शक्ति काम 15 - जिरेलज्येन ज्येन जातकी मिताङ मोशेकी टिबाते परमेश्वर नियम बात 1 थेमे यहूदिये अञ्चलपेकी कोई कोई मि एन्टिओखियादु लेप्सुङ। थेरू लेप्कीन थेबेकी थेरू आज्यो न्वाओनला “ख्योकोनगीङ मोशेकी ङ्योकोन यहूदीओनला जीउला जो साबाते खतकी चिनु ज्वा फाप्क्यो। थे चिनु माजोसीनचेन परमेश्वरगी ख्योकोनला पापदुकी मेडेलो,” सिन लोपाला स्यूसुङ। 2 थेबेकी ज्येन ज्येन जातकी मिकीङ खतकी चिनु ज्वापराङ फाप्क्यो सिरजीन पावलताङ बारनाबासकीचेन पापदुकी ठालाला थेबेकी थे चिनु ज्वाराङ माफाबो सिन थेबाताङ आदोराङ टेकाटेउरी खासुङ। थोक खाईन जति बात खासीनोङ थेबे नाङ बात माडिक्पेकी थेरू येशू ख्रीष्ट मिओनगी “लो था ङुरूङगी दोक खिइ। च्यि सासीन पावलताङ बारनाबास थेमे ङुरूङ नाङदुई कोई कोईला यरूशलेमपा तोङगी। थेबेकी थेपा गाल्ला येशू ख्रीष्टकी खटे खाबाते मिओन थेमे थेरू येशू ख्रीष्ट मिओनला ताकान्तेबाला ठेत्ला दि बात खित्स्यीत। थेमे थेबेकी चुक खि सिका थोकराङ खिताप,” सिन सल्लाह खासुङ। 3 सल्लाह खानामेकी थेबेकी पावलताङ बारनाबास थेमे खोपरोङ नाङदुई कोई कोईला यरूशलेमपा ताङसुङ। थेपा डोजीन थेबेकी फोनिसियाताङ सामरिये नाङला ओताते आज्यो न्वाओनला ज्येन ज्येन जातकी मिङ चुक खाईन प्रभु येशू छ्य्वापा लै खासुङा सिरच्येते गाङे बात लाःप्कीन गाल्सुङ। थे बात थोजीन थेबाङ आउदी खाईन गा खासुङ। 4 थेमे यरूशलेमपा लेप्कीन थेबेकी येशू ख्रीष्टकी खटे खाबाते मिओन, येशू ख्रीष्ट मिओन थेमे थेबाला ताकान्तेबाताङ ठेता खासुङ। यरूशलेमदु ओताते थेबा गाङेकी थोक खाईन वाबातेबा गाङेला लेमु खाईन खोपरोङताङ ज्याक्सुङ। थेमे पावलताङ बारनाबासबेकी ज्येन ज्येन जातकी मिला गा लाङच्येते बात लोप्जीन परमेश्वरगी खोपरोङला चुक चुक खित च्युत्सुङा सिन गाङे थेबाला लाःप्सुङ। 5 थेबेकी थे बाततेबा सानामेकी थेरू येशूला विश्वास खित्कान्ते फरिसी पाटी मि कोई कोईकीचेन “ज्येन ज्येन जातकी मिकीङ ङुरूङगी च्योक खाला खतकी चिनु ज्वा फाप्क्यो, मोशेकी टिबाते परमेश्वर नियमोङ ङेन्दाराङ फाप्क्यो,” सिन सासुङ। 6 थेबेकी थोक सानामेकी येशू ख्रीष्टकी खटे खाबाते मिओन थेमे येशू ख्रीष्ट मिओनला ताकान्तेबा गाङेराङ रूकीन था दि बातला चुक खित्च्ये सिन छलफल खिताला स्यूसुङ। 7 काल्बासाक छलफल खानामेकी थेरू पत्रुसकी गाङे दोन्दु लाकीन “आज्यो न्वावे, ङे ज्येन ज्येन जातकी मिला गा लाङच्येते बात लोप्स्यीत थेमे थे बात थोला थेबेकी येशूला विश्वास खित्स्यीत सिनराङ परमेश्वरगी गोमा ङाला ख्योकोन नाङदुकी छाने खाबा ओतान। दि बातनी ख्योकोनला छ्याराङ ओत। 