२ कोरिन्थी 6 - जिरेल1 ङेराङ परमेश्वरताङ डिक्ला काम खित्कान ईन्देकी ङ्योकोन ख्योकोनला दोक सिनोङ सिओ। च्यि सासीन ख्रीष्टकी खित्सादु परमेश्वरगी खेराङला दया खाबाते थाराङ खेरो मोन्डोस्यीत सिन ओर्च्ये ख्योकोनगी थेला मन परे खित्च्येते काम खि। 2 परमेश्वर बातला परमेश्वरगी च्यि साबा ओते सासीन “ङाराङगी ख्योकोनला लेमु खिता फाप्च्ये बेलाला ङे ख्योकोन बिन्ती ङेन्गीन लेमु खाबान। ङे ख्योकोनला पापताङ दुक्पादुकी डेला फाप्च्ये बेलाला पापताङ दुक्पादुकीङ टालान,” सिन साबा ओत। ङा ख्योकोनला च्यि सिते सासीन परमेश्वरगी लेमु खित्च्येते थेमे पापताङ दुक्पादुकी डेल्च्येते समय थरिङोलाराङ ईन। जस्तो ओङजीनोङ पावलबेकी काम खिन देताते 3 थेमे ङेराङला परमेश्वरगी जिम्मा बिन्दाते काम खित्जीन फलानेकी दि दि गल्ती खासुङ सिन सुङगीङ सिरा मेङेत्स्यीत सिन ङ्योकोन ज्येनला लेमु मेङच्येते काम छ्याःङ मिक्किओ। 4 बरू ङेत परमेश्वर काम खित्कान ईन्देकी थोक्ते मिकी खिता फापा च्योकराङ खाला काम खिओ। च्यि सासीन जति दुक्पा ओङसीनोङ ङ्योकोन थोक्ते दुक्पा खपे खिन देत्क्यो। ज्येनगी दुक्पा तेरजीनोङ, आपत् विपत् आइ परे खित्जीनोङ थेमे पीर लाङजीनोङ ङ्योकोन सेम मेसेता खाला देत्क्यो। 5 थोकराङ खाला थाराङ मि लाक्पे दुताक सा फाप्सीनोङ, जेलदु देता फाप्सीनोङ, ङेराङ विरोधला हूलदङ्गा खासीनोङ ङ्योकोन खपेराङ खाला देत्क्यो। दोस्यिककामा मेन, ङीन नुप स्याप स्याप खाला काम खिता फाप्सीनोङ, मिक छुम मिक्किता खाला जागोराङ देत्ला नुप स्येन्दा फाप्सीनोङ थेमे त्वाबा तुक्पाराङ देता फाप्सीनोङ दोकराङ खिओ। 6 ङ्योकोन मेलेबा काम सिराते छ्याःङ मिक्किओ। परमेश्वरगी ङ्योकोनला थे खोरोङ बाततेबा लेमु खाईन छ्या स्ये च्युता ओत। ङ्योकोन सेम मेसेता खाला काम खिओ, ज्येनला दया खिओ, परमेश्वर आत्मेकी खि साबाते कामकामा खिओ थेमे खेकीकामा मेन्देकी ङ्योकोन ज्येनला पक्काराङ खाला ङिङज्ये खिओ। 7 परमेश्वर बातला जे साला दुक ङ्योकोन थेकामा लोप्क्यो, ङेराङगी खित्च्येते काम ङ्योकोन परमेश्वर शक्ति छ्य्वापेकी खिओ। लडाइँला डोकान्ते मिते सामे लाक्पाला तरवार थेमे देब्रे लाक्पाला ढाल ओङगो। ङ्योकोन ढालताङ तरवारचेन परमेश्वरगी खि साबा साबाच्योक खाला ङेराङगी खिन ओताते कामराङ ईन। 8 थेमे कोईकी ङ्योकोनला मान खिदुक, कोईकीचेन दिबाङ सु ईन्देरो सिराच्योक खाला छ्याःङ च्योक गने मिक्किदुक। कोईकी फलानाबा लेमु काम खित्कान्ते मि ईन सिन बात खिदुक। ङ्योकोन सत्यते बात लोप्कान्ते ईन। ईन्सीनोङ मिओनगी ङ्योकोनला मेन्दे बात लोप्कान ईन खिदुक। 