२ थिस्सलोनिकी 1 - जिरेल1 दि चिट्ठीचेन ङ्योकोन पावल, सिल्वानसताङ तिमोथी डिक्ला ख्योकोन थिस्सलोनिका सारदु जम्मा ओङकान्ते येशू ख्रीष्ट मिओनला टिगीन ओत। ख्योकोनचेन ङुरूङ आबा परमेश्वर थेमे प्रभु येशू ख्रीष्टताङ जीउज्यीकराङ ओङाते मि ईन। 2 आबा परमेश्वरताङ प्रभु येशू ख्रीष्टकी ख्योकोनला दया खाला लेमु खिनराङ देत्स्यीत। परमेश्वरला धन्यवाद तेरच्येते थेमे प्रार्थना खित्च्येते बात 3 आज्यो न्वावे, ख्योकोनगी प्रभु येशूला झन झन लेमु खाईन विश्वास खाबाते थेमे दाक्पोन नाङ दोक्पोईकी ज्येनज्यीकला झन ङिङज्ये खिन वाबा थोङजीन ङ्योकोन जहिलेङ ख्योकोन लाईदु परमेश्वरला धन्यवाद सिओ। ख्योकोनगी थोक लेमु खिन ओतेकी ङ्योकोनगी परमेश्वरला धन्यवाद सिरा फाप्च्येतेराङ ईन। 4 थेमे ज्येनगी खेराङला खेदा खाईन जति दुक्पा बिन्सीनोङ थेमे जति दुक्पा भोगे खिता फाप्सीनोङ ख्योकोनगी सेम मेसेता खाईन प्रभु येशूला विश्वास खिनराङ देताते बात ठाउँ ठाउँला जम्मा ओङकान्ते परमेश्वर मिओनला ङ्योकोन गा खिनकामा लाःप्कीन ख्याम्ग्यो। 5 ख्योकोनगी थोक खिन ओताते ताला परमेश्वरगी सुङलाङ काका पाका मिक्किता खाला न्याय खिओ सिन छ्या स्येक्यो। चुक सासीन परमेश्वर राज्यने देता ङेत्क्यो सिन ख्योकोनगी थरिङोला दुक्पा भोगे खिन ओताते ताला ख्योकोनगी लेमु खासुङ सिन परमेश्वरगी ख्योकोनला थे खोरोङ राज्यने देत ज्युत्क्यो। 6 थेकी सु सुला चुक खिता फाप्च्या दुका थे ताला थरिङोला ख्योकोनला दुक्पा तेरकान्ते मिओनला सजाय बिन्ला दुक्पा तेरग्यो। 7 थरिङोला दुक्पा भोगे खिन ओताते ख्योकोनलाचेन ङ्योकोनताङराङ था तिरी थेकी गाङे पीरताङ दुक्पादुकी टाल्ला लेमु खिओ। था चुक ओङगीते सासीन प्रभु येशू छ्येज्यीक शक्ति ओताते थे खोरोङ दूतओनताङ ज्यीबा लाङच्या मे ज्वाले नाङ देत्ला गाङेकी थोङच्या खाला स्वर्गनेकी ग्युरला वाला 8 परमेश्वरला माने मिक्किकान्ते थेमे ङुरूङ प्रभु येशूते गा लाङच्येते बात मेङेन्कान्ते मिओनला थेबेकी ङेता फाप्च्येते सजाय तेरग्यो। 9 होथोक्ते मिओनगी ङेत्च्येते सजाय च्यि ईन्दे सासीन थेबाचेन प्रभु येशू दोन्दु बान्दा देता मेङेदो। थेत्ताङ चुक छ्येज्यीक शक्ति ओता ईन्दाका सिनोङ नोमुङ थोङा मेङेदो। थेबेकीनी सधैँभरि आउदी खाला दुक्पा भोगे खिनराङ देता फाप्क्यो। 10 थेला विश्वास खित्कान्ते थे खोरोङ मिओनगीचेन गाङेकी प्रभु येशू ग्युरला ओङे छोमु थेकी खोपरोङला थोई लेमु खासुङा सिन थेते जय जय खिओ। ङ्योकोनगी लापाते गा लाङच्येते बात ङेन्देकी खित्सादु थे छोमु प्रभु येशूला थोक खित्कान्ते मिओन नाङ ख्योकोनोङ ओङगो। 11 होदि बाततेबा टोक मेज्येता खाला ङ्योकोन ख्योकोन लाईदु जहिलेङ ङुरूङ परमेश्वरला दोक सिन प्रार्थना खिओ। चुक सासीन थेकी ख्योकोनला थे खोरोङ दोन्दु स्योक सिन काताङाते ईन्देकी ख्योकोन चुक ओङा फाप्च्येते ईन्दे थोकराङ ओङ ज्युत्स्यीत। दोक खाला ख्योकोनगी खिता चालाते लेमुते कामताङ बात थेमे प्रभु येशूला विश्वास खाईन खिताला स्यूबाते कामतेबा गाङे परमेश्वरगी ख्योकोनला थे खोरोङ शक्ति बिन्ला पूरो खित ज्युत्स्यीत सिन प्रार्थना खिओ। 12 परमेश्वरगी ख्योकोनला ङ्योकोनगी प्रार्थना खाबा च्योकराङ खानामेई ख्योकोनगी खित्सादु ङुरूङ प्रभु येशूकी छ्येज्यीक मान ङेत्क्यो थेमे थेकी ख्योकोनलाङ मान तेरग्यो। दोक दोक ओङच्येतेचेन गाङे ङुरूङ परमेश्वरताङ प्रभु येशू ख्रीष्ट दयेकी खित्सादुराङ ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.