२ कोरिन्थी 10 - जिरेलपावलगी थे खोरोङ चुक खाला काम खिते सिन साबाते 1 थेमे ज्येन बात कोई कोईकी ङा ख्योकोन दोन्दु ओत्जीनचेन बात खितालाङ ज्यीबा खिन ओतान, थारीला गाल्नामेईचेन ङाराङ ईन सिराच्योक खाला बात खित्च्याक्वा सिन ङे बात खिदुक्लो। था ङा पावल ख्रीष्टकी खाबा च्योकराङ ङाराङ ईन सिराच्योक मिक्किता खाला थेमे स्येदाङ मिक्किता खाला ख्योकोनताङ बात खितामीन। 2 च्यि सासीन थोक सिन बात खित्कान्ते मिओनला था ङा थेपा वाला ङाला खजो स्येदाङ लाङच्या ईन्दाका सिन ङे तेन्दा माफाप्स्यीत। ङ्योकोनोङ ज्येन च्योकराङ दाक्पोन खुशीला ख्याम्कान्ते मि ईन सिन सिरकान्ते थोक्ते मिओनताङ चुक खाला बात खिता फाप्कीते सिन ङाला छ्या ओत। 3 ईन्दाका ङ्योकोनोङ दि सा लुङबादुराङ देता ओत। ईन्सीनोङ ङेराङगी दुक्पा खाला खाला काम खित्जीन दि सा लुङबे मिओनगी खित्च्येते च्योक्ते कामताङ बातचेन ङ्योकोन छ्याःङ मिक्किओ। 4 ङेराङ काम खित्जीन ङ्योकोन नोमुङ दि सा लुङबे मिओनगी च्योक खाला दाक्पोन फाइदा ताला मिक्किओ। ङेराङ काम लेमु ओङस्यीत सिन परमेश्वरगी तेरच्येते शक्तिकी ङ्योकोन दि काम खिओ। थे शक्ति छ्य्वापेकीराङ ङ्योकोन ङेराङ विरोध खित्कानताङ ङेराङ काम ङ्ये ज्युता छोल्कान गाङेला ग्याल्ग्यो। 5 दोक खाला परमेश्वर सु ईन्दे, चुक्ते ईन्दे सिन मिओनला छ्या स्ये ज्युता फाप्च्येते बातताङ मिडिक्च्येते बात खित्कानताङ जे बादोङ छ्या स्येक्यो सिराच्योक खिन छ्ये खित्कान्ते मिओन बात मेन्दे बात ईन सिन ङ्योकोन थेबे विरोध खिओ। खालि मि विचारकामा ईन्दाते परमेश्वर सु ईन्दे, चुक्ते ईन्दे सिन होथोक्ते मिओनगी सिरच्येते थोक्ते बात गाङे ठीक मेन सिन तेन्ला बिन्ला होथोक्ते बात खित्कानला ख्रीष्टकी खि साबाते बात ङेन सिन सिओ। 6 दोक खाईन ख्योकोन गाङेकी ङ्योकोनगी लाःपा कोताते लेमु खाईन ङेन्नामेईचेन ङ्योकोन बात मेङेन्कान्तेबाला चुक खिता फाप्कीते सिन ङ्योकोनला लेमु खाला छ्या ओत। 7 ख्योकोनचेन खालि मि चुकस्यिक दुका थेकामा तेइदुक। थे सेमगी नाङ चुक ओताना सिरच्येते बात छ्याःङ विचार मिक्किदुक। सुइँदेकी ङानी ख्रीष्टकी मि ईन खिदुक सासीन थेकी ङ्योकोनोङ होथोक्ते मिराङ ईन सिन लेमु खाला खोबा फाप्क्यो। 8 प्रभु येशूकी ङाराङला चुक छ्येज्यीक अधिकार बिन्दा ओते सिन ङे ङाराङ बात खासीन ङाला छ्याःङ ङोचा मेत। थेकी ङाला ख्योकोनला ङ्ये ज्युताला मेन, बरू ख्योकोनला लेमु ओङस्यीत सिन लाःप्ला कोत्ला तेरच्येते अधिकार बिन्दा ओत। 