२ पत्रुस 2 - जिरेलमेन्दे बात लोप्कानगी सजाय ङेत्च्येते बात 1 गोमा इस्राएलीओन नाङ परमेश्वर बात खित्कान्ते मि ईन सिन मेन्दे बात लोप्कान्ते मिओन ओता च्योकराङ ख्योकोन नाङचेन परमेश्वर बात लोप्कान्ते मि ईन सिन मेन्दे बात लोप्कान्ते मिओन ओङगो। थेबेकी ख्योकोनला ङ्ये ज्युताला परमेश्वर बातताङ डिकराङ मिडिक्च्येते बात लोप्क्यो। थेबेकीनी खोपरोङ पापकी मोल च्याल्ला खोपरोङला पापदुकी डेल्कान्ते छ्येज्यीक शक्ति ओताते प्रभु येशूला मानेराङ मिक्किओ। दोक दोक खानामेई थेबे गोःनामा परमेश्वर सजाय फाप्क्यो। 2 थेबे बात ङेन्ला मि काल्बेईकी होथेबेकी खाबा च्योकराङ खिता ओङच्या मेङच्या आउदी ङोचा लाङच्येते काम खिओ। थेबेकी थोक खाबा थोङला ज्येनगी परमेश्वर बात लेमु मेन्दाक्वा सिन सिओ। 3 पैसे लोभकी खित्सादु थेबेकी ख्योकोनला मेन्दा मेन्दे बात जोला लाप्ला ठगे खिओ। दोक खित्कान्तेबाला परमेश्वरगी सजाय बिन्ला नरककुण्डमा लुक्यो सिन गोमाका साबा ओत। थेकी दि बात टोक ज्येता मेत। था थेकी होत्ताराङ थेबाला सजाय तेरग्यो। 4 दि बात ङुरूङला छ्याराङ ओत। च्यि सासीन परमेश्वरगी पाप खित्कान्ते परमेश्वर दूतओनला समेदोङ थाराङ मोतोङा खाईन सजाय बिन्गीन नरककुण्डमा गाङे भन्दा मुन्दाकते ठाउँनामा लुक्पा ओत। परमेश्वरगी मि गाङे न्याय खित्च्येते दिन मालेपथुप थेबाला ठाठाबाराङ थे मुन्दाकते ठाउँदुराङ किल्ला ज्य्वाक्यो। 5 दिकामा मेन, थाङबो थे खोरोङगी साबाते मेङेन्कान्ते मिओनलाङ परमेश्वरगी सा लुङबा खाङ भल ग्या च्युत्कीन गाङेला खराप खुरूप सेता ओतान। थेजीन थे खोरोङगी खि साबाच्योक खित्कान्ते थेमे ज्येनलाङ थोकराङ खि सिन याङ याङ लोप्कान्ते नूहला थेमे ज्येन मेरा दुईन मिलाकामा थे भलदुई थार च्युता ओतान। 6 थेमे परमेश्वरगी मे ताङगीन सदोमताङ गमोरा सारला थाला जोबा ओतान। थोक खाईन थेकी थे खोरोङ बात मेङेन्कान्तेबे गति चुक ओङगीते सिन तेन्गीन बिन्दा ओतान। 7 थे सारओन थोक खाला नाश तोङे बेलाला सदोम सारदुराङ देता ओताते लोतलाचेन थेकी थेरूकी तेन्गीन जोए खाबा ओतान। लोत परमेश्वरगी खि साबा साबाच्योक खित्कान्ते मि ओतान। थे सारगी मिओनगी खिता मेङच्या आउदी मेलेबा मेलेबा ङोचा लाङच्या काम खाबा थोङजीन थेला आउदी मेलेबा लाबा ओतान। 8 होथोक्ते मिओन नाङराङ देता ओत्कीन थेबेकी खाबाते होथोक खिता मेङच्या आउदी मेलेबा मेलेबा बात थोजीन थेमे काम थोङजीन थेला ङीमे ठाङमा आउदी मेलेबा लाङगीन ओतान। 