२ पत्रुस 3 - जिरेलप्रभु येशू ग्युरला ओङच्येते बात 1 ङिङज्येते आज्यो न्वावे, दित्ताङ ङे ख्योकोनला टिबाते चिट्ठी ङि छाङगो। गोमे चिट्ठी च्योकराङ ङे दि चिट्ठीङ खेराङगी छ्या स्येबाते बाततेबा टोक मेज्येता खाला देत सिराला टिबाते ईन। 2 परमेश्वर बात खित्कान्ते मिओनगी गोमाका साबाते बाततेबा थेमे ङुरूङला पापदुकी डेल्कान्ते प्रभु येशू ख्रीष्टकी खि साबाते थेकी खटे खाबाते मिओनगी खेराङला लाप्कीन बिन्दाते बातओन ख्योकोनगी नोमुङ टोक माज्येत। 3 दि बातज्यीक ख्योकोनगी लेमु खाला छ्या स्येबा खि। च्यि सासीन येशू ख्रीष्ट दुरू ग्युरला ओङा भन्दा गोमाचेन दाक्पोन खुशी खिन मेलेबा मेलेबा काम खित्कान्ते मिओनगी ख्योकोन खिस्यी खिन 4 “थे याङराङ दुरू ग्युरला ओङगो साबाते बात खै खापा तोरसुङा? ज्युज्यु पुर्खा गाङे स्यिइन गाल्सुङ। ईन्सीनोङ दि सा लुङबा जोजीनमेई ओता च्योकराङ जेसुकै थोककी थोकराङ दुक,” सिन सिओ। 5 परमेश्वरगी दुरू दोक ओङस्यीत, थोक ओङस्यीत सानामेई दि सा नाम गाङे ओङा ओतान थेमे साचेन छ्युदुकी टाल्गीन च्याकीन जोबा ओतान सिन छ्या ओत्कीन ओत्कीनोङ थेबेकी छ्या स्येबा मेता च्योकराङ खिओ। 6 तिरी परमेश्वरगी थे छ्युई भलराङ ग्या च्युत्कीन थेजीन सा लुङबा गाङे खतम जोबा ओतान। 7 थेकी दोक ओङस्यीत, थोक ओङस्यीत सानामेई गोमा गाङे ओङाच्योक खाला थरिङोला ओताते दि साताङ नामोङ परमेश्वरगी दि छोमुसाक लेमु ओङस्यीत साबा छोमुसाककामा देत्क्यो। थेमे थे खोरोङगी साबाते माङेन्ला मेलेबा काम खित्कान्ते मिओनला सजाय बिन्ला न्याय खिते छोमु थेकी दि सा नाम मेकी थाला जोइओ। 8 ङिङज्येते आज्यो न्वावे, दि बादोङ ख्योकोनगी टोक माज्येत। च्यि सासीन प्रभु परमेश्वर लाईदुनी ङीमाई सिराताङ लो हजारज्यीक सिरा दोक्पोईराङ ईन, छ्याःङ खुदुक मेन। 9 मि कोई कोईकी परमेश्वरगी खिओ साबाते बात थेकी खोले खोलेकामा खिओ सिन विचार खिदुक। तर बात दोक मेन। मि सुङ नरककुण्डमा स्यूक्पा माफाप्स्यीत, बरू थेबा गाङेकी खोपरोङ पापी दुका सिन छ्या स्येला थे खोरोङ छ्य्वापा लै खित्स्यीत सिनकामा सजाय मेतेरा खाईन थे गुकीन देताते ईन। 10 चोर दि छोमुराङ ओङगो सिन सुङलाङ छ्या मेता च्योकराङ प्रभु येशू दि छोमु ग्युरला ओङगो सिनोङ सुङगीङ सिरा मुथुबो। थे ग्युरला ओङे छोमु नामचेन नामज्योक बु साच्याज्यीक ङोरो देन्गीन तोक तोरला डुइओ। दागार, ङीमाताङ कार्मातेबाङ मेकी छिक्ला सोला डुइओ। थोकराङ खाला दि सा लुङबाताङ दुरू ओताते जतिङ जेसुकै थाला डुइओ। 