२ पत्रुस 1 - जिरेल1 दि चिट्ठी टिक्कान्ते ङा शिमोन पत्रुस ईन। ङा येशू ख्रीष्ट काम खित्कान्ते थेकी खटे खाबाते मि ईन। ङा दि चिट्ठी जे खित्जीनोङ ठीक खाला खित्कान्ते ङुरूङला पापदुकी डेल्कान्ते येशू ख्रीष्टकी खित्सादु ङेराङ च्योकराङ पक्का खाला थेला विश्वास खिता ङेताते मिओनला टिगीन ओत। येशू ख्रीष्टराङ ङुरूङ परमेश्वर ईन। 2 आबा परमेश्वरताङ प्रभु येशूकी ख्योकोनला झन झन दया खाला लेमु खिनराङ देत्स्यीत। दोक ओङनामेई परमेश्वरताङ ङुरूङ प्रभु येशू सु ईन्दे, चुक्ते ईन्दे सिन झन लेमु खाला छ्या स्येक्यो। परमेश्वरगी छाने खाबाते मिओनगी चुक खिता फाप्कीते 3 दाक्पोनगी ङेताते साम्बाते जुनीला खिता फापाच्योक खिताला थेमे थेला माने खिताला खिता फाप्च्येते कामताङ बात खिताला गोच्येते जति गाङे परमेश्वरगी थे खोरोङताङ ओताते छ्येज्यीक शक्ति छ्य्वापेकी ङुरूङला बिन्दा ओत। थे सु ईन्दे, चुक्ते ईन्दे सिन थेला छ्या स्येबेकी खित्सादु थेकी ङुरूङला दोक खाईन गोच्येते जति बिन्दाते ईन। थे खोरोङताङ छ्येज्यीक शक्ति ओतेकी थेमे जे खित्जीनोङ लेमु खित्कान्ते ईन्देकी थेकी ङुरूङला थे खोरोङ दोन्दु स्योक सिन काताङा ओत। 4 थेकी जमान खाईन तेरग्यो साबाते आशी ङेत्नामेई ङुरूङगी खोपरोङ सेम मेलेबा ओतेकी दि सा लुङबे मिओनगी च्योक दाक्पोन सेमला लाबा लाबा मिक्किता खाला थेकी खिता च्योकराङ लेमु खिता थुप्क्यो। 5 बात दोक ईन्देकी ङुरूङ दि सा लुङबे मि ज्येन च्योकराङ मेन्देकी ङा ख्योकोनला च्यि सिते सासीन येशू ख्रीष्टला विश्वास खिन देत्ला ख्योकोनगी काम बात जे खित्जीनोङ लेमु खित्च्ये छ्य्वापाकामा स्येत खि। दोक खानामेई परमेश्वरगी च्यि खि सिका सिन लेमु खाला छ्या स्येबा खि। 6 दिकामा मेन, दाक्पोन सेम काबूला स्योक, दुक्पा किम्मु जस्तो ओङजीनोङ सेम मेसेता खाला देत। दि लाक्तुङ ख्योकोनगी परमेश्वरला माने खिताला खिता फाप्च्येते कामताङ बात खि। 7 दिकामा मेन, खेराङ च्योकराङ परमेश्वरला विश्वास खित्कानला दुक्पाला लेमु खि थेमे ज्येनला ङिङज्ये खि। 8 होदोक दोककामा खिन गाल्सीन ङुरूङ प्रभु येशू ख्रीष्ट सु ईन्दे, चुक्ते ईन्दे सिन छ्या स्येबाते बात ख्योकोनगी कामगीराङ खाला तेन्दा थुप्क्यो। 9 होदोक दोक मिक्किकान्ते मिचेन अन्ध च्योकराङ ईन। थोक्ते मिकी तिरी बात छ्याःङ विचार मिक्किओ। थे खोरोङगी गोमा खाबाते पापदुकी थेला प्रभु येशू ख्रीष्टकी टाला ओत सिरच्येते बादोङ थेकी टोक ज्येत्कीन सिन्दा ओङगो। 10 थोगी आज्यो न्वावे, परमेश्वरगी खेराङला छाने खाईन थे खोरोङ दोन्दु स्योक सिन काताङाते पक्काराङ ईन सिन छ्या स्येबाला ख्योकोनगी ङे थाल्लासाक साबाच्योक खिनराङ देत। दोक खिन देत्सीन ख्योकोनगी मेलेबा काम मिक्किओ। 