9 प्रभु परमेश्वरगी गोमा दोक दोक खाबाते बात विचार खित्जीन थे खोरोङगी खि साबा साबाच्योक खित्कानला मेलेबा लाङजीन, दुक्पा ओङजीन थेबाला चुक खाला थे छ्य्वापेई डेला फाप्कीते थेमे मेलेबा काम खित्कानलाचेन चुक खाला सजाय तेरा फाप्कीते सिन थेला छ्या ओत सिरच्येते बात लेमु खाला छ्या स्येबा थुप्कीदुक। 10 खास खालाचेन खोपरोङ सेम मेलेबा ओत्कीन दाक्पोन खुशी खिन खिता मेङच्या आउदी मेलेबा मेलेबा काम खित्कान्ते थेमे परमेश्वरताङ ज्येन सुङगीङ अधीनला मेदेत्कान्तेबाला चुक खाला सजाय तेरा फाप्कीते सिन थेला लेमु खाला छ्या ओत। परमेश्वर बातताङ मिडिक्च्येते बात लोप्कान्ते होथे मिओनगी सुङताङ ज्यीबा ख्यारा मिक्किता खाला ङा ङाराङ ईन सिराच्योक खिओ। थेबेकीनी पाप खित्कान्ते परमेश्वर दूतओनलाङ छ्याःङ ज्यीबा मिक्किता खाला विरोध खिओ। 11 परमेश्वर दूतओन होदि मिओन भन्दा खापान खापान छ्ये ईन। थेबाताङ छ्येज्यीक शक्ति ओत। ईन्सीनोङ दिबेकीङ प्रभु परमेश्वर दोन्दु गाल्ला थे पाप खित्कान्ते परमेश्वर दूतओन दोषी ईन, थोगी थेबाला सजाय तेरा फाप्क्यो सिन मिसिरो। 12 परमेश्वर बातताङ मिडिक्च्येते बात लोप्कान्ते मिओनगीचेन खोपरोङगी माखोबाते बात गाङे ठट्टाला पुरग्यो। थेबा सो साकान्ते पशु च्योकराङ ईन। सेता सेम लाङजीन पशुतेबा ग्याङ सेताच्योक खाला होथेबालाङ परमेश्वरगी सजाय बिन्ला नरककुण्डमा लुक्यो। 13 थेबेकी ज्येनला जस्तो मेलेबा खाला दुक उस्तोराङ खाला परमेश्वरगी थेबालाङ मेलेबा खिओ। थेबेकीनी ङीमे खोङलाराङ खोपरोङला खिता सेम लाबा लाबा खिओ। ख्योकोनताङ ङ्योम्बु रूला साजीन थुङजीन थेबेकी ख्योकोनलाङ खोपरोङ मेलेबा बानी बिवाराराङ लाप्ला खोपरोङ च्योकराङ जोइओ। ख्योकोनलाङ खोपरोङगी च्योकराङ खिता लोप्जीन थेबाला गा लाङगो। 14 थेबाचेन थोङाते जति फेम्मे मित्ताङ ङ्यालाकामा छोल्ग्यो। थोक्ते काम खाला थेबा नोमुङ माडाओ। सेम ङि ओताते मिओनला खोपरोङ छ्य्वापा लै खित ज्युताला थेबा च्योक सिपालु ज्येन सुङ मेङगो। जहिलेङ सम्पत्ति लोभकामा खिन खापेकी चुक खाला सम्पत्ति ज्वा थुप्कीते सिन थेबेकी लेमु खाईन छ्या स्येबा ओङगो। थेबाला परमेश्वर सराप फाप्क्यो। 15 थेबा लेमु काम खिता ताङगीन खोपरोङ लामला ख्याम्ला दुक। थेबाचेन थाङबो बओर फुज्युङ बालामगी खाबा च्योकराङ खिन दुक। पैसे लोभ खाईन बालामचेन मेलेबा काम खिताला अघि सरे खाबा ओतान। 