३ यूहन्ना 1 - जिरेल1 ङा येशू ख्रीष्ट मिओनला ताकान्ते छ्येते मिज्यीक ईन। दि चिट्ठी ङा ङे र्वा गायस खोल्ला टिगीन ओत। खेकीकामा मेन्देकी ङा खोल्ला पक्काराङ ङिङज्ये खिओ। 2 ङिङज्येते र्वा खो येशू ख्रीष्टला लेमु खाला विश्वास खित्कान्ते मि ईन। खोल्ला साबा च्योक ओङस्यीत थेमे जीउलाङ सन्चा सुबिस्ता ओङस्यीत सिन ङा प्रार्थना खिओ। 3 कोई कोई आज्यो न्वाकी थेपेकी वाकीन खो आउदी खाला सत्यते बात ङेन्च्याक्वा थेमे थे बातला खि साबा च्योकराङ खिन देत्च्याक्वा सिन ङाला लाःप्सुङ। दि बात थोनामेई ङाला आउदी गा लासुङ। 4 ङाराङ फिजाओनगी सत्यते बात ङेन्ला थेरू खि साबा च्योकराङ खिदुक्लो सिन थोजीन ङाला आउदी गा लाङगीदुक, दि छेत गा लाङच्येते बात ङे लाईदु ज्येन छ्याःङ मेन। यूहन्नेकी गायसला लेमु खासुङ सिन साबाते 5 ङिङज्येते र्वा खुई खोरोङगी गोमा नोमुङ माठेताते थेमे ङो मास्येबाते मि ईन्सीनोङ दाक्पोन आज्यो न्वाला आउदी लेमु खादुक। दोक्ते काम खुई खिता फापा च्योकराङ लेमु खाला खिदुक। 6 होथे आज्यो न्वाओनगी दुरू वाकीन खुई थेबाला थोई लेमु खासुङा सिन येशू ख्रीष्ट मिओन दोन्दु गाङे लाःप्सुङ। था थेबा ज्येन ठाउँला डोजीनोङ खुई थेबाला गोच्येते बिन्ला होथोकराङ लेमु खाईन ताङसीन लेमु ओङगो। थोक खाबाते परमेश्वर दोन्दु खिता डिक्च्येते काम ईन। 7 येशू ख्रीष्ट सु ईन्दे सिन लोपाला थोक खाला ठाउँ ठाउँला डोजीन ज्येन ज्येन जातकी मित्ताङ थेबेकी छ्याःङ मिलिनो। 8 दोक ईन्देकी ङुरूङगीराङ थेबाला गोच्येते बिन्ला लेमु खिता फाप्क्यो। दोक खाबाते ज्येनला सत्यते बात लोपाला ङुरूङगीङ थेबाताङराङ डिगीन काम खाबाते ईन। यूहन्नेकी डियोत्रिफसताङ डेमेत्रियस बात खाबाते 9 ङे थेपा जम्मा ओङकान्ते येशू ख्रीष्ट मिओनला चिट्ठीज्यीक टिबा ओतान। ईन्सीनोङ ख्योकोन नाङ दुरूते छ्येते ङाराङ ईन सिराच्योक खित्कान्ते डियोत्रिफसकीचेन ङे बातला नामज्योकराङ मासेत्सुङ। 10 थोगी था ङा थेपा वासीन थेकी च्यि च्यि खासुङा सिन गाङे सिओ। थेकी मेन्दा मेन्दे बात खिन ङ्योकोनला मोत्कीन ख्याम्गीन दुक। दोस्यिककामा मेन, थेकीनी ठाउँ ठाउँला युगीन येशू ख्रीष्ट बात लोप्कीन ख्याम्कान्ते आज्यो न्वाला मिक कार्बोकीङ ग्युरला मातादुक। थेमे थोक्ते मिला लेमु खिता छोल्कानलाङ येशू ख्रीष्ट मिओन जम्मा ओङसादु ओङा मेङेत्च्या खाला तेन्ला तोङगीदुक। 11 ङिङज्येते र्वा खुईचेन ज्येनगी मेलेबा बानी मालोप, लेमुते बानीकामा लोप। लेमुते कामताङ बात खित्कान्ते मिचेन परमेश्वरताङ डिक्कान्ते ईन। मेलेबा काम खित्कान्ते मिकीनी परमेश्वरला थोङाराङ मेत। 12 डेमेत्रियसकीचेन लेमु कामकामा खिदुक सिन मि गाङेकी बात खिदुक। थेकी खाबाते काम ताला थे सत्यते बात ङेन्ला थेरू खि साबा च्योकराङ खित्कान्ते मि ईन सिन छ्या स्येकीदुक। ङ्योकोनोङ थे लेमु मि ईन सिन सिओ। ङ्योकोन मेन्दाते बात मिक्किओ सिन खोल्ला छ्याराङ ओत। 13 ङे खोल्ला सिरा फाप्च्येते बात थोरूमोङ काल्बेई ओत। ईन्सीनोङ ङा थे बाततेबा चिट्ठीला मिटिगो। 14 बरू खोत्ताङ होत्ता ठेत्च्ये आश खाबा ओत। ठेत्नामेई ङ्योम्बुराङ देत्ला बात खिताप। 15 लो परमेश्वरगी खोल्ला लेमु खिनराङ देत्स्यीत। दुरू ओताते र्वाओनते खोल्ला नमस्ते ओत्लो। थेपा ओताते र्वाओन मेरा रेरेला ठेत्ला ङेते नमस्ते ओत सि। |
© 1992 Wycliffe Bible Translators Inc. All rights reserved.
Wycliffe Bible Translators, Inc.