11 थेमे ङुरूङला पापदुकी डेल्कान्ते प्रभु येशू ख्रीष्टकी गा खिनकामा ख्योकोनला थे खोरोङ राज्यदु स्यूक ज्युत्क्यो। थे राज्यचेन नोमुङ तोरला मोन्डोओ। परमेश्वर बात खित्कान्तेबेकी गोमाका खाबाते बात 12 ईन्दाका दि बातओन ख्योकोनला लेमुराङ खाला छ्या ओत। थेमे दि सत्यते बात ईन सिन ख्योकोनगी छ्याःङ शंका मिक्किता खाला ङेन्गीनोङ दुक। ईन्सीनोङ ङाला दि बातओन ख्योकोनला याङ याङ दोरे खाला सिरा सेम लाङगीदुक। 13 ङा ङाराङ सोन्ला देत देतसाकराङ दि बातओन याङ याङ साला ख्योकोनला सम्झे खित ज्युता लेमु ईन सिराच्योक लाङगीदुक। 14 च्यिला सासीन ङा सोन्ला देत्च्येते था काल्बा मेत। ङुरूङ प्रभु येशू ख्रीष्टकी ङाला दि बात लेमु खाईन छ्या स्ये च्युता ओत। 15 ङा स्यिनामेकीङ ख्योकोनगी दि बाततेबा नोमुङ टोक मेज्येत्स्यीत सिनराङ ङे ङाराङ स्येतकी थुपासम्म खाईन दि बातओन खो ज्युता चालाते ईन। 16 ङुरूङ प्रभु येशू ख्रीष्ट चुक छ्येज्यीक शक्ति ङेत्ला दुरू ग्युरला ओङगीते सिन ख्योकोनला लोप्जीन ङ्योकोनगी थाराङ ङेराङगी जोबाते बात लापाते मेन। थे चुक छ्ये ईन्दे सिननी ङ्योकोनगी ङेराङ मिगीराङ थोङाते ईन। 17-18 चुक सासीन बाजिई ङ्योकोन प्रभु येशूताङ बोमज्यीक्तु ङ्योम्बुराङ ओते बेलाला आबा परमेश्वरगी थेला आउदी छ्येज्यीक मान बिन्देकी खित्सादु ङ्योकोनगी थेला मिगी ताराङ मुथुप्च्या झिलिमिली नाम्दाकला देता ओता थोङा ओतान। थेमे थेजीनराङ परमेश्वरगी स्वर्गनेकी “दि ङे फुज्युङ ईन। ङा दिला आउदी ङिङज्ये खिओ। दित्ताङ ङा आउदी खुशी ओत,” सिन साबातेङ थोबा ओतान। परमेश्वरगी थेला थोक छ्ये जोइन साबाते दि बात ङ्योकोनगी ङेराङ नामज्योककीराङ थोबाते ईन। 19 ङ्योकोनगी थोङातेताङ थोबाते होथे बात ताला परमेश्वर बात खित्कान्तेबेकी गोमाका साबा ओताते बाततेबा पक्काराङ ईन सिन सिरा थुप्क्यो। थेबेकी साबाते बातओन ङेन्गीन देत। दोक खासीन बत्ती पारनामेकी नाम्दाक ओङाच्योक खाला खेराङगी खोबा फाप्च्येते बाततेबा लेमु खाला खोबा थुप्क्यो। येशू ख्रीष्ट ग्युरगीन मावाथुप ख्योकोनगी दि बाततेबा ङेन्गीन देत। थेचेन ङोमु पाखाला स्यारच्येते कार्मा ईन। 20 ज्येनतोक भन्दाङ दि बातचेन ख्योकोनगी लेमु खाला छ्या स्येबा फाप्क्यो। च्यि सासीन परमेश्वर बातला टिबा ओताते परमेश्वरगी सिर च्युताते बाततेबा दोक्पोईओङ परमेश्वर बात खित्कान्ते मिओन खोपरोङगी जोकीन साबाते बात मेन। 21 थे बातओननी थे खोरोङ आत्मे छ्य्वापेई परमेश्वरगीराङ थेबाला सिर च्युताते ईन, मिओनगी खोपरोङ सेमला नोकीन खाबाते बात मेन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.