२ तिमोथी 2 - जिरेलजस्तो ओङसीनोङ दाक्पोन काम तोङा मेङगो 1 थेमे फुज्यो, येशू ख्रीष्टकी खित्सादु परमेश्वरगी खोल्ला दया खाईन शक्ति बिन्दा ओतेकी खो छ्याःङ ज्यीबा माकेत। 2 थेमे मि काल्बेई ङोन्दु च्यि बात चुक ईन्दे सिन ङे खोरोङला लाप्कीन बिन्दाते बातओन मिओनला लोप सिन ज्येन मिलाङ जिम्मा बिन। दोक्ते मिओनचेन ज्येनला लेमु खाला लोपा थुप्कान थेमे भर परे खिता थुप्च्येतेन्दे ओङा फाप्क्यो। 3 थेमे लेमु खाला काम खित्कान्ते मिल्टेरीकी लडाइँला जस्तो दुक्पा ओङसीनोङ खपे खाबाच्योक खाला गा लाङच्येते बात लोप्जीन खुईओङ येशू ख्रीष्ट मिल्टेरी च्योक ओङला दुक्पा भोगे खि। दोक खाला ङे खाबा च्योकराङ खि। 4 खोपरोङ छ्येते मिकी साबा साबा ङेन्दा छोल्कान्ते मिल्टेरी सुङ लडाइँ खिन खिन ताङला खोपरोङ काम खिताला मोन्डोओ। 5 लोक्ला खेलकूदलाङ ङेन्दा फाप्च्येते नियम ङेन्कान्ते मिकीकामा पुरूस्कार ङेत्क्यो। 6 थोकराङ खाला बाली लेस्यीत सिन आउदी दुक्पा खाला कमाइ खित्कान्ते मिकीङ थे खोरोङगी दुक्पा खाबा अनुसार बाली थोक्पा रूक्पा ङेत्क्यो। 7 ङे थाल्ला साबाते दि बातओन च्यि च्यि साबाते ईन्ताका सिन सेमदु लेमु खाला गुने खि। प्रभु येशू ख्रीष्टकी खोल्ला खुई खोबा फाप्च्येते दोक्ते बात गाङे लेमु खाला खो च्युत्ला तेरग्यो। 8 थेमे गेल्बो दाऊद सन्तान नाङ केबाते येशू ख्रीष्टला सधैँ सम्झे खिन देत। परमेश्वरगी थेला स्यिसादुकी सोम्बो लोक्पा ओत। मिओनला ङे लोप्कीन ओताते गा लाङच्येते बादोङ दिराङ ईन। 9 दि बात लापेकीराङ ङा दुक्पा भोगे खिन ओत। ङाला डाँकाला च्योक खाईन नेल कोन्गीन जेलदु समेत लुक्पा ओत। तर ङाला नेल कोन्ला जेलदु किल्ला ज्य्वाबाच्योक खाला परमेश्वर बात फैले मिक्किस्यीत सिनचेन जति खासीनोङ सुङगीङ छ्याःङ खिता मुथुबो। 10 दोक ईन्देकी परमेश्वरगी थे खोरोङ मि सिन छाने खाबाते मिओनला लेमु ओङस्यीत सिनराङ ङा जस्तो दुक्पाङ भोगे खिओ। येशू ख्रीष्टकी थेबालाङ पूरो खाला पापदुकी डेल्स्यीत थेमे सधैँ परमेश्वरताङ स्वर्गने देता ङेत्स्यीत सिनराङ ङा दोक खिओ। 11 दोक सिन सिरच्येते बात साँच्चीराङ ईन्दाते बात ईन। च्यि सासीन ङुरूङ येशू ख्रीष्टताङ स्याप्ते ईन्सुङ सासीन ङुरूङगीङ थेकी ङेताते च्योक्ते जुनी ङेत्ला थेत्ताङराङ देता ङेत्क्यो। 12 थेमे जस्तो ओङजीनोङ सेम मेसेता खाईन दुक्पा भोगे खिन देत्सीन ङुरूङगीङ थेत्ताङराङ राज्य खिता ङेत्क्यो। ङुरूङगी थे मि मेन सिन थेला विश्वास खिता ताङसीन थेकीङ तिरी ङुरूङला थे खोरोङ मि मेन सिन सिओ। 13 ङुरूङगी खिओ साबाच्योक माक्यासीनोङ थेकीचेन थे खोरोङगी खिओ साबाच्योक खिता नोमुङ मोतोङो। च्यिला सासीन थेकी बातज्यीक खानामेई थे बात लोक्ला नोमुङ खुदुक मोजोओ। परमेश्वर लाईदु काम लै खित्च्येते मि चुक ओङगीते 14 दि बातओन थेरू गाङेला याङ याङ सिनराङ देत। टेकाटेउरी स्योरच्येते बात माकेत सिन खुई थेबाला प्रभु परमेश्वर ङोन्दु कोत। टेकाटेउरी खाला छ्याःङ लेमु मेङगो। येशूला विश्वास खित्कान्ते ज्येनतेबे दोन्दु दोक्ते बात खित्जीन थेबेकी थेबाला ङ्ये ज्युत्क्यो। 15 परमेश्वरगी खोरोङला लेमु खाला काम खित्कान्ते मि ईन सिरस्यीत सिन खुईचेन लेमु काम खित्च्ये छ्य्वापाकामा स्येत खि। थोक ओङला थे दोन्दु खोरोङगी छ्याःङ ङोचा खिता माफाप्स्यीत सिन सत्यते बात लोप्जीन खुई च्यि बात चुक खाला लोपा फाप्च्येते ईन्दे होथोकराङ खाला लोप। 