२ तिमोथी 3 - जिरेलदि जुग सिन्दे खाला मिओनगी आउदी मेलेबा खिओ 1 थेमे खुई दि बादोङ लेमु खाला छ्या स्येला स्योक। च्यि सासीन था दि जुग सिन्दे खाला आउदी ज्यीबा लाङच्याज्यीक समय ओङगो। 2 थेजीन मिओनगी खालि दाक्पोन विचारकामा खिओ, गाङेराङ पैसे लोभलाकामा स्यूइओ। थेबेकी ङा ङाराङ ईन सिन धाक लै खिओ थेमे छ्ये खिओ। थेजीन मिओनगी मेन्दे बातला ज्येनला दोष लै खिओ, आबा आमेकी लाःपा कोताते मेङेनो, खोपरोङला लेमु खित्कानला लेमु खासुङ सिराच्योक मिक्किओ थेमे परमेश्वरला मन परे मिक्किच्येते कामकामा खिओ। 3 थेबेकी ज्येनला मिक कार्बोकीङ ग्युरला माताओ, थेबा ज्येनतेबाताङ नोमुङ डिक्ला थुन्ला मेदेदो, थेबा मि मोत्कीन थेमे मनपरी खिन ख्याम्ग्यो, थेबे सेमला दया माया सिराते छ्याःङ मेङगो, थेबेकी दाक्पोनगीङ लेमु सिराते नोमुङ मिक्किओ थेमे लेमु खित्कानलाङ मिगी थोङसार्मु खिओ। 4 थेबाला नोमुङ भर परे खिता मुथुबो, थेबेकी उत्तोउलोते कामकामा खिओ, थेबाचेन खोपरोङ छेत सुङ मेन सिराच्योक खाला साला मिक मिक्किता खाला ख्याम्ग्यो। परमेश्वरला मन परे खित्च्येते काम खिता साटोला थेबाला दाक्पोन खुशीला ख्याम्जीन गा लाङगो। 5 थेबा परमेश्वरला माने खित्कान्ते मि ईन सिरा च्योकराङ खाला ख्याम्ग्यो। तर लेमु खाईन तासीन थेबेकी परमेश्वरला खोपरोङ सेमदु काम खित माच्युत्ला थेला मन परे खित्च्येते सिराते कामज्यीगोङ मिक्किओ। थोक्ते मिओनताङ साङ माकेत। 6 थोक्ते मिओन नाङ कोई कोईचेन मि खाम्बा खाम्बाला डुइओ। थेमे खोपरोङगी छक्के खिता थुप्च्येते फेम्मे मिओनला लुला खोपरोङ छ्य्वापा लै खित ज्युत्क्यो। थोक्ते फेम्मे मिओनचेन पापताङ लोभकी खाङाते थेमे खोपरोङ सेमला जे जे खिता सेम लाङगीदुक थोक थोकराङ खित्कान्ते ईन। 7 थेबेकी ज्येनगी लापाते बात जहिलेङ छ्या स्येबा छोल्ग्यो। थोक ईन्सीनोङ सत्यते बात च्यि ईन्दे सिन नोमुङ छ्या स्येबा मुथुबो। 8 होथोक्ते फेम्मे मिओनला लुला खोपरोङ छ्य्वापा लै खित ज्युत्कान्ते मिओनचेन यान्नेसताङ याम्ब्रेस च्योक्तेबा ईन। थाङबो होथेबा ङिबोकी मोशे बात माङेन्दा च्योकराङ होदिबेकीङ सत्यते बात मेङेनो। थेबा सेम लेमु ओताते मि मेन। थेबेकी खोपरोङ येशूला विश्वास खित्कान्ते मि ईन सासीनोङ परमेश्वरगी थेबा थोक्ते मि मेन सिओ। 