२ कोरिन्थी 9 - जिरेलपावलगी पैसा जम्मा खिन खि सिन लोईन साबाते 1 यरूशलेमदु ओताते परमेश्वर सन्तानओनला मद्धत तेराला सिन पैसा जम्मा खिन ओताते बात ङे ख्योकोनला याङराङ टिक्पा फाप्क्यो सिराच्योक मालाङदुक। 2 थे पैसा जम्मा खिताला ख्योकोनगी चुक आउदी सेम खाबा ओते सिन ङाला लेमुराङ खाला छ्या ओत। ख्योकोनगी थोक लेमु खिन ओताते बात खिन ङे म्यासिडोनियादु ओताते येशू ख्रीष्ट मिओनला अखैयादु ओताते ख्योकोनगी ननीङमेईराङ पैसा जम्मा खिताला स्यूबा ओतान सिन लाःपाप। दि बात थोनामेई आँट ङेत्कीन थेबा काल्बा च्योक्तेकी ख्योकोनगी खाबा च्योकराङ खिताला आउदी सेम खाबा ओत। 3 ङे ख्योकोनगी ननीङमेईराङ थोक खिताला स्यूबा ओत साबाते बात ढाँर खाबाच्योक मेङस्यीत, बरू खेराङगी जम्मा खिताला स्यूबाते पैसा जम्मा खाला सिन्दा खित्स्यीत सिन दि न्वाओनला थेपा तोङगीन ओत। 4 ङात्ताङ थेपा म्यासिडोनिये मिओन ओङजीन ख्योकोनगी थे पैसा जम्मा खाईन ज्याक्पा मेत्सीन ङ्योकोनला चुक ङोचा लेबोङा। ख्योकोनतेनी झन ङोचेकी छ्येत तेन्च्ये लामोङ मेदेदो। 5 थोक मेङस्यीत सिनराङ ङाराङ ओङा भन्दा गोमाराङ दि न्वाओनला ख्योकोन ओत्सापा तोङा फाप्क्यो सिराच्योक लाबेकी ङा दिबाला थेपा ग्युक सिन तोङगीन ओत। था वाला दिबेकी ख्योकोनगी तेरग्यो साबाते थे पैसा गाङे जम्मा खाला ज्य्वाबा थुप्क्यो। दोक ओङनामेई ख्योकोन सुङगीङ करला फाप्कीन बिन्दाते मेन्देकी खेराङ राजी खुशीकी बिन्दाते दुका सिन ज्येनगी छ्या स्येक्यो। ज्येनला तेरजीन चुक खाला तेरा फाप्कीते 6 ख्योकोनगी दि बात टोक माज्येत। च्यि सासीन सोन टिक्पीस्यिक देप्कान्ते मिकी तिरी बाली थोक्जीन रूक्जीनोङ टिक्पीस्यिकराङ रूइओ। सोन काल्बेई देप्कान्तेईचेन बालीङ काल्बेईराङ रूइओ। 7 बात दोक ईन्देकी ख्योकोनगी खेराङला जति जति तेरा सेम लाङगीदुक उति उतिराङ बिन। सुइँदे करला फापाच्योक खाला तेरा सेम मालाङगीन मालाङगीन छ्याःङ मातेर। ज्येनला तेरजीन सुइँदे करला फाप्कीन तेरा फापाच्योक मिक्किता खाला सोचित्तेकी तेरकान्ते मिचेन परमेश्वरला मन परे खिओ। 8 परमेश्वरगी ख्योकोनला जहिलेङ जे कुरोङ खेराङला गोबा भन्दाङ ल्हाक्पा तेरा थुप्क्यो। दोक खाला ख्योकोनला मादाङच्या मोख्योप्च्या सिराते छ्याःङ मायाङला ख्योकोनगी झन झन ज्येनला लेमु खाला ता थुप्क्यो। 9 परमेश्वर बातला “थे मिकी थे खोरोङगी थुपासम्म गाङेला गोकीन बिन्ला दुक। थेकी छ्याःङ मेताते मिओनला गोच्येते बिन्गीन लेमु खाला दुक। थेकी थोक लेमु खाबाते परमेश्वरगी नोमुङ टोक मेज्येदो,” सिन टिबा ओत। 10 थेमे परमेश्वरगीराङ बालीनाली लै खिताला सोन बिन्ला मिओनला साच्या थुङच्येते तेरच्येते ईन। दोक खाला थेकी गोच्येते जति बिन्ला ख्योकोनते जे कुरोङ फेल ज्युत्क्यो। थोक ओङनामेई ख्योकोनगी झन झन ज्येनला मद्धत बिन्ला लेमु खिता थुप्क्यो। 11 परमेश्वरगी ख्योकोनला जे कुरोङ वालछ्येल ओङच्या खाला तेरग्यो। दोक ओङला ख्योकोनगी जहिलेङ ज्येनला तेरासम्म बिन्ला लेमु खिता थुप्क्यो। ख्योकोनगी बिन्दाते थे पैसा था ङ्योकोनगी थेबाला खेरगीन बिन्नामेई दि लाईदु थेबेकी परमेश्वरला धन्यवाद तेरग्यो। 12 ख्योकोनगी बिन्दाते पैसेकी परमेश्वर सन्तानओनते खाँचो टरे खित्च्येतेकामा मेन। दि कामगी खित्सादु मि काल्बेईकी परमेश्वरला आउदी खाला धन्यवाद तेरग्यो। 13 ख्योकोनगी थेबे लाईदु खाबाते दि कामगी खित्सादु ख्योकोनगी ख्रीष्टते गा लाङच्येते बात ङेन्गीन थेरू खि साबा च्योकराङ लेमु खाबाते थोङला थेबेकी परमेश्वरते जय जय खिओ। ख्योकोनगी थेबाला थेमे ज्येनला गोच्येते तेरा थुपासम्म बिन्गीन लेमु खाबे लाईदुङ थेबेकी परमेश्वरते जय जय खिओ। 14 थेमे परमेश्वरगी ख्योकोनला खितासम्म दया खाबा ओताते थोङला थेबेकी ख्योकोनला आउदी खाला सम्झे खिन ख्योकोन लाईदु प्रार्थना खिओ। 15 सुङगीङ खिता मुथुप्च्येते काम खाईन ङुरूङला लेमु खाबे लाईदु परमेश्वरला ङुरूङ धन्यवाद सिइ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.