Biblia Todo Logo
Bìoball air-loidhne

- Sanasan -


२ थिस्‍सलोनिकी 2 - जिरेल


आउदी पाप खित्‍कान्‍ते मि बात

1 थेमे आज्‍यो न्‍वावे, ङुरूङ प्रभु येशू ख्रीष्‍ट ग्‍युरला ओङच्‍येते थेमे ङुरूङला थे खोरोङताङ ङ्योम्‍बुराङ देताला टीला खेरच्‍येते बातला ङ्योकोन च्‍यि सिते सासीन

2 सुइँदेकी प्रभु येशू ग्‍युरला ओङच्‍येते दिन नाम वाओङा सिन गुला देता माफाबो, थे लेप्‍कीन सिन्‍सुङ सिरजीनमेईराङ थेबे बात ङेन्‍ला दि बात पक्‍काराङ ईन्‍ताकाना च्‍यिन्‍ताका सिन ज्‍यीबेकी आते खाला अलमल्‍ल परे माकेत। थोक सिरकान्‍ते मिओनगी दि बातनी पावलबेकी परमेश्‍वर आत्‍मे छ्य्‌वापेई साबाते ईन सासीनोङ, पावलबा खोपरोङगीराङ साबाते ईन सासीनोङ कि पावलबेकी चिट्ठीला टिबाते बात ईन सासीनोङ थोक्‍ते बात ङेनराङ माङेन।

3 होथोक्‍ते बात ङेन्‍ला ख्‍योकोन सुङ छक्‍के माकेत। च्‍यिला सासीन मि काल्‍बेईकी परमेश्‍वरगी खि साबाते ङेन्‍दा ताङगीन थे विरोध माक्‍याथुप थेमे आउदी पाप खित्‍कान्‍ते मि मावाथुपनी प्रभु येशू ग्‍युरला ओङच्‍येते दिन ओङराङ मेङगो। थे आउदी पाप खित्‍कान्‍ते मिकी छ्येज्‍यीक सजाय ङेत्‍ला नरककुण्‍डमा ड्वा फाप्‍क्‍यो।

4 परमेश्‍वर छ्येते शत्रुचेन होथे मिराङ ओङगो। था थेकी वाला चुक खिते सासीन गाङे भन्‍दा छ्येते थे खोरोङराङ ईन्‍दाच्‍योक खाला परमेश्‍वरला थेमे मिओनगी ल्‍हा लु सिन माने खिन वाबाते सुङलाङ थेमे छ्याःङलाङ माने खिता मेङगो सिन सिओ। दोस्‍यिककामा मेन, परमेश्‍वर मन्‍दिर नाङ स्‍यूला थेकी गाङेला थे खोरोङराङ परमेश्‍वर ईन साला थेरूराङ देत्‍क्‍यो।

5 ख्‍योकोनताङ ङ्योम्‍बु ओत्‍जीन दि बाततेबा ङे ख्‍योकोनला गाङे साबा ओतान। ख्‍योकोनगी टोक ज्‍येत्‍सुङरो?

6 थे आउदी पाप खित्‍कान्‍ते मि ओङच्‍ये बेला मालेपथुप थेला किल्‍ला ज्‍य्‌वाकान्‍ते ओतेकी थे थातासाक माबाते ईन। थेला किल्‍ला ज्‍य्‌वाकान्‍ते सु ईन्‍दे सिन ख्‍योकोनला छ्याराङ ओत।

7 थे वाबा मेत्‍सीनोङ थेत्ताङ डिक्‍कान्‍तेबेकी मिओनला परमेश्‍वरगी साबाते ङेन माच्‍युत्‍ला पाप खित ज्‍युत्‍कीन ओत। थे लाम किल्‍ला ज्‍य्‌वाकान्‍तेला परमेश्‍वरगी लो था थेला थोङ सानामेईचेन थे ओङा थुप्‍क्‍यो।

8 थेला किल्‍सादुकी ताङनामेईकामा थे दुरू ओङगो। थेमे थे खोरोङ नाम्‍दाककी झिलिमिली गाल्‍ला ग्‍युरला ओङाईताङ प्रभु येशूकी थेला दाक ग्‍याल्‍ग्‍यो, थेकी थेला पालोईला फु खालाराङ सेत्‍क्‍यो।

9 थे आउदी पाप खित्‍कान्‍ते मि दुरू वानामेई शैतानगी थेला छ्येज्‍यीक शक्ति तेरग्‍यो। थेमे थे मिकी छ्ये छ्येताङ अचम्‍बतेन्‍दे काम खाला तेन्‍ग्‍यो। थे काम थोङजीन मिओनला परमेश्‍वरगी खित च्‍युताते ईन्‍दासीन सिरा च्‍योकराङ लाङगो।

