२ तिमोथी 4 - जिरेलपावलगी तिमोथीला गाङे भन्दा तिरी साबाते बात 1 थोगी परमेश्वरताङ येशू ख्रीष्ट दोन्दु ङा खोल्ला चुक खिता फाप्कीते सिन कोत्क्यो। स्याप्तेबा थेमे सोम्बोराङ ओताते मि गाङेला न्याय खित्कान्ते थेमे स्वर्गनेकी ग्युरला वाला गाङेपा गाङेला राज्य खित्कान्ते येशू ख्रीष्टराङ ईन सिन टोक माज्येत। 2 खुई चुक खिता फाप्कीते सासीन मिओनला परमेश्वर बात लोप्कीनराङ देत, मिओनगी ङेन्सीनोङ माङेन्सीनोङ जुन बेलालाङ थे बात लोपा मातोङ थेमे गल्ती खित्कानला थोक खाबाते लेमु मेन साला थोक खिता थोङ सिन सि। चुक खिता लेमु ईन्दे सिन गाङेला लाप्ला बिन। थानी दिबाला थोई लोप्च्ये सिराच्योक माकेत, सुङताङ स्येदाङ मिक्किता खाला खा छ्येत लेमु खिन दोक खाला लोप्कीनराङ देत। 3 ङे च्यिला दोक साबाते ईन्दे सासीन था समयज्यीक ओङगो। थेजीनचेन मिओनला मिकी ङेन्दा फाप्च्येते सत्यते बात ङेन्दाला गाराङ मालाङो। बरू जसकी खोपरोङला ङेन्दा सेम लाङच्येते बात लोप्कीदुक होथोक्ते मि काल्बेईला रूला गा खिन थेबे बात ङेन्ग्यो। 4 थोक खाला थेबेकी सत्यते बात ङेन्दा ताङला छ्याःङ काम लै मिक्किच्येते कथाओनका लेमु खाला ङेन्ग्यो। 5 तर खोचेन जे खित्जीनोङ लेमु खाला विचार खालाकामा खि, खोरोङ काम खित्जीन जस्तोराङ दुक्पा ओङसीनोङ थे दुक्पा भोगे खि, ठाउँ ठाउँला गाल्ला गा लाङच्येते बात लोप्कान्ते मिकी खित्च्येते काम खिन देत थेमे परमेश्वरगी खोल्ला जिम्मा लै खाबाते काम गाङे मासिनथुप खिनराङ देत। 6 था ङाराङ बात खिइ सासीनचेन था ङेते स्यिच्ये बेला लेप्कीन सिन्सुङ। ङा दोक खाला स्यिच्येतेचेन परमेश्वरला भोग बिन्दाते च्योकराङ ईन। 7 दुक्पा किम्मु जस्तो ओङजीनोङ ङे ङाराङ काम लेमु खाईन खाबा ओत, बत्ते खित्कान्ते मि ख्योला फाप्सासाक लेपाच्योक खाईन ङेङ ङाराङगी खिता फाप्च्येते काम गाङे खाईन सिन्दा खाबा ओत। थेमे येशू ख्रीष्टला विश्वास खाईन ङेन्दाते बात ङे जुनी खाङ ङेन्गीनराङ देताप। 8 थोगी ङा परमेश्वरगी खि साबा साबा च्योकराङ खित्कान्ते मि ईन सिन था ङे इनाम ङेत्क्यो। थे इनामचेन सुङलाङ काका पाका मिक्किता खाला न्याय खित्कान्ते प्रभु येशू ख्रीष्टकी थे खोरोङ ग्युरला ओङे छोमु ङाला तेरग्यो। थे इनाम थेकी ङालाकामा मेन, थे स्वर्गनेकी ग्युरला ओङगो सिन गा खिन गुला देत्कान्तेबा गाङेला तेरग्यो। पावलगी चिट्ठी टिला सिन्दे खाला साबाते बात 9 थेमे जस्तो खालाङ खो होत्ता देपा स्योक। 