शक्ति काम 13 - जिरेलशावलताङ बारनाबासला येशू बात लोप ताङाते 1 एन्टिओखियादु जम्मा ओङकान्ते येशू ख्रीष्ट मिओन नाङ कोई परमेश्वर बात खित्कान थेमे कोईचेन परमेश्वर बात लोप्कान ओतान। थेबाचेन बारनाबास, काला सिराते शिमियोन, साइरेनीपे लुसियस थेमे मनेनताङ शावल ओतान। मनेनचेन हेरोद गेल्बोताङराङ हुर्के खाबा ओतान। 2 थेमे बाजिई थेबाबरी बर्त देत्ला प्रभु परमेश्वरते जय जय खिन प्रार्थना खिन ओतान। थोक खिते बेलाला परमेश्वर आत्मेकी थेबाला “ङे बारनाबासताङ शावलला कामज्यीक खिताला छाने खाबा ओत। थोगी था ख्योकोनगी दिबा ङिबोला थे कामराङ खिताला थोङ,” सिन छ्या स्ये च्युत्सुङ। 3 परमेश्वर आत्मेकी थोक सानामेई थेबेकी थोरूमोङ बर्त देत्कीन परमेश्वरला प्रार्थना खासुङ। थोक खाईन सिन्नामेकी थेबेकी बारनाबासताङ शावल लाक्तु लाक्पा ज्यागीन प्रार्थना खासुङ। थेमे परमेश्वर आत्मेकी थेबाला खि साबाते काम खिताला थेरूकी ताङसुङ। शावलताङ बारनाबास साइप्रस लुङबापा गालाते 4 थोक खाईन परमेश्वर आत्मेकी बारनाबासताङ शावलला थेरूकी ताङनामेकी थेबा सिल्युसिया सारनामा गाल्सुङ। थेमे थेरूकी पानीजहाजला जेकीन समुन्द्रे किल्दु ओताते साइप्रस लुङबापा गाल्सुङ। 5 थेमे थेरू सलामिस सिरसादु लेप्नामेकी थेबा यहूदीओनते मिटिङ खित्च्येते खाम्बा खाम्बाला गाल्गीन गाङेला परमेश्वर बात लोपाला स्यूसुङ। खोपरोङला थे काम खित्जीन मद्धत खिताला गोक्यो सिन बारनाबासताङ शावलगी यूहन्नालाङ ङ्योम्बुराङ टीकीन खेरा ओतान। 6 थेबा सुमबो थे लुङबा खाङ युगीन पाफोस सारदु लेप्सुङ। थेरू थेबेकी बार-येशू सिराई यहूदीज्यीक ठेत्सुङ। थे जादू देन्कानताङ स्येबा खाबे काम खित्कान ओतान। थेकी थे खोरोङ परमेश्वर बात खित्कान्ते मि ईन सिन ज्येनला मेन्दे बात लोप्कीन ओतान। 7 थेचेन थे लुङबे रोमी गेल्बो हाकिमताङ ङ्योम्बुराङ देता ओतान। थे हाकिम मिन सर्गियस पौलस ओतान। थे आउदी बुद्धिमानज्यीक ओतान। थेकी परमेश्वर बात ङेन्दा सेम खाबा ओतान। थोगी थेकी बारनाबासताङ शावलला थे खाम्बादु स्योक सिन काताङसुङ। 8 थोक खाला थेबा ङिबोला परमेश्वर बात लोपाला कातोङजीन बार-येशूकी थुप थुपला थे हाकिमला शावलताङ बारनाबासकी खाबाते बात ईनराङ मेन्दे बात ईन सिन येशूला विश्वास खित मुज्युता चाल्सुङ। बार-येशूलाचेन मिओनगी एलुमास सिनोङ सिरच्येते खिन ओतान। एलुमास साबाते जादू देन्कानताङ स्येबा खाबे काम खित्कान्ते साबाते ईन। 9 शावललाचेन ग्रीक बातला पावल सिनोङ सिन ओतान। एलुमासकी थे हाकिमला येशूला विश्वास खित मुज्युता छोल्जीन पावलगी थेला ऊरीकामा ताकीन च्याकीन परमेश्वर आत्मे छ्य्वापेकी 10 “खो शैतानताङ डिक्कान्ते ईन। खो जे लेमुते कामताङ बादोङ मेलेबा जोला ढाँरकामा खिदुक। खो मिला छक्के खिताकामा छोल्गीदुक। खुई सेम पापकीकामा खाङला दुक। प्रभु परमेश्वरगी मिओनला लेमु खिता चालाते काम खो नामसाक ङ्ये ज्युता छोल्गीते? 