10 दोस्‍यिककामा मेन, दोक्‍ते ज्‍येनोङ मेलेबा मेलेबा काम खाला थेकी नरककुण्‍डमा स्‍यूक्‍कान्‍ते मिओनला मिकला छारो ग्‍याप्‍ला थे खोरोङ छ्य्‌वापा लै खित ज्‍युत्‍क्‍यो। थे मिओनगी सत्‍यते बात ङेन्‍दा सेम माक्‍याबेकीराङ थेबा नरककुण्‍डमा स्‍यूक्‍च्‍येते ईन। सत्‍यते बात ङेन्‍दा सेम खाबा ईन्‍सीनचेन परमेश्‍वरगी थेबाला पापदुकी डेल्‍च्‍या ओतान।

11 थेबेकी सत्‍यते बात माङेन्‍देकी खित्‍सादु परमेश्‍वरगी थेबाला ईन्‍दाताङ मेन्‍दाते बात खाङ ईन्‍ताका सिन डेला मुथुप्‍च्‍या जोइओ। थोक खानामेई थेबेकी थे आउदी पाप खित्‍कान्‍ते मिकी साबाते मेन्‍दा मेन्‍दे बातकामा ङेन्‍ग्‍यो।

12 थोक खाला सत्‍यते बात माङेन्‍ला खालि परमेश्‍वरगी माकेत साबाते कामकामा खिता सेम खाला थोकराङ खित्‍कान गाङेला परमेश्‍वरगी थेबेकी ङेता फाप्‍च्‍येते सजाय तेरग्‍यो।


परमेश्‍वरगी छाने खाबाते मिओनगी चुक खिता फाप्‍कीते

13 दोक ईन्‍सीनोङ आज्‍यो न्‍वावे, ख्‍योकोनलाचेन प्रभु येशू ख्रीष्‍टकी आउदी ङिङज्‍ये खाबा ओत। थेमे ङ्योकोन जहिलेङ ख्‍योकोन लाईदु परमेश्‍वरला धन्‍यवाद सिओ। परमेश्‍वर आत्‍मेकी खित्‍सादु ख्‍योकोन सेम खुदुक गालाते मि ओङला थेमे सत्‍यते बात ङेन्‍ला ख्‍योकोनगी पापकी सजाय भोगे खिता माफाप्‍स्‍यीत सिन परमेश्‍वरगी ख्‍योकोनला दि सा नाम ज्‍वा भन्‍दा गोमाकाराङ छाने खाबा ओतेकी ङ्योकोनगी थेला धन्‍यवाद सिरा फाप्‍च्‍येतेराङ ईन।

14 ख्‍योकोनला थोक खिताला ङ्योकोनला गा लाङच्‍येते बात लोप च्‍युत्‍कीन परमेश्‍वरगी ख्‍योकोनला थे खोरोङ दोन्‍दु स्‍योक सिन काताङाते ईन। दोस्‍यिककामा मेन, ङुरूङ प्रभु येशू ख्रीष्‍टला मान बिन्‍गीन छ्ये जोबा च्‍योकराङ खाला परमेश्‍वरगी था ख्‍योकोनलाङ मान बिन्‍ला थे खोरोङगी ज्‍वा चाला च्‍योकराङ लेमु जोइओ।

15 बात दोक दोक ईन्‍देकी आज्‍यो न्‍वावे, ख्‍योकोनगी ङेन्‍गीन वाबाते बात ङेन्‍गीनराङ देत। ख्‍योकोनताङ ङ्योम्‍बु ओत्‍जीन लापाते ईन्‍स्‍यीत थेमे चिट्ठीला टिकीन ताङाते ईन्‍स्‍यीत ङ्योकोनगी लापाते बात ङेन्‍दा मोतोङा खाला चुक खि सिन लापा ओताने थोकराङ खिन देत।

16-17 ङुरूङ आबा परमेश्‍वरगी ङुरूङला ङिङज्‍ये खाईन थे खोरोङ दयेकी जहिलेङ आँट तेरगीन देत्‍ला तिरी तेरग्‍यो सिन साबातेबा गाङे पक्‍काराङ ङेत्‍क्‍यो सिन आश खाला देत ज्‍युत्‍क्‍यो। दोक खित्‍कान्‍ते परमेश्‍वरताङ ङुरूङ प्रभु येशू ख्रीष्‍ट थे खोरोङगीराङ ख्‍योकोनला आँट बिन्‍ला ख्‍योकोनगी खिन ओताते लेमुते कामताङ बात गाङे खिनराङ देत ज्‍युत्‍स्‍यीत सिन ङ्योकोन प्रार्थना खिओ।

© 1992 Wycliffe Bible Translators Inc. All rights reserved.

Wycliffe Bible Translators, Inc.
Lean sinn:



Sanasan