२ कोरिन्थी 4 - जिरेलमिला स्येत तेरकान्ते परमेश्वरराङ ईन 1 परमेश्वरगी ङ्योकोनला दया खाईन दि जमान बात लोप सिन जिम्मा बिन्दाते ईन्देकी ङ्योकोन सेम मेसेदो। 2 ङ्योकोन ईप्ला छ्याक्ला ज्येनला ठगे खित्च्येते च्योक्ते ङोचा लाङच्येते काम मिक्किओ, मिला छक्के खिताला ईनराङ मेन्दे बात मोलोबो, ङ्योकोननी परमेश्वर बात खुदुक जोला लोप्च्येतेङ मिक्किओ। परमेश्वर दोन्दुराङ काम खाबाच्योक खाला ङ्योकोननी सत्यते बातला जे साला दुक थेकामा लोप्क्यो। थोक ईन्देकी ङ्योकोनगी सत्यते बातकामा लापा ओत सिन मि गाङेकी सिरा थुप्क्यो। 3 ङ्योकोनगी थोक खाईन लापाते गा लाङच्येते बात छ्याःङ खोबा मेत सिन सुइँदेकी खिदुक सासीन थोक्तेबाचेन पापकी सजाय ङेत्ला नरककुण्डमा स्यूक्कान्ते मिराङ ईन। 4 येशूला विश्वास खाबा मेताते होदि मिओनगी ख्रीष्टताङ चुक छ्येज्यीक शक्ति ओते सिन छ्या स्येच्येते गा लाङच्येते बात छ्याःङ मोखोस्यीत सिन दि कलि जुगी गेल्बो शैतानगी थेबाला लेम्बा जोबा ओत। परमेश्वरताङ ख्रीष्टला छ्याःङ फरक मेत, परमेश्वर जस्तो ईन ख्रीष्टोङ थोजोराङ ईन। 5 थेमे ङ्योकोन ज्येनगी ङेराङला आउदी लेमु मि दुका सिरस्यीत सिन दि बात लोप्च्येते मेन। येशू ख्रीष्टराङ छ्ये ईन, थेराङ गाङेते मालिक ईन सिन ङ्योकोन मिओनला लोप्क्यो। थोक ईन्देकी ङ्योकोनचेन थेला मान खिन ख्योकोन काम खित्कान्ते मि च्योकराङ ईन। 6 परमेश्वरगी सा नाम जोजीन “मुन्दाकते ठाउँदु नाम्दाक ओङस्यीत,” सिन साबा ओतान। होथोक सिरकान्ते परमेश्वरगीराङ मुन्दाकते ठाउँदु नाम्दाक ओङ च्युताच्योक खाईन थे खोरोङ सु ईन्दे थेमे थेत्ताङ चुक छ्येज्यीक शक्ति ओते सिन ङुरूङला छ्या स्ये च्युत्सुङ। दि बात ङुरूङगी ख्रीष्टला ताकीन छ्या स्येबाते ईन। 7 परमेश्वरताङ चुक छ्येज्यीक शक्ति ओते सिन छ्या स्येच्येते दि गा लाङच्येते बात लोपाला ङ्योकोनताङ छ्याःङ शक्ति मेत। ङ्योकोननी छ्याक्ला फराक फुरूक डोच्येते सबी नोत च्योककामा ईन। थोगी ङ्योकोनगी खित्च्येते काम ङेराङ शक्तिकी मेन, परमेश्वरगी शक्ति बिन्देकी खिता थुप्च्येते दुका सिन मिओनगी छ्या स्येक्यो। 8 च्यिला सासीन ङेराङगी ङेतासम्म दुक्पा ङेत्सीनोङ ङ्योकोनगी ङेराङ काम खिता ताङा मेत, च्यि खित्च्ये चुक खित्च्ये सिन बेला बेलाला अलमल्ल परे खिता फाप्सीनोङ था ईन्सीन छ्याःङ खिता मुथुबो सिराच्योक खाईन हरेस सोबा मेत, 9 मिकी ङेराङला खेदापानी खासीनोङ परमेश्वर ङ्योकोनताङ नोमुङ ठाला मेत, मिकी ङ्योकोनला दुकीन सेता चाल्सीनोङ थोरूमसाक स्यापचेन मेत। 