11 था प्रभु परमेश्वरगी खोल्ला थे खोरोङ छ्येज्यीक शक्तिकी सजाय तेरग्यो। थोक ईन्देकी था खो टिक्पी दिनसाक अन्ध गाल्ला ङीमा स्यारातेङ मोथोङच्या डुइओ,” सिन सिदुक। थोक सिराईताङ मुक्पेकी ऊप उपाच्योक खाईन एलुमास मिक छ्याःङ मोथोङच्या गाल्सुङ। थेमे थेङला थे खोरोङला ठीताला सुइँदा दुकाना सिन छामछाम छुमछुम खिताला स्यूसुङ। 12 थेला थोक ओङा थोङगीन थे हाकिम छक्क परे खासुङ। थेमे थेकी पावलबेकी लोप्च्येते प्रभु येशू बात पक्काराङ सत्यते दुका सिन येशूला विश्वास खिताला स्यूसुङ। पावलगी पिसिदिये एन्टिओखियादु खाबाते बात 13 थेरूई तिरी पावलताङ थे र्वाओन पाफोसदुकी पानीजहाजला जेकीन पामफिलिये अञ्चलदु फाप्च्येते पर्गा सिरसादु लेप्सुङ। थेरू लेप्नामेकी यूहन्नाचेन पावलबा बारनाबासबाताङ ठाल्गीन यरूशलेमपा ग्युरसुङ। 14 पावलताङ बारनाबासचेन थे सारदुकीङ पिसिदिये अञ्चल एन्टिओखिया सारदु लेप्सुङ। थेरू लेप्नामेई सन्चारी छोमु थेबा ङिबो यहूदीओनते मिटिङ खित्च्येते खाम्बादु गाल्गीन थेरू जम्मा ओङाते ज्येनतेबाताङराङ देत्सुङ। 15 थेमे थेरू मिज्यीगी परमेश्वर नियमला टिबाते थेमे परमेश्वर बात खित्कान्तेबेकी टिबाते बात गाङेकी थोच्या खाईन पढे खासुङ। थे बाततेबा पढे खाईन सिन्नामेकी थे मिटिङ खित्च्येते खाम्बे छ्ये छ्ये मिकी आज्यो न्वावे, ख्योकोनला खइँदा लेमु बात सिरा सेम लाबा ओत्सीन थे बात दुरू जम्मा ओङाते मिओनला खि सिन मिज्यीकला पावलताङ बारनाबास देत्सादु ताङसुङ। 16 थोगी पावलगी लाकीन गाङेराङ खाराक्पा देत्स्यीत सिन लाक्पे चाल खानामेई दोक सिन बात खिताला स्यूसुङ। चुक सासीन “इस्राएलीवे थेमे परमेश्वरला माने खित्कान्ते ज्येन ज्येन जातकी मिवे, ङे बात लेमु खाला ङेन। 17 ङुरूङ इस्राएलीओनगी माने खिन ओताते परमेश्वरगी ङुरूङ ज्युज्यु पुर्खाला थे खोरोङ मि सिन छाने खाबा ओतान। थेमे थेबाबरी मिश्रे लुङबामा गाल्ला देत्जीन थेकी थेबाला आशी बिन्गीन आउदी खाईन फेल च्युता ओतान। थेमे परमेश्वरगीराङ थे खोरोङ छ्येज्यीक शक्तिकी थेबाला मिश्रदुकी तेन्गीन खुला लिच्युङ। 18 थेरूकी तेन्नामेकी लो खाल ङिसाक ठाःकताङ बालुवा बाई छ्याःङ मेत्से नाङला देत्जीन थेबेकी परमेश्वरगी खि साबाच्योक माक्यासीनोङ थेकी थेबाला लेमु खाला तेइनराङ देत्सुङ। 19 थेमे परमेश्वरगी कनान लुङबादु ओताते जात दुईनगी मि गाङे खतम जोकीन थे लुङबा खोपरोङतेराङ ओङच्या खाईन ङुरूङ ज्युज्यु पुर्खाला बिन्सुङ। 