शक्ति काम 11 - जिरेलपत्रुसकी यरूशलेमदु ग्युरनामेई खाबाते बात 1 ज्येन ज्येन जातकी मिकीङ परमेश्वर बात ङेन्दाला स्यूदुक्लो सिन येशू ख्रीष्टकी खटे खाबाते मिओनगी थेमे यहूदिये अञ्चलदु ओताते येशूला विश्वास खित्कान्ते यहूदी आज्यो न्वाओन ज्येन ज्येनगीङ थोसुङ। 2 थेमे पत्रुस यरूशलेमपा ग्युरगीन वानामेई होथे यहूदी आज्यो न्वाओनगी थेला 3 “खुईनी खतकी चिनु माजोबाते ज्येन ज्येन जातकी मित्ताङ ङ्योम्बु देत्कीन थेबाताङ साच्या थुङच्याङ खादुक। ङुरूङ यहूदीओनगी दोक खिता मेङगो सिन च्यि खोल्ला छ्या मेतानरो?” सिन ङाराला स्यूसुङ। 4 थेबेकी थोक खित्जीन पत्रुसकी च्यिला दोक खाबाते ईन्दे, चुक चुक ओङा ओताने सिन गाङे बात थेबाला लाःपाला स्यूसुङ। 5 थेकी “आज्यो न्वावे, ङा योप्पादु ओत्जीन ङीमाई प्रार्थना खिते बेलाला परमेश्वरगी ङाला मिलाम खित ज्युताच्योक खित च्युत्सुङ। थोक खित ज्युत्जीन ठामासोमुलाराङ ङे स्वर्गनेकी गा च्योकस्यिक जोदाई छेउ छेउला सुइँदेकी जुम्बाच्योक खाईन फाप्कीन ओता थोङसुङ। 6 थेमे ङे थे नाङ लेमु खाईन ताबाप। थे नाङचेन थरी थरीतेन्दे चारखुट्टे पशुताङ री रीदाक, साला ख्याम्कान्ते चापाकताङ रूलतेबा थेमे छ्योज्युङमा ओतान। 7 थेरूकी ङे ‘ए पत्रुस, लाला खो दिबाला सेत्ला सो,’ सिन सिरा थोसुङ। 8 थोक सिरा थोजीन ङे ‘प्रभु, ङ्योकोन यहूदीओनगी सा मेङगो साबाते दोक्तेबा थोरूमसाक ङे नोमुङ दोबाङ मेत। ङा दिबाला चुक खाला साच्येरो?’ साबाप। 9 याङराङ स्वर्गनेकी ‘परमेश्वरगी सा ओङगो सानामेकी था खो चुक खाला साच्ये सिन मासेर,’ सिन साबा थोसुङ। 10 थोक खाईन बाजि सुम थे गा च्योक्ते ङे खादु ओङगीन देत्सुङ। थेमे बाजि सुमसाकराङ ‘दिबाला सेत्ला सो,’ सिन साबाते बादोङ थोसुङ। थे तिरीचेन थे गा च्योक्ते याङराङ स्वर्गनेराङ ग्युरगीन गाल्सुङ। 11 थे बेलालाराङ सिजरियापेकी मिल्टेरी क्याप्टेन कर्नेलियस सिरातेकी ङाला कातोङ ताङाते मेरा सुम मि ङा देत्च्येते खाम्बादु वादुक। 12 थेमे परमेश्वर आत्मेकी ङाला ‘दिबाताङ चुक खाला ड्वाबे सिराच्योक खाला अप्ठेरो माने मिक्किता खाला खो खोल्ला लिन वाबाते मिओनताङ ग्युक,’ सिन सिदुक। थेमे ङा थेबाताङ सिजरियापा गालाप। दुरू ङात्ताङ ओताते दि आज्यो न्वाबा मेरा ठुगोङ ङात्ताङ ङ्योम्बुराङ थेपा गाला ओतान। ङ्योकोन गाङेराङ थे मिल्टेरी क्याप्टेन खाम्बे नाङ स्यूबाप। 13 थेरूई थेकी ङ्योकोनला परमेश्वर दूतज्यीगी थे खोरोङ खाम्बादु वाकीन थेला ‘योप्पादु ओताते शिमोन सिराते मिला लिन थोङ। थेला मिओनगी पत्रुस सिनोङ सिओ। 14 थेकी वाला ख्योकोनला परमेश्वर बात लोप्क्यो। थे बात ङेन्नामेई परमेश्वरगी खोत्ताङ खुई खाम्बादु ओताते मि गाङेला पापकी सजायदुकी डेल्ग्यो,’ सिन सिदुक सिन थे खोरोङला ओङाते बात गाङे लाःप्सुङ। 15 थेकी थोक सानामेकी ङे थेबाबरीला परमेश्वर बात लोपाला स्यूबाप। थोक खाला बात खिन खिनलाराङ ङुरूङगी गोमा ङेता च्योकराङ खाईन थेबाबरीकीङ परमेश्वर आत्मा ङेत्सुङ। 16 थोक ओङनामेकी ‘यूहन्नेकीनी मिओनला खालि छ्युलाकामा लुगीन बप्तिस्मा बिन्दा ओतान। परमेश्वरगीचेन ख्योकोनला परमेश्वर आत्मे बप्तिस्मा तेरग्यो,’ सिन प्रभु येशूकी गोमाका साबाते बात ङाला ठेम्बा लासुङ। 17 ङुरूङगी च्योकराङ थेबेकीङ प्रभु येशू ख्रीष्टला विश्वास खासुङ। थेला विश्वास खानामेई परमेश्वरगी थेबालाङ ङुरूङला च्योकराङ खाईन परमेश्वर आत्मा बिन्सुङ। परमेश्वर थे खोरोङगीराङ ज्येन ज्येन जातकी मिलाङ परमेश्वर आत्मा बिन्नामेकी ङे चुक खाला थेला थोक खिता मेङगो सिन सिरच्ये?” सिन सासुङ। 