२ कोरिन्थी 3 - जिरेल1 थेमे च्यि ख्योकोनला ङेराङ आउदी लेमु मि ईन सिरालाका लोक्ला ङ्योकोनगी ङ्योकोन ज्येनगी च्योक मिक्किओ साबाते ईन्दासीन सिराच्योक लाङगीदुक? ज्येनला च्योकराङ ङ्योकोनलानी ख्योकोनला तेन्दाला दि मि दोक्ते ईन सिन टिकीन बिन्दाते चिट्ठी मोगोओ। ङ्योकोन चुक्ते मि ईन्दे सिन ज्येनला तेन्दाला ख्योकोनगी टिबाते चिट्ठीङ मोगोओ। 2 ङ्योकोनतेनी ङेराङ सेमगी नाङराङ टिबा ओताते थेमे मि गाङेकी ख्योकोनला ताला ङेराङ चुक्ते मि ईन्दाका सिन छ्या स्येच्येते चिट्ठी च्योक्ते ख्योकोनराङ ईन। 3 थेकी साबाच्योक खाईन ङ्योकोनगी ख्योकोन नाङ काम खाबेकी दि चिट्ठीचेन ख्रीष्ट थे खोरोङगीराङ टिबाते ईन सिन मि गाङेकी छ्या स्येला दुक। दि चिट्ठी मसीकी टिबाते मेन, दोई पाटीला टिबातेङ मेन। दिचेन सोम्बोते परमेश्वर आत्मेकी मि सेमगी नाङराङ टिबाते ईन। 4 ख्रीष्टकी छ्य्वापेई ङेराङला काम खिताला खटे खित्कान्ते परमेश्वरराङ ईन सिन लेमु खाला छ्या ओतेकीराङ ङे ख्योकोनला ख्रीष्टकी टिबाते चिट्ठी ईन सिन साबाते ईन। 5 थोगी ङ्योकोनगी खित्च्येते कामताङ बात ङेराङ स्येतताङ बुद्धिकी खाबाते मेन। ङ्योकोनला स्येतताङ बुद्धि तेरकान्तेनी परमेश्वरराङ ईन। 6 थेकीराङ ङ्योकोनला थे खोरोङगी मिओनताङ तिरी खिओ सिन साबाते जमान बात ज्येनला लोप सिन जिम्मा बिन्सुङ। ङ्योकोनगी लोप्च्येते होदि जमान बातचेन थाङबो मोशे पालोला दोई पाटीला टिबाते परमेश्वर नियम च्योक्ते मेन, परमेश्वर आत्मे बात ईन। होथे दोई पाटीला टिबाते नियमला खि साबाच्योक मिक्किकान्ते मिओनचेन पापकी सजाय ङेत्ला स्यिइओ। परमेश्वर आत्मेकीचेन मिओनला नोमुङ मिसिन्च्येते जुनी तेरग्यो। गोमे नियम भन्दा तिरी जमान बात छ्ये ईन 7 दोई पाटीला खोपे खाईन टिबाते होथे नियम पाटीओन परमेश्वरगी थे खोरोङला तेरजीन थेत्ताङ बात खाबेकी परमेश्वर झिलिमिली नाम्दाककी खित्सादु मोशे छ्येत आउदी खाला टल्के खित्च्या गाला ओतान। थेते थोक खाला टल्के खित्च्येते छ्येतकी टाक घटे खाला डुइन ओत्सीनोङ ज्यीबेकी इस्राएलीओनगी मोशे छ्येत ता थुप्कीन मेतान। थेरू साबा च्योकराङ माक्यासीन पापकी सजाय ङेत्ला स्यिइओ सिन टिबा ओताते थे नियम तेरजीननी परमेश्वरते थोक आउदी झिलिमिली मिओनगी थोङा थुपा ओतान सासीन 8 मिओनला नोमुङ मिसिन्च्येते जुनी तेरकान्ते परमेश्वर आत्मा बिन्नामेईनी थेत्ताङ झन चुक छ्येज्यीक शक्ति ओता ईन्दाका सिन लेमु खाला छ्या स्येबा थुप्क्यो। 