10 येशूला च्योकराङ मिओनगी ङ्योकोनलाङ सेता छोल्च्येते ईन्देकी ङेराङ नाम स्यिइताना सिन ङ्योकोनला छ्याःङ छ्या मेत। ङ्योकोन सधैँ दुक्पा भोगे खिनराङ देत्क्यो। दोक दुक्पा ओङजीनोङ ङ्योकोन सोन्गीन देता थोङला येशू सोम्बो ओताक्वा सिन मिओनगी छ्या स्येक्यो। 11 ङीमाई स्यिला डोच्येते दि जुनीला दोक दुक्पा ओङसीनोङ येशू मि ईन्देकी दोक खाला नाम स्यिइताना सिराच्योक खाला देत्जीनोङ ङ्योकोन थोरूमसाक सोन्गीन देता ओता थोङला येशू सोम्बो लोगीन ङेताते जुनी ङ्योकोनगीङ ङेता ओताक्वा सिन मिओनगी छ्या स्येक्यो। 12 ङ्योकोनगी ङेराङ नाम स्यिइताना सिराच्योक खाईन दुक्पा भोगे खिन काम खाबेकी खित्सादु ख्योकोनगी नोमुङ मिसिन्च्येते जुनी ङेता ओत। 13 थेमे परमेश्वर बातला “परमेश्वरगी लेमु खिओ सिन ङे थेला विश्वास खाबा ओतेकी ङा ज्येनलाङ थेकी थोकराङ खिओ सिन लोप्क्यो,” सिन टिबा ओत। परमेश्वर बातला टिबा ओताते होदि बात खित्कान्ते मि च्योकराङ ङ्योकोनोङ परमेश्वरला विश्वास खित्कान ईन्देकी मिओनला गा लाङच्येते बात लोप्क्यो। 14 च्यिला सासीन प्रभु येशूला स्यिसादुकी सोम्बो लोक्कान्ते परमेश्वरगी थेला च्योकराङ खाला ङ्योकोनलाङ सोम्बो लोक्ला ख्योकोनताङराङ थे दोन्दु देत ज्युत्क्यो सिन ङ्योकोनला लेमु खाला छ्या ओत। 15 ख्योकोनला लेमु ओङस्यीत सिनराङ ङ्योकोन दोक खाला दुक्पा खपे खिओ। ङ्योकोनगी दोक खिन देत्जीन परमेश्वरगी खोपरोङला चुक दया खित्च्या ईन्दाका सिन झन झन मि काल्बेईकी छ्या स्येला थेते जय जय ओङस्यीत सिन थेला धन्यवाद तेरग्यो। 16 बात दोक दोक ईन्देकी ङ्योकोन नोमुङ सेम मेसेदो। ङेराङ स्येत घटे खिन खोले खोले छ्याःङ खिता मुथुप्च्या डुइन ओत्सीनोङ परमेश्वरगी बिन्दाते नोमुङ मिसिन्च्येते जुनीचेन दोक डुइन मोन्डोओ सिन ङीमे ठाङमा झन झन लेमु खाला छ्या स्येकीदुक। 17 थरिङोला टिक्पी दिन दोक्ते दुक्पा भोगे खिता फाप्सीनोङ दोक खाईन सिन्नामेईनी परमेश्वरगी ङेराङला सधैँभरि लाईदु मान बिन्ला थे खोरोङगी ज्वा चाला च्योकराङ लेमुका जोइओ। होथे बात सम्झे खित्जीन ङ्योकोनलानी थरिङोला टिक्पी दिन ङेराङगी भोगे खिन ओताते होदोक्ते पीरताङ दुक्पा छ्याःङ मेन सिराच्योक लाङगीदुक। 18 थोगी ङ्योकोनचेन थरिङोला ओङगीन ओताते होदोक्ते बातला मेन, था तिरी ओङच्येते होथोक्ते लेमुते बातकी विचारकामा खाला देत्क्यो। च्यिला सासीन थरिङोला ओङगीन ओताते मिकी थोङा थुप्च्येते होदोक्ते पीरताङ दुक्पा ङीमाई गाङे सिन्ला तोरला डुइओ। तर थोरूमसाक सुङगीङ थोङा मेताते तिरी परमेश्वरगी तेरच्येतेचेन नोमुङ सिन्ला तोरला मोन्डोओ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.