२ कोरिन्थी 1 - जिरेल1 दि चिट्ठी टिक्कान्ते ङा पावल थेमे ङुरूङ न्वा तिमोथी ईन। ङा येशू ख्रीष्टकी खटे खाबाते मि ईन। ङा थोक्ते मि ईन सिन परमेश्वरगी ङाला छाने खाबा ओत। ङ्योकोन दि चिट्ठी कोरिन्थ सारदु जम्मा ओङकान्ते परमेश्वर मिओन थेमे अखैये लुङबा खाङ ओताते परमेश्वर सन्तान ख्योकोन गाङेला टिगीन ओत। 2 ङुरूङ आबा परमेश्वरताङ प्रभु येशू ख्रीष्टकी ख्योकोनला दया खाला लेमु खिनराङ देत्स्यीत। परमेश्वर ङुरूङला आँट तेरकान्ते ईन 3 ङुरूङ प्रभु येशू ख्रीष्ट आबा परमेश्वरते जय जय खिइ। मिओनला ङिङज्ये खित्कान्ते थेमे दुक्पे बेलाला आँट तेरकान्ते थेराङ ईन। 4 ङेराङला दुक्पा ओङजीन थेमे ज्येनगी दुक्पा तेरजीन जहिलेङ थेकी ङ्योकोनला आँट तेरगीदुक। थेकी दोक खाबेकी ज्येनला जस्तो दुक्पा ओङा ओत्सीनोङ परमेश्वरगी ङेराङला खाबाच्योक खाला पीर माकेत, सेम मासेत सिन ङ्योकोनगी थेबाला आँट तेरा थुप्कीदुक। 5 ख्रीष्टकी आउदी दुक्पा भोगे खाबा ओतान। थेकी च्योकराङ खाला ङ्योकोनोङ दुक्पा भोगे खिन ओत। दुक्पा भोगे खित्च्येतेकामा मेन, ख्रीष्टकी छ्य्वापेकी परमेश्वरगी ङ्योकोनला झन झन आँट तेरगीदुक। 6 ङ्योकोनगी दुक्पा ङेत्सीन थे ख्योकोनगी आँट ङेत्ला ख्योकोनला लेमु ओङाला ईन। परमेश्वरगी ङ्योकोनला आँट तेरच्येते ख्योकोनलाङ आँट तेरग्यो सिराला ईन। थेकी आँट बिन्नामेई ङ्योकोनला च्योकराङ दुक्पा ओङजीन ख्योकोनगीङ सेम मेसेता खाला थोक्ते दुक्पा खपे खिता थुप्क्यो। 7 ङ्योकोनला दि बात लेमु खाला छ्या ओत। च्यि सासीन ख्योकोनगीङ ङ्योकोनगी च्योकराङ दुक्पा खपे खिन ओत। दुक्पा खपे खित्च्येतेकामा मेन, परमेश्वरगी ङ्योकोनला खाबा च्योकराङ खाला ख्योकोनलाङ आँट तेरग्यो। 8 आज्यो न्वावे, थाचेन ङा ख्योकोनला एशिये अञ्चलदु ओत्जीन ङ्योकोनगी चुकस्यिक दुक्पा भोगे खिता फापा ओताने सिन सिरामीन। थेरू ङ्योकोनगी नोमुङ टोक ज्येता मुथुप्च्याज्यीक खपेराङ खिता मुथुप्च्याई दुक्पा भोगे खिता फापा ओतान। था सोन्दा थुबोङ सिरच्येतेनी ङ्योकोनते सेमगी छेउलाङ मेतान। 9 ङ्योकोनलानी था सोन्च्येते सिराते दोस्यिकराङ दुका सिराच्योक लाकीन सिन्दा ओतान। सुङगीङ दाक्पोनगीराङ दाक्पोन लाईदु छ्याःङ खिता मुथुबो, खालि स्याप्ते मिओनला सोम्बो लोक्कान्ते परमेश्वरगीकामा जस्तोङ खिता थुप्क्यो सिन ङ्योकोनगी छ्या स्येस्यीत सिनराङ थोक दुक्पा ओङाते दुका। 10 थेजीन थेकी ङ्योकोनला थोक छ्येज्यीक दुक्पाताङ कालगी खादुकी समेत जोए खाबेकी थोक ओङजीन था जहिलेङ थेकी ङ्योकोनला दोकराङ खिओ सिन ङ्योकोनगी थेला भर परे खाबा ओत। दि बातला ङ्योकोनला छ्याःङ शंका मेत। 11 ख्योकोनगी ङ्योकोन लाईदु प्रार्थना खिनराङ देत। थोक खासीन मि काल्बेईकी खाबाते प्रार्थना ङेन्गीन परमेश्वरगी ङ्योकोनला थोक खाईन जोए खाबाते बात छ्या स्येला झन मि काल्बेईकी परमेश्वरला धन्यवाद तेरग्यो। पावलगी थे खोरोङ कोरिन्थपा च्यिला माबे सिन साबाते 12 थेमे दि बात ङ्योकोन छ्याःङ ज्यीबा मिक्किता खाला सिरा थुप्क्यो। च्यि सासीन ज्येनगी दोन्दु ईन्स्यीत, ख्योकोन दोन्दु ईन्स्यीत जे खासीनोङ जहिलेङ ङ्योकोनगी सेमला पाप सिराते छ्याःङ मोज्योबा खाईन परमेश्वरगी खि साबा च्योकराङ खाईन लेमुते कामताङ साँचोते बातकामा खाबा ओत। ङेराङ स्येतताङ बुद्धिकी खित्सादु ङ्योकोनगी थोक खिता थुपाते मेन। परमेश्वर दयेकी खित्सादुराङ थोक खिता थुपाते ईन। 