8 थेमे मि सेमगी बात छ्या स्येकान्ते परमेश्वरगी ज्येन ज्येन जातकी मिलाङ ङुरूङला च्योकराङ खाईन परमेश्वर आत्मा बिन्गीन थे खोरोङ मि जोसुङ। 9 थेबेकी येशूला विश्वास खाबेकी खित्सादु परमेश्वरगी थेबे पाप गाङे माफ बिन्गीन थेबे सेम लेमु जोसुङ। थोक खाईन थेकी ङुरूङ यहूदीताङ थेबाला दोक्पोईराङ सम्झे खाबा ओत। 10 था परमेश्वरगीराङ दोक खानामेकी ख्योकोनचेन च्यिला परमेश्वर भन्दाङ छ्ये ओङला थेबाला मोशेकी टिबाते परमेश्वर नियम ङेन्दा फाप्क्यो सिते? दोक खाला ख्योकोन च्यिला खुरा मुथुप्च्येते खुर्बु कुराच्योक खाला ङुरूङ ज्युज्यु पुर्खाताङ ङुरूङगी ङेन्दा माथुपाते नियम थेबाला ङेन ज्युता छोल्गीते? 11 साँच्चीराङ थोक खिता मेङगो। च्यि प्रभु येशूकी ङुरूङलाङ थेबाला च्योकराङ खाईन दया खाईन पापदुकी टालाते मेनरो?” सिन सासुङ। 12 थेकी थोक सानामेकी थेरू मि गाङेराङ खाराक्पा देत्सुङ। थेमे पावलताङ बारनाबासकी ज्येन ज्येन जातकी मिला गा लाङच्येते बात लोप्जीन परमेश्वरगी खोपरोङ ङिबोला चुक छ्ये छ्येताङ अचम्बतेन्दे काम खित च्युत्सुङा सिन लाःप्जीन थेरू थेबाबरी गाङेकी लेमु खाईन ङेन्सुङ। 13 थेबेकी बात खाईन सिन्नामेकी याकूबकी गाङेला “आज्यो न्वावे, दि बात लेमु खाला ङेन। 14 चुक खाईन परमेश्वरगीराङ ज्येन ज्येन जातकी मिलाङ दया खाईन थेबे नाङदुई थे खोरोङ मि जोसुङा सिनका थाल्ला भर्खरराङ शिमोनगी ङुरूङला लाःप्सुङ। 15 परमेश्वरगी ज्येन ज्येन जातकी मिलाङ थे खोरोङ मि जोइओ सिरच्येते बात थोङला परमेश्वर बात खित्कान्ते मिओनगी खाबाते दि बाततेबाताङ लेमु खाला डिइदुक। थेबेकीचेन परमेश्वरगी साबाते बात दोक सिन टिबा ओतान। 16 च्यि सासीन प्रभु परमेश्वरगीचेन ‘ङा था तिरी दुरू ग्युरला वाला गेल्बो दाऊद खाम्बा याङराङ जोइओ। राम्गीन खतम गालाते थे खाम्बा ङा याङराङ जोइओ। 17 थेमे बाँकी ओताते मिओनताङ ङे ङाराङ मि ईन सिन साबाते ज्येन ज्येन जातकी मिङ ङे छ्य्वापा लै खित्च्येते लाम चाल्ला ओङगो। 18 ङे गोमामेकीराङ दोक खिओ सिन साबाते बात साबा च्योकराङ खिओ,’ सिन साबा ओतान। 19 परमेश्वरगीराङ थोक साबा ओतेकी ङाचेन था ख्योकोनला चुक सिते सासीन परमेश्वर छ्य्वापा लै खित्कान्ते ज्येन ज्येन जातकी मिकीङ ङुरूङ यहूदीओनला बिन्दाते परमेश्वर नियम गाङे ङेन्दाराङ फाप्क्यो साला थेबाला दुक्पा तेरा मेङगो। 20 बरू ङुरूङगी थेबाला चुक खिइसे सासीन ल्हाला पूजा खाबाते छ्याःङ मासा। थोक्ते सोसीन ल्हा लु माने खाबा च्योकराङ ईन। थेमे रन्डीबाजी थेमे होदि च्योक्ते खिता मेङच्येते काम माकेत। थोकराङ खाला ठाक मेदेन्दा खाईन सेताते छ्याःङगीतेङ स्या मासा, ठागोङ मासा सिन चिट्ठीज्यीक टिला तोङगी। 