10 डेमासकीचेन दि जुनी बातकामा विचार खाईन ङाला ताङगीन थिस्सलोनिकापा गाल्सुङ। ज्येन ङात्ताङ ओतातेबे नाङ क्रेसेन्सचेन गलातिये अञ्चलपा थेमे तीतसचेन दलमातियापा गाला ओत। 11 दुरू थरिङोला ङात्ताङ लूकाकामा ओत। ओङजीन खुई मर्कूसलाङ टीला खोरच्योक। परमेश्वर काम खिताला ङाला दुरू थे गोबा ओत। 12 ङे टाइकिकसला एफिससपा ताङा ओत। 13 थेमे खो ओङजीन त्रोआस सारनापा कार्पस खाम्बादु ज्याक्पाते ङेते रीम्बुते कोटताङ किताबओन खोरच्योक। थे किताबओन भन्दाङ ङेते थे कोक्तेनला टिबाते किताबओनचेन खुलाङा टोक माज्येत। 14 थेमे बातज्यीक च्यि सासीन थे अलेक्जेन्डर सिराते गारेकी ङाला आउदी मेलेबा खासुङ। थेकी थोक मेलेबा खाबाते काम ताला प्रभु येशू ख्रीष्टकी थेला सजाय तेरग्यो। 15 अलेक्जेन्डरगीचेन ङुरूङगी लोप्च्येते गा लाङच्येते बात ईनराङ मेन्दे बात ईन सिन आउदी खाईन विरोध खासुङ। थोगी खोरोङोङ थेत्ताङ च्याङबो खाला देत। 16 थेमे ज्येन बात च्यि सासीन गाङे भन्दा गोमा दुरू ङाला बयान लिन्दाला अड्डादु केल्जीन ङे लाईदु बात खित्कान्ते सुङ माथेन्सुङ। थेबा गाङेकी ङाला ताङगीन गाल्सुङ। थेबेकी थोक खासीनोङ प्रभु येशू ख्रीष्टकी थेबाला सजाय मेतेरस्यीत। 17 दोक दोक ओङजीनोङ प्रभु येशू ख्रीष्टचेन ङात्ताङ ङ्योम्बुराङ देत्कीन थेकी ङाला शक्ति बिन्सुङ। थोगी ङे ज्येन ज्येन जातकी मि गाङेकी थोस्यीत सिन गा लाङच्येते बात लेमु खाईन लाप्कीन बिन्दाप। दोस्यिककामा मेन, थेकी ङाला सिंहे खादुकीङ जोए खासुङ। 18 थेमे थोरूमोङ ङाला मेलेबा खिता छोल्कान गाङे लाःक्तुकी जोए खाला थेकी ङाला छ्याःङ मेलेबा मेङा खाला स्वर्गने थे खोरोङ राज्यने खेरग्यो। थोक खित्कान्ते प्रभु येशू ख्रीष्टते सधैँभरि जय जय ओङस्यीत। आमेन। 19 लो अक्वीलाताङ प्रिस्काबा जाप्राङ ङिबोला थेमे ओनेसिफरसताङ थे खाम्बे मि गाङेला ङेते नमस्ते ओत्लो सि। 20 इरास्तस कोरिन्थ सारदुराङ देत्सुङ। त्रोफिमसचेन नाबेकी मिलेटस सारदुकी ङा थेत्ताङ ठाल्गीन देपा ओङा फाप्सुङ। 21 खो जस्तो खालाङ गुन स्यूक्पा भन्दा गोमाराङ देपा स्योक। युबुलस, पुडेन्स, लिनस, क्लौडिया थेमे दुरू आज्यो न्वाबा गाङेकी खोल्ला नमस्ते ओत्लो। 22 लो प्रभु येशू ख्रीष्ट खोत्ताङ ङ्योम्बुराङ देत्स्यीत। थेमे ख्योकोन गाङेला थेकी दया खिनराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.