16 थे थोक खाला ङ्योबाच्योक खाला मेलेबा काम खित डोजीन थेकी खिता चालाते काम लेमु मेन सिन थे खोरोङ जेबाते सो साकान गधेकी मिकी च्योक खाईन बात खाईन थेला थोक खित च्युता मेतान। 17 परमेश्वर बातताङ मिडिक्च्येते बात लोप्कान्ते होथे मिओननी छ्यु काम्गीन सिन्दाते क्वा च्योकराङ ईन। थेमे छ्यार्बे थोपोज्यीगोङ मेताते ल्हाबेकी पुरगीन खेराते मुक्पा च्योकराङ ईन। होथेबाला सजाय तेराला परमेश्वरगी नरककुण्डमा आउदी मुन्दाकज्यीक ठाउँ ठीक खाईन ज्याक्पा ओत। 18 च्यिला सासीन थेबेकी काम लै खित्च्येते बात सिराते छ्याःङ मोलोबो। खोपरोङ जे बादोङ छ्या स्येकान ईन सिराच्योक खाला आउदी छ्ये छ्ये बात खिओ। दाक्पोन खुशी खिन दि सा लुङबे मिओनगी खित्च्येते च्योक्ते खिता मेङच्या ङोचा लाङच्येते काम खिता ताङगीन भर्खर भर्खर परमेश्वरला विश्वास खिताला स्यूबाते मिओनला दिबेकी होथोक्ते काम खासीन छ्याःङ मेङगो साला लोक्ला गोमा खाबाते होथोक्ते कामराङ खित ज्युत्कीदुक। 19 थेबेकी मिकी दाक्पोन खुशीकी जे खासीनोङ ओङगो, छ्याःङ मेलेबा मेङगो सिन ज्येनला लोप्कीदुक। तर खोपरोङला खिता सेम लाबाते काम मिक्किता खाला देताराङ माथुप्ला थेबेकी दाक थोक्ते मेलेबा काम खिदुक। दोक खाला थेबा पापकी योक्पो च्योकराङ ओङगीन देत्ला दुक। च्यिला सासीन जेकी मिला ग्याल्गीदुक मिचेन होथे योक्पोराङ ईन। 20 ङुरूङला पापदुकी डेल्कान्ते प्रभु येशू ख्रीष्ट सु ईन्दे, चुक्ते ईन्दे सिन छ्या स्येकीन दि सा लुङबे मिओनगी खित्च्येते जेसुकै मेलेबाते काम खिता ताङगीन सिन्दाते मिओनगी लोक्ला गोमा खाबा च्योक्ते कामराङ खिताला स्यूला थोक खित्च्ये छ्य्वापेई ठालाराङ मुथुप्तुक सासीन थेबा गोमा भन्दाङ झन ज्यीबा लाङच्या मेलेबा डुइओ। 21 परमेश्वरगी खि साबाते खोपरोङला लाप्कीन बिन्दाते बात ङेन्दाला स्यूनामेकी थे ङेन्दा तोङा भन्दानी थेबेकी बरू परमेश्वरगी मिओनगी चुक खिता फाप्कीते सिन साबाते होदि बात नोमुङ छ्या मास्येबा ईन्सीन लेमु ओङच्या ओतान। 22 थेबे काम ताजीन दि उखानताङ डिइदुक। चुक सासीन “किकी ग्युरला गाल्ला थे खोरोङ क्युबाराङ दाइओ।” थेमे “फाक्पाला साङसाङ खाईन टुकीन बिन्सीनोङ लोक्ला हिलो नाङराङ गाल्ला ढलीमली खिओ।” |
© 1992 Wycliffe Bible Translators Inc. All rights reserved.
Wycliffe Bible Translators, Inc.