२ यूहन्ना 1 - जिरेल1 ङा येशू ख्रीष्ट मिओनला ताकान्ते छ्येते मिज्यीक ईन। दि चिट्ठी ङा परमेश्वरगी छाने खाबाते फेम्मे मि खोत्ताङ खुई फुज्युङ फुमुला टिगीन ओत। खेकीकामा मेन्देकी ङा ख्योकोनला पक्काराङ ङिङज्ये खिओ। ङेकामा मेन, सत्यते परमेश्वरला छ्या स्येकान गाङेकी ख्योकोनला ङिङज्ये खिओ। 2 ङ्योकोनगी ख्योकोनला ङिङज्ये खित्च्येतेचेन सत्यते परमेश्वर ङुरूङताङ ङ्योम्बु देतेकी थेमे थे सधैँभरि ङुरूङताङ ङ्योम्बु देत्च्येते ईन्देकीराङ ईन। 3 आबा परमेश्वरताङ थे फुज्युङ येशू ख्रीष्टकी ङुरूङला दया खिन थेमे ङिङज्ये खाला लेमु खिन देत्नामेई ङुरूङगी सत्यते बात झन लेमु खाला छ्या स्येबा थुप्क्यो थेमे दाक्पोन नाङ ङिङज्ये खिन देता थुप्क्यो। ज्येनला ङिङज्ये खित्च्येते बात 4 थेमे खुई फुज्युङ फुमु कोई कोईकी ङुरूङला आबा परमेश्वरगी खि सिन कोता च्योकराङ खाईन सत्यते बात ङेन्गीन थेरू खि साबा च्योकराङ खाबा थोङगीन ङाला आउदी गा लाबा ओत। 5 थोरूमोङ ङा खोल्ला ङुरूङगी दोक्पोईकी ज्येनज्यीकला ङिङज्ये खिता फाप्क्यो सिन सिओ। दोक खिइ सिन ङा खोल्ला बिन्ती खिओ। ईन्दाका दि खुई गोमा माथोबाते बात मेन। दि बात ङुरूङगी येशूला विश्वास खिता छोमुमेईराङ थोबाते बात ईन। 6 दोक्पोईकी ज्येनज्यीकला ङिङज्ये खित्च्या सिराते परमेश्वरगी ङुरूङला खि सिन कोताते ङेन्च्येते ईन। थेकी खि सिन कोतातेचेन दोक्पोईकी ज्येनज्यीकला ङिङज्ये खित्च्येते ईन। दि बात खुई येशूला विश्वास खिता छोमुमेईराङ थोबाते बात ईन। च्याङबो खाला देता फाप्च्येते बात 7 थेमे सत्यते बातताङ मिडिक्च्येते बात लाप्ला ज्येनला छक्के खित्कान्ते मिओन दि सा लुङबा खाङ ठाम्गीन सिन्दा ओत। थेबेकी येशू ख्रीष्ट दुरू मि जुनी लाकीन वाबाते मेन सिन सिओ। होथोक्ते मिचेन ज्येनला छक्के खित्कान्ते थेमे ख्रीष्टला विरोध खित्कान्ते मि ईन। 8 थोक्ते मिओनताङ च्याङबो खाला देत। खेराङगी दुक्पा खाबाते थाराङ खेरो मोन्डोस्यीत बरू परमेश्वरगी खेराङला तेरग्यो साबाते इनाम जति गाङे ङेता थुप्स्यीत सिन थोरूमसाक खिन ओता च्योकराङ खिन देता मातोङ। 9 ख्रीष्टकी लापाते बातकी लाक्तुङ ज्येन बात ङेन्दा छोल्कानगीचेन थेकी लापाते बात ङेन्दा तोङगो थेमे होथोक्ते मित्ताङचेन परमेश्वर ङ्योम्बु मेदेदो। ख्रीष्टकी लापाते बात ङेन्गीन देत्कान्ते मित्ताङचेन आबा परमेश्वर थेमे थे फुज्युङ ङ्योम्बुराङ देत्क्यो। 10 सुइँदेकी वाला ख्रीष्टकी लापाते भन्दा खइँदा ल्हाक्पा बात लोपा छोल्गीदुक सासीन थोक्ते मि जो ईन्सीनोङ थेला स्यासा मातेर, थेत्ताङ बातज्यीगोङ माकेत। 11 सुइँदेकी होथोक्ते मित्ताङ बातकामा खासीनोङ थेकीङ होथे मित्ताङ डिगीन थेकी खित्च्येते च्योक्ते मेलेबा कामराङ खाबाते ईन। 12 ङे ख्योकोनला सिरा फाप्च्येते बात थोरूमोङ काल्बेई ओत। ईन्सीनोङ ङा थे बाततेबा चिट्ठीला मिटिगो। बरू ख्योकोनताङ ठेत्ला ङ्योम्बुराङ देत्ला बात खिताप सिन ख्योकोनला होत्ता ठेत्च्ये आश खाबा ओत। दोक खाईन ठेता थुप्सीन ङुरूङ छ्याःङ पीर मिक्किता खाला गा खिन देता थुप्क्यो। 13 परमेश्वरगी छाने खाबाते खुई नुमु फुज्युङ फुमुकी खोल्ला नमस्ते ओत्लो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.