9 दिबेकी तिरीसाक दोकराङ खिन देता मेङेदो। यान्नेसताङ याम्ब्रेस बात च्योकराङ थेबा चुक बुद्धि मेताते लेम्बाते मि ईन्दे सिन ङीमा लेनज्यीक मि गाङेकी दाक छ्या स्येक्यो। पावलगी तिमोथीला चुक खिन देता फाप्कीते सिन साबाते 10 बात दोक दोक ईन्सीनोङ ङे बातचेन गाङे खोल्ला लेमुराङ खाला छ्या ओत। च्यि सासीन सत्यते बात लोप्जीन ङे च्यि बात चुक खाईन लापा ओताने, ङे चुक चुक खाबा ओताने थेमे ङे ङाराङ जुनी खाङ च्यि खिता चाला ओताने सिन खोल्ला छ्याराङ ओत। दोस्यिककामा मेन, ङे येशूला चुक खाला विश्वास खिन ओताने, ङा चुक खाला ज्येनताङ स्येदाङ मिक्किता खाला देत्कीन ओताने, ज्येनला चुक खाला ङिङज्ये खिन ओताने थेमे जस्तो दुक्पा ओङसीनोङ ङे चुक खाला खपे खिन ओताने सिन गाङे बात खुई छ्या स्येबाराङ ओत। 11 मिओनगी ङाला खेदा खाईन खाईन दुक्पा बिन्दाते थेमे ङे भोगे खाबाते जेसुकै दुक्पा खोल्ला छ्या मेताते मेन। एन्टिओखिया, आइकोनियम थेमे लिस्त्रा सारगी नाङला मिओनगी ङाला चुक मेलेबा खाबा ओताने सिरच्येते बादोङ खोल्ला छ्याराङ ओत। ङाला जहाँदु जस्तो दुक्पा ओङसीनोङ प्रभु येशू ख्रीष्टकी थोक्ते गाङे दुक्पादुकी जोए खाबा ओत। 12 ईन्दालाचेन येशू ख्रीष्टताङ जीउज्यीकराङ ओङगीन परमेश्वरला मन परे खित्च्येते काम खिता छोल्कान्ते मि गाङेला ज्येनगी दाक खेदापानी खिओ। 13 थेमे मेलेबा काम खित्कानताङ ज्येनला छक्के खित्कान्ते मिओनचेन होथोक्ते कामकामा खिन देत्ला झन झन ङ्येकीन डुइओ। थोक खित्जीन थेबेकी ज्येनलाङ ङ्ये ज्युत्क्यो, खोपरोङोङ ङ्येक्यो। 14 तर खुईचेन खोरोङला लाप्कीन बिन्दाते, खोरोङगी पक्काराङ दुका सिन ङेन्दाते परमेश्वर बात लेमु खाला ङेन्गीनराङ देत। दि बात खोरोङला सु सुई लापा ओताने 15 थेमे च्याक फिजामेईराङ खोरोङगी दि बात चुक खाईन ङेन्गीन वाबाते ईन्दे सिन टोक माज्येत। परमेश्वर बात ताला येशू ख्रीष्टला विश्वास खित्कान्ते मिओनला थेकी पापदुकी डेल्ग्यो सिन खुई लेमु खाला छ्या स्येक्यो। 16 परमेश्वर बातला टिबाते बात मिओनगी खोपरोङ बुद्धिकी टिबाते मेन्देकी गाङे परमेश्वरगी मिओनला थे खोरोङ आत्मे छ्य्वापेकी टिक च्युताते ईन। थेमे परमेश्वर बात चुकला काम लै खिते सासीन सत्यते बात च्यि ईन्दे सिन लोपाला, दाक्पोनगी चुक खाबाते गल्ती खाबाते ईन्दाका सिन छ्या स्येला च्याला चुक खिता फाप्च्या ईन्दाका सिन लोपाला थेमे परमेश्वरगी खि साबा साबा च्योकराङ खित्च्येते लोपाला काम लै खिओ। 17 दोक खाला परमेश्वरला माने खित्कान्ते मिकीचेन लेमुते काम सिराते जेङ लेमु खाला खिता थुप्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.