9 थेमे ङे चिट्ठीला टिबाते बाततेबा ख्योकोनला ज्यीबा लोङाप सिन टिबाते दुका सिराच्योक मालाङस्यीत। 10 ख्योकोन कोई कोईकी “पावलगी खालि थारीला गाल्नामेईकामा स्येदाङ खिन दोक खिताङ थोक खि सिन कोत्ला चिट्ठी टिइदुक। ङुरूङताङ ङ्योम्बु ओत्जीनचेन थेकी ङेन्गीन देत्की सिराच्योक खाला बादोङ खिता मुथुबो, थे चुकस्यिक ओते सिन ङुरूङला छ्या ओत,” सिन बात खिदुक्लो। 11 थोक्ते मिला था ङा थेपा वाला च्याला ङे खालि चिट्ठीला बातकामा टिक्च्या ईन्दाकाना कामोङ थोकराङ खित्च्या ईन्दाका सिन लेमु खाला तेन्दामीन। 12 थेमे ङ्योकोननी ङ्योकोन दोक्ते ईन, ङ्योकोनगी दोक खाबाप थोक खाबाप सिन सिरकान्ते मिओन छेत मेन। थोक छ्ये मिओनताङ ङ्योकोन चुक खाला दाँजे खिता थुप्कीतेरो। थेबेकीनी ङा दोक खिओ, थोक खिओ सिन साला खोपरोङगी खिओ साबा छेत खाला ङे फलानेकी भन्दा लेमु खाबाप सिन दाक्पोनला ज्येनताङ दाँजे खाला लेम्बे काम खिदुक। 13 थेबेकी थोक खासीनोङ ङेतनी ङेराङगी काम खाबा भन्दा ल्हाक्पा बात मिक्किता खाला खालि परमेश्वरगी ङेराङला च्यि खि सिका थेकामा खिओ। थेकी खि साबा मेताते ज्येन छ्याःङ मिक्किओ। ङ्योकोनगी ख्योकोन नाङ खाबाते कामोङ परमेश्वरगी ङेराङला खि साबातेराङ ईन। 14 दोक खाला परमेश्वरगी ङेराङला खि साबा साबा खिन डोजीन ङ्योकोन ख्योकोन ओत्सासाकोङ लेपा ओत। ङ्योकोनगी दोक खाबाते परमेश्वरगी ङेराङला खि साबा भन्दा ल्हाक्पा खाबाते मेन। ख्रीष्टते गा लाङच्येते बात ख्योकोनला गोमा ङ्योकोनगीराङ लाप्कीन बिन्दाते ईन। 15 लोक्ला ङ्योकोननी ज्येनगी खाबाते कामला ङ्योकोनगीका खाबाते ईन सिराच्योक खाला छ्येङ मिक्किओ। बरू ख्योकोनगी प्रभु येशूला झन लेमु खाला विश्वास खिन गाल्नामेई परमेश्वरगी ङेराङला ख्योकोन नाङ खि साबाते काम झन काल्बा खिता थुप्क्यो सिरच्येते आश ओत। 16 ख्योकोन नाङ खित्च्येते काम सिन्नामेई ङ्योकोन ज्येन ज्येन लुङबे मिलाङ गा लाङच्येते बात लोपा थुप्क्यो। थोक ओङनामेई सुङगीङ ङ्योकोनला थे काम थे खोरोङगी खाबाते ईन सिराला थेनी गोमाका ज्येनगी गाल्गीन काम खासादुका काम खित गाल्सुङ सिन सिरा मुथुबो। 17 परमेश्वर बातला चुक साबा ओते सासीन “सुइँदा मि छ्ये खिदुक सासीन थेकी प्रभु परमेश्वरगी थे खोरोङ लाईदु चुक छ्ये छ्ये काम खासुङा सिरच्येते बातलाकामा छ्ये खित्स्यीत,” सिन साबा ओत। 18 बातचेन दिराङ ईन, मिकी ङा दोक्ते ईन, ङे दोक खाबाप थोक खाबाप साला छ्याःङ फाइदा मेत। प्रभु परमेश्वरगी दि मि लेमु मि ईन सिन सासीन थे बात खुदुकराङ ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.