20 दोक खाईन ङुरूङ ज्युज्यु पुर्खा मिश्रमा गाल्गीन च्याकीन कनान लुङबादु देताला ओङ ओङसाक लो सय स्यीताङ खाल ङिताङ च्युताम्बा गाल्गीन सिन्दा ओतान। थेमे कनान लुङबा बिन्नामेकी थेबाला न्याय खिन राज्य खिताला परमेश्वरगी थेबे नाङदुईराङ छ्ये छ्ये मि छाने खिन ओतान। परमेश्वर बात खित्कान्ते शमूएल पालोसाकराङ परमेश्वरगी थोकराङ खिन ओतान। 21 शमूएल पालोलाचेन थेबेकी ‘ङ्योकोनला राज्य खिताला छ्ये छ्ये मिकामा मेन, गेल्बोज्यीक जोला नाङ,’ सिन सानामेई परमेश्वरगी बेन्यामीन थरगीते कीशकी फुज्युङ शावलला थेबे गेल्बो जोसुङ। थेकी लो खाल ङिसाक राज्य खानामेई 22 परमेश्वरगी थे लाःक्तुकी गेल्बो अधिकार ठ्वासुङ। थेमे थे साटोला दाऊदला गेल्बो जोसुङ। दाऊद चुक्ते मि ईन्दे सिन बात खिन परमेश्वरगी ‘यिशै फुज्युङ दाऊदचेन ङेते मन परे खाबाते मि ईन, दिकीचेन ङे खि साबा साबा च्योकराङ खिओ,’ सिन साबा ओतान। 23 थेमे गोमाका जमान खाबा च्योकराङ खाईन परमेश्वरगी गेल्बो दाऊद सन्तान नाङदुकीराङ इस्राएलीओनला पापदुकी डेल्कान्ते मिज्यीकला ताङसुङ। थेचेन येशूराङ ईन। 24 येशूकी थे खोरोङ काम शुरू खिता भन्दा गोमाचेन यूहन्नेकी वाकीन इस्राएली गाङेला ‘था ख्योकोनगी खेराङ पापी दुका सिन छ्या स्येला परमेश्वर छ्य्वापा लै खि थेमे बप्तिस्मा लोङ,’ सिन साबा ओतान। 25 थे खोरोङ कामबरी खाला सिन्दे बेलाला थेकी मिओनला ‘ख्योकोनगी ङा परमेश्वरगी तोङगो साबाते ख्रीष्ट ईन्दासीन सिन विचार खिदुक तर ङा थे मेन। थेनी था तिरीका ओङगीन ओत। ङानी थेते योक्पो ओङला काचाप टोल्ला तेरालाङ सोई मिक्किओ,’ सिन साबा ओतान। 26 आज्यो न्वावे, ख्योकोन दुरू अब्राहाम सन्तान थेमे परमेश्वरला माने खित्कान्ते ज्येन ज्येन जातकी मिङ ओत। येशू बात थोरूम चुक सासीन परमेश्वरगी ङुरूङला पापकी सजायदुकी डेलाला थेला ताङाते ईन। 27 यरूशलेम मिओनताङ थेबे छ्ये छ्ये मिकी येशूला परमेश्वरगी ताङाते ईन सिरच्येते बात छ्या मास्येसुङ। थेमे परमेश्वर बात खित्कान्तेबेकी येशू विषयला टिबाते बाततेबा सन्चारी सन्चारीला पढे खासीनोङ थेबेकी थेङ छ्याःङ माखोसुङ। थेबेकीचेन येशूला सजाय तेरा फाप्क्यो साकीन थेला चुक ओङगीते सिन गोमाका परमेश्वर बात खित्कान्तेबेकी टिबाते बाततेबा साबा च्योकराङ ओङ च्युत्सुङ। 28 थेला सेता फाप्च्येते छ्याःङ गल्ती मेत्सीनोङ थेबेकी रोमी गेल्बो हाकिम पिलातस ओत्सादु गाल्गीन दिलाचेन सेताराङ फाप्क्यो सिन बात खाईन येशूला स्यिङगी थामला टाँए खाईन सेत च्युत्सुङ। 29 थोक खाईन परमेश्वर बातला थोक थोक ओङगो सिन गोमाका टिबाते बात गाङे साबा च्योकराङ ओङ च्युत्नामेई थेबेकी थेला टाँए खाईन सेताते स्यिङगी थामदुकी थेन्गीन खेरगीन दिसुङ। 30 ईन्सीनोङ परमेश्वरगीचेन येशूला स्यिसादुकी सोम्बो लोक्पा ओत। 