9 परमेश्वर दोन्दु मि दोषी ईन सिन छ्या स्येच्येते नियम तेरजीननी परमेश्वरते चुक छ्येज्यीक शक्ति ओता ईन्दाका सिन थोङा ओतान सासीन थेकी मिओनला दोषी मेन सिन सानामेई थेत्ताङ चुक छ्येज्यीक शक्ति ओता ईन्दाका सिन झन लेमु खाला छ्या स्येक्यो। 10 होदि बात विचार खित्जीन परमेश्वरगी गोमा बिन्दाते नियम भन्दा मिओनताङ तिरी खिओ सिन साबाते जमान झन छ्ये ईन्देकी जमान बातकी दोन्दु गोमे नियमचेन छ्याःङ मेन्दाच्योक ओङसुङ। 11 च्यिला सासीन मि दोषी ईन सिन टिक्पी दिनगी लाईदुकामा बिन्दाते नियम तेरजीननी थेते थोक झिलिमिली नाम्दाककी खित्सादु परमेश्वरताङ छ्येज्यीक शक्ति ओताक्वा सिन छ्या स्येबा ओतान सासीन थेकी मिओन दोषी मेन सिन सिरच्येते जमान बात ताला थेत्ताङ चुक छ्येज्यीक शक्ति ओता ईन्दाका सिन झन लेमु खाला छ्या स्येक्यो। टिक्पी दिनगी लाईदुकामा बिन्दाते गोमे नियम च्योक मेन्देकी दि जमान बातचेन सधैँभरि लै खित्च्येते नियम च्योकराङ ईन। 12 बात दोक दोक ईन्देकी ङ्योकोन ङेराङगी लोप्च्येते बात छ्याःङ ज्यीबा मिक्किता खाला खिओ। 13 थे खोरोङ छ्येत टल्के खित्च्येते घटे खिन ड्वा बेलाला थोक ओङाते इस्राएलीओनगी मोथोङस्यीत सिन मोशेकी गेकी थे खोरोङ छ्येत उपाच्योक खाला ङ्योकोनगीचेन छ्याःङ खिता माफाबो। 14 थेजीन इस्राएलीओन छ्याःङ मोखोच्या गाला ओतान। थेबा थोरूमोङ थोकराङ ओतेकी मोशेकी टिबाते परमेश्वर नियम पढे खित्जीन थेबेकी छ्याःङ मोखोदुक। ख्रीष्टकी छ्य्वापेईकामा थे बात लेमु खाला खोबा थुप्क्यो। 15 थेबा गोमा च्योकराङ ओतेकी थेबेकीचेन थोरूमसाकोङ मोशेकी टिबाते परमेश्वर नियम पढे खित्जीन छ्याःङ मोखोदुक। 16 प्रभु ख्रीष्ट छ्य्वापा लै खानामेकीचेन थेबेकी थे बात लेमु खाला खोबा थुप्क्यो। 17 प्रभु ख्रीष्टताङ परमेश्वर आत्मा दोक्पोईराङ ईन। सुइँदा मि सेमगी नाङ प्रभु ख्रीष्टकी आत्मा ओत्नामेकी थे मि गोमाका परमेश्वरगी मिओनला बिन्दाते नियम अधीनला देता माफाबो। 18 प्रभु ख्रीष्टकी ङुरूङ सेम खुदुक जोकीन बिन्नामेकी ङुरूङगी सुङताङ छ्याःङ बात बोङा माफाबो। ङुरूङला ताला मिओनगी ख्रीष्टताङ चुक छ्येज्यीक शक्ति ओता ईन्दाका सिन छ्या स्येक्यो। थेकी ङुरूङला थे खोरोङ च्योकराङ लेमु जोइन गाल्नामेई ङुरूङ झन झन प्रभु ख्रीष्ट च्योकराङ लेमु डुइन डुइओ। ङुरूङला दोक खित्कान्ते प्रभु ख्रीष्ट ईन। थेत्ताङ परमेश्वर आत्मा दोक्पोईराङ ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.