२ कोरिन्थी 5 - जिरेलख्रीष्टताङ सधैँभरि देता ङेत्च्येते बात 1 थरिङोले ङुरूङ जीउ ङीमा ङि सुम देताला टाँए खाबाते पाल च्योक्तेकामा ईन। स्यिनामेकी ङुरूङ दाक रूल्ला डुइओ सिन ङुरूङला छ्या ओत। ईन्सीनोङ था तिरी परमेश्वरगी ङुरूङला नोमुङ स्यिला रूल्ला मोन्डोच्येते जीउ तेरग्यो। थे जीउचेन मिकी जोबाते खाम्बा च्योक मेन्देकी नोमुङ माराम्च्येते स्वर्गे खाम्बा च्योक्ते ईन। 2 थोरूमसाक ङुरूङगी परमेश्वरगी तेरच्येते थे जीउ ङेता मेत। थे जीउ नामराङ ङेदोङा सिराच्योक खाईन रकस्यिकोङ सेम ढुक्क मिक्किता खाईन ङुरूङ गुकीन देता ओत। 3 दोक खाला ङुरूङगी था तिरी स्वर्गने देत्च्येते जीउओङ ङेत्क्यो, ङुरूङ जीउ मेता खाला देता माफाबो। 4 थरिङोले दि जीउकी साटोला थे जीउ नामराङ ङेदोङा सिराच्योक खाईन रकस्यिकोङ सेम ढुक्क मिक्किता खाईन ङुरूङ गुकीन देता ओत। दोक खाबाते था नाम स्यिरोङा सिन साबाते मेन, बरू नोमुङ स्यिला रूल्ला मोन्डोच्येते जीउ होत्ता ङेत्सीन ओङच्या ओतान सिन ईन। स्यिला रूल्ला डोच्येते दि जीउकी साटोला होथे जीउ ङेत्ला नोमुङ मिसिन्च्येते जुनी ङेत्स्यीत सिन ईन। 5 ङुरूङला दोक खाला थे नोमुङ स्यिला रूल्ला मोन्डोच्येते जीउ तेरकान्ते परमेश्वरराङ ईन। थोक्ते जीउ तेरग्यो सिन पक्का खिताला थेकी ङुरूङला थे खोरोङ आत्मा बिन्दा ओत। 6 दोक खाला परमेश्वरगी होथोक्ते जीउ तेरच्येते ईन्देकी ङुरूङगी सेम सेता माफाबो। थरिङोले दि जीउ ओत ओतसाक प्रभु येशूताङ सधैँभरि देताराङ मेङेदो सिन ङुरूङला छ्याराङ ओत। 7 प्रभु येशूला ङुरूङगी थरिङोला मिगी थोङा मेत्सीनोङ था तिरी सधैँभरि थेत्ताङ देता ङेत्क्यो सिन ङुरूङ थेला विश्वास खिओ। 8 तिरी सधैँभरि थेत्ताङ देता ङेत्क्यो सिन लेमु खाला छ्या ओतेकी ङ्योकोनलानी थेत्ताङ होथोक खाला देताला बरू होत्ता स्यिसीन ओङच्या ओतान सिराच्योक लाङगीदुक। 9 बात दोक ईन्देकी दि जुनीला ईन्स्यीत, स्यिइन थेत्ताङ देता ङेत्नामेई ईन्स्यीत ङ्योकोन जहिलेङ प्रभु येशूला मन परे खित्च्येते काम खित्च्ये छ्य्वापाकामा स्येत खिओ। 10 च्यिला सासीन ख्रीष्टकी न्याय खिते छोमु छ्ये टेक्टे जोराङ ईन्सीनोङ ङुरूङ गाङेराङ थे दोन्दु ड्वा फाप्क्यो। थेमे थे छोमु थेकी ङुरूङगी दि जुनीला लेमु मेलेबा चुक खाला दुका थे ताला सु सुला च्यि खिता फाप्च्या दुका थोकराङ खिओ। ख्रीष्टकी खित्सादु मि परमेश्वरताङ डिक्पा थुप्च्येते ईन 11 दोक खाला ङीमा लेनज्यीक प्रभु येशू दोन्दु दाक्पोनगी खाबाते लेमु मेलेबा कामगी हर हिसाब तेरा फाप्क्यो सिन छ्या ओतेकी ङेराङ मेलेबा काम मिक्किओ सिन ङ्योकोन मिओनला छ्याःङ शंका मालाङच्या खाला लोप्क्यो। ङ्योकोन चुक्ते ईन्दे सिन परमेश्वरला गाङे छ्या ओत। दि बात ख्योकोनगीङ लेमु खाईन छ्या स्येबाराङ ओतासीन। 