13-14 थोगीराङ ङ्योकोन ख्योकोनगी पढे खिताईताङ खोबा थुप्च्येते बातकामा टिइओ, ख्योकोनगी खोबा मुथुप्च्येते अर्थ ङि लै खित्च्येते बात मिटिगो। ङ्योकोन चुक्ते मि ईन्दे सिन ख्योकोनगी थोरूमसाक लेमु खाईन छ्या स्येबा मेत्सीनोङ ङीमाई ख्योकोनगी ङ्योकोनला दिबा दोक्तेराङ दुका सिन लेमु खाला छ्या स्येक्यो सिरच्येते आश ओत। ङ्योकोनला दिबा दोक्तेराङ दुका सिन छ्या स्येनामेई प्रभु येशू ग्युरला ओङे छोमुचेन ङ्योकोनगी ख्योकोनला प्रभु येशू बात लाप्कीन बिन्दाते चुक लेमु ओङसुङा सिन ख्योकोन गा खिता ङेत्क्यो। ङ्योकोनगीराङ ख्योकोनला थे बात लाप्कीन बिन्दाते ईन्देकी थे छोमु ङ्योकोनोङ आउदी गा खिता ङेत्क्यो। 15 ङाराङला होदि बात लेमु खाला छ्या ओतेकी ङा गोमा ख्योकोन ओत्सादु ओङाला ठीक खाबा ओतान। थोक खाला पालो ङि ठेता ङेत्जीन परमेश्वरगी ख्योकोनला झन आशी तेरच्या ओतान। 16 ङेचेन म्यासिडोनियापा डोजीनोङ थेपेकी ग्युरजीनोङ ख्योकोनला ठेता खिता फाबोङ। थेमे म्यासिडोनियापेकी ग्युरगीन ख्योकोन ओत्सादु वानामेई ख्योकोनगी ङाला यहूदियापा ड्वाप्ला गोच्येते खर्च तेरा थुप्क्यो सिन विचार खाबा ओतान। 17 ङाराङगी साबाच्योक खाईन ङा ख्योकोन ओत्सापा ओङा माथुप्सुङ। थोक ईन्देकी च्यि ख्योकोन ङेङ जमान मेताते मिकी च्योक ड्वा ङेत्सीन ड्वा फाबोङ मेन सासीन मोन्डोबा फाबोङ सिन साबाते ईन, थेला देपा ओङा सेम मालाबेकी मेङगो सिन साबासीन सिन सिओ? 18 थे खोरोङगी खिओ साबाच्योक पक्काराङ खित्कान्ते परमेश्वर दोन्दु ङा दि बात सिओ। च्यि सासीन बातज्यीकलाराङ ङा नोमुङ बाजिई ओङगो थेमे बाजिई मेङगो सिन मिसिरो। ङा ईन्दाते बातकामा खिओ। 19 च्यिला सासीन सिल्वानस, तिमोथी थेमे ङे ख्योकोनला छ्या स्येबा खाईन बिन्दाते परमेश्वर फुज्युङ येशू ख्रीष्टचेन साँचोतेङ मेन्दातेङ परी ङि बात खित्कान्ते मेन। थे खालि साँचोते बातकामा खित्कान्ते ईन। 20 ख्रीष्टकी खाबाते कामगी खित्सादुराङ परमेश्वरगी मिओनताङ खाबाते जमान जति गाङे पूरो खिओ। थोगीराङ परमेश्वरला प्रार्थना खित्जीनोङ ङुरूङ ख्रीष्टकी मिनगी छ्य्वापेई आमेन सिन सिओ। दोक सिरच्येतेचेन परमेश्वरला मान खाबाते ईन। 21 परमेश्वरगीराङ ङुरूङ गाङेला जस्तो ओङसीनोङ ख्रीष्टला विश्वास खिन देत ज्युत्क्यो, थेकी ङुरूङला थे खोरोङ मि ईन सिन छाने खाबा ओत, 22 ङुरूङ थोक्ते मि ईन सिन थेकी ङुरूङला थे खोरोङ छाप ग्यापा ओत थेमे थे खोरोङगी तेरग्यो साबाते गाङे तेरग्यो सिन पक्का खिताला थेकी ङुरूङला परमेश्वर आत्मा बिन्दा ओत। 23 दि बात ङा परमेश्वर साक्षी ज्याक्ला खिन ओत। ङा नोमुङ मेन्दे बात मिक्किओ। ङा कोरिन्थपा माबातेचेन याङराङ ङे ख्योकोनला थापा ङारा माफाप्स्यीत सिनकामा ईन। 24 ङा ख्योकोनला ङे साबा च्योकराङ खाला येशूला विश्वास खिता फाप्क्यो सिन कर लै मिक्किओ। ख्योकोनगी थेला खित्च्येते विश्वासका ठीकराङ दुक। ङानी खालि ख्योकोनला लेमु ओङला ख्योकोनगी गा खिन देता ङेत्स्यीत सिरच्येते कामताङ बातकामा खिओ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.