२ तिमोथी 1 - जिरेल1 दि चिट्ठी टिक्कान्ते ङा पावल ईन। ङा येशू ख्रीष्टकी खटे खाबाते मि ईन। ङा थोक्ते मि ईन सिन परमेश्वरगी ङाला छाने खाबा ओत। ङे कामचेन परमेश्वरगी तेरग्यो साबाते नोमुङ मिसिन्च्येते जुनीचेन येशू ख्रीष्टकी खित्सादु ङेत्क्यो सिन ज्येनला लोप्च्येते ईन। 2 ङा दि चिट्ठी ङे ङिङज्येते फुज्युङ तिमोथी खोल्ला टिगीन ओत। आबा परमेश्वरताङ ङुरूङ प्रभु येशू ख्रीष्टकी खोल्ला दया खिन थेमे ङिङज्ये खाला लेमु खिनराङ देत्स्यीत। पावलगी परमेश्वरला धन्यवाद साबाते 3 थेमे परमेश्वरताङ प्रार्थना खित्जीन ङा ङीन नुप जहिलेङ खुई लाईदुङ प्रार्थना खिन खुई लाईदु थेला धन्यवाद सिओ। ङा ङाराङ ज्युज्यु पुर्खेकी माने खिन वाबाते परमेश्वरला थेबेकी च्योकराङ खाला थेला जस्तो खाला माने खिता फाप्च्येते ईन थोकराङ खाला माने खिओ। 4 ङुरूङ ठाल्जीन खो चुक आउदी खाईन ङुबा ओताने सिन ङाला ठेम्बा लाङगीदुक। थे बात सम्झे खित्जीन ङाला खोल्ला ठेता आउदी सेम लाङगीदुक। खोल्ला लोक्ला ठेता ङेत्सीन ङाला आउदी गा लाङच्या ओतान। 5 थेमे खेकीकामा मेन्देकी खुई पक्काराङ खाईन येशू ख्रीष्टला विश्वास खाबाते बात ङे टोक ज्येता मेत। खुई गोम्मु लोइसताङ खोरोङ आमा युनिसकीङ थोङला होदोकराङ खाला परमेश्वरला विश्वास खिन ओतान। खोङ थेबेकी च्योकराङ खाला येशू ख्रीष्टला विश्वास खित्कान्ते मि ईन सिन ङाला लेमु खाला छ्या ओत। पावलगी तिमोथीला आँट बिन्दाते 6 बात दोक ईन्देकी था ङा खोल्ला च्यि सिते सासीन ङे खुई गोःकी लाक लाक्पा ज्याक्ला प्रार्थना खिते बेलाला परमेश्वरगी खोल्ला थे खोरोङ काम खिताला बिन्दाते सीप चले खिता नोमुङ मातोङ। 7 च्यिला सासीन परमेश्वरगी ङुरूङला थे खोरोङ आत्मा बिन्दाते ज्यीबा खित्स्यीत सिन मेन बरू थे आत्मे छ्य्वापेकी शक्ति ङेत्स्यीत, ज्येनला ङिङज्ये खिता थुप्स्यीत थेमे दाक्पोन सेम काबूला ज्य्वाबा थुप्स्यीत सिन ईन। 8 थोक ईन्देकी ज्येनला ङुरूङ प्रभु येशू बात लोपा नोमुङ ङोचा माकेत। थेमे थे बात लापेकी ङाला जेलदु ज्याक्पा ओत्सीनोङ खो छ्याःङ ङोचा माकेत। बरू थे गा लाङच्येते बात लोप्जीन खुईङ ङे च्योकराङ खाला दुक्पा भोगे खिता फाप्च्या दुक सासीनोङ थोकराङ खि। थोक खिताला परमेश्वरगीराङ खोल्ला थे खोरोङ शक्ति तेरग्यो। 9 थेकीराङ ङुरूङला पापकी सजायदुकी टाल्गीन बिन्दा ओत। थेमे ङुरूङ सेम खुदुक गाल्ला मेलेबाते कामताङ बात सिराते छ्याःङ मिक्किस्यीत सिन थे खोरोङ दोन्दु स्योक सिन काताङा ओत। थेकी थोक खाबाते ङुरूङगी थेकी खि साबा साबाच्योक खाईन लेमु काम खाबेकी खित्सादु मेन, बरू थे खोरोङ दयेकी ङुरूङला थोक खिता चालेकी खित्सादुकामा ईन। येशू ख्रीष्ट छ्य्वापेकी ङुरूङ लाईदु दोक खिओ सिन थेकी दि सा नाम ज्वा भन्दा गोमाकाराङ टुङ्गो खाबा ओतान। 