21 मोशेकी टिबाते परमेश्वर नियमला दोक्ते काम खिता मेङगो सिन साबाते बात गाङेपा लापेकी गाङेकी लेमु खाईन छ्या स्येबा ओत। च्यिला सासीन गोमामेकीराङ सन्चारी सन्चारीला ठाउँ ठाउँला ओताते यहूदीओनते मिटिङ खित्च्येते खाम्बादु गाङेकी थोच्या खाला दि नियम बात पढे खिन ओत,” सिन सिदुक। ज्येन ज्येन जातकी मिला सल्लाह बिन्गीन टिबाते चिट्ठी 22 याकूबकी थोक सानामेकी थेरू येशू ख्रीष्टकी खटे खाबाते मिओन, येशू ख्रीष्ट मिओनला ताकान्तेबा थेमे येशू ख्रीष्ट मि गाङेकी थे बात ङेन्गीन “लो था ङुरूङगी ङुरूङ नाङदुई कोई कोईला छाने खाला च्याला पावल थेमे बारनाबासताङराङ एन्टिओखियापा तोङगी,” सिन सल्लाह खासुङ। थेमे खोपरोङ नाङदुई बारसाबास सिराते यहूदाताङ सिलासला छाने खासुङ। थेबा ङिबोचेन थेरू खोपरोङ नाङ छ्येते मि ओतान। 23 थेमे थेबेकी दोक सिन चिट्ठीज्यीक टिकीन थेबे लाःक्तु बिन्गीन ताङसुङ। थे चिट्ठीला च्यि सिन टिबा ओताने सासीन “दि चिट्ठीचेन एन्टिओखियादु थेमे सिरियाताङ सिलिसियादु ओताते ख्योकोन ज्येन ज्येन जातकी आज्यो न्वाबा गाङे लाईदु टिबाते ईन। ख्योकोन गाङेला येशू ख्रीष्टकी खटे खाबाते मिओन थेमे दुरू ओताते येशू ख्रीष्ट मिओनला ताकान्ते मि ङ्योकोन गाङेते नमस्ते ओत। 24 बात च्यि सासीन ङ्योकोन नाङदुई कोई कोई मि ख्योकोन ओत्सादु गाल्गीन दोक खिता फाप्क्यो, थोक खिता फाप्क्यो सिन साकीन ख्योकोनला अलमल्ल लाङगीन आउदी खाईन दुक्पा बिन्दुक्लो सिन ङ्योकोनगी थोसुङ। थेबाला ङ्योकोनगी ताङाते मेन। 25 दि बात थोनामेकी ङ्योकोन गाङेकी डिगीन दुरू ङेराङ नाङदुई कोई कोईला छाने खाला पावल थेमे बारनाबासताङराङ ख्योकोन ओत्सापा तोङगी सिन सल्लाह खाबाप। पावलताङ बारनाबासला ङ्योकोन आउदी ङिङज्ये खिओ। 26 ङुरूङ प्रभु येशू ख्रीष्ट सु ईन्दे सिन लोप्जीन दिबेकी झन्दै खोपरोङ ज्यानगी मायाङ मारे खिता फापा ओतान सिननी ख्योकोनलाङ छ्याराङ ओतासीन। 27 दोक खाईन ङ्योकोनगी सल्लाह खाईन दि चिट्ठीला टिबाते बात ख्योकोनला खेकीङ लेमु खाला लोःप सिन यहूदाताङ सिलासला ख्योकोन ओत्सापा ताङा ओत। 28 ङ्योकोनला खालि ख्योकोनगी ङेन्दाराङ फाप्च्येते दि बातज्यीक बात ङिकामा टिला तोङा लेमु ईन सिराच्योक लासुङ। परमेश्वर आत्मेकी ङ्योकोनला होदि बातओनकामा टिसीन ओङगो सिन छ्या स्येबा खाईन बिन्सुङ। 