18 थेकी दि गाङे बात सानामेकी गोमा थेला ङारकान्ते मि गाङेराङ खाराक्पा देत्सुङ। थेमे थेबेकी परमेश्वरते जय जय खिनकामा “दि चुक अचम्बे बात ईन्दाका। थानी परमेश्वरगी ङुरूङगी च्योकराङ खाला ज्येन ज्येन जातकी मिकीङ नोमुङ मिसिन्च्येते जुनी ङेत्स्यीत सिन थेबाला खोपरोङ पापी दुका सिन छ्या स्येला परमेश्वर छ्य्वापा लै खित्च्ये मौका तेराला स्यूदुक,” सिन बात खासुङ। एन्टिओखियादु मिओनगी येशूला विश्वास खाबाते 19 स्तिफनसला सेत्नामेकी येशूला विश्वास खित्कान्तेबाला छ्ये छ्ये मिकी आउदी खाईन दुक्पा तेराला स्यूनामेकी यरूशलेमदुकी फ्रोकीन छरपुट्ट गालाते मिओन थारी थारीला ख्योला ओतान। थेबा लाला फोनिसिये नाङपा, लालाचेन साइप्रस लुङबे नाङपा लेपा ओतान। थोकराङ खाईन लाला लालाचेन एन्टिओखिये सारगी नाङपा गाला ओतान। थोक खाईन गाङेपा गालाते मि काल्बा च्योक्तेकी खालि खोपरोङ यहूदीओनलाकामा येशू बात लोपाला स्यूसुङ। 20 थोक ईन्सीनोङ कोई कोईकीचेन एन्टिओखियापा गाल्गीन ग्रीकओनलाङ प्रभु येशू बात लाप्सुङ। थोक खित्कान्तेबाचेन साइप्रस लुङबाताङ साइरेनी सारगी मिओन ओतान। 21 थोक खाला बात लोपाला प्रभु येशूकी थेबाला आउदी खाईन आशी बिन्सुङ। थेमे थेरू मि काल्बेईकी प्रभु येशूला विश्वास खाईन थे छ्य्वापा लै खासुङ। 22 थेमे एन्टिओखियादु थोक खाईन ज्येन ज्येन जातकी मिकीङ येशूला विश्वास खिताला स्यूदुक्लो सिन यरूशलेमदु जम्मा ओङकान्ते येशू ख्रीष्ट मिओनगी थोसुङ। थेमे थेबेकी बारनाबासला थेपा चुक दुका सिन तार ताङसुङ। 23 थे एन्टिओखियादु लेप्ला ताजीन परमेश्वरगी थेरू मिओनलाङ दया खाईन थे खोरोङ छ्य्वापा लै खित्च्येते मौका बिन्दा थोङगीन थेला आउदी गा लासुङ। थेमे थेकी “जस्तोराङ ओङसीनोङ ख्योकोनगी प्रभु येशूला विश्वास खिता नोमुङ मातोङ,” सिन थेबाला आँट बिन्सुङ। 24 बारनाबास लेमु मि ओतान। थेचेन परमेश्वर आत्मेकी खाङाते थेमे येशूकी जेङ खिता थुप्क्यो सिन थेला आउदी खाला विश्वास खित्कानज्यीक ओतान। थे एन्टिओखियादु देते बेलाला थे बात ङेन्गीन मि काल्बेईकी प्रभु येशूला विश्वास खिताला स्यूसुङ। 25 थोक ओङगीन थेरू येशू बात लोपाला ज्येनोङ मि गोबेकी बारनाबास शावलला छोलाला टार्ससपा गाल्सुङ। 26 शावलला ठेत्नामेकी थेकी थेला एन्टिओखियापा लाकीन खुला लिच्युङ। थेमे थेबा ङिकाराङ लोज्यीकसाक पूरो थेरू येशू ख्रीष्ट मिओनताङ ङ्योम्बुराङ देत्कीन मि काल्बेईला येशू बात लाप्सुङ। मिओनगी येशू चेलाओनला गाङे भन्दा गोमा ख्रीष्टियान साबाते एन्टिओखियादुराङ ईन। 27 थे बेले नाङलाराङ परमेश्वर बात खित्कान्ते कोई कोई मि यरूशलेमदुकी एन्टिओखियापा लिच्युङ। 28 थेरू वाबातेबे नाङ अगाबस सिरातेकी परमेश्वर आत्मे छ्य्वापेई येशू चेलाओन गाङे दोन्दु “था गाङेपा छ्येज्यीक अनिकाल लाङगो,” सिन तिरी ओङच्येते बात लाःप्सुङ। थे अनिकालचेन तिरी रोमी गेल्बो क्लौडियस पालोला लाबा ओतान। 29 अगाबसकी साबाते बात थोनामेकी थेरू ओताते चेलातेबा गाङेकी यहूदिये अञ्चलदु ओताते येशूला विश्वास खित्कान्ते ज्येन आज्यो न्वाओन लाईदु पैसा दुला तोङगी सिन ठो खासुङ। थेमे थेबाबरीकी खोपरोङगी जति जति तेरा थुप्कीदुक उति उतिराङ पैसा जम्मा खासुङ। 30 थेमे थे पैसाबरी थेबेकी थेपा ओताते येशू ख्रीष्ट मिओनला ताकान्ते मिओन लाःक्तु बिन सिन बारनाबासताङ शावल लाःक्तु बिन्गीन ताङसुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.