11 था ङीमाई दोक खाला जेसुकै खतम डोच्येते ईन्देकी ख्योकोनगी चुक खिता फाप्कीते छ्या ओत? ख्योकोनगी काम बात जे खासीनोङ लेमुते थेमे परमेश्वरला मन परे खित्च्येतेकामा खिता फाप्क्यो। 12 परमेश्वरगी मि गाङे न्याय खित्च्येते थे दिन होत्ता ओङस्यीत सिन ख्योकोन होदोक खाला लेमु कामताङ बात खिन देत। थे छोमु नामचेन मेकी छिक्ला सोला डुइओ। थेमे दागार, ङीमाताङ कार्मातेबाङ मे रापकी खित्सादु बिले खाला खतम डुइओ। 13 दिबा जेसुकै दोक खाईन नाश गाल्सीनोङ ङुरूङचेन परमेश्वरगी जोइओ साबा ओताते साम्बाते साताङ नाम था होत्ता थोङा ङेत्च्या ओङसुङ सिन गुलाराङ देत्क्यो। दोक खाईन थेकी साम्बाते सा नाम जोनामेई थेरूचेन थेकी खि साबा साबाच्योक खित्कान्तेबा देत्क्यो। 14 थोगी ङिङज्येते आज्यो न्वावे, था तिरी दोक दोक ओङगो सिन खेराङ गुकीन देता ओतेकी ख्योकोन छ्याःङ गल्ती मेताते, सुङगीङ दिबेकी दोक दोक गल्ती खाबा ओत सिरा मुथुप्च्या थेमे परमेश्वरताङ डिक्ला देत्कान्ते मि ओङा थुप्स्यीत सिन ख्योकोनगी काम बात जे खित्जीनोङ लेमु खित्च्ये छ्य्वापाकामा स्येत खि। 15 मिओन पापकी सजायदुकी थारस्यीत सिनकामा प्रभु परमेश्वर थोरूमसाक सजाय मेतेरा खाईन गुकीन देताते ईन। परमेश्वरगी छ्या स्ये च्युत्कीन बिन्दा ओतेकी ङुरूङ ङिङज्येते आज्यो पावलगीङ परमेश्वर च्यिला गुकीन देताते ईन्दे सिन बात खित्जीन ख्योकोनला दि बातराङ टिबा ओत। 16 प्रभु येशू ग्युरला ओङच्येते बात थेकी थे खोरोङ चिट्ठी गाङेला टिबा ओत। ईन्दानी थेकी टिबाते कोई कोई बातकी अर्थ खोबाला आउदी दुक्पाङ ओत। थोगीराङ परमेश्वर बात लेमु खाईन छ्या स्येबा मेताते सेम ङि ओताते मिओनगी थे चिट्ठी बाततेबा खोपरोङ अर्थ लै खाला लोप्कीदुक। थेबेकीचेन परमेश्वर बातला साबाते ज्येन बादोङ होदोकराङ खाला लोप्क्यो। दोक खाबेकी थेबे गोःनामा परमेश्वर सजाय फाप्क्यो। 17 बात दोक दोक ईन्देकी ङिङज्येते आज्यो न्वावे, होदोक्ते मेन्दे बात लोप्कान्ते मिओन ओङगो सिन ख्योकोनला छ्याराङ ओतेकी ख्योकोन च्याङबो खाला देत। दोक माक्यासीन खिता मेङच्या ङोचा लाङच्येते काम खित्कान्ते मिओनगी लोप्च्येते मेन्दा मेन्दे बात ङेन्ला ख्योकोनगी खेराङगी ङेन्गीन ओताते सत्यते बात ङेन्दा तोङगो। 18 ङुरूङला पापदुकी डेल्कान्ते प्रभु येशू ख्रीष्टकी थोई दया खासुङा थेमे थे चुक लेमु खित्कान्ते ईन्दे सिन झन झन लेमु खाला छ्या स्येबा थुप्स्यीत सिन ख्योकोनगी सत्यते बात ङेन्गीन देत। थरिङोला ईन्स्यीत, था तिरी ईन्स्यीत सधैँभरि प्रभु येशू ख्रीष्टते जय जय ओङस्यीत सिन सिइ। आमेन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.