31 थोक खाईन सोम्बो लोक्नामेकी थेकी गोमा गालील अञ्चलदुकी थे खोरोङताङ ङ्योम्बुराङ यरूशलेमपा गालाते मिओनताङ याङ याङ ठेता खासुङ। थेमे खोपरोङगी थोङातेताङ थोबाते येशू बात गाङे थरिङोला इस्राएलीओनला लोप्कान्ते मिओन होथेबाराङ ईन। 32-33 थोगी था ङ्योकोन ख्योकोनला दि गा लाङच्येते बात सिओ। च्यि सासीन परमेश्वरगी येशूला स्यिसादुकी सोम्बो लोगीन ङुरूङ ज्युज्यु पुर्खाताङ खाबाते जमान ङुरूङ लाईदु पूरो खाबाते ईन। परमेश्वरगी येशूला स्यिसादुकी सोम्बो लोइओ सिरच्येते बात थेकी गोमाका ‘खो ङे फुज्युङ ईन। थरिङमेई ङा खुई आबा ईन,’ सिन दोस्रो भजनला टिक च्युता ओतान। 34 येशूला सोम्बो लोक्नामेई थे याङराङ नोमुङ मिस्यिओ थेमे से चावादु रूल मुज्युदो सिनोङ परमेश्वरगी गोमाका दोक सिन साबा ओतान। च्यि सासीन ‘दाऊदताङ जमान खाबा च्योकराङ ङा ख्योकोनला पक्का खाला आशी तेरग्यो,’ सिन साबा ओतान। 35 थोगीराङ दाऊद गेल्बोकीङ भजन किताबला ठाउँज्यीक्तु ‘सेमला पाप सिराते छ्याःङ मेताते खोरोङगी छाने खाबातेला परमेश्वर खुई से चावादु रूल मुज्युदो,’ सिन साबा ओतान। 36 गेल्बो दाऊदकीचेन थे खोरोङ पालो मिओनला परमेश्वरगी थे खोरोङला खित च्युता च्योकराङ खाला राज्य खिन ओतान। उमेर छाङनामेकी थे स्यिसुङ। थेमे थेला थे खोरोङ पुर्खाओन दिसे खादुराङ दिसुङ। थेमे थे दाक रूल्गीनोङ गाल्सुङ। 37 तर येशूचेन स्यिनामेकी रूल्गीन मागाल्सुङ। परमेश्वरगी थेला सोम्बो लोक्सुङ। 38 बात दोक दोक ईन्देकी आज्यो न्वावे, येशूकी खित्सादुराङ खेराङ पाप माफ ओङगो सिन था ख्योकोन गाङेकी लेमु खाला छ्या स्येबा खि। 39 येशूला विश्वास खित्कान गाङेला परमेश्वरगी थेबे पापबरी माफ बिन्ला थेबाला दोषी मेन सिन सिओ। मोशेकी टिबाते परमेश्वर नियम तालाचेन परमेश्वरगी ख्योकोनला दोक खाला दोषी मेन सिरा थुप्च्या मेतान। 40 बात चुक चुक ईन्दाका सिन ख्योकोन गाङेकी दाक थोसुङ। थोगी था ङ्योकोनगी साबाते बातओन लेमु खाला ङेन। मेन सासीन गोमा परमेश्वर बात खित्कान्ते मिओनगी साबाते दि बाततेबा ख्योकोन गोःनामा फाबोङ। 41 थेबेकी चुक साबा ओताने सासीन ‘ङे बातला ईनराङ मेन सिन खिस्यी खित्कान्ते मिवे, लेमु खाला ङेन। ङा ख्योकोन नाङ कामज्यीक खिओ। थे काम च्यि ईन्दे सिन सुइँदेकी ख्योकोनला लेमु खाईन लाप्कीन बिन्सीनोङ ख्योकोनगीचेन परमेश्वरगी थोक खाबाते ईनराङ मेन सिन पत्ते मिक्किओ। थोगी ख्योकोन गाङे सजाय ङेत्ला स्यिइओ,’ सिन परमेश्वरगी साबाते बात टिबा ओतान,” सिन सिदुक। 42 दि बाततेबा साकीन सिन्नामेकी पावलताङ बारनाबास थे मिटिङ खित्च्येते खाम्बादुकी थेन्गीन गाल्सुङ। फिनामा थेन्ला डोजीन थेरू वाबाते मिओनगी थेबा ङिबोला “ख्योकोनगी खाबाते बात था तिरी सन्चारीलाङ थोकराङ खाला लाप्ला तेराला स्योक,” सिन सासुङ। 