२ कोरिन्थी 11 - जिरेलपावलगी ज्येनला छक्के खित्कान्ते मि बात खाबाते 1 था ङा ख्योकोनला लेम्बा च्योक खाला बात खितामीन। ङे दोक खाईन बात खासीनोङ ओर्च्ये ख्योकोनगी दि बातओन ङेन। ख्योकोनगी दोक्ते बात ङेन्गीन ओत सिन ङाला छ्या ओत। 2 ख्योकोनला लेमु ओङस्यीत सिन परमेश्वरगी सधैँ तेइन देता च्योकराङ ङाङ ख्योकोनला चुक खासीन लेमु ओङगीका सिरच्ये छ्य्वापाकामा सेम खिओ। चुक सासीन थे मोरोङगी ङा खोत्ताङ फाङमा खिओ सिन साबाते मित्ताङ फाङमा खिता छोमुसाक थे फेम्मे फिजा कर्ने देताच्योक खाला ख्योकोनोङ ख्रीष्टताङकामा डिक्ला देत्स्यीत सिरच्येते ङेते आउदी सेम ओत। 3 थाङबो रूलगी हव्वाला आउदी च्याङबो खाईन छक्के खाबा च्योकराङ खाला सुइँदेकी ख्योकोनलाङ छक्के खाला ख्रीष्टकी साबाते ङेन्ला थेत्ताङकामा डिक्ला देत्से छ्य्वापेकी डेल्गीता सिन ङाला आउदी ज्यीबाङ लाङगीदुक। 4 च्यिला सासीन सुइँदेकी वाकीन ङ्योकोनगी लापाते च्योक्ते मेन्देकी ज्येनज्यीकराङ येशू बात लाप्सीनोङ ख्योकोनगी थे आउदी लेमु खाला ङेन्च्याक्वा। थेमे थेबेकी खेराङला ङेता फाप्क्यो साबाते आत्मा ख्योकोन ङेता छोल्च्याक्वा। थे आत्माचेन ख्योकोनगी ङेता ओताते परमेश्वर आत्मा मेन। थोकराङ खाला ङ्योकोनगी ख्योकोनला लाप्कीन बिन्दा ओताते च्योक्ते मेन्देकी खुदुकज्यीकराङ गा लाङच्येते बात लाप्सीन ख्योकोनगी होथोक्ते बातराङ ङेन्च्याक्वा। 5 ख्योकोनला होथोक्ते बात लोप्कान्ते खेराङगी येशू ख्रीष्टकी खटे खाबाते मि नाङ खापान खापान छ्ये ईन सिराच्योक ठाने खाबाते मिओन भन्दा ङा छ्याःङ कुरोलाङ कम्ती मेत। 6 ईन ईन, ङे ङेन्गीन देत्की सिराच्योक खाला बात खिता मेस्येतासीन। ईन्सीनोङ परमेश्वरगी छ्या स्ये ज्युत्च्येते बात ङाला लेमु खाला छ्या ओत। ङा थे बात लेमु खाला छ्या ओताते मि ईन सिन ङे ख्योकोनला गाङे बात लेमु खाईन लाप्कीन बिन्दा ओताते बातकी छ्य्वापेकीङ छ्या स्येक्यो। 7 थेमे ख्योकोनला लेमु ओङस्यीत सिन ङे छ्याःङ छ्ये मिक्किता खाईन काम खाबाप। दोक खिन ख्योकोनला छ्याःङज्यीक खाङज्यीक मिलिन्दा खाईन परमेश्वरते गा लाङच्येते बात लाप्कीन बिन्दाते च्यि ङे मेलेबा काम खाबाते ईनरो? 8 ख्योकोन नाङ दि बात लोप्जीन ङाराङला गोच्येते ङाला ज्येन ज्येन ठाउँकी येशू ख्रीष्ट मिओनगी बिन्दा ओतान। सिइराङ सासीन ङे थेबाताङ थोक खाईन पैसा लाबाते थेबाला लुटे खाबा छेतराङ ईन। 9 ख्योकोनताङ ङ्योम्बु देत्जीन ङाराङला मादाङजीनोङ ङे सुङताङ छ्याःङ नाङ मासा। ङाला खाँचो परे खाबे बेलाला म्यासिडोनियादुकी ओङकान्ते आज्यो न्वाओनगी पैसा खुलाकीन बिन्दा ओतान। दोक खाईन ङे ख्योकोनला गोमाबाङ छ्याःङज्यीक खाङज्यीक दुक्पा माबिन, थाङ नोमुङ थोक मिक्किओ। 10 ख्रीष्टकी च्योकराङ ङा सत्यते बातकामा खिओ। ङे ख्योकोन सुङताङ छ्याःङज्यीक खाङज्यीक लाबा मेत, थाङ नोमुङ छ्याःङ मिलिनो। दि बातलाचेन ङा छ्येराङ खिओ। अखैये लुङबादु ओताते मि सुङगीङ खुई थोक सिरा मेङेदो सिन सिरा मुथुबो। 