9 ङ्योकोन दोक्ते मि ईन सिन लेमु खाला छ्या ओत्सीनोङ मिकी ङ्योकोन चुक्ते मि ईन्दे सिन छ्या स्येबा मेता च्योकराङ खिदुक। पालोताङ पालो था नाम स्यिइताना सिराच्योक खाईन देता फाप्सीनोङ ङ्योकोन थोरूमसाक दि धर्ती लाक काम्बा चुला ख्याम्गीनराङ ओत। थेमे ङ्योकोन च्येते खाला ङेराङ काम खिता तोङस्यीत सिन ङ्योकोनला दुकीन सेता चाल्सीनोङ थोरूमसाक स्यापराङचेन मेत। 10 दोक दोक ओङला पीरताङ तापकी नाङ देता फाप्सीनोङ ङ्योकोन सधैँ छ्याःङ पीर मेताते मि च्योक खाला गा खिन देत्क्यो। थेमे ङेराङ लाला साकान्ते च्योक्तेन्दे ओत्सीनोङ ङ्योकोनगी खाबाते कामगी खित्सादु मिओनगी परमेश्वरगी तेरच्येते जति गाङे ङेत्क्यो। लोक्ला ङ्योकोन ङेराङते सिराते छ्याःङ मेताते कङ्गाली च्योकराङ ईन्सीनोङ परमेश्वरगी खित्सादु ङेत्ताङ जेसुकै ओत। 11 कोरिन्थदु ओताते ख्योकोन गाङेला ङ्योकोनगी ङेराङ बात दोक्पोईओङ मोबोङा खाईन गाङे लाप्कीन बिन्दा ओत। ङ्योकोनगी ख्योकोनला खितासम्म ङिङज्ये खाबा ओत। 12 दोक ईन्सीनोङ ङ्योकोनगी ख्योकोनला ङिङज्ये खाबाते मेन सिन ख्योकोनगी चुक खाला सिरा थुप्कीका? बरू ख्योकोनगीका ङ्योकोनला ङिङज्ये माक्याबाते ईन। 13 थोगी आबातेकी फिजाओनला खाबा च्योकराङ खिन ङा च्यि सिते सासीन ङ्योकोनगी ख्योकोनला ङिङज्ये खाबा ओत। ङ्योकोनगी खाबा च्योकराङ खाला ख्योकोनगीङ ङ्योकोनला ङिङज्ये खि। येशूला विश्वास खाबा मेत्कानगी च्योक खिता मेङगो 14 थेमे येशूला विश्वास खाबा मेताते मिओनताङ डिक्ला थेबेकी खिता च्योकराङ माकेत। च्यि परमेश्वरगी खि साबा साबाच्योक खित्च्येतेताङ थेकी माकेत साबाते खित्च्येते दोक्पोईराङ ईनरो? ना मुन्दाकोङ नाम्दाकोङ पालोईला ओङगीते? 15 च्यि ख्रीष्टताङ शैतान डिक्पा थुप्क्योतरो? ना ख्रीष्टला विश्वास खित्कानताङ थेला विश्वास खाबा मेताते मिओनगी खित्च्येते दोक्पोईराङ ईन्दे? 16 परमेश्वर मन्दिर ओङगीन सिन्दाते मिओन ल्हा ल्हन्डीकताङ चुक खाला डिक्पा ओङगीते? ङुरूङनी सोम्बोते परमेश्वर मन्दिर ईन। ङुरूङ थोक्ते मि ईन सिन परमेश्वरगी थे खोरोङ बातला “ङा थेबाताङ ङ्योम्बुराङ देत्क्यो। दोक खाला ङा थेबे परमेश्वर ओङला थेबाला ङाराङ मि ईन सिओ,” साबा ओत। 17 लोक्ला प्रभु परमेश्वरगी “थोगी ङाला माने मिक्किकान्ते मिओनताङ ख्योकोन ङ्योम्बुराङ रूला मादेत। थेबाताङ ठाल्ला थारीला देत। ङाला मन परे मिक्किच्येते काम छ्याःङ माकेत। दोक खाईन ङे साबा च्योकराङ खासीन ङा ख्योकोनला ङाराङ दोन्दु स्योक साला लेमु खिओ। 18 दोक खाला ङा ख्योकोन आबा ओङगो। थेमे ख्योकोनला ङाराङ फुज्युङ फुमु ईन सिन सिओ। दि बात गाङे भन्दा छ्येज्यीक शक्ति ओताते प्रभु परमेश्वरगी साबाते ईन,” सिन साबा ओत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.