12 ङे दोक साबाते ङेराङ आउदी लेमु मि ईन सिराला मेन्देकी ङ्योकोन मेलेबा मि ईन सिरकानला ङ्योकोन थोक्ते मि मेन सिन ख्योकोनगी छ्याःङ ज्यीबा मिक्किता खाला सिरा थुप्स्यीत सिनकामा ईन। ङ्योकोनला थोक सिरकान्ते मिओन ज्येनगी ताजीन आउदी लेमु मि दुका सिराच्योक थोङसीनोङ थेबे सेम लेमु मेत। 13 मिकी साबा च्योकराङ ङ्योकोन ङ्योबाते ईन्सीन परमेश्वरला छ्ये ज्वाप्की लाईदुराङ ङ्योबाते ईन। ङ्योबाते मेन्गीन सरसौंदोते मिकी च्योकराङ खाला काम खिन ओत सासीन ख्योकोनला लेमु ओङस्यीत सिनराङ ईन। 14 ङ्योकोनगी थरिङोला जे खिदुक थे खालि ख्रीष्टकी ङेराङला ङिङज्ये खाबेकी खित्सादु ईन। मि गाङेकी खाबाते पापकी सजाय भोगे खाईन गाङे लाईदु ख्रीष्ट स्याप्ते ईन्देकी मि गाङे थेत्ताङराङ स्याप्ते च्योक ओङा ओत सिन ङ्योकोनगी लेमु खाईन छ्या स्येबा ओत। 15 मि गाङे लाईदु थे स्याप्ते ईन्देकी नोमुङ मिसिन्च्येते जुनी ङेताते मिओनगी था दाक्पोन खुशी खिता मेङगो। बरू थे थोक खाईन खोपरोङ लाईदु स्या ओतान थेमे परमेश्वरगी थेला सोम्बो लोक्पा ओतान सिन टोक मेज्येता खाला थेला मन परे खित्च्येते काम खिता फाप्क्यो। 16 दोक ईन्देकी था ङ्योकोन ज्येन मिकी च्योक खाला दाक्पोनला सु मि चुक्ते ईन सिराच्योक लाङगीका थे थोक्तेराङ ईन सिराच्योक खाला बात मिक्किओ। गोमा गोमाबा ङेङ ख्रीष्टला थेनी दोक्तेताङ थोक्तेका ईन सिन साबा ओतान। थाचेन ङा नोमुङ थोक मिक्किओ। 17 च्यिला सासीन ख्रीष्टताङ जीउज्यीकराङ ओङाते मिचेन साम्बाते जुनी ङेताते मि ईन। थोगी गोमे बात तोरगीन था थे मिकी गोमा च्योक दाक्पोन खुशी मिक्किता खाला परमेश्वरगी खि साबा साबाच्योक खिओ। 18 दि गाङे परमेश्वरगी खित्सादु ओङाते ईन। ख्रीष्टकी खाबाते कामगी खित्सादु थेकी ङुरूङला थे खोरोङताङ डिक्पा खाबा ओत। दोक खाला मिओनला थे खोरोङताङ डिक ज्युत्क्यो सिरच्येते बात ज्येनलाङ लोप सिन थेकी ङ्योकोनला जिम्मा बिन्सुङ। 19 च्यि सासीन ख्रीष्टकी खाबाते कामगी खित्सादु परमेश्वरगी दि सा लुङबे मिओनला थेबेकी खाबाते मेलेबाते कामताङ बातकीते छ्याःङ हर हिसाब मिलिन्दा खाईन थे खोरोङताङ डिक्पा खित्च्येते काम खासुङ। थेमे मिओनला थे खोरोङताङ डिक ज्युत्क्यो सिरच्येते बात ज्येनला लोप्च्येते कामगी जिम्मा थेकी ङ्योकोनला बिन्सुङ। 20 थोगी ङेराङला जिम्मा बिन्दाते काम खिताला ङ्योकोन ख्रीष्टकी ताङाते मि ईन। मिओनला परमेश्वरताङ डिक्च्येते सेम खि सिन बात खित्कान्ते ङ्योकोन ईन्सीनोङ परमेश्वर थे खोरोङगीराङ ङ्योकोन छ्य्वापेकी मि गाङेताङ दि बात खित्च्येते ईन। ख्रीष्टकी छ्य्वापेई ङ्योकोन ख्योकोनला परमेश्वरताङ डिक्च्येते सेम खि सिन सिओ। 21 ख्रीष्टकी खाबाते कामगी खित्सादु ङुरूङला दोषी मेन सिन सिरा थुप्स्यीत सिन ङुरूङ पापकी सजाय जति परमेश्वरगी गाङे पाप सिराते नोमुङ छ्याःङ खाबा मेताते ख्रीष्टला भोगे खित च्युत्सुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.