२ कोरिन्थी 2 - जिरेल1 थोगी याङराङ ख्योकोन सेमला फोक्च्या खाला थापा ङारा माफाप्स्यीत सिनकामा ङे ख्योकोन ओत्सापा मोन्डोच्ये टुङ्गो खाबाप। 2 ङे ख्योकोन सेमला फोक्च्या खाईन थाप्सीन ङारसीन सुई ङाला मन परे खित्च्येते काम खितेरो? थोक्ते काम खित्कान्ते ख्योकोनकामा ईन। 3 ङाला गा लाङच्येते बात ख्योकोनलाङ गा लाङच्येतेराङ ईन सिन ङाला लेमु खाला छ्या ओतेकी ङाराङ मेङा खाईन ङे थे चिट्ठीकामा टिबाप। ख्योकोनचेन ङाला मन परे खित्च्येते काम खित्कान्ते मि ईन। दि पालो ङा थेपा वाबा ईन्सीन ङाला आउदी दुक्पा लाङच्या ओतान। 4 ख्योकोन पीरताङ तापकी खित्सादु ङाला सेमला आउदी दुक्पा लाबा ओतान। ङे ङुइनकामा थे चिट्ठी टिबाते ईन। ङाला चुक दुक्पा ओताने सिन ख्योकोन सेमला दुक्पा लोङाप सिन ङे थे चिट्ठी टिबाते मेन, बरू ङे ख्योकोनला थोई ङिङज्ये खित्च्या ईन्दाका सिन छ्या स्येस्यीत सिनराङ थोक खाबाते ईन। पावलगी गल्ती खित्कान्ते मिला माफ बिन साबाते 5 थेमे ख्योकोन नाङ ज्येनगी सेमला मोन्डोच्येते काम खित्कान्ते मिकी ङालाकामा मेन, ख्योकोन गाङे सेमला मोन्डोच्येते काम खाबाते ईन। दि ङे ल्हाक्पा बात खाबाते मेन। थेकी थोक खाबेकी ख्योकोन गाङेला मेन्सीनोङ कोई कोईला आउदी मेलेबा लाबा ओतान। 6 थेमे ख्योकोन काल्बा च्योक्तेकी थेला जे सजाय बिन्ला दुक थोस्यिक ठीकराङ ईन, थे भन्दा ल्हाक्पा छ्याःङ खिता मेङगो। 7 बरू थाचेन ख्योकोनगी थेला माफ बिन्ला लेमु खि। थोक खानामेई दिबेकी ङाला थोरूमोङ ङिङज्ये खित्च्याक्वा सिन थेकी आँट ङेत्क्यो। ख्योकोनगी थोक माक्यासीन था ङाला लेमु खित्कान्ते सुङ मेताक्वा सिन पीर खाला थेकी झन सेम सेत्क्यो। 8 थोगी ख्योकोनगी थेला पक्काराङ ङिङज्ये खित्च्याक्वा सिन छ्या स्येस्यीत सिन ओर्च्ये ख्योकोनगी थेला ङिङज्ये खि। 9 ङे साबाते गाङे पक्काराङ ङेन्च्या ईन्दाकाना मेन्दाका सिन ख्योकोन सेम तापलाङ ङे थे चिट्ठी टिबा ओतान। 10 ख्योकोनगी सुइँदाला माफ बिन्सीन थेला ङाङ माफ तेरग्यो। ङे सुइँदाला माफ तेरा फाप्सीन ख्योकोनला लेमु ओङस्यीत सिन खेकीकामा मेन, ख्रीष्टकी दोन्दुराङ थेला माफ तेरगीन ओताच्योक खाला ङा थे मि गल्ती नोमुङ सम्झे मिक्किच्या खाला माफ तेरग्यो। 11 शैतानगी ङुरूङ नाङ खिता चालाते काम छ्याःङ खिता मेङेत्स्यीत सिनराङ ङुरूङगी दोक खाला माफ तेरा फाप्क्यो। थेकी चुक च्याङबो खाला काम खिते सिन ङुरूङला छ्याराङ ओत। पावलगी त्रोआसदु ओङाते बात खाबाते 12 ङा ख्रीष्टते गा लाङच्येते बात लोपाला त्रोआस सारदु लेप्नामेकी प्रभु ख्रीष्टकीराङ ङाला थेरूङ थे बात लोप्च्येते आउदी लेमुज्यीक मौका बिन्सुङ। 13 ईन्सीनोङ ङे न्वा तीतसला थेरू माठेतेकी ङाला सेमला बान्दा सन्तो मालासुङ। थोगी थेरू मिओनला ड्वामीन सिन थेबाताङ ठाल्गीन ङा म्यासिडोनियापा गालाप। पावलगी खोपरोङ चुक्ते मि ईन्दे सिन साबाते 14 थेमे परमेश्वरला ङ्योकोन धन्यवाद तेरग्यो। ख्रीष्टताङ जीउज्यीकराङ ओङा ओतेकी ङेराङ जहाँदु गाल्सीनोङ परमेश्वरगी सधैँ ङ्योकोनला ख्रीष्ट च्योकराङ शत्रुला ग्याल्कान्ते ईन सिन तेन्ला तेरगीदुक। थेमे धूप पारनामेकी थे बास्ना फैले खाबा च्योकराङ खाला ङ्योकोन छ्य्वापेकी ख्रीष्ट सु ईन्दे, थेकी च्यि खिते सिरच्येते बात गाङेपा फैले खित ज्युत्कीदुक। 15 परमेश्वरते जय जय ओङस्यीत सिन ङ्योकोनगी लोप्च्येते ख्रीष्टकी बात धूपकी बास्ना फैले खिता च्योकराङ खाला मिओन नाङ फैले खिन ओत। दोक खाला ख्रीष्टकी पापदुकी डेल्गीन ओताते मि ईन्स्यीत, नरककुण्डमा स्यूक्कान्ते मि ईन्स्यीत मि गाङेकी ङ्योकोनगी लोप्कीन ओताते बात थोकीन ओत। 16 ङ्योकोनगी लोप्कीन ओताते बात माङेन्ला नरककुण्डमा स्यूक्कान्ते मिओन लाईदु दि बात मि स्यिच्येते थुक च्योकराङ ईन सासीन दि बात ङेन्ला ख्रीष्टकी पापदुकी डेल्गीन ओताते मिओन लाईदुचेन नोमुङ मिसिन्च्येते जुनी ङेत्च्येते बात ईन। दाक्पोनगीराङ दोक छ्येते बातकी जिम्मा लाला काम खिता थुप्कान्ते मि सु ओतेरो? 17 ईन्सीनोङ मि काल्बेईकी खोपरोङ फाइदे लाईदु खाबाच्योक खाला ङ्योकोननी ङेराङ फाइदे लाईदु परमेश्वर बात मोलोबो। बरू ख्रीष्टताङ जीउज्यीकराङ ओङा ओतेकी परमेश्वर दोन्दुराङ दि काम खिन ओत सिराच्योक खाला सेमदु छ्याःङ पापताङ लोभ मोज्योबा खाला ङ्योकोनचेन परमेश्वरगी ङेराङला जिम्मा बिन्दाते काम खिओ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.