२ कोरिन्थी 12 - जिरेलपावलगी थे खोरोङला ओङाते बात खाबाते 1 ईन्दाका ङा दोक्ते मि ईन, ङे दोक खाबाप सिन छ्ये खाला छ्याःङ फाइदा मेत। ईन्सीनोङ था ङा ख्योकोनला प्रभु ख्रीष्टकी मिलाम खित ज्युताच्योक खाईन खो च्युताते थेमे छ्या स्ये च्युताते बातओन खितामीन। 2 च्यि सासीन लो च्युप्स्यी गोमे बात ईन। ख्रीष्टला विश्वास खित्कान्ते मिज्यीकला ङा लेमु खाला छ्या स्येक्यो। थे मिला टेप तुकीन स्वर्गने परमेश्वर देत्सासाकराङ खेरसुङ। ईन्दाका थेलाराङ थेने खेराते ईन्दा ना ठामासोमुला मिलाम खित ज्युताच्योक खाईन थेने खेराते ईन्दा ङाला छ्याःङ छ्या मेत। दि बात परमेश्वरलाकामा छ्या ओत। 3 थे मिला स्वर्गने परमेश्वर देत्सासाकराङ खेरा ओतान सिन ङाला लेमु खाला छ्या ओत। थेलाराङ थेने खेराते ईन्दा ना ठामासोमुला मिलाम खित ज्युताच्योक खाईन खेराते ईन्दा ङाला छ्याःङ छ्या मेत। दि बात परमेश्वरलाकामा छ्या ओत। 4 थेने खेरनामेई थेकी मिकी साला सिराराङ मुथुप्च्या आउदी अचम्बतेन्दे बात थोसुङ। थोक्ते बात मिओनगी खिताराङ मेङेदो। 5 थे मिकी स्वर्गने च्यि च्यि थोङसुङा, चुक्तेन्दे बात थोसुङा सिन बात खिन छ्ये खिता थुप्क्यो। तर ङा ङाराङगी थोङातेताङ थोबाते थोक्ते बात खाला छ्ये मिक्किओ। ङाराङ छ्ये खिता फाप्सीन ङानी ङाराङ चुक छ्याःङ खिता मुथुप्कान्ते ईन्दे सिरच्येते बातकामा खिओ। 6 ङे छ्ये खिता चाल्सुङ सासीन स्वर्गने ङाराङगी थोङाते थेमे थोबाते बात खाला ङा छ्ये खिता थुप्क्यो। दि साँचोते बात ईन्देकी सुङगीङ ङाला थेकी लेम्बे बात खासुङ सिरा मुथुबो। ईन्सीनोङ मिओनगी ङा चुक खिका थेमे ङे च्यि बात लोप्कीका थेकामा छ्या स्येस्यीत सिन ङाराङगी थोङाते थेमे थोबाते होथे बात था ङा मिक्किओ। 7 ङाराङला छ्या स्ये च्युताते होथे अचम्बते बातओन खाला ङा छ्ये मिक्किस्यीत सिन परमेश्वरगी ङाला सुकज्यीक देक च्युत्सुङ। ङा छ्ये मिक्किस्यीत सिन थेकी शैतान दूतज्यीकला ङाला दोक खाला सुक लोङ च्युत्सुङ। 8 दि सुक ठाक्पा खाला नाङ सिन ङे बाजि सुमसाक प्रभु येशूला प्रार्थना खाबाप। 9 दोक खित्जीन थेकी ङाला “ङे खोल्ला आउदी खाईन दया खाबा ओत। दि भन्दा ल्हाक्पा था खोल्ला छ्याःङ मोगोओ। खोरोङगी छ्याःङ खिता मुथुप्जीनराङ खुई ङेताते ङे शक्ति चुक छ्ये ईन्दाका सिन खुई छ्या स्येक्यो,” सिन सिदुक। थोगी ङाराङगी छ्याःङ खिता मुथुप्जीन ङानी गाका खिओ। च्यिला सासीन थोक्ते बेलालाराङ ख्रीष्टकी ङाराङला थे खोरोङ शक्ति बिन्दा ओत सिन ङे छ्या स्येकीदुक। 