२ कोरिन्थी 7 - जिरेल1 थोगी ङिङज्येते आज्यो न्वावे, परमेश्वरगी थोक थोक खिओ सिन साबाते ङुरूङ लाईदुङ ईन्देकी ङुरूङगी काम बात जे खित्जीनोङ थेला मन परे मिक्किच्येते छ्याःङ खिता मेङगो सिन ज्यीबा खिन थेला मान खिता फाप्क्यो। थेमे सेम खुदुक गालाते मि ईन्देकी ङुरूङगी लेमुते कामताङ बातकामा खिन देता फाप्क्यो। पावलगी गा लासुङ सिन साबाते 2 थेमे ख्योकोनगीङ ङ्योकोनला ङिङज्ये खि। ङ्योकोनगी ख्योकोन सुङलाङ छ्याःङ मेलेबा खाबा मेत, मेन्दे बात लाप्कीन ख्योकोन सुङलाङ छक्के खाबा मेत थेमे सुङताङ छ्याःङज्यीक खाङज्यीक लाकीन ठगेङ खाबा मेत। 3 ख्योकोनला मेलेबा सिराला ङे दोक साबाते मेन। थोक ईन्दा ईन्सीन ङ्योकोनगी ख्योकोनला खितासम्म ङिङज्ये खाबा ओत सिन ङा सिरच्याराङ मेतान। ङेराङ सोन्ला देत देतसाक थेमे स्याराङ फाप्सीनोङ ङ्योकोन ख्योकोनला नोमुङ टोक ज्येता मुथुबो। 4 ख्योकोनताङ ङा ङाराङ सेमगी बादोङ खिता थुप्क्यो। ख्योकोन लेमु काम खित्कान्ते मि ईन सिन सम्झे खित्जीन ङाला गा लाङगीदुक। ङेराङगी जस्तो दुक्पा ङेत्सीनोङ ङानी गाकी फिरगीन देत्क्यो। 5 चुक सासीन म्यासिडोनिये लुङबापा ख्योल्नामेकीङ मिओनगी ङ्योकोनला मिगी थोङसार्मु खित्च्येतेताङ दुक्पा तेरच्येते बाई ज्येनतोक छ्याःङ माक्यासुङ। छ्य्वाच्यीकपा ङेराङला थोक दुक्पा ओङगीन ओतान सासीन लोक्ला सेमगी नाङचेन येशू ख्रीष्ट मिओनला च्यि ओङाना, चुक ओताना सिन आउदी ज्यीबा लाबा ओतान। 6 थोक ईन्सीनोङ न्वा तीतस दुरू वानामेईचेन पीरताङ दुक्पाला मिओनला आँट तेरकान्ते परमेश्वरगी ङ्योकोनला सेम ढुक्क लाङसुङ। 7 थे वाबेकीकामा मेन, थेकी खुलाबाते लोन थोनामेई ङ्योकोनला ढुक्क लासुङ। चुक सासीन ख्योकोनगी थेला लेमु खाबेकी थेकी आँट ङेत्सुङलो, ख्योकोनगी ङाला आउदी खाईन ठेता सेम खाला दुक्लो, खेराङगी ङाला गोमाबा थोक मेलेबा खाबाते लेमु मेन्दाक्वा सिन ख्योकोन थरिङोला बात खिदुक्लो थेमे ङा मेलेबा मि ईन सिन सिरकानला ख्योकोनगी पावल थोक्ते मिराङ मेन सिन ङे छ्य्वा खाला बात खिदुक्लो सिन तीतसकी ङ्योकोनला लाःप्सुङ। दि बातओन थोजीन ङाला झन आउदी गा लासुङ। 8 थेमे ङे टिबाते थे चिट्ठी पढे खित्जीन थे बात ख्योकोन सेमला फोक्पा ईन्सीनोङ ङाला ख्योकोनला थोक खिताला ङे च्यिला थे चिट्ठी टिताका सिराच्योक मालाङदुक। टिक्पी दिनगी लाईदुकामा ईन्सीनोङ ङे ख्योकोन सेमला फोक्च्येते थे बात टिबाप सिन सम्झे खित्जीन ङाराङलाङ मेलेबा लासुङ। 9 दोक ईन्सीनोङ थानी ङाला आउदी गा लाबा ओत। ख्योकोनला थोक खाईन दुक्पा बिन्दान सिन गा लाबा ओत साबाते मेन। बरू ङे टिबाते थे बात खेराङ सेमला फोक्नामेई खेराङगी खाबाते काम लेमु मेन्दाक्वा सिन छ्या स्येकीन ख्योकोनगी लोक्ला लेमु काम खिताला स्यूबाते थोङगीनराङ ईन। परमेश्वरगीराङ ख्योकोनला थोक ओङ च्युत्कीन लोक्ला लेमु काम खित च्युतेकी ङे टिबाते थे चिट्ठीकी खित्सादु ख्योकोनला मेलेबा ओङातेचेन मेन। 