16 थेमे सत्यते बातताङ डिकराङ मिडिक्च्येते कामराङ लै मिक्किच्येते बातला नोमुङ नामज्योक मासेत। थोक्ते बात खिन देत्कान्ते मिओनगीनी झन झन परमेश्वरगी माकेत साबाते कामकामा खिन डुइओ। 17 थेबेकी लोप्च्येते बातचेन बेल्गीन डोच्येते मा च्योकराङ ईन। मा बेल्गीन ड्वाप च्योकराङ खाला थेबे बात फैले खिन गाल्ला मि काल्बेईला ङ्ये ज्युत्क्यो। थोक्ते बात लोप्कान्ते नाङ हाइमेनियसताङ फिलेतसोङ ईन। 18 थेबा ङिबोकीचेन सत्यते बात ङेन्दा ताङगीन परमेश्वरगी थे खोरोङ मिओनला सोम्बो लोक्च्येते काम खाईन सिन्दा ओत सिन लोप्कीदुक। थेबेकी दोक्ते मेन्दाते बात लापेकी येशूला विश्वास खित्कान्तेबा कोई कोईकी सत्यते बात ङेन्दा तोङगीन दुक। 19 तर परमेश्वर सत्यते बातचेन नोमुङ माराम्च्या खाईन तिङाते खाम्बे जग च्योकराङ ईन। थे बात नोमुङ खुदुक मोन्डोओ। खइँदा खाम्बा च्यि लाईदु जोबाते ईन्दे सिन खाम्बे दोज्यीकला कोरगीन टिबाते बात च्योक खाईन परमेश्वर सत्यते बातला दोक दोक सिन टिबा ओत। चुक सासीन “थे खोरोङ मि सु सु ईन्दे सिन प्रभु परमेश्वरगी लेमु खाला छ्या स्येक्यो,” थेमे “प्रभु परमेश्वर मि ईन सिन सिरकान गाङेकी मेलेबा काम खिता तोङा फाप्क्यो,” सिन टिबा ओत। 20 थेमे दि बादोङ विचार खि। च्यि सासीन छ्ये छ्ये मि खाम्बाला सेरताङ चाँदी स्यीकामा मेन, सबी स्यीताङ स्यिङगी नोततेबाङ ओङगो। सेरताङ चाँदी स्यीचेन साप साजीन थेमे भोज लै खित्जीन चले खिओ। तर स्यिङताङ सबी नोतचेन ज्येन कामगी लाईदु चले खिओ। 21 थोगी धनीतेकी लेमुते कामलाकामा चले खित्च्येते सेरताङ चाँदी स्यी च्योकराङ ओङाला मिकी मेलेबा कामताङ बातकी छ्य्वापेई ठाला फाप्क्यो। दोक खासीन थोक्ते मिचेन थे खोरोङ मालिक ख्रीष्टकी लाईदु काम लै खित्च्येते थेमे थेकी खि साबा च्योककामा खित्कान्ते मि ओङगो। थेमे थोक्ते मिकी लेमुते कामताङ बात खिता थुप्क्यो। 22 थोगी खुईचेन स्यारातेबाला खिता सेम लाङच्येते दाक्पोन सेमला लाबा लाबाच्योक खित्च्येते मेलेबा काम सिराते नोमुङ माकेत। परमेश्वरगी खि साबा च्योकराङ खि, येशूला विश्वास खिन देत, ज्येनला ङिङज्ये खि थेमे ज्येनतेबाताङ डिक्ला थुन्ला देत। येशू ख्रीष्टला प्रभु सिन सिरकान्ते सेमला छ्याःङ पाप मेताते मिओनताङ खुई होदोककामा खिन देत। 23 थेमे छ्याःङ काम लै मिक्किच्येतेताङ ईनराङ मेन्दाते बात खासीन खालि थोम्मु जीङगाकामा स्योरग्यो सिन खोल्ला छ्याराङ ओतेकी होदोक्ते बात खित्कान्ते मिओनताङ खुई थोक्ते बात छ्याःङ माकेत। 24 प्रभु येशू ख्रीष्ट काम खित्कान्ते मिकी ज्येनताङ थोम्मु जीङगा खिता मेङगो। बरू गाङेताङ खा छ्येत लेमु खाला बात खिता फाप्क्यो, ज्येनला लेमु खाला लोपा थुप्कानज्यीक ओङा फाप्क्यो थेमे ज्येनगी जे खासीनोङ स्येदाङ खुरा मेङगो। 25 थेकीचेन थे खोरोङगी लोप्च्येते बातताङ मिडिक्च्येते बात खित्कान्ते मिओनताङ खा छ्येत लेमुकीराङ थेबेकी चुक्ते बात लोपा फाप्च्येते ईन्दे सिन लाप्ला तेरा फाप्क्यो। परमेश्वरगी थेबाला खोपरोङगी चुक मेलेबा खाबा ओता ईन्दाका सिन छ्या स्येच्येते मौका तेरगीतासीन सिन थेमे थेबेकी सत्यते बात च्यि ईन्दाका सिन लेमु खाला छ्या स्येकीतासीन सिन थेबाला होदोक खाला लाप्ला तेरा फाप्क्यो। 26 थेबेकी दि मौका ङेत्सीन खोपरोङगी चुक खिन ओता ईन्दाका सिन छ्या स्येला तोर्बाकला थेप्सादुकी स्योरा च्योकराङ खाला खोपरोङला होथोक्ते मेलेबा काम खित ज्युत्कान्ते शैतान लाःक्तुकी स्योरा थुप्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.