29 थे बातओन च्यि ईन्दे सासीन ख्योकोनगी ल्हाला पूजा खाबाते छ्याःङ मासा, ठागोङ मासा। ठाक मेदेन्दा खाईन सेताते छ्याःङगीतेङ स्या मासा। थेमे रन्डीबाजी थेमे होदि च्योक्ते खिता मेङच्येते काम माकेत। ङ्योकोनगी माकेत साबाते दि कामओन ख्योकोनगी माक्यासीन लेमु ओङगो। लो ख्योकोन गाङेला साबा च्योक ओङस्यीत,” सिन टिबा ओतान। 30 थोक खाईन थेबेकी थेबा ङिबोला चिट्ठी कुरगीन पावल थेमे बारनाबासताङराङ एन्टिओखियापा ताङसुङ। थेपा लेप्कीन येशू ख्रीष्ट मि गाङेला जम्मा खाईन थेबाला थे चिट्ठी बिन्सुङ। 31 थेमे थेबेकी थे चिट्ठी ताकीन खोपरोङगी थोस्यिककामा खिता फाप्च्याक्वा सिन छ्या स्येकीन थेबा आउदी गा खासुङ। 32 यहूदाताङ सिलासोङ ङिकाराङ परमेश्वर बात खित्कान्ते मि ओतान। थेबेकी थेरू आज्यो न्वाओनला चुक चुक खिता फाप्कीते सिन लाप्कीन बिन्गीन जस्तोराङ ओङसीनोङ प्रभु येशूला विश्वास खिन देता मातोङ सिन आँटोङ बिन्सुङ। 33 थोक खाला लोप्कीन थेबा ङिबो टिक्पी दिन थेरूराङ देत्सुङ। थेमे थेबा यरूशलेमपा ग्युरच्येते बात खित्जीन थेरू आज्यो न्वाओनगी खोले खोले ग्युगा सिन थेबाला लेमु खाईन ताङसुङ। 34 थोक ईन्सीनोङ सिलासचेन थेरूराङ देत्सुङ। 35 पावलताङ बारनाबास एन्टिओखियादु देत्सुङ। थेमे थेरू थेबा ङिबोताङ ज्येनोङ काल्बेई मिकी प्रभु येशू बात च्यि ईन्दे सिन लाप्सुङ। पावल याङराङ येशू बात लोप गालाते 36 थेमे टिक्पी तिरी पावलगी बारनाबासला “लो था ङुरूङ गोमा दाक्पोनगी प्रभु येशू बात लापाते सार सारला गाङेपा ग्युरला डुइ। थेमे थेङला आज्यो न्वाओनला च्यि च्यि ओङका, थेबा चुक दुका तार डुइ,” सिन सिदुक। 37 बारनाबासकीङ थे बात ङेन्सुङ। थेमे मर्कूस सिराते यूहन्नालाङ खोपरोङताङ खेरच्ये बात खासुङ। 38 तर पावलगीचेन थेला ङ्योम्बु खेरा लेमु मेङगो। येशू बात लोपे बेलाला थे काम मासिन्दालाराङ गोमा थे पामफिलियादुकी ङुरूङताङ ठाल्गीन गाला ओतान सिन थेला ङ्योम्बु खेरा माचाल्सुङ। 39 दि बातलाराङ थेबा ङिबोते आदोराङ ठाकठाक ठोकठोक स्योरसुङ। थेमे थेबा ङिबो ङ्योम्बु मोन्डोओ सिन ठाल्सुङ। बारनाबास मर्कूसला टीकीन पानीजहाजला जेकीन साइप्रसपा गाल्सुङ। 40 पावलगीचेन सिलासला थेत्ताङ खेरच्ये विचार खासुङ। थेमे पावलताङ सिलासला एन्टिओखियादु ओताते आज्यो न्वाओनगी प्रभु येशूकी ख्योकोनला दया खाला आशी तेरस्यीत साकीन थेरूकी ताङसुङ। 41 दोक खाईन पावलचेन सिरियाताङ सिलिसिये नाङपा गाल्सुङ। थेमे थेङला सार सारला जम्मा ओङकान्ते येशू ख्रीष्ट मिओनला जस्तोराङ ओङसीनोङ ख्योकोनगी येशूला विश्वास खिन देता मातोङ सिन आँट तेरगीन ख्याम्सुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.