43 थेरू मिटिङ सिन्नामेई यहूदीओन थेमे यहूदी धर्म माने खिताला स्यूकीन परमेश्वरला माने खित्कान्ते ज्येन ज्येन जातकी मि काल्बेई पावलताङ बारनाबास तिरी तिरी गाल्सुङ। थेमे थेबा ङिबोकी थे मिओनला “परमेश्वरगी ख्योकोनला दया खाबा ओतेकी था जस्तो ओङसीनोङ ख्योकोन येशूला विश्वास खिनराङ देत,” सिन सिदुक। एन्टिओखियादु पावलताङ बारनाबास विरोध खाबाते 44 थे तिरी सन्चारी छोमु यहूदीओनते मिटिङ खित्च्येते खाम्बादु परमेश्वर बात ङेन्दाला झन्दै थे सार खाङगी मि गाङेराङ जम्मा ओङसुङ। 45 थोक काल्बेई मि थेरू वाबा थोङगीन थानी मि गाङे पावलताङ बारनाबास छ्य्वापाका लै खिताला स्यूसुङ सिन यहूदीओनला खोक्पो खाईन स्येदाङ लासुङ। थेमे थेबेकी थेरू ओताते मिओनला पावलगी खाबाते बात ईनराङ मेन्दे बात ईन सिन आउदी खाईन थे विरोध खिताला स्यूसुङ। 46 यहूदीओनगी थोक खित्जीन पावलताङ बारनाबासकी ज्यीबाराङ मिक्किता खाईन थेबाला “ङ्योकोनगी लोप्कीन ओताते परमेश्वर बात लोपाला ङ्योकोन गोमा ख्योकोन ओत्सादु वाबाते ईन। तर ख्योकोनगी दि बात ईनराङ मेन्दे बात ईन सिन ङेनराङ माङेन्सुङ। दोक खाईन ख्योकोनगी नोमुङ मिसिन्च्येते जुनी मोगोओ सिरा च्योकराङ खासुङ। थोक ईन्देकी था दि बात ङ्योकोन ज्येन ज्येन जातकी मिला लोप डुइओ। 47 ङ्योकोनला दोक खि सिन प्रभु येशू थे खोरोङगीराङ कोता ओत। चुक सासीन ‘लुङबा लुङबाला देता ओताते ज्येन ज्येन जातकी मि ओत्साला गाल्ला थेबाला ठीक लाम तेन्ला तेराला ङे खोल्ला छाने खाबा ओत। थोगी गाल्ला परमेश्वरगी थेबालाङ पापकी सजायदुकी टाल्ला लेमु खिओ सिन थेबाला लोप,’ सिन साबा ओत,” सिन सिदुक। 48 पावलताङ बारनाबासकी दोक सिरजीन ज्येन ज्येन जातकी मि आउदी खाईन गा खासुङ। थेमे प्रभु येशू बात चुक लेमु दुका सिन बात खिताला स्यूसुङ। दोक खाईन नोमुङ मिसिन्च्येते जुनी तेराला परमेश्वरगी छाने खाबाते मिओनगीचेन येशूला विश्वास खिताला स्यूसुङ। 49 थोक ओङगीन थे लुङबादु गाङेपा प्रभु येशू बात फैले खासुङ। 50 थोक ओङजीन यहूदीओनगीचेन पावलताङ बारनाबासला लेमु मि मेन सिन थे सारगी छ्ये छ्ये मि थेमे थेरू परमेश्वरला माने खित्कान्ते छ्युक्पु छ्युक्पुते फेम्मे मिला लुकीन खोपरोङ लाःक्तु लासुङ। थोक खाईन थेबाबरी गाङेराङ डिगीन पावलताङ बारनाबासला दुक्पा बिन्गीन थेरूकी उरगीन ताङसुङ। 51 थेरूकी थोक खाला उरला तोङजीन पावलताङ बारनाबासकीङ थे मिओनतेराङ गल्ती ईन सिराला खोपरोङ काम्बाला खोबाते थाला समेदोङ टाक टाक खाईन एन्टिओखियादुकी थेन्गीन आइकोनियमपा गाल्सुङ। 52 थोक ओङसीनोङ एन्टिओखियादु येशू चेलाओन आउदी गा खिन देत्सुङ। थेबा परमेश्वर आत्मेकी खाङाते मि ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.