थे लाक्तु ‘मिनराङ छ्या मास्येबाते ल्हा’ सिन टिबातेङ ङे थोङसुङ। थे ल्हा सु ईन्दे, चुक्ते ईन्दे सिन छ्या मास्येबालाराङ ख्योकोनगी थेला माने खिन दुक। ख्योकोनगी थोक खाईन छ्या मास्येबालाराङ माने खाबाते थे सु ईन्दे सिन था ङा लेमु खाला सिरामीन। 24 थेचेन सा नाम थेमे दि पृथ्वीदु ओताते जति जेसुकै जोकान्ते परमेश्वर ईन। स्वर्गने थेमे पृथ्वीदु गाङेपा राज्य खित्कान्ते थेराङ ईन। थोगी थेनी मिओनगी जोबाते मन्दिर नाङला मेदेदो। 25 थेलानी मिओनगी चढे खाबातेङ छ्याःङ मोगोओ। मिओनला जुनी तेरकान्ते थेराङ ईन। मिओनला गोच्येते जेसुकै थेकीराङ तेरग्यो। 26 थेकीराङ गोमा मिज्यीक जोकीन थे छ्य्वापेईराङ जात जातकी मि ओङ च्युत्कीन थेबाला सा लुङबा खाङ देत च्युताते ईन। खाङ जातकी मिला खापा ज्य्वाच्ये, थोईसाक सोन ज्युत्च्ये सिन गाङे थेकी गोमाका ठीक खाबा ओतान। 27 मिओनगी थे खोरोङला चाल्ला सु ईन्दे सिन छ्या स्येस्यीत सिनराङ दोक खाईन थेकी गाङे लाईदु जेसुकै ठीक खाबाते ईन। थेला छोलाला थारीला ड्वा माफाबो। थे ङुरूङताङराङ देत्क्यो। 28 थेकी खित्सादुराङ ङुरूङ गाङेराङ सोन्गीन देता थुपाते ईन। थे शक्तिदुईराङ ङुरूङ काम खित्च्येते थेमे फार छुर खिता थुपाते ईन। कविता टिक्कान्ते खेराङ मिओनगीङ कोई कोईकी ‘ङुरूङ गाङे थे सखा सन्तानराङ ईन,’ सिन टिबा ओत, मेन? 29 परमेश्वर सखा सन्तान ईन्सीनोङ ङुरूङगी परमेश्वर दोकस्यिकराङ ओतासीन सिन विचार खाला सेर चाँदीताङ दोई मूर्तितेबा जोला परमेश्वर सिन माने खिता मेङगो। 30 ईन्दानी मिओनगी थे सु ईन्दे, चुक्ते ईन्दे सिन लेमु खाईन छ्या मास्येकीन मूर्तितेबा जोकीन थेला माने खासीनोङ थातासाक थेकी सजाय माबिन्सुङ। थाचेन थेकी गाङेपा मि गाङेला खोपरोङ पापी दुका सिन छ्या स्येला थे छ्य्वापा लै खि सिन साबा ओत। 31 च्यिला सासीन थेकी ङीमा लेनज्यीक सुङलाङ काका पाका मिक्किता खाला मि गाङेते न्याय खिओ। थे छोमु सु सुला चुक चुक खिता फाप्कीका सिरच्येते टुङ्गोचेन थेकी छाने खाबाते मिज्यीगी खिओ। थे मि थे खोरोङगीराङ छाने खाबाते ईन सिन मिओनगी छ्या स्येस्यीत सिन थेकी थेला स्यिसादुकी सोम्बो लोक्पा ओत,” सिन बात खासुङ। 32 पावलगी परमेश्वरगी स्याप्ते मिला सोम्बो लोक्पा ओत सानामेई थेरू ओताते कोई कोई मिकी “दोक बादोङ चुक खाला ओङगीतेरो,” सिन थेला आउदी खाईन खिस्यी खासुङ। तर कोईकीचेन थेला “दि बात ङ्योकोनला था तिरीङ पालोई लाप्ला नाङ,” सिन सासुङ। 33 बात खाईन सिन्नामेकी थे थेबाताङ ठाल्गीन गाल्सुङ। 34 थेकी साबाते बात ङेन्गीन मि कोई कोई थे छ्य्वापा लै खाईन येशूला विश्वास खिताला स्यूसुङ। थेबे नाङ दोक्पोईचेन थे अरियोपागसदु जम्मा ओङाते डियनुसियस सिराते छ्येते मि थेमे ज्येनतेचेन डामारिस सिराते फेम्मे मि ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.