२ कोरिन्थी 13 - जिरेलकोरिन्थदु येशू ख्रीष्ट मिओनला पावलगी सल्लाह बिन्दाते 1 दि बाजिताङनी ङा थेपा वाबाते पालो सुम छाङगो। थेपा वाला ङा परमेश्वर बातला साबा च्योकराङ खाला कम्तीतेङ मेरा ङि सुम मिकी दिकी दोक खाबाते ङेराङ थोङाते ईन सिन सानामेईकामा सु सु दोषी ईन्दाका सिन डेल्ग्यो। 2 ईन्दानी पालो ङिकी बाजिला थेपा गाला ओत्जीनोङ ङे पाप खाबा ओत्कानलाङ ज्येनलाङ गाङेला च्यि च्यि खिसे, चुक खिता मेङते सिन सम्झे खाईन बिन्दा ओतान। था दि पालोला ङा थेपा ओङजीनोङ सुइँदा ङे बात माङेन्गीन गोमा च्योकराङ खिन ओता थेप्सुङ सासीन थोक्तेलाचेन ङा लेमु मिक्किओ सिन थाल्ला ङाराङ थारीला ओते बेलालाराङ सिओ। 3 ख्योकोनगी ङे थाराङ बात खित्च्या ईन्दाकाना ख्रीष्टकी खित च्युताते बात खित्च्या ईन्दाका सिन था थेजीनराङ लेमु खाला छ्या स्येक्यो। ङे थोक खित्जीन ख्रीष्ट छ्याःङ खिता मुथुप्कान्ते मेन्दाक्वा बरू थेत्ताङ छ्येज्यीक शक्ति ओताक्वा सिनोङ ख्योकोनगी छ्या स्येक्यो। 4 ईन्दानी मिओनगी स्यिङगी थामला टाँए खाला सेत्जीन थे छ्याःङ खिता मुथुप्कान्ते च्योकराङ थोङा ओतान। थोक ईन्सीनोङ परमेश्वरगी थे खोरोङ शक्तिकी थेला सोम्बो लोक्पेकी थे सोम्बोराङ ओत। ख्रीष्टताङ जीउज्यीकराङ ओङाते मि ङ्योकोनलाङ मिओनगी छ्याःङ खिता मुथुप्कान्ते च्योकराङ थोङगो। ईन्सीनोङ ङ्योकोनगी ख्योकोन नाङ खित्च्येते गाङे काम ख्रीष्टताङ जीउज्यीकराङ ओङगीन परमेश्वर शक्ति छ्य्वापेकी खित्च्येते ईन। 5 था ङा च्यि सिते सासीन ख्योकोनगी खेराङ येशू ख्रीष्टला विश्वास खिनराङ ओताना मेते सिन विचार खाला तो। खेराङ सेमगी नाङ येशू ख्रीष्ट देता ओत सिन ख्योकोनला छ्याराङ ओत, मेनरो? खेराङगी थेला विश्वास खिता ताङसीनकामा थे ख्योकोन सेमगी नाङ मेदेदो। 6 ङ्योकोन पक्काराङ येशू ख्रीष्टकी खटे खाबाते मि ईन सिन ख्योकोनगी लेमु खाईन छ्या स्येबा ओत सिरच्येते ङेते आश ओत। 7 ख्योकोनगी मेलेबा काम छ्याःङ मिक्किस्यीत सिन ङ्योकोन परमेश्वरला प्रार्थना खिओ। ख्योकोनगी लेमु काम खासीन मिओनगी ङेराङला येशू ख्रीष्टकी खटे खाबाते मि मेन सासीनोङ ङेल्ला छ्याःङ मेत। ङ्योकोन लाईदु छ्येते बात मिकी ङेराङला लेमु मि ईन सिरस्यीत सिरच्येते मेन, बरू ख्योकोनगी लेमु काम खित्स्यीत सिरच्येतेराङ ईन। 8 ङ्योकोनगी सत्यते बातताङ मिडिक्च्येते छ्याःङ खिता मुथुबो, खालि सत्यते बातताङ डिक्च्येते कामकामा खिता थुप्क्यो। 9 थेमे ङेराङ छ्याःङ खिता मुथुप्कान्ते च्योक थोङसीनोङ ख्योकोन लेमु खित्कान ओङसीन ङ्योकोनला गा लाङगो। परमेश्वरगी ज्वा चाला च्योकराङ ख्योकोन लेमु मि ओङस्यीत सिनोङ ङ्योकोन प्रार्थना खिओ। 10 था ङे थेपा वानामेई ङाराङताङ खजो अधिकार ओते सिराच्योक मिक्किता खाला ख्योकोनताङ खा छ्येत लेमुकी बात खिता ङेत्स्यीत सिन ङे थारीला ओते बेलालाराङ दि बाततेबा टिबाते ईन। च्यिला सासीन प्रभु ख्रीष्टकी ङाला बिन्दाते अधिकार ख्योकोनला ङ्ये ज्युताला मेन, बरू ख्योकोनला लेमु ओङस्यीत सिन लाःप्ला कोत्ला तेराला बिन्दाते ईन। पावलगी चिट्ठी टिला सिन्दे खाला साबाते बात 11 लो आज्यो न्वावे, था ज्येन बातका च्यि सिरच्ये, ख्योकोनगी परमेश्वरगी खेराङला ज्वा चाला च्योकराङ लेमु मि ओङस्यीत सिन थोक्ते मि ओङच्ये छ्य्वापा स्येत खि। ङे लाःपा कोताते ङेन्ला था चुक खिता फाप्कीका थोककामा खि, ख्योकोन गाङेराङ सेमज्यीकराङ खाला डिक्ला थुन्ला देत। थोक खासीन गाङेला ङिङज्ये खित्कान्ते थेमे डिक्ला थुन्ला देत ज्युत्कान्ते परमेश्वर ख्योकोनताङ ङ्योम्बुराङ देत्क्यो। 12 ठेत्जीन ख्योकोनगी दोक्पोईकी ज्येनज्यीकला मान खिन नमस्ते खि। 13 दुरू ओताते परमेश्वर सन्तान गाङेते ख्योकोनला नमस्ते ओत्लो। 14 लो प्रभु येशू ख्रीष्टकी ख्योकोनला दया खिनराङ देत्स्यीत, परमेश्वरगी ख्योकोनला ङिङज्ये खिन देत्स्यीत थेमे परमेश्वर आत्मा ख्योकोन गाङेताङ ङ्योम्बुराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.