11 च्यि ङे ख्योकोनला ङिङज्ये मिक्किच्येते ईन्देकीका ख्योकोनताङ छ्याःङ मालाबाते ईन्दासीन साबाप? ङे ख्योकोनला थोई ङिङज्ये खिते सिन परमेश्वरलाराङ छ्या ओत। 12 ङा थाङ थरिङसाक खाबा च्योकराङ खिन देत्क्यो। ङे ख्योकोनताङ पैसा लासुङ सासीन होथे येशू ख्रीष्टकी खटे खाबाते मि नाङ खापान खापान छ्ये ईन सिरकान्ते मिओनगी ङ्योकोनोङ पावल च्योकराङ ईन सिन सिओ। थेबेकी खोपरोङला ङ्योकोन च्योकराङ ईन सिन सिरा मेङेत्स्यीत सिन ङा ख्योकोनताङ छ्याःङ मिलिनो। 13 होथेबानी ख्रीष्टकी खटे खाबाते मि ईनराङ मेन। थेबा मिला छक्के खाला ठगे खित्कान्तेबा ईन। थेबानी ख्रीष्टकी खटे खाबाते मिकी च्योक खित्जुम खित्कान्तेबाकामा ईन। 14 ईन्दाका दि छ्याःङ अचम्बते बात मेन। शैतानोङ नाम्दाककी झिलिमिली गालाते परमेश्वर दूत च्योकराङ ओङा थुप्क्यो। 15 थेमे शैतानगी खि साबाते काम खित्कान्ते मिओन परमेश्वरगी खि साबाते खित्कान्ते मि च्योकराङ ओङाते च्यि अचम्बे बात ओङसुङारो? परमेश्वरगी था तिरी थेबे काम ताला सजाय तेरग्यो। पावलगी थे खोरोङगी भोगे खाबाते दुक्पे बात खाबाते 16 थेमे दि बात ङा याङराङ सिरामीन। च्यि सासीन ख्योकोन सुङगीङ ङाला थेकी चुकस्यिक लेम्बे बात खासुङा सिराच्योक माकेत। ख्योकोन थोक खिओतराङ सासीनका ङा होथोक्ते मिकी च्योकराङ खाला बात खितामीनना ओना। थेमे ज्येन च्योकराङ ङाङ ङा दोक्ते मि ईन, ङे दोक खिता थुप्क्यो सिन बात खितामीन। 17 ईन्दाका दोक्ते बात खि सिन प्रभु येशू ख्रीष्टकी ङाला कोताते मेन। छ्याःङ बुद्धि मेताते लेम्बाते मिकीकामा ङा दोक्ते ईन, थोक्ते ईन साला छ्ये खिओ। 18 मि काल्बेईकी ङा दोक्ते ईन, ङे दोक खिता थुप्क्यो सिन छ्ये खिन बात खाबा च्योकराङ ङाङ खितामीन। 19 ख्योकोन आउदी बुद्धि ओताते मि ईन। थोगी ङा दोक्ते ईन, ङे दोक खिता थुप्क्यो सिन छ्ये खित्कान्ते मि ख्योकोनला लेमु लाङगो मेन? 20 च्यि सासीन खेराङला योक्पो योङमु जोबाते ख्योकोनला लेमु लाङच्याक्वा। खेराङते ओताते जति नाङ खाईन खाम्बा तोङबा जोसीनोङ, ईनराङ मेन्दे बात लाप्ला छक्के खासीनोङ थेमे खेराङला काम्बे पुज्या छेदोङ गने माक्याबाते ख्योकोनला गा लाङच्याक्वा। थेबेकी ख्योकोनला छ्येतकी नाङपाराङ ग्याप्सीनोङ ख्योकोनला छ्याःङ च्योक मालाङच्याक्वा। 21 होथेबेकी खाबाते च्योक्ते कामचेन ङे खिता माथुप्सुङ। थोक खिता माथुपेकी ङाला ङोचा लाङगीदुक। सुइँदेकी ङा दोक्ते मि ईन, ङे दोक खिता थुप्क्यो सिन छ्ये खिदुक सासीन ङाङ छ्याःङ बुद्धि मेताते लेम्बाते मि च्योक खाला होथेबेकी च्योक खाला बात खिता थुप्क्यो। 22 थेबा हिब्रू ईन खिदुक। ङाङ हिब्रूराङ ईन। थेबेकी खोपरोङ इस्राएली ईन खिदुक। ङाङ इस्राएलीराङ ईन। थेबेकी खोपरोङ अब्राहाम सन्तान ईन खिदुक। ङाङ थे सन्तानराङ ईन। 