२ कोरिन्थी 8 - जिरेलपावलगी पैसा जम्मा खिन खि सिन साबाते 1 आज्यो न्वावे, थाचेन ङा ख्योकोनला म्यासिडोनिये लुङबादु ठाउँ ठाउँला जम्मा ओङकान्ते येशू ख्रीष्ट मिओनगी परमेश्वरगी खोपरोङला दया खाबेकी खित्सादु चुक चुक खासुङा सिन सिरामीन। 2 खोपरोङगी आउदी खाईन दुक्पा ङेता ओत्सीनोङ थेमे ज्येनगी तेरासम्म दुक्पा बिन्सीनोङ थेबा आउदी गा खिन देत्सुङ। दोक खाला गा खिन देत्कीन थेबेकी खोपरोङताङ छ्याःङ मेत्सीनोङ दुक्पा ङेताते ज्येनला मद्धत खिताला खोपरोङगी तेरा थुपासम्म बिन्सुङ। 3 दि बात ङाला लेमुराङ खाला छ्या ओत। च्यि सासीन थेबाला थोक खि सिन सुङगीङ कोता मेतान। थेबेकी खोपरोङ खुशीकीराङ खोपरोङगी तेरा थुप्च्या छेतकामा मेन, थे भन्दा खापान खापान ल्हाक्पा बिन्दा ओतान। 4 यरूशलेमदु ओताते परमेश्वर सन्तानओनला मद्धत खिता ङ्योकोनलाङ आउदी सेम लाङगीदुक। ङ्योकोनलाङ थेबाला मद्धत खित्च्येते मौका नाङ सिन बिन्ती खिनकामा थेबेकी थोक खाईन थे पैसा बिन्दा ओतान। 5 थेबेकीनी ङ्योकोनगी विचार खाबा भन्दाङ ल्हाक्पा खासुङ। गाङे भन्दा गोमानी थेबेकी ङेत प्रभु येशूकी खि साबा च्योकराङ खिओ साकीन थोकराङ खिताला स्यूसुङ। थेमे ङ्योकोनगी लापाते बातओनोङ लेमु खाईन ङेन्सुङ। दोक खाईन थेबेकी परमेश्वरगी खित ज्युता चालाते काम खासुङ। 6 थेबेकी थोक खाबा थोङनामेई ङ्योकोनगी तीतसला खेराङगी जम्मा खिताला स्यूबाते पैसा जम्मा खाला सिन्दा खि सिन सिराला ख्योकोन ओत्सापा ग्युक सिन साबाप। ज्येनला मद्धत तेराला सिन ख्योकोन नाङ पैसा जम्मा खिताला शुरू खित्कान्ते थेराङ ईन सिन ङ्योकोनगी सिरा माफाप्तासीन। 7 ज्येनला तासीन जे कुरोङ ख्योकोनगी लेमु खिन दुक। च्यि सासीन ख्योकोन प्रभु येशूला लेमु खाला विश्वास खित्कान्ते मि ईन, ज्येनला परमेश्वर बात लेमु खाला लोप्च्येते सीपताङ शक्ति ङेताते मि थेमे परमेश्वरगी छ्या स्ये ज्युत्च्येते बात लेमु खाला छ्या स्येकान्ते मि ख्योकोन नाङ काल्बेई ओत। ख्योकोन लेमु खित्च्ये छ्य्वापा स्येत खित्कान्ते थेमे ङ्योकोनला आउदी खाला ङिङज्ये खित्कान्ते मिङ ईन। ख्योकोन दोक्ते मि ईन्देकी था ज्येनला मद्धत तेराला सिन पैसा जम्मा खित्च्येते दि लेमुते कामोङ ज्येनगी भन्दा लेमु खाईन खासीन लेमु ओङच्या ओतान। 8 ङे ख्योकोनगी दोकराङ खिता फाप्क्यो सिन कोतातेनी मेन। ज्येनतेबेकी दुक्पा ङेतातेबाला चुक रहर खाईन तेरा चाल्ला दुका सिन साला ख्योकोनगीङ ज्येनला खेकीकामा मेन पक्काराङ ङिङज्ये खित्च्या ईन्दाकाना मेन्दाका सिन छ्या स्येबाला ङे दोक साबाते ईन। 9 ङुरूङ प्रभु येशू ख्रीष्टकी ङुरूङला चुक आउदी दया खासुङा सिरच्येते बातनी ख्योकोनला छ्याराङ ओत। ख्योकोनला थे खोरोङगी तेरच्येते आशी जति गाङे बिन्ला लेमु खितालाराङ थे स्वर्गनेकी थे खोरोङ मान थेमे अधिकार गाङे ताङगीन छ्याःङ मेताते च्योक खाईन देमा वाबाते ईन। 10 था ङा ख्योकोनला सल्लाहज्यीक तेरामीन। च्यि सासीन खेराङगी ननीङमेकी खिताला स्यूबाते थे काम खाईन सिन्दा खासीन लेमु ईन। गाङे भन्दा गोमा दि बात तेन्ला थोक खिताला शुरू खित्कान्ते खेराङराङ ईन। 11 थोगी खेराङगी शुरू खाबाते थे काम थाचेन खाला सिन्दा खि। खेराङगी खिता सेम खाबाते थे काम खेराङगी जति जति तेरा थुप्कीदुक उति उति बिन्ला था पूरो खि। 