10 परमेश्वरगी मि सेमला फोक्च्येते काम खित्जीन मिकी दाक्पोनगी मेलेबा काम खाबाते दुका सिन छ्या स्येला लोक्ला लेमु काम खिताला स्यूइओ। थेमे थोक्ते मिकी पापकी सजाय भोगे खिता माफाबो, परमेश्वरगी ङाला च्यिला दोक खाईन सेमला फोक्च्येते काम खासुङा सिराच्योक खिताङ माफाबो। तर परमेश्वरगी थोक खित्जीन लोक्ला लेमु काम खिता साटोला परमेश्वरगी ङाला च्यिला दोक खाईन सेमला फोक्च्येते काम खासुङा सिरा च्योककामा खिन देत्कान्ते मिचेन पापकी सजाय ङेत्ला नरककुण्डमा स्यूइओ। 11 लो विचार खि, परमेश्वरगी ख्योकोन सेमला फोक्च्येते थे काम खानामेई ख्योकोनला थोई लेमु ओङसुङा। च्यि सासीन था ख्योकोनगी ङेत गोमा च्योक खितराङ मिक्किओ सिन खालि लेमु खित्च्ये छ्य्वापाकामा स्येत खिताला स्यूसुङ, खेराङगी ङाला गोमाबा च्यिला थोक मेलेबा खाताका, थोक खाबाते लेमु मेन्दाक्वा सिन छ्या स्येबाला स्यूसुङ, था ङे ख्योकोनला च्यि खिताना चुक सिताना सिन ज्यीबा खिताला स्यूसुङ, ख्योकोन था ङात्ताङ ठेताला आउदी सेम खिताला स्यूसुङ थेमे खेराङ नाङ मेलेबा खित्कान्ते मिला सजाय तेराला टुङ्गो खासुङ। दोक दोक खाईन ख्योकोनगी था खेराङ दोषी मेन सिन तेन्दाला स्यूसुङ। 12 थे चिट्ठी ङे थे मेलेबा काम खित्कान्ते मिला सिन तोके खाईन टिबाते मेन। थेमे थेकी थोक खाबेकी अन्याय सै खिता फाप्कान्ते मि छ्य्वा खाईन टिबातेङ मेन। बरू ख्योकोनगी परमेश्वर दोन्दु ङ्योकोनला खजो ङिङज्ये खाबा ओता ईन्दाका सिन छ्या स्येबा थुप्स्यीत सिनराङ ईन। 13 दोक खाईन ख्योकोनगी याङराङ लेमु खिताला स्यूबा थोङनामेई ङ्योकोनला आउदी गा लाबा ओत। दि बातलाकामा मेन, तीतसला थेपा ओङजीन ख्योकोनगी आउदी लेमु खासुङ थेमे थेला आँट बिन्सुङ सिन थे आउदी खाईन गा खाला दुक। ख्योकोनगी थेला थोक लेमु खाबेकी खित्सादु ङ्योकोनला झन आउदी गा लासुङ। 14 तीतस थेपा ओङा भन्दा गोमा ङे थेला ख्योकोन लेमु मि ईन, ख्योकोनगी थेला आउदी लेमु खिओ सिन साबा ओतान। थे थेपा ओङजीन ख्योकोनगी थेला आउदी लेमु खाबेकी ख्योकोन लेमु मिराङ दुका सिन थेकी छ्या स्येसुङ। थोगी ङे थे दोन्दु छ्याःङ ङोचा खिता माफाप्सुङ। ख्योकोनताङ ङ्योकोनगी मेन्दाते सिराते बातज्यीगोङ माक्या। थोकराङ खाईन ङे तीतसला ख्योकोन चुक्ते मि ईन्दे सिन साबाते बादोङ ढाँर खाबाते मेन्दाक्वा सिन थेकी छ्या स्येसुङ। 15 था दिकी च्यि खिताना, चुक सिताना सिन ज्यीबा खिन ख्योकोनगी थेला डोम्बोला च्योक खाईन लेमु खाबाते थेमे थेकी साबाते ख्योकोन गाङेकी ङेन्दाते बाततेबा सम्झे खित्जीन थेला ख्योकोनते झन झन ङिङज्ये लाङगीदुक्लो। 16 जे खासीनोङ ख्योकोनगी ङे साबाच्योक लेमु खिओ सिन ङाला छ्या ओतेकी ङाला गा लाङगीदुक। |
© 1992 Wycliffe Bible Translators Inc. All rights reserved.
Wycliffe Bible Translators, Inc.