23 थेबेकी खोपरोङ येशू ख्रीष्ट काम खित्कान्तेबा ईन खिदुक। ङाङ येशू ख्रीष्ट काम खित्कान्तेराङ ईन। ईन्दानी दोक्ते बात खित्च्येते लेम्बे बात च्योक्ते ईन सिन ङाला छ्या ओत। ईन्सीनोङ ङा च्यि सिते सासीन थेबेकी भन्दा ङे खापान खापान ल्हाक्पा काम खाबा ओत। ङा पालो थोई जेलदु देते सिन टुङ्गो मेत। मिओनगी ङाला दुबाते बात खाला छ्याःङ साँधी मेत। पालोताङ पालो ङा कालगी खादुकी थाराते ईन। 24 खाल ङि ङिला रेरेकामा घटी खाईन बाजि ङा ङाला यहूदीओन छ्ये छ्ये मिकी कोर्रा लै खाबा ओत। 25 बाजि सुम ङाला रोमीओनगी डन्डीकी दुसुङ। पालोई मिओनगी ङाला सेताप सिन सरे पुङलु खाईन दोई ग्याप्सुङ। बाजि सुम ङा जेबा ओताते पानीजहाज छ्याक्सुङ। थोक ओङजीन ङीमाईताङ ग्वामाईनी ङे समुन्द्रे छ्युई लाकराङ देत्कीन काटे खाबान। 26 थोक खाला फार छुर डुइनराङ देता फाप्जीन ङा पालोताङ पालो भल ग्यासालाङ फाप्सुङ। पालोताङ पालो डाँकाओन लाःक्तुङ फाप्सुङ। पालोताङ पालो ङाराङला नाम सेत्कीताना सिन ङे ङाराङ यहूदीओन थेमे ज्येन ज्येन जातकी मि ज्यीबा खुरगीन ख्याम्बा फाप्सुङ। सारगी नाङला युक्जीन ईन्स्यीत, खाम्बाताङ युल छ्याःङ मेत्साला ख्याम्जीन ईन्स्यीत, समुन्द्रदुकी खाला डोसाला ईन्स्यीत थेमे येशू ख्रीष्टला विश्वास खित्कान्ते ईन सिरकान्तेबा तर थोक मेन्देकी ङाला मेलेबा खिता छोल्कान्ते मिओन नाङला ईन्स्यीत जहाँदुङ जहिलेङ ङाला ज्यीबाकामा ओतान। 27 ङे स्याप स्याप खाईन काम खाबाप। पालोताङ पालो ङे मिक छुम मिक्किता खाईन नुप स्येन्दान, पालोताङ पालो ङा त्वाबा कोम्बा लासीनोङ थोकराङ देतान, पालोताङ पालो ङा सुबाला अन्ने तारानराङ मुलुबा खाईन देतान थेमे खोन्च्या दिङच्या मेतेकी पालोताङ पालो ङा खेबे नाङला ख्वाकीनराङ देतान। 28 दोक्ते बात खिइ सासीन ज्येनोङ काल्बेई ओत। दोक्ते बात भन्दाङ ङीमे ठाङमा ङा सुर्ता खिन देताते बात ठाउँ ठाउँला जम्मा ओङकान्ते येशू ख्रीष्ट मिओनला चुक ओताका, थेबेकी चुक खिन ओताका सिरच्येतेराङ ओतान। 29 च्यि थेबे नाङ मेराज्यीकराङ ईन्सीनोङ मेन्दे बात ङेन्गीन छक्के खासीन ङाला पीर मालाङो? थेबे नाङ दोक्पोईलाकामा ईन्सीनोङ सुइँदेकी पाप खित च्युत्सीन ङाला मेलेबा मालाङोतरो? 30 ङा दोक्ते मि ईन, ङे दोक खिता थुप्क्यो सिन ङे छ्ये खित्च्येते बात छ्याःङ मेत। ङाराङ छ्ये खिता फाप्सीन ङानी ङाराङ चुक छ्याःङ खिता मुथुप्कान्ते ईन्दे सिरच्येते बातकामा खिओ। 31 ङे ढाँर मिक्किओ सिन परमेश्वरला छ्या ओत। थेचेन प्रभु येशू आबा थेमे परमेश्वर ईन। थेते सधैँभरि जय जय ओङस्यीत। 32 ङा दमस्कसदु ओत्जीन अरितस गेल्बो हाकिमगी थेरू ङाला पक्रे खिताला थे सारगी नाङने स्यूक्च्येतेताङ फिनामा थेन्च्येते गोई नाङला गाङेपा गार्ड ज्याक्पा ओतान। 33 थोक खाबा ओत्सीनोङ थेरू ङे बात ङेन्कान्ते मिओनगी डोकोला थाक्पा ताप्कीन ङाला थे नाङ लुगीन च्याकीन सारगी फेरोला चिबा ओताते गारो झ्यालदुकी फिनामा पाप्कीन बिन्सुङ। थोक खाईन ङा थे हाकिम लाःक्तुकी थारा ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.