12 ख्योकोनते तेरच्येते सेम ओत्सुङ सासीन खेराङगी जति तेरा थुप्कीदुक थोस्यिकराङ बिन्सीनोङ परमेश्वरला लेमुराङ लाङगो। खेराङताङ ओतराङ मेतातेका परमेश्वरगी बिन सिनोङ मिसिरो। 13 थेमे थेबाला किम्मु ओङस्यीत ख्योकोनला दुक्पा ओङस्यीत सिन ङे दोक खि साबाते मेन। 14 थरिङोला ख्योकोनताङ गोच्येते भन्दा ल्हाक्पा दुक। दि ल्हाक्पा ओताते थेबाला बिन्सीन ख्योकोनला मादाङच्ये बेलाला थेबाला ल्हाक्पा ओङाते थेबेकी ख्योकोनला तेरग्यो। दोक खासीन ख्योकोन कोईला दाङच्या कोईला मादाङच्या मेङा खाला गाङेला बराबर ओङगो। 15 परमेश्वर बातला “काल्बेई रूक्कान्ते मिला ल्हाक्पा ओङा मेतान थेमे टिक्पीईकामा रूक्कान्तेलाङ घटी ओङा मेतान,” सिन टिला दुक। पावलगी तीतसबे बात खाबाते 16 परमेश्वरगी ङाला च्योकराङ खाईन तीतसलाङ चुक खाला ख्योकोनला लेमु खिता थुबोङा सिरच्येते सेम बिन्दा ओतेकी ङ्योकोन दि लाईदु परमेश्वरला धन्यवाद तेरग्यो। 17 ङ्योकोनगी ग्युक साबेकीकामा मेन, दि पैसे कामला ख्योकोनला मद्धत तेराला दिते आउदी सेम ओतेकी थे खोरोङ खुशीकीराङ गा खिन दि थेपा ओङगीन ओत। 18 थेमे ङ्योकोनगी न्वाज्यीकलाङ तीतसताङ ङ्योम्बु थेपा तोङगीन ओत। दिचेन गा लाङच्येते बात लोपाला मिन चले खाबाते मि ईन सिन ठाउँ ठाउँला जम्मा ओङकान्ते येशू ख्रीष्ट मि गाङेकी बात खिदुक। 19 दोस्यिककामा मेन, ज्येनला मद्धत तेराला सिन जम्मा खाबाते पैसा केलाला ङ्योकोनताङ ङ्योम्बु ड्वाप्ला सिन दिलानी देङपा ठाउँ ठाउँला जम्मा ओङकान्ते येशू ख्रीष्ट मिओनगीराङ छाने खाबाते ईन। ङ्योकोनगी खाबाते दि काम थोङला दुक्पा ङेतातेबाला मद्धत तेरच्येते ङ्योकोनते आउदी सेम ओताक्वा सिन ज्येनगी छ्या स्येक्यो। दि कामगी खित्सादु मिओनगी प्रभु येशू ख्रीष्टला छ्ये जोइओ। 20 ज्येनला मद्धत तेराला सिन दोक काल्बेई पैसा जम्मा खिन ओतेकी दि पैसे कामला सुङगीङ ङेराङला दोष लै खित्च्येते मौका मेङेत्स्यीत सिन ङ्योकोनगी दि काम मेरा काल्बेईकी डिगीन खाबाते ईन। 21 च्यिला सासीन प्रभु येशू ख्रीष्ट दोन्दुकामा मेन्देकी मि दोन्दुङ ङेराङ लेमु काम खित्कान दुका सिन ज्येनगी छ्या स्येस्यीत सिरच्येते ङ्योकोन सेम खिओ। 22 तीतसबाताङराङ ज्येनज्यीक न्वालाङ ङ्योकोन थेपा तोङगीन ओत। दिचेन ज्येनला चुक खाला लेमु खिता थुबोङा सिन आउदी सेम खित्कान्ते मि ईन। दिकी पालोताङ पालो खाबाते काम ताकीन दि थोक्ते मि दुका सिन ङ्योकोनगी छ्या स्येसुङ। ङ्योकोनगी ख्योकोन लेमु मि ईन सिन लाःप्नामेकीनी दि झन गा खिन ख्योकोनला थे काम खाला सिन्दा खित ज्युताला थेपा ओङगीन ओत। 23 तीतसचेन ङात्ताङ ङ्योम्बुराङ डिक्ला ख्योकोन नाङ काम खित्कान्ते मि ईन सिन ख्योकोनला छ्याराङ ओत। दि ज्येनते न्वा ङिबोलाचेन देङपा ठाउँ ठाउँला जम्मा ओङकान्ते येशू ख्रीष्ट मिओनगी खोपरोङ नाङदुई छाने खाईन ताङाते ईन। दिबा ख्रीष्टला मान खिताला काम खित्कान्ते मि ईन। 24 थोगी ख्योकोनगी दिबाला लेमु खि। थोक खासीन ख्योकोनगी ज्येनला ङिङज्ये खित्च्याक्वा थेमे ङ्योकोनगी साबा च्योकराङ ख्योकोन लेमु काम खित्कान्ते मि दुका सिन दिबेकी छ्या स्येक्यो। दोक ओङनामेई दिबेकीकामा मेन, ठाउँ ठाउँला जम्मा ओङकान्ते येशू ख्रीष्ट मि गाङेकी दि बाततेबा छ्या स्येक्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.