10 ङुरूङला पापदुकी डेल्कान्ते येशू ख्रीष्ट देमा वाबेकी थे खोरोङगी ङुरूङला दया खिओ सिन साबाते बात परमेश्वरगी छ्या स्ये च्युत्सुङ। थेमे येशू ख्रीष्टकी दुरू वाकीन स्यिच्येते कालला ग्यालेकी थेकी मिओनला नोमुङ मिसिन्च्येते जुनी तेरग्यो थेमे थोक्ते मि नोमुङ मिस्यिओ। दि बातचेन गा लाङच्येते बातलाराङ साबा ओत। 11 दि गा लाङच्येते बात ज्येनला लोप सिन परमेश्वरगी ङाला छाने खाबा ओतान। दोक खाईन ङा येशू ख्रीष्टकी खटे खाबाते मि ईन्देकी थेमे दि बात लोप्कान्ते मि ईन्देकी ङे दि काम खिता फाप्क्यो। 12 दि काम खाबेकीराङ ङाला जेलदु लुक्पेकी दोक खाला दुक्पा भोगे खिन ओत। ईन्सीनोङ दोक खिता फापाते ङाला छ्याःङ ङोचा मेत। च्यिला सासीन ङे सुला विश्वास खाबा ओते थेमे थे चुक्ते ईन्दे सिन ङाला लेमु खाला छ्या ओत। थेमे ङे थे लाःक्तु जे सोम्पे खाला दुक थे खोरोङ दुरू ग्युरला ओङे छोमुसाकराङ थेकी थे लेमु खाला तेइओ सिरच्येते बातला ङाला छ्याःङ शंका मेत। 13 थेमे था ङा खोल्ला चुक खि सिते सासीन ङे खोल्ला च्यि बात चुक सिन लाप्कीन बिन्दा ओताने थे थेराङ ङेन्दा फाप्च्येते बात ईन सिन टोक मेज्येता खाला ज्येनतेबाला होथे बातराङ लोप्कीन देत। थोक खाला लोप्जीन येशू ख्रीष्टताङ जीउज्यीकराङ ओङाते खुई थेला विश्वास खिन देता मातोङ थेमे ज्येनला ङिङज्ये खिन देताङ मातोङ। 14 थेमे लोप सिन खोल्ला जिम्मा बिन्दा ओताते बात खुदुक जोला मालोप। ङुरूङ सेमगी नाङ देत्कान्ते परमेश्वर आत्मे छ्य्वापेई खुई दि काम खिता थुप्क्यो। 15 थेमे एशिये अञ्चलदु येशूला विश्वास खित्कान गाङेराङ ङे छ्य्वापेई ठाल्गीन सिन्दा ओत। थोक खित्कान्तेबे नाङ फाइगेलसताङ हर्मोगेनसोङ ईन। दि बातओन खोल्ला छ्या मेताते मेन। 16 ओनेसिफरस खाम्बे मि गाङेला प्रभु येशूकी लेमु खित्स्यीत। च्यिला सासीन पालोताङ पालो थेकी ङाला आँट बिन्दा ओतान। थेमे ङा जेलदु ओता ईन्सीनोङ छ्याःङ ङोचा खाबा मेतान। 17 थे खोरोङ रोम सारदु ख्योल्नामेई आउदी खाईन चाल्गीन चाल्गीन थे ङाला ठेता खित वाबा ओतान। 18 था प्रभु येशू ख्रीष्ट ग्युरला ओङे छोमु थेकी थेला दया खित्स्यीत। ङा एफिससदु देता ओत्जीनोङ थेकी ङाला थोई मद्धत खाबा ओताने सिन खोल्लाङ छ्याराङ ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.