२ थिस्सलोनिकी 3 - जिरेलपावलगी प्रार्थना खि सिन साबाते बात 1 आज्यो न्वावे, थोरूमोङ बातज्यीक च्यि सासीन ङ्योकोन लाईदु दोक सिन परमेश्वरला प्रार्थना खि। चुक सासीन प्रभु येशू बात छिटो छिटो फैले खाला ज्येन ज्येनगीङ थे बात लेमु दुका सिन ख्योकोनगी च्योकराङ खाला ङेन्स्यीत 2 थेमे परमेश्वरगी खि साबाते ङेनराङ मेङेन्कान्ते मेलेबा मेलेबा काम खित्कान्ते मिओन लाःक्तुई ङ्योकोनला जोए खि सिन प्रार्थना खि। मि गाङेकीचेन प्रभु येशू बात मेङेनो सिन ख्योकोनला छ्याराङ ओत। 3 प्रभु येशू थे खोरोङगी खिओ साबा च्योकराङ खित्कान्ते ईन्देकी थेकी ख्योकोनला थे खोरोङला विश्वास खिन देत्च्येते शक्ति तेरग्यो थेमे खेराङला मेलेबा खित्कान्ते शैतान लाःक्तुकीङ जोए खाला ज्य्वाक्यो। 4 ख्योकोन प्रभु येशूताङ जीउज्यीकराङ ओङाते मि ईन्देकी थातासाक खाबा च्योकराङ थाङ ख्योकोनगी ङ्योकोनगी खि साबा साबा च्योकराङ खिन देत्क्यो सिन ङ्योकोनला छ्या ओत। 5 थेमे परमेश्वरगी खेराङला थोई ङिङज्ये खित्च्या ईन्दाका सिन ख्योकोनगी झन लेमु खाला छ्या स्येस्यीत थेमे जतिराङ दुक्पा ओङसीनोङ ख्रीष्टकी च्योकराङ सेम मेसेता खाला दुक्पा खपे खिन देता थुप्स्यीत सिन ङ्योकोन प्रभु येशू ख्रीष्टताङ प्रार्थना खिओ। पावलगी अल्छी खिता मेङगो सिन साबाते 6 थेमे आज्यो न्वावे, प्रभु येशू ख्रीष्टकीराङ ङ्योकोनला दोक खित्च्येते अधिकार बिन्दा ओतेकी ङ्योकोन ख्योकोनला च्यि खि सिते सासीन खेराङ नाङ ङ्योकोनगी लापाते बात माङेन्ला दाक्पोन लाःक खिता ताङला अल्छी खाला देत्कान्ते मिओनताङ ङ्योम्बुराङ रूला मादेत। 7 ख्योकोनताङ ङ्योम्बुराङ देत्जीन ङ्योकोनगी चुक चुक खाबा ओताने थे थोङगीन खेराङगी चुक खिता फाप्च्या ईन्दाका सिन ख्योकोनगी छ्या स्येकीन सिन्दा ओत। थेजीन ङ्योकोनगी अल्छी खाईन थाराङ लाक्पा किकीन मादेत। 8 पैसा मेज्येला खाईन ङ्योकोनगी सुङगीङ खाम्बादु साप मासो। ख्योकोन सुङलाङ दुक्पा मेङस्यीत, साप थुङा ङेराङगीराङ पैसा च्याल्ला सा थुप्स्यीत सिन ङ्योकोनगी ङीन नुप ठोत थेनथेन काम खाबाप। 9 ङ्योकोनगी ख्योकोनगीराङ ङेल्ला साप थुङा तेरा फाप्क्यो सिरा थुप्च्या ओतान। ईन्सीनोङ ख्योकोनगी चुक खिता फाप्च्या ईन्दाका सिन लोप्स्यीत सिन ङ्योकोनगी थोक दुक्पा खाईन काम खाबा ओतान। 10 सुइँदा मि काम मिक्किता खाला देत्कीदुक सासीन थोक्तेला साप तेराराङ मेङगो सिन ङ्योकोनगी ख्योकोनताङ ङ्योम्बु ओत्जीनराङ साबा ओतान मेनरो? 11 ख्योकोन नाङ कोई कोई अल्छीकी दाक्पोन काम खिता ताङला ज्येन मि काम खित्साला गाल्ला बरालस्यिङ लोङगीदुक्लो सिरा थोकीदुक। 12 प्रभु येशू ख्रीष्टकीराङ ङ्योकोनला दोक खित्च्येते अधिकार बिन्दा ओतेकी अल्छी खित्कान्तेबा ख्योकोन जोराङ ईन्सीनोङ ङ्योकोन च्यि सिते सासीन ओर्च्ये ख्योकोनगी अल्छी खिता ताङला खुरू खुरू दाक्पोन पाखुरा चले खाला सो। 13 थेमे चुक खिता लेमु ईन्दे सिन दाक्पोन दाक्पोन लाःक खिन ओताते आज्यो न्वाबा ख्योकोनगीचेन ङे लेमु खाईन च्यि ओङसुङारो सिराच्योक मिक्किता खाला थरिङसाक खिन ओता च्योकराङ खिन देत। 14 ख्योकोन नाङ सुइँदेकी ङ्योकोनगी दि चिट्ठीला खि सिन टिबाते बात माङेन्सुङ सासीन थोक्ते मि सु सु ईन्दे सिन ख्योकोन गाङेकी लेमु खाला ङो स्येबा खाला थेला ङोचा लाङस्यीत सिन थोक्ते मित्ताङ साङराङ माकेत। 15 ङ्योकोनगी दोक साबाते थोक्ते मिला शत्रुला च्योकराङ खि साबाते मेन याङ। बरू थेङ खेराङ आज्यो न्वाराङ ईन सिन सम्झे खाला थेला थोक खाला अल्छी खाला देता लेमु मेन सिन सि। पावलगी चिट्ठी टिला सिन्दे खाला साबाते बात 16 थेमे सेमला ढुक्क लोङकान्ते प्रभु येशूकी दुक्पा किम्मु जस्तो ओङसीनोङ ख्योकोनला जहिलेङ सेमदु ढुक्क लोङस्यीत थेमे ख्योकोन गाङेताङ ङ्योम्बुराङ देत्स्यीत सिन ङ्योकोन प्रार्थना खिओ। 17 था ख्योकोनला ङेते नमस्ते ओत सिनचेन ङा पावल ङाराङ लाक्पेकीराङ टिगीन ओत। दि चिट्ठी ङेराङ ताङाते ईन सिन छ्या स्येस्यीत सिन ङाराङगी ताङाते जुन चिट्ठीलाङ सिन्दे खालाचेन होदोकराङ खाला ङा ङाराङ लाक्पेकीराङ टिइओ। 18 ङुरूङ प्रभु येशू ख्रीष्टकी ख्योकोन गाङेला दया खिनराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.