10 थोगी ङाराङगी छ्याःङ खिता मुथुप्जीन ईन्स्यीत, ज्येनगी ङाराङला इज्जत बेइज्जत खित्जीन ईन्स्यीत, दुक्पा ङेत्जीन ईन्स्यीत, मिओनगी ङाराङला खेदापानी खित्जीन ईन्स्यीत थेमे आपत् विपत्ला फाप्जीन ईन्स्यीत ख्रीष्टकी मि ईन्देकी ङानी सधैँ गा खिन देता थुप्क्यो। दोक खाला ङाराङगी छ्याःङ खिता मुथुपे बेलालाराङ ख्रीष्टकी शक्ति ङेता ओतेकी ङे जेङ खिता थुप्कीदुक। कोरिन्थदु येशू ख्रीष्ट मिओन लाईदु पावलगी पीर खाबाते बात 11 ङे छ्याःङ बुद्धि मेताते लेम्बाते मिकी च्योक खाईन ङा दोक्ते मि ईन, ङे दोक खिता थुप्क्यो सिन छ्ये खिन बात खाबाप। ङाला दोक खित ज्युत्कान्ते ख्योकोनराङ ईन। ख्योकोनगीका थे दोक्ते मि ईन, थेकी दोक दोक खिओ सिन ङे बात खिता फाप्च्येते ईन। ईन्दाका ङाला छ्ये ज्वा फाप्च्येते ङा सुङ मेन। ईन्सीनोङ खेराङगी येशू ख्रीष्टकी खटे खाबाते मि नाङ खापान खापान छ्ये ईन सिराच्योक ठाने खाबाते मिओन भन्दा ङा छ्याःङ कुरोलाङ कम्ती मेत। 12 ङे ख्योकोनताङ ओत्जीन जस्तो दुक्पा ओङजीनोङ नोमुङ ङाराङ काम खिता माताङ। थेमे ङे खाईन तेन्दाते छ्ये छ्येताङ अचम्बतेन्दे काम थोङगीन ङा येशू ख्रीष्टकी खटे खाबाते मि ईन सिन ख्योकोनगी छ्या स्येबा ओतान। 13 च्यि ङे ख्योकोनला ज्येन ज्येन ठाउँकी येशू ख्रीष्ट मिओनला भन्दा खुदुकराङ खासुङ साबाप? ईन, कामज्यीकचेन ङे खुदुकराङ खाबा ओतान। च्यि सासीन ङे ख्योकोनताङ छ्याःङज्यीक खाङज्यीगोङ नाङ मासा। ङे थोक माक्यासुङ सिन ङात्ताङ स्येदाङ माकेत। 14 थेमे ङा याङराङ ख्योकोन ओत्सापा ओङाला ठीक खाबा ओत। दि बाजिताङनी ङा थेपा वाबाते पालो सुम छाङगो। जेराङ ईन्सीनोङ गोमाबा च्योकराङ दि पालोलाङ ङा ख्योकोनताङ छ्याःङज्यीक खाङज्यीक नाङ मिसिरो। ङाला ख्योकोन सम्पत्ति चिमाईओङ गोबा मेत। ख्योकोनगी ङाला ङिङज्ये खासीन दाक दाङगो। दि बाई ङाला छ्याःङ मोगोओ। ईन्दाबोङ फिजाओनगी आबा आमातेबे स्याहार सुसार खित्च्येते मेन, आबा आमातेबेकीका फुज्युङ फुमुतेबाला च्यि च्यि गोकीका बिन्ला स्याहार सुसार खिओ। 15 थोक ईन्देकी ख्योकोनला लेमु ओङस्यीत सिन ङाङ स्याप स्याप खाला दुक्पा खाला खाला काम खिओ। ङानी ख्योकोन लाईदु ङाराङ ज्यानराङ तेरा फाप्सीनोङ नाइँ मिसिरो। ङे ख्योकोनला दोक आउदी ङिङज्ये खानामेई च्यि ख्योकोनगी ङालाङ थोजोराङ ङिङज्ये खिता माफाबो? 16 ङे ख्योकोनला छ्याःङ नाङ साबा मेत सिन ख्योकोनला लेमुराङ खाला छ्या ओत। थोक ईन्सीनोङ ङे ख्योकोनला फार्रा फुर्रा जोकीन ङाराङ छ्य्वापा लै खित च्युत्सुङ सिन सिरकानोङ ओत्कीन ओत। 17 च्यि ङे ख्योकोन ओत्सापा ताङाते मिओनला ख्योकोनताङ दि दि नाङ खाला खोरच्योक साकीन ख्योकोन सुइँदाताङ खइँदा नाङ खाबा ओतान? 18 ङे तीतसला ख्योकोन ओत्सापा मागालाला मेङगो सिन थेपा ताङाप। होथे ज्येनते न्वाज्यीकलाङ ङे थेत्ताङ ङ्योम्बुराङ ताङा ओतान। च्यि तीतसकी ख्योकोनताङ खइँदा नाङ खाबा ओतान ओना? तीतस ङाराङ च्योक्तेराङ ईन सिन ङाला लेमु खाला छ्या ओत। ङ्योकोन खुदुक खुदुकते काम मिक्किओ। 19 ङिङज्येते आज्यो न्वावे, ङे थाल्लासाक खाबाते दि गाङे बात ङेराङ आउदी लेमु मि ईन सिराला खाबासीन सिन सितासीन मेन? ख्रीष्टताङ जीउज्यीकराङ ओङाते मि ईन्देकी ङ्योकोननी परमेश्वर दोन्दुराङ बात खाबाच्योक खाला बात खिओ। ख्योकोन झन लेमु खाला येशू ख्रीष्टकी खि साबा साबा खित्कान ओङस्यीत सिन दि गाङे बात खाबाते ईन। 20 था ङा थेपा ओङजीन ङे साबा ओताच्योक मेन्देकी ख्योकोनगी खुदुकराङ काम खिन ओताते थोङा फाप्कीता सिन ङाला पीर लाबा ओत। थोकराङ खाला ख्योकोनगीङ ङाला खुदुकराङ गालाते च्योक थोङगीता सिनोङ ङाला पीर लाबा ओत। च्यि सासीन थोरूमोङ ख्योकोन थोम्मु जीङगा खिन ओताते, मिला डार खिन ओताते, मित्ताङ स्येदाङ खित्च्येते, ज्येनगी वास्ता मिक्किता खाला दाक्पोन फाइदाकामा ताच्येते, मिला मोत्च्येते, मि पनी खित्च्येते, ङा ङाराङ ईन सिराच्योक खित्च्येते थेमे गाङेराङ डिक्ला थुन्ला काम खिता साटोला आफूराङस्ये खाला ख्याम्गीन ओताते थेप्कीता सिन ङाला सुर्ता लाबा ओत। 21 दि पालो ङा थेपा ओङजीन ख्योकोन थोरूमोङ होदोक दोकराङ खिन ओता थेप्सीन ङे माने खिन ओताते परमेश्वरगी ख्योकोनगी खित्सादु ङाला ङोचा लोङगीता सिन ज्यीबा लाबा ओत। दोस्यिककामा मेन, ख्योकोन नाङ गोमाबा रन्डीबाजी थेमे होदि च्योक्ते खिता मेङच्येते ज्येनोङ ङोचा लाङच्येते काम खित्कान्ते मिओनगी खोपरोङगी थोक खाबाते लेमु मेन्दाक्वा सिन थोक खिता ताङा मेत्सीन थोक्ते मिओन